شانتی پور میں ڈرامے بُنتا ایک بنکر

ایک پرانے ڈرامے کا مسودہ ہاتھ میں لیے اسیت پرمانک کہتے ہیں، ’’میں نے اِچّھے کُسم ڈرامہ میں ایک بنکر کا کردار ادا کیا تھا…بالکل وہی جو میں حقیقی زندگی میں ہوں۔‘‘ اپنے گھر میں لوہے کی رنگ برنگی الماریوں کو کھنگالتے ہوئے، وہ احتیاط سے رکھے بہت سے ڈراموں کے مسودوں کی کاپیاں نکالتے ہیں۔

اسیت دا نادیہ ضلع کے شانتی پور ہینڈلوم کلسٹرز کے بے شمار بنکروں میں سے ایک ہیں۔ شانتی پور اپنی منفرد ٹنگائل اور جامدانی ہینڈلوم کی ساڑیوں کے لیے مشہور ہے۔ اس ماہر بنکر کی لوم پر مشقت تھیٹر سے ان کی محبت کے متوازی چلتی ہے۔ چھ دہائیوں پر مشتمل ان کی زندگی کا تانا بانا تانت گھر (کرگھے والا کمرہ) اور رنگ منچ (اسٹیج) کے درمیان بُنا جاتا ہے۔

اپنی پہلی بڑی اسٹیج پیشکش کے بارے میں بات کرتے ہوئے اسیت دا کی باچھیں کھل اٹھتی ہیں۔ ’’یہ ڈرامہ سیالدہ اسٹیشن کے آس پاس کہیں اسٹیج کیا گیا تھا۔ حالانکہ میں ایک جج کا کردار ادا کر رہا تھا، لیکن سچ تو یہ ہے کہ میں خوف سے کانپ رہا تھا،‘‘ ایک بڑے ڈرامہ کلب کے لیے پبلک اسٹیج پر پہلی بار ناظرین سے روبرو ہونے کا اپنا تجربہ بیان کرتے ہوئے وہ کھل کر ہنستے ہیں۔

اسی جوش و خروش کے ساتھ اسیت دا بُنائی کی دنیا میں قدم رکھنے کا اپنا تجربہ بھی بیان کرتے ہیں: ’’میں نے پانچویں جماعت تک تعلیم حاصل کی ہے۔ کسی بنکر گھرانے میں چھوٹے بچوں سے لے کر گھر کے مردوں اور عورتوں تک، ہر شخص لوم سے متعلق مختلف کاموں میں شامل ہوتا ہے۔‘‘ سوت کاتنا، رنگنا، چرخے کا استعمال کرتے ہوئے دھاگے کو ٹیوب میں لپیٹنا، پھر اس ٹیوب سے ڈرم کی شکل میں رول کرنا اور پھر آخر میں اسے کرگھے پر لگانا جیسے کام گھر کے مختلف عمر کے افراد کرتے ہیں۔ ’’اور کسی دوسرے تانتی [بُنکر] گھرانے کی طرح، ہمارے گھر میں بھی، ہمیں چھوٹی عمر سے ہی اس کام میں شامل ہونا پڑا،‘‘ وہ مزید کہتے ہیں۔

جوانی کے دنوں میں وہ ایک شوقیہ اداکار تھے۔ اداکاری کے میدان میں ان کے داخلہ کا محرک ’لانگ روٹ‘ گروپ بنا جو ان کے گھر کے قریب شانتی پور کے ساہا پاڑہ علاقے میں واقع تھا۔ یہیں پر ان کی ملاقات شانتی پور کے تھیٹر سرکٹ کی ایک معروف شخصیت پلان کُنڈو سے ہوئی جنہوں نے شہر کے مشہور گروپ ’شانتی پور سانسکرتک‘ کے ساتھ ان کے بعد کے سفر میں اہم کردار ادا کیا۔

تین دہائیوں سے زیادہ عرصے سے تھیٹر میں سرگرم رہے اس سینئر ورکر-فنکار کا خیال ہے کہ تھیٹر نے انہیں ایک الگ شناخت دی ہے۔ وہ کہتے ہیں، ’’میں ۱۹۸۸ سے اس کلب کا حصہ ہوں۔ اگر میں تھیٹر نہ کرتا، تو میں کئی مقامات کا سفر نہیں کر پاتا، اور میں دنیا سے بے خبر رہتا۔‘‘

یہ دکھانے کے لیے کہ ڈراموں کے سازوسامان کہاں رکھے جاتے ہیں، وہ ہمیں کے بی پرمانک اسٹریٹ پر واقع شانتی پور سانسکرتک کے ریہرسل اور اسٹوریج روم کی سیر کراتے ہیں۔ ’’تدنت چولچھے، گھوڑار ڈِمیر گپّو، پھرے دیکھا، اِچھّے کُسم، اَچلایتَن، نِشی ڈاک، رتھیِر روشی، گندھ جلے، برشٹی برشٹی، رَکت اُپاکھیان، شادا گھوڑا…میں نے بہت سے ڈرامے کیے ہیں،‘‘ وہ ڈراموں کے نام شمار کرتے ہوئے کہتے ہیں۔

’’آج کل میں اپنی ٹانگوں کے درد کی وجہ سے ڈراموں میں مزید کام نہیں کرسکتا،‘‘ وہ ہمیں بتاتے ہیں۔ بچپن میں دو دفعہ ان کی ٹانگ ٹوٹی تھی اور اب عمر بڑھنے کے ساتھ اس کا اثر محسوس ہونے لگا ہے۔ لیکن وہ مزید کہتے ہیں کہ اداکاری نہ کرنے کے باوجود بھی وہ ڈرامے کا حصہ ہیں: ’’میں ڈرامے کے لیے مختلف پراپس ترتیب دینے، اسٹیج ترتیب دینے، اور شو ختم ہونے کے بعد تمام اشیاء کو واپس لانے کا کام کرتا ہوں۔ یہ بھی تھیٹر کا کام ہے،‘‘ اسیت دا زور دے کر کہتے ہیں۔ شانتی پور سانسکرتک کے تقریباً تمام اداکار اداکاری کے علاوہ تھیٹرسے متعلق دیگر کاموں میں بھی حصہ لیتے ہیں۔ اسیت دا عموماً چیزوں کا بندوبست کرتے ہیں اور اسٹیج سیٹ اپ کا انتظام دیکھتے ہیں۔

تھیٹر کے تئیں اپنے شوق کو پورا کرنے کے لیے اسیت دا نے اپنے لیے بُنائی سے متعلق دیگر ذمہ داریوں کی بجائے لوم کے کام کا انتخاب کیا۔ ’’کرگھے کے کام کو سنبھالنے میں کچھ آزادی ملتی ہے۔ آپ اپنے وقت پر بُنائی کرسکتے ہیں، جہاں اور جب چاہیں جاسکتے ہیں۔‘‘ مزید یہ کہ، ’’ڈرامے کے لیے ریہرسل اور زیادہ تر کام رات کو ہوتا ہے۔ اس لیےمجھے پورا دن کرگھے پر کام کرنے کے لیے مل جاتا ہے۔ اور جس دن کوئی ڈرامہ اسٹیج ہونا ہوتا ہے، مجھے بُنائی سے دور رہنے میں کوئی اعتراض نہیں ہوتا،‘‘ اسیت دا کسی تاسف کا اظہار کیے بغیر کہتے ہیں۔

لیکن جب وہ شانتی پور میں ہتھ کرگھا بنکروں کی حالت زار کے بارے میں بات کرتے ہیں، تو ان کی مایوسی اور اداسی کو آسانی سے محسوس کیا جا سکتا ہے: ’’دن رات سخت محنت کرنے کے بعد بھی بنکروں کی معاشی حالت ابتر ہے۔ میرے والدین بہت اچھے لوگ تھے۔ لیکن میرے بابا [والد] اپنے لوم کے کاروبار کو آگے بڑھانے میں کامیاب نہیں ہو سکے، جس کی وجہ سے ہمارا خاندان غربت کا شکار رہا۔‘‘ وہ اپنے گھر میں کرگھے پر بیک وقت بُنائی کرتے ہوئے گفتگو جاری رکھتے ہیں، ’’ایک طرف تو پچھلے کچھ سالوں میں پاور لومز کے فروغ کی وجہ سے ساڑیوں کی قیمت میں تیزی سے کمی آئی ہے اور دوسری طرف دھاگوں اور رنگوں جیسے خام مال کا معیار بھی گر گیا ہے۔‘‘ ان تمام عوامل کی وجہ سے، ’’مارکیٹ میں مانگ بھی کم ہو گئی ہے جس نے شانتی پور کی بنائی کی صنعت کو بڑے خطرے میں ڈال دیا ہے،‘‘ اپنی بات جاری رکھتے ہوئے وہ کہتے ہیں۔

اسیت دا کو خدشہ ہے کہ صرف ایک یا دو دہائیوں میں ہتھ کرگھے کی روایتی صنعت باقی نہیں رہے گی۔ ’’بُنائی کا ہنر ایک نسل سے دوسری نسل میں منتقل ہوتا ہے۔ اب ہمارے تمام لڑکے کام کی تلاش میں یہاں سے باہر جا رہے ہیں۔ بُنکروں کے بچے یہاں کیوں رہیں گے؟ اور پھر یہ [ہتھ کرگھا] کیسے چلے گا؟‘‘

اسیت دا کا کام مکمل طور پر مہاجنوں (ٹھیکیداروں) کے آرڈر پر منحصر ہے۔ وہ مہینے میں بمشکل ۲۰ دن کا کام حاصل کر پاتے ہیں۔ تمام اخراجات کو منہا کرنے کے بعد وہ ۱۵۰ روپے یومیہ تک کما لیتے ہیں۔ ان تمام رکاوٹوں کے باوجود اسیت پرمانک جیسے بنکروں نے شانتی پور کی ہتھ کرگھا صنعت کو زندہ رکھا ہے۔

مزید برآں، کسی بنکر کی زندگی کی تمام محرومیوں اور پریشانیوں کے درمیان، انہیں تھیٹر کی دنیا میں خوشی، آزادی اور پہچان ملی ہے۔ اسیت پرمانک کے بھائی، بہن اور بھتیجے کی فیملی نے بھی ان کے شوق کو اپنا لیا ہے۔ ’’پچھلے آٹھ دس سالوں میں ہی اسٹیج شوز سے کچھ کمائی ہوئی ہے، لیکن اگر میں نے اس سے کوئی پیسہ نہ بھی کمایا ہوتا تو بھی اسے جاری رکھتا…‘‘

وہ تھیٹر سے اپنی وابستگی کو اپنی زندگی کا سب سے قیمتی سرمایہ خیال کرتے ہیں۔ تھیٹر کے میدان میں ان کی خدمات کے اعتراف میں، کولکاتا کی ایک ثقافتی تنظیم بیلگھریا ابھیمُکھ نے انہیں ۲۰۲۲ میں اسیت مکھرجی میموریل ایوارڈ سے نوازا تھا۔ وہ پاری کو فخر کے ساتھ اس ایوارڈ کی تختی دکھاتے ہیں۔

اسیت دا ان دنوں کو یاد کرتے ہیں جب وہ شوز کے لیے سفر کیا کرتے تھے، اکثر مقامات تک پہنچنے کے لیے وہ گاڑی والوں سے مدد مانگتے تھے۔ ’’پرانے زمانے میں اسٹیج شو کے لیے سفر کرنا بہت مشکل کام تھا، گاڑیاں نہ ہونے کی وجہ سے ہم ٹرینوں یا بسوں کے ذریعہ سفر کیا کرتے تھے۔ شو ختم ہوتے ہوتے دیر ہو جاتی تھی۔ کیسے لوٹنا ہے؟ کوئی پرواہ نہیں! ہم سڑک کے درمیان کھوا [اینٹ کے ٹکڑوں] سے لدی ہوئی لاری کو روک کر اس میں گھس جاتے تھے۔ اینٹوں کے بھاری وزن کی وجہ سے لاری زیادہ ہچکولے نہیں کھاتی تھی۔ جب ہم اچھی طرح بیٹھ جاتے تو شو کے منتظمین کی طرف سے فراہم کردہ ٹفن [ہلکے ناشتے] کھاتے تھے۔ جیسے ہی لاری شانتی پور پہنچتی تھی، ہم اتر جاتے تھے۔ ہمارے تھیٹرکرنے کا یہی طریقہ تھا۔‘‘

ٹانگ کے درد میں اضافہ کی وجہ سے انہیں شک ہے کہ وہ اپنے شوق کو زیادہ دیر تک جاری رکھ سکیں گے: ’’میں بحیثیت ایک اداکار اور ایک بنکر کے جب تک ہو سکتا ہے فعال رہنا چاہتا ہوں۔‘‘

یہ اسٹوری بنیادی طور پر بنگالی میں رپورٹ کی گئی تھی۔

ترجمہ نگار: شفیق عالم