करघा के धुन, रंगमंच के तान- असित दा!

“नाटक ‘इच्छेय कुसुम’ में हमार किरदार एगो बुनकर के रहे... जे तरहा असल जिनगी में हम बुनकर बानी,” असित प्रमाणिक आपन हाथ में एगो पुरान नाटक के स्क्रिप्ट धइले कहलन. आपन घर के एगो पुरान, झंवराइल लोहा के अलमारी में टटोलत-टटोलत ऊ न जाने केतना संभार के रखल नाटक के स्क्रिप्ट सब बाहर निकललन.

असित दा हजारन बुनकरनन में से बानी, जे नदिया जिला के शांतिपुर हैंडलूम कलस्टर से जुड़ल बानी. ई इलाका आपन अद्भुत शांतिपुरी टंगाइल आ जामदानी हैंडलूम के साड़ी खातिर जानल जाला. तांत-घर (कमरा जेकरा में करघा रहेला) आ रंगा-मंचा (रंगमंच) के बीच के निरंतर ताना-बाना, एह कारीगर आ कलाकार के साठ बरिस के जिनगी के बुनावट रचेला.

मंच पर आपन पहिल अभिनय के बारे में बतियावत, असित दा के चेहरा बेसंभार खुसी से चमक उठल बा. “ई नाटक सियालदह स्टेसन के आस-पास कहूं स्टेज पर कइल गइल रहे. हम जज के भूमिका में त रहीं, बाकिर सच्चाई त ई रहे कि हम डरे कांपत रहीं,” ऊ हंसत कहत बाड़न. आउर दर्शक के बीच मंच पर के आपन आउर अनुभव हमनी के बतावे लागत बाड़न.

एकदम एतने जोस से असित दा हमनी के बुनाई के दुनिया में आपन पहिल कदम के बारे में बतइलन. “हम पचंमा ले पढ़नी. छोट लइका से लेके एह बुनकर परिवार के मरद आ मेहरारू, एक-एक प्राणी हथकरघा के तरह-तरह के काम में जुटल रहे.” सूत काते, रंगे आ चरखा के मदद से सूत के एगो ट्यूब में लपेटे, आउर फेरु उहंवा से सूत के फेरु ड्रम में लपेटे आ आखिर में ओकरा करघा पर चढ़ावे, सेट करे के अलग अलग काम परिवार में अलग-अलग उमिर के लोग करेला. “आउर जइसन कि कवनो तांती (बुनकर) परिवार में होखेला, हमनियो के बहुते छोट उमिर में एह काम में लगे पड़ल रहे.”

असित प्रमाणिक जब नौजवानी में शौकिया अभिनय करत रहस, शांतिपुर के साहापाड़ा मोहल्ला में आपन घर के लगहीं पड़े वाला ‘द लॉन्ग रूट’ नाटक मंडली, रंगमंच के दुनिया में उनकर कदम रखे के एगो बड़ कारण बनल रहे. इहे ऊ जगह रहे, जहंवा उनकर भेंट पालन कुंडू से भइल. पालन कुंडू शांतिपुर रंगमंच जगत के एगो जानल-पहचानल नाम रहलन. उनके सहजोग से असित दा के शांतिपुर सांस्कृतिक नाटक मंडली संगे उनकर सफर सुरु भइल.

तीन दसक से जादे से रंगमंच में सक्रिय एह अनुभवी कारीगर-कलाकार के मानना बा कि रंगमंच उनका एगो अलग पहचान देलक. उनकर कहनाम बा, “हम 1988 से एह क्लब के हिस्सा बानी. अगर हम रंगमंच में ना आइल रहतीं, त हम कहूं ना पहुंच पइतीं, दुनिया के ना जान पइतीं.”

ऊ हमनी के के. बी. प्रमाणिक स्ट्रीट पर शांतिपुर संस्कृतिक के रिहर्सल आ स्टोरेज रूम सब घुमावे आ देखावे लगलन जहंवा नाटक के प्रॉप्स सब रखल बा. “तंदला चोलचे, घोरार डिमर गप्पो, फिरे देखा, इच्छेय कुसुम, अचलायतन, निशि डाक, रथेर रोशी, गंधाजले, बृष्टि बृष्टि, रक्त उपाख्यान, शादा घोरा... हम ई सब नाइटक कइले बानी,” ऊ नाम गिनावत कहलन.

“आजकल त गोड़ में दरद होखे चलते हम अब एक्टिंग नइखी कर पावत,” ऊ हमनी के बतइलन. लरिकाई में उनकर गोड़ दू बेर टूट गइल रहे. आउर अब बुढ़ापा में जाके ओकर असर देखे मिल रहल बा. बाकिर ऊ इहो कहलन कि नाटक ना कइला के बावजूद ऊ अबहियो एकरा से जुड़ल बाड़न. “हम नाटक खातिर अलग-अलग तरह के सामान जुटावेनी, मंच सजावेनी, आ शो खतम भइला के बाद सब चीज संभारेनी. इहो त रंगमंच के काम ह नू,” असित दा तनी जोर देके कहलन. शांतिपुर सांस्कृतिक के लगभग सभे कलाकाल लोग अभिनय के साथे-साथे दोसर जिम्मेदारी सब में भी हाथ बंटावेला. मंच सजावट, आ व्यवस्था के जिम्मा जादे करके असित दा ही संभारेलन.

नाटक के जुनून जारी रखे खातिर असित दा बुनाई से जुड़ल अउरी जिम्मेदारी छोड़ के करघा पर काम करे के राह चुननी. “हथकरघा पर काम में तनी आजादी रहेला. जब मन करे, तब बीनी. जब जहां जाए के मन करे, जाईं. कवनो रोक-टोक ना रहे. इहे ना, नाटक के रिहर्सल आ बाकी जादेतर काम रात में होखेला. एहि से दिन भर करघा पर बीनाई कर लीहिला. आ जवन दिन नाटक होखे के होखेला, ओ दिन बीनाई छोड़ देवे में हमरा कवनो अफसोस ना होखे,” असित दा बिना कवनो पछतावा के कहलन.

बाकिर जब असित दा शांतिपुर के बुनकर लोग के हालचाल बातवेलन, त उनकर लाचारी आ दुख साफ झलकेला. “दिन-रात खटला के बादो बुनकर लोग के हालत जस क तस बा. हमार माई-बाऊजी लोग बहुते सज्जन रहनी. बाकिर हमार बाबा (बाऊजी) करघा ठीक से ना चला पवलन. एहि से हमनी के परिवार गरीबिए में रह गइल,” असित दा बात करत-करत करघा पर बीनाई जारी रखले रहस. “एक ओरी पछिला कुछ बरिस में पावरलूम बढ़ला से साड़ी के दाम तेजी से गिर गइल बा. आ दोसरा ओरी तागा आ रंग जइसन कच्चा माल के क्वालिटी भी अब खराब हो गइल बा.” असित दा कहे लगलन, “एहि सब झंझट से बाजार में बीनाई के मांग घट रहल बा. आ शांतिपुर के पूरा बुनकरी धंधा संकट में पड़ गइल बा.”

असित दा के डर बा कि अब से दस-पंद्रह साल के भीतर हथकरघा के ई परंपरा एकदमे मिट जाई. “बीनाई के लुर त बाप-दादा से मिलेला. बाकिर अब त हमनी के जवान लइका सब काम खोजे बाहर जाता. बुनकर के घर के बचवा लोग अब इहंवा काहे रही? आ फेरु ई काम (हथकरघा) कइसे आगू बढ़ी?”

महाजन (ठिकदार) के ऑर्डर पर पूरा तरीका से निर्भर रहे वाला असित दा के महीना में मुस्किल से 20 दिन काम मिलेला. सभे खरचा निकाल दीहीं त उनका रोज के 150 रुपइया मिलेला. एतना तरह के मुस्किल के बादो असित प्रमाणिक जइसन बुनकर लोग शांतिपुर के हथकरघा उद्योग के जिंदा बचइले बा.

एगो बुनकर के कष्ट आउर कठिनाई से भरल जिनगी के बावजूद, रंगमंच के दुनिया उनका आनंद, आजादी आ पहचान देलक. असित प्रमाणिक के परिवारो, जेकरा में उनकर भाई-बहिन आ भतीजा लोग बा, उनकर जुनून के स्वीकार कर लेले बा. “पछिला आठ-दस बरिस से स्टेज शो से भी तनी-मनी आमदनी हो जाला. बाकिर जदि हमरा फूटलो कौड़ी ना मिलित, तबो हम थियेटर कइल ना छोड़तीं,”

रंगमंच से जुड़ल रहे के ऊ आपन जिनगी भर के कमाई मानेलन. थियेटर के दुनिया में उनकर जरूरी योगदान के मान्यता देत, कोलकाता के बेलघरिया अभिमुख नाम के सांस्कृतिक संस्था उनका 2022 में अशोक मुखर्जी मेमोरियल अवार्ड से सम्मानित कइलक. ऊ बहुते गर्व से पारी के ऊ स्मृति चिन्ह देखावत बानी.

असित दा पुरान दिन सब इयाद करत बाड़न. शो खातिर आन-जान करत अक्सरहा लिफ्ट लेके ऊ एक जगह से दोसरा जगह जात रहस. “तब नाटक करे जाए खातिर यात्रा बहुते कठिन होत रहे. कवनो गाड़ी ना मिले, त हम ट्रेन चाहे बस ले लेत रहीं. शो देर रात खतम होखत रहे. वापस कइसे लउटल जाव? कवनो चिंता ना! हम कवनो लॉरी के रोक लेत रहीं जेकरा में खोवा (ईंट के टुकड़ा) लदल रहत रहे, आउर ओकरा पर चढ़ जात रहीं. ईंटा सब के भार से लॉरी हिल ना पावत रहे. एक बेरा बइठ जाईं, त शो में आयोजक लोग ओरी से जे टिफिन (हलका नास्ता) मिलत रहे, ऊ खाईं आउर जब लॉरी शांतिपुर पहुंच जाए, त उतर जाईं. अइसे थियेटर कइनी.”

गोड़ में दरद बढ़े चलते, अब उनका ना लागे कि एह जुनून के ऊ लंबा समय ले जारी रख पइहन. “जबले संभव बा, हम एगो अभिनेता आ बुनकर के रूप में काम करत रहे के चाहत बानी.”

रपट मूल रूप से बांगला में लिखल गइल बा.

अनुवाद: स्वर्ण कांता