پنجاب: دو تارکین وطن کی المناک کہانی

رندیپ سنگھ اتنے خوش قسمت نہیں تھے کہ انہیں گرفتار کر کے پیروں میں بیڑیاں لگائی جاتیں اور امریکہ سے امرتسر آنے والی سی-۱۷ فلائٹ کی ایک سیٹ سے جکڑ دیا جاتا۔ مسلسل ۲۶۴ دنوں تک اجنبی سرزمین پر جدوجہد کرنے کے بعد، بالآخر اس سال ۲۱ فروری کو غیر قانونی طریقے (ڈنکی روٹ) سے امریکہ جاتے ہوئے کمبوڈیا میں ان کی موت واقع ہو گئی۔

آپ یہ کہہ سکتے ہیں کہ پرگٹ سنگھ زیادہ خوش قسمت تھے۔ وہ ایک اور پنجابی تھے جنہوں نے بیرونی ملک جانے کے اپنے خوابوں کو پورا کرنے کے لیے امریکہ کا سفر اختیار کیا تھا۔ اس سفر کا آغاز ان کے کنبے کی ۳ ایکڑ اراضی کا آدھا حصہ اور ان کی ماں کے زیورات کا بیشتر حصہ فروخت کرنے سے ہوا، اور اس کا خاتمہ ہندوستان میں ملک بدری کے ساتھ ہوا۔ وہ ہتھکڑیوں میں گھر واپس آئے، لیکن اپنی کہانی سنانے کے لیے بہرحال زندہ رہے۔

پنجاب کے ضلع موہالی کے گاؤں شیخ پورہ کلاں میں رندیپ کے گھر میں اب صرف سَتھر (ماتم پرسی) ان کی دل دہلا دینے والی خوفناک کہانی کی گواہی دے رہی ہے۔ دو کمروں کے چھوٹے سے مکان میں سوگواروں کے لیے جگہ کم پڑ گئی ہے۔ یہ لوگ ان کی لاش کے آنے کا انتظار کر رہے ہیں۔ لیکن ایسا جلد ہوتا ہوا دکھائی نہیں دیتا۔ کمبوڈیا میں ہندوستانی سفارت خانہ نے لاش کو وطن واپس بھیجنے کے تمام اخراجات کو پورا کرنے کے لیے ۷۱۰۰ امریکی ڈالر (تقریباً چار لاکھ ۲۱ ہزار روپے) کی پیشگی رقم کا مطالبہ کیا ہے۔

چھ ہندسوں کی یہ بڑی رقم رندیپ کے والد بلوندر سنگھ (۵۵ سالہ) کی سمجھ سے باہر ہے۔ وہ یومیہ اجرت پر کام کرنے والے ایک مزدور ہیں، اور جس دن کام ملتا ہے اس دن ۵۰۰ روپے کما لیتے ہیں۔ بلوندر ہر آنے والے شخص کو، خواہ انہیں پہچانتے ہوں یا نہیں، ایک نازک امید کے ساتھ دیکھتے ہیں اور صرف ایک جملہ دہراتے ہیں ۔ ’’باڈی لیکے کے اَون دا دیکھو [لاش کو واپس لانے کے لیے کچھ کیجئے]۔‘‘

دیہی علاقوں میں بے روزگاری اور زرعی بحران کے باعث پنجاب سے فرار ہونے کی خواہش رکھنے والوں میں ۲۴ سالہ رندیپ تنہا نہیں تھے۔ وہ ایک بے زمین دلت گھرانے میں پیدا ہوئے۔ ان کی پرورش اس شدید مایوسی کے درمیان ہوئی، جب فصلوں کی مسلسل ناکامی، کام کی عدم دستیابی، اور خودکشیوں کی لہر نے دیہی پنجاب کو اپنی گرفت میں لے رکھا تھا۔

لدھیانہ میں واقع پنجاب اگریکلچر یونیورسٹی کی ایک تحقیق سے معلوم ہوتا ہے کہ ریاست میں سال ۲۰۰۰ سے ۲۰۱۵ تک ۱۶ ہزار ۶۰۶ کسانوں نے خودکشی کی۔ ان میں سے نصف کا تعلق دلت برادریوں سے تھا، جو بے زمین زرعی مزدور تھے۔ اس مدت کے بعد بھی یکے بعد دیگرے آنے والی حکومتوں نے ’پنجاب کو کیلیفورنیا میں تبدیل کرنے،‘ یا روزگار کے اتنے مواقع پیدا کرنے کے دعوے کیے کہ غیر ملکی بھی ملازمت کی تلاش میں یہاں آئیں۔ لیکن یہ وعدے بھی یہاں کے نوجوانوں کو متاثر نہیں کر پائے۔

