بڑھتی ہوئی گرمی سے خواتین باورچی پریشان

جب کروز کشتی سجنے کھالی ٹائیگر ریزرو، پیر کھالی اور ڈوبنکی ٹائیگر ریزرو سے ہو کر گزرتی ہے، تب بھانومتی کے پاس ارد گرد کے نظارے دیکھنے کا وقت بھی نہیں ہوتا ہے۔ دور دور تک پانی، واچ ٹاور اور درختوں پر چہچہاتے پرندے، سب کچھ ان کی آنکھوں کے سامنے دھندلا ہو جاتا ہے۔ کروز کشتی پر باورچی کے طور پر کام کرنے والی بھانومتی اور ان کے جیسے دیگر باورچی اور ان کے معاون ہمیشہ اپنے کاموں میں مصروف رہتے ہیں۔ آلو، دال اور انڈے ابالنے ہوتے ہیں، لہسن اور ادرک کاٹنے ہوتے ہیں، اور طرح طرح کے مسالوں کو کوٹ کر پیسٹ بنانا ہوتا ہے۔ یہ سب کئی قسم کے کھانے کی تیاریوں کے لیے کرنا ہوتا ہے۔

دن کے چڑھنے کے ساتھ ساتھ گرمی بڑھتی جاتی ہے اور کشتی کے باورچی خانہ میں کام کرنے والی خواتین کو تھوڑی تھوڑی دیر میں آرام کرتے ہوئے خود کو ٹھنڈا رکھنے کی کوشش کرنی پڑتی ہے۔ ’’تارا تاری ہاتھ چالا [جلدی جلدی کام کرو]،‘‘ وہ ایک دوسرے سے کہتی ہیں۔ ’’جیسے ہی موٹر چالو ہوگا، ہم بھی ابلنے لگیں گے،‘‘ لپیکا منڈل ہنستے ہوئے کہتی ہیں۔ وہ بھی ایک باورچی ہیں اور کبھی کبھی ہیلپر کا کام بھی کرتی ہیں۔ وہ موٹر کی گرمی کی بات کر رہی ہیں، جس سے کشتی کا باورچی خانہ، جو موٹر کے پاس ہی ہوتا ہے، مزید گرم ہو جاتا ہے۔ عورتیں بتاتی ہیں کہ گرمی بہت تیز ہوتی ہے اور اس سے راحت پانے کے لیے انہیں فرصت کے پانچ منٹ بھی نہیں ملتے ہیں۔

یہ کروز کشتیاں پاکھیرالیہ گاؤں سے روانہ ہوتی ہیں، جو کولکاتا سے تقریباً ۱۱۰ کلومیٹر دور سندربن کے گوسابا جزیرہ پر واقع ہے۔ یہ ایک مشہور سیاحتی مقام ہے اور سندربن کے کثیف جنگلاتی علاقہ، جہاں بنگال ٹائیگر (پینتھیرا ٹگریس) دیکھے جا سکتے ہیں، تک پہنچنے کا داخلی دروازہ بھی ہے۔

ٹور آپریٹر عام طور پر ایک کشتی پر تقریباً ۴۰ سیاحوں کو لے جاتے ہیں۔ ہر چھ گھنٹے کے کروز کا کرایہ فی مسافر تقریباً ۲۰۰۰ سے ۵۰۰۰ روپے کے درمیان ہوتا ہے۔ دو دنوں تک چلنے والا لمبا کروز اس سے زیادہ مہنگا ہوتا ہے۔ کشتی میں عام طور پر دو ڈیک ہوتے ہیں اور نچلے حصہ میں بستر اور تکیے ہوتے ہیں، جہاں سیاح دن کی گرمی میں آرام کر سکتے ہیں۔

کروز سالوں بھر چلتے ہیں، لیکن مصروف ترین سیزن تب ہوتا ہے، جب بازار میں ایلیش یا ہلسا (ٹینیو آلوسا ایلیشا) مچھلی آتی ہے – جون سے اگست اور نومبر سے جنوری تک۔ چونکہ سیاحوں کا سیزن سال کے تقریباً نصف حصہ تک چلتا ہے، اس لیے لوگ اس کام پر آمدنی کے لیے بہت زیادہ منحصر ہیں۔

گزشتہ چھ برسوں سے بھانومتی منڈل ان کشتیوں پر باورچی کے طور پر کام کر رہی ہیں۔ ان کا دن صبح پانچ بجے شروع ہوتا ہے، تاکہ وہ گھر کے کام کاج نمٹا سکیں اور بچوں کے لیے کھانا بنا سکیں۔ پھر صبح ساڑھے چھ بجے کے آس پاس وہ کشتی پر روانہ ہو جاتی ہیں۔

کشتی پر پہنچتے ہی ۳۸ سالہ بھانومتی ۱۰ کلو میدا گوندھنے لگتی ہیں، تاکہ لوچیاں بنائی جا سکیں، جو مغربی بنگال میں ناشتہ میں کھائی جانے والی تلی ہوئی گول روٹیاں ہوتی ہیں۔ اس کے بعد تقریباً اگلے ۱۲ گھنٹے تک وہ اور ان کی سبھی سہیلیاں پسینے سے لت پت اپنے کام میں بری طرح سے مصروف رہتی ہیں۔ ’’میں ایک ساتھ تین تین چولہوں پر کام کرتی ہوں،‘‘ خواتین باورچیوں کے ذریعہ کھانا بناتے وقت برداشت کی جانے والی بے حساب گرمی کی طرف اشارہ کرتے ہوئے بھانومتی بتاتی ہیں۔

کھانا پکانے کے بعد انہیں بھاری برتنوں کو دھونا پڑتا ہے اور چاول کے پانی کو ایک بڑے جال میں نکالنا پڑتا ہے۔ پھر وہ بھاری برتنوں میں کھانا سجاتی ہیں اور ٹور آپریٹر کے ساتھ کام کرنے والے لڑکوں کو بلا کر اوپر کی ڈیک پر کھانا پہنچانے اور بوفے لگانے کو کہتی ہیں۔

یہ دن کا اکلوتا وقت ہے جب ان عورتوں کو تھوڑی دیر آرام کرنے کا موقع ملتا ہے۔ جب مہمان کھانا کھا لیتے ہیں تو بچا ہوا کھانا نیچے لایا جاتا ہے اور تبھی یہ عورتیں بھی اپنا کھانا کھاتی ہیں۔ عام طور پر رات کو تقریباً ۹ بجے تک وہ اپنا کام سمیٹ کر موبائل فون کی روشنی میں کچے راستوں پر چل کر اپنے گھر لوٹتی ہیں۔ بارش کے موسم میں ان راستوں پر چلنا بہت مشکل ہوتا ہے۔

سندربن کے گرم اور حبس بھرے ماحول میں لمبے عرصے تک کام کرنے کی وجہ سے ان عورتوں میں صحت سے متعلق مسائل بہت عام ہیں۔ ’’اس سال گرمی برداشت سے باہر پڑ رہی ہے،‘‘ پاکھیرالیہ کی رہنے والی لپیکا کہتی ہیں۔ پچھلے سال مئی (۲۰۲۴) میں درجہ حرارت اچھل کر ۴۰ ڈگری سیلسیس کے پار پہنچ گیا تھا۔ ’’میں گرمی سے بہت تھک چکی ہوں،‘‘ لپیکا کہتی ہیں۔

اب چالیس پار کر چکیں لپیکا نے تقریباً دس سال پہلے کشتیوں پر کام کرنا شروع کیا تھا۔ تب ان کی یومیہ اجرت ۱۰۰ روپے تھی۔ ’’اگر مجھے پورا کام مل جائے تو میں اپنی فیملی کی کفالت کر سکتی ہوں…گھر کے لیے راشن خرید سکتی ہوں۔ لیکن میں بری صحت کا بھی سامنا کر رہی ہوں،‘‘ وہ پاری کو بتاتی ہیں۔ ’’میں اپنے علاج کے لیے کولکاتا گئی تھی، لیکن اتنی دور آنا جانا میرے لیے ممکن نہیں ہے،‘‘ وہ کہتی ہیں۔

’’اگر کوئی لمبے وقت تک لگاتار اتنی گرمی میں کام کرے جیسے ہم کرتے ہیں، تو اس کا بلڈ پریشر بڑھ جاتا ہے،‘‘ بھانومتی بتاتی ہیں۔ ’’ایسے کئی موقعے آئے ہیں جب ہمارا بلڈ پریشر بڑھ گیا ہے، خاص کر جب میں نے لگاتار کئی ہفتوں تک بغیر کسی چھٹی کے کام کیا ہو۔‘‘

گرمیوں میں کام کے دوران ہونے والی تیز گرمی کی تھکان، کھانے کے درمیان کے لمبے وقفہ اور کشتی کی لگاتار ہچکولے کھاتی رفتار سے حالت مزید خراب ہو جاتی ہے۔ خاص کر پنچ مکھی نام کی جگہ پر، جہاں پانچ ندیاں آپس میں ملتی ہیں۔ اسے قابل دید مانا جاتا ہے، لیکن باورچیوں کے لیے یہ جگہ مدوجزر کے سبب خطرناک ہوتی ہے، کیوں کہ یہاں کشتیاں تھپیڑوں کی وجہ سے بہت زیادہ ہلتی ڈلتی ہیں۔ ’’ہر بار جب میں اس جگہ سے گزرتی ہوں، تو مجھے الُٹی جیسا محسوس ہوتا ہے۔ اتنے سالوں کے بعد بھی، مدوجزر کے وقت مجھے بہت ڈر لگتا ہے۔ میں اپنی آنکھیں زور سے بند کر لیتی ہوں جب تک کشتی آگے نہیں نکل جاتی،‘‘ بھانومتی کہتی ہیں۔

جیسے ہی سیاح اپنی سکون والی دوپہر کے کھانے کا وقت ختم کرتے ہیں، کچھ لوگ ایک بار پھر سے شوندیش (بنگالی مٹھائی) کی فرمائش کرتے ہیں۔ کچھ لوگ مقامی گائیڈ کے پاس جمع ہو کر جنگل کی حفاظت کرنے والی دیوی یعنی بون بی بی کے بارے میں جاننے کی خواہش ظاہر کرتے ہیں۔ نوجوان عمر کے سیاح ڈیک پر کھڑے ہو کر اپنے فون پر گانا سننا شروع کر دیتے ہیں، تو کچھ اکیلے لوگ الگ بیٹھ کر سندربن کے جنگلوں کے نظاروں کا لطف اٹھانے میں مصروف ہو جاتے ہیں۔ اچانک آئے تیز مدوجزر اور پانی کے تھپیڑوں کے سبب اڑتے چھینٹوں سے مجمع میں جوش سے بھری ہوئی کچھ چیخیں نکل جاتی ہیں۔

ماہر بشریات انّو جلَیس، سندربن میں سیاحوں کے لیے ریاستی حکومت کے ذریعہ بڑے پیمانے پر کی جا رہی سرمایہ کاری اور اسی علاقہ کے کارکنوں کی اندیکھی کے درمیان کے گہرے فرق کو اجاگر کرتی ہیں۔ ’’یہاں اسپتالوں، دواخانوں، اسکولوں اور کالجوں کی زبردست کمی ہے۔ کشتیوں پر کام کرنے والے باورچیوں، مالیوں اور دوسرے کارکنوں کو بہت کم تنخواہ ملتی ہے،‘‘ کریئا (کے آر ای اے) یونیورسٹی میں ایسوسی ایٹ پروفیسر کے عہدہ پر فائز جلَیس کہتی ہیں۔ انہوں نے سندربن پر ہندوستان اور بنگلہ دیش میں ۲۵ سال سے زیادہ عرصے تک ایک وسیع تحقیق کی ہے، اور فاریسٹ آف ٹائیگرز: پیپل، پالیٹکس اینڈ انوائرمنٹ اِن سندربن نام کی کتاب لکھی ہے۔

ریاستی حکومت کی ویب سائٹ بھی یہ مانتی ہے کہ یہ ایک ’’پس ماندہ علاقہ ہے جہاں بنیادی طور پر درج فہرست ذات اور درج فہرست قبائل کی آبادی رہتی ہے۔ یہ علاقہ بیحد مشکل گزار اور کٹھن ہے، یہاں ذرائع ابلاغ محدود ہیں اور زندگی انتہائی مشکل ہے۔‘‘ اور اسی ترقی کے نام پر یہاں ایکو-ٹورزم کو فروغ دیا جا رہا ہے۔

ماہر اقتصادیات جیئتی گھوش ریاست کی اس پالیسی سے اتفاق نہیں رکھتیں۔ وہ کہتی ہیں، ’’جسے ایکو-ٹورزم کہا جا رہا ہے، وہ دراصل بہت کم تنخواہ پر مبنی محنت کا استحصال ہے۔ خاص کر عورتوں کی صحت پر اس کا برا اثر پڑ رہا ہے۔‘‘ گھوش نے خواتین اور محنت پر بہت کچھ لکھا ہے۔ ’’پالیسی ساز عورتوں کے کام کے حالات اور ان کی نوعیت کو نظر انداز کر دیتے ہیں،‘‘ انہوں نے اس رپورٹر سے ایک ملاقات کے دوران کہا تھا۔

گھوش کی بات بالکل صحیح ہے۔ کشتیوں پر کھانا پکانے والی یہ عورتیں تنخواہ اور کام کے حالات کے نقطہ نظر سے سب سے نچلے پائیدان پر ہیں۔ زیادہ تر کشتیوں پر باورچی خواتین ہی ہوتی ہیں اور مان لیں کبھی مرد اس کام کو کرتے بھی ہیں، تو انہیں خواتین کی بنسبت کچھ سو روپے زیادہ تنخواہ دی جاتی ہے۔ اس کام کے لیے سب سے سستی محنت رکھی جاتی ہے۔ ’’ہم عام طور پر مقامی لوگوں کو ہی کام پر رکھتے ہیں۔ باورچی کو تقریباً ۶۰۰-۷۰۰ روپے اور ہیلپر کو تقریباً ۴۰۰ روپے ملتے ہیں۔ یہ لوگ ناشتہ، دوپہر اور رات کا کھانا بنانے کے لیے ذمہ دار ہوتے ہیں،‘‘ پاکھیرالیہ میں واقع ایک ٹور مینیجر اروپ سرکار بتاتے ہیں۔

صحت سے متعلق مسائل اور کام کے خراب حالات کے باوجود بھانومتی کو سمجھ نہیں آتا کہ انہیں مستقل آمدنی کے لیے اور کیا کرنا چاہیے۔ اکیس سال کی شادی شدہ زندگی میں انہوں نے کئی قسم کے کام کرنے کی کوشش کی ہے – جیسے ڈھائی بیگھہ (ایک ایکڑ سے بھی کم) خاندانی زمین پر دھان، مرچ اور آلو کی کھیتی کرنے، اور کیکڑا اور مچھلی پکڑنے کا کام۔

بھانومتی بتاتی ہیں کہ سندربن میں حالات بہت تیزی سے بدلتے رہے ہیں۔ ’’لگاتار آنے والے سمندری طوفانوں نے ہماری برادری کی زندگی کو تہ و بالا کر دیا ہے۔ پہلے ہم مرچ، مسور اور دھان کی کھیتی پر منحصر تھے، لیکن اب کھارے پانی کے کھیتوں میں گھُس جانے سے کھیتی کرنا تقریباً ناممکن ہو گیا ہے۔ ہم کچھ بھی نہیں کر سکتے،‘‘ بھانومتی کہتی ہیں۔ ہر سال طوفان ان کے گھروں کو برباد کر دیتا ہے۔ ’’ہم ایک عام زندگی کیسے بسر کر سکتے ہیں؟ ہمیں ہر سال سمندری طوفان کے بعد اپنے گھر کو دوبارہ بنانا پڑتا ہے۔‘‘

ان نازک حالات میں سندربن کے علاقہ میں شدید موسم کے واقعات کی تعداد میں تیزی سے اضافہ ہو رہا ہے۔ ’’گزشتہ ۱۶ برسوں میں ہم نے خلیج بنگال میں ۱۶ سمندری طوفان درج کیے ہیں، جن میں کم از کم پانچ بیحد تباہ کن تھے،‘‘ مغربی بنگال آلودگی کنٹرول بورڈ کے صدر کلیان رودر کہتے ہیں۔ ’’خلیج بنگال میں سمندر کی سطح کا درجہ حرارت عالمی اوسط سے تقریباً دوگنی رفتار سے بڑھ رہا ہے، جس سے ساحلی کٹاؤ اور زمین کے اندر سمندر کی دراندازی بڑھتی جا رہی ہے۔ اس کی وجہ سے آبادی کی نقل مکانی بھی ہو رہی ہے،‘‘ رودر مزید بتاتے ہیں۔

گھر میں کام کے مواقع نہ ہونے کے سبب بھانومتی کے شوہر چانکیہ منڈل ہر سال دو بار آندھرا پردیش جاتے ہیں اور دھان کے کھیتوں میں دہاڑی مزدور کے طور پر کام کرتے ہیں۔ ان کا بڑا بیٹا مانس ہیلتھ سپلیمنٹ پروڈکٹس کو گھوم گھوم کر بیچنے کا کام کرتا ہے۔ فیملی کے اخراجات میں ہاتھ بٹانے کے لیے، ۲۰ سالہ مانس پہلے کولکاتا میں دہاڑی مزدوری بھی کر چکا ہے اور سندربن کے ایک لاج کا مینیجر بھی رہا ہے، جہاں اسے سب کچھ سنبھالنا پڑتا تھا۔

اپنی تعلیم کو جاری رکھنے کی خواہش سے اس نے حال ہی میں قریب کے پتھ کھالی میں ایک کالج میں داخلہ لیا ہے، جب کہ وہ اپنا سیلز مین کا کام بھی جاری رکھے ہوا ہے۔ بھانومتی کہتی ہیں، ’’وہ ہمیشہ پڑھائی کرنا چاہتا تھا۔ میں یہ نہیں برداشت کر سکتی تھی کہ وہ دہاڑی مزدوری کا کام کرے۔‘‘ ان کا چھوٹا بیٹا ہیروک اسکول میں پڑھ رہا ہے۔ جب بھانومتی اور ان کے شوہر کام پر باہر ہوتے ہیں، تو ہیروک کو اکثر اکیلے رہنا پڑتا ہے۔ اس کی ماں فکرمند ہو کر کہتی ہیں، ’’میں اس کے لیے بہت پریشان رہتی ہوں۔‘‘

بھانومتی کولکاتا کے ایک پرائیویٹ میڈیکل کالج میں شعبہ امراض خواتین کے او پی ڈی کے سامنے قطار میں کھڑی ہیں۔ ایک مہینہ سے کچھ زیادہ عرصے میں وہ یہاں تیسری بار آئی ہیں۔ ’’اب جب کہ میرے پاس الٹرا سونوگرافی (یو ایس جی) رپورٹ ہے، تو امید ہے کہ اب میرا علاج اچھی طرح ہو پائے گا،‘‘ پاکھیرالیہ کی یہ ۳۸ سالہ رہائشی کہتی ہیں۔

یو ایس جی کی رپورٹ سے یہ پتہ چلتا ہے کہ بھانومتی ایڈیونائیوسس میں مبتلا ہیں۔ اس حالت میں بچہ دانی کی پرت اس کے پٹھوں میں بڑھنے لگتی ہے، جس کی وجہ سے مریض کو بہت زیادہ اور طویل عرصہ تک خون کا رساؤ ہو سکتا ہے۔ بھانومتی نے اکتوبر ۲۰۲۳ میں پہلی بار اپنا علاج شروع کیا تھا، جب انہیں سٹز (گانٹھوں) کا پتہ چلا تھا۔ لیکن پچھلے سال ان کے خون کا بہاؤ لگاتار ۶۰ دنوں تک بند نہیں ہوا تھا۔ ’’مجھے آرام کی ضرورت تھی، لیکن میں ایسا نہیں کر سکتی تھی۔‘‘

اگر سیاحتی سیزن کے دوران انہیں مشکل سے کبھی کوئی چھٹی مل جاتی ہے، تبھی وہ اسپتال جا پاتی ہیں۔ جنوری ۲۰۲۵ میں اسپتال جانے کے ٹھیک ایک دن پہلے بھی انہوں نے ۱۰ گھنٹے لگاتار کام کیا تھا اور ایک ہیلپر کی مدد سے ۱۵ قسم کے کھانے پکائے تھے۔ اس رات جب وہ گھر لوٹیں تو ان کے شوہر نے پہلے ہی چار رکنی فیملی کے لیے کھانا پکا رکھا تھا۔ ’’یہ راحت کی بات تھی کہ کھانا تیار تھا،‘‘ بھانومتی مسکراتے ہوئے کہتی ہیں۔

تھوڑے وقت میں وہ کولکاتا کے ایک پرائیویٹ میڈیکل کالج کے شعبہ امراض خواتین میں تین بار جا چکی ہیں۔ ایک بار تو ان کی حالت اتنی خراب تھی کہ فکرمند ڈاکٹر نے انہیں اسپتال میں ہی رکنے کی صلاح دی تھی، کیوں کہ ان کے جسم میں آئرن کی مقدار بہت کم تھی۔ انہوں نے اس رپورٹر کو بتایا، ’’شہر میں میرا خیال کون رکھے گا؟ میں شہروں کے بارے میں اتنا کچھ نہیں جانتی ہوں کہ یہاں رات گزار سکوں۔‘‘ آخرکار، ان کے ہیموگلوبن ٹیسٹ کے نتیجے آنے کے بعد ڈاکٹر نے انہیں گھر لوٹنے کی اجازت اس شرط کے ساتھ دے دی کہ اگلے کچھ دنوں تک وہ پاکھیرالیہ میں کشتی پر کام کرنے نہیں جائیں گی۔

’’صحت عامہ کی پالیسیوں میں محنت اور صحت کے درمیان کے باہمی رشتوں کو کوئی اہمیت نہیں دی جاتی ہے،‘‘ گھوش بتاتی ہیں۔ ’’صرف صحت نوجواں، حمل اور زچگی کے پیمانوں پر توجہ دی جاتی ہے۔‘‘

بہت سے لوگ کام کی تلاش میں گاؤں چھوڑ کر باہر جا چکے ہیں، لیکن بھانومتی نے وہیں رکنے کا فیصلہ کیا ہے۔ ’’میں نے ہمیشہ یہاں پیسہ کمانے کے طریقے کھوج لیے۔‘‘ ان کا خواب ہے کہ وہ گاؤں میں اپنا ایک پختہ مکان بنائیں۔ انہیں پردھان منتری آواس یوجنا کے تحت ایک لاکھ ۲۰ ہزار روپے ملے ہیں، لیکن دو کمروں والا گھر بنانے کے لیے تقریباً ۶ لاکھ روپے کی ضرورت ہے۔

اس کے لیے وہ کہتی ہیں، ’’مجھے کشتیوں پر کام کرتے رہنا ہوگا۔‘‘

یہ رپورٹ پولتزر کرائسس سنٹر سے ملے گرانٹ کے تعاون سے تیار کی گئی ہے۔

ترجمہ نگار: قمر صدیقی