اس نسل کے بہت سے لوگوں کی امریکہ سے زنجیر پا واپسی اس بات کی تصدیق کرتی ہے۔ ورنہ وہ بہتر زندگی کی تلاش میں وہاں کیوں جاتے؟ اس سال ۱۳ مارچ کو مرکزی حکومت نے پارلیمنٹ میں بتایا کہ امریکہ سے ہندوستان بھیجے گئے ۳۸۸ افراد میں سے ۴۳ء۳۹ فیصد کا تعلق پنجاب سے اور ۰۲ء۳۴ فیصد کا تعلق ہریانہ سے تھا۔ یہ تعداد واپس بھیجے گئے تمام لوگوں کی تقریباً تین چوتھائی تھی۔ چھوٹے شہروں میں بھی انٹرنیشنل انگلش لینگویج ٹیسٹنگ سسٹم (آئی ای ایل ٹی ایس) اور ٹیسٹ آف انگلش ایز اے فارین لینگویج (ٹافیل) چلانے والے مراکز کے امیگریشن کے کاروبار کا عروج اس افسوسناک سچائی کی تصدیق کرتا ہے۔ پنجاب سے نکلنا وہاں کے نوجوانوں کی بڑی تعداد کا واحد خواب بن گیا تھا۔

اس سے قبل، حکومت ہند نے پارلیمنٹ میں بتایا تھا کہ ۲۰۱۶ اور ۲۰۲۱ کے درمیان تقریباً ۵ لاکھ افراد پنجاب سے روزگار کی تلاش میں بیرونی ممالک ہجرت کر چکے ہیں۔ اسی اثنا میں، ۶۲ء۲ لاکھ طلباء دوسرے ملکوں میں تعلیم حاصل کرنے گئے تھے۔ ان میں سے اکثر کے لیے تعلیم صرف پنجاب سے نکلنے کا ایک ذریعہ تھی۔ خودکشیوں کی لہر کے بعد یہاں ایک اور لہر آئی: یعنی بڑے پیمانے پر خروج کی لہر۔

رندیپ کا خواب تھا کہ وہ اپنی بڑی بہن کی شادی کرائیں اور اپنے والد اور والدہ کو سخت مشقت سے نجات دلائیں۔ لہٰذا، زیادہ سود پر قرض لینے اور دو بھینسیں بیچنے کے بعد، انہوں نے ایک ٹریول ایجنٹ کے ساتھ ۴۲ لاکھ روپے میں سودا طے کیا۔ اس ایجنٹ نے ’یقین‘ دلایا کہ وہ انہیں کینیڈا کے راستے امریکہ پہنچا دے گا۔ رندیپ اس یقین دہانی پر یکم جون ۲۰۲۴ کو گھر سے نکلے۔ اہل خانہ کا کہنا ہے کہ انہوں نے ٹریول ایجنٹ کو ۲۵ لاکھ روپے ادا کیے تھے۔

کینیڈا کے بجائے ایجنٹ انہیں کمبوڈیا لے گیا، جہاں ۲۱ فروری کو ایک ہسپتال میں پراسرار طور پر ان کی موت ہوگئی۔ ’’ایجنٹ نے ہمیں دھوکہ دیا ہے۔ بچے صرف ان کے لیے قربانی کے بکرے ہیں۔ اب ہمیں اس کی لاش واپس لانی ہے،‘‘ رندیپ کے چچا دھرم پال کہتے ہیں، جو ٹیکسی ڈرائیور ہیں۔ یہاں مہاجرت کی دوڑ میں شامل زیادہ تر نوجوانوں کی یہ ایک عام کہانی ہے۔ تقریباً ۳۰ سے ۴۰ لاکھ روپے خرچ کرنے کے بعد ان میں سے بہت سے لوگوں کے سفر کا اختتام پکڑے جانے یا بحیرہ روم میں ڈوب جانے، یا پاناما کے جنگلوں میں، یا امریکہ کی جیلوں میں داخل ہونے کے ساتھ ہوتا ہے۔

پٹیالہ ضلع کے مولی والا گاؤں سے تعلق رکھنے والے ایک چھوٹے کسان کے بیٹے اور جاٹ سکھ، پرگٹ سنگھ بھی رندیپ کی طرح امریکہ پہنچنا چاہتے تھے۔ اپنے ۴۵ سالہ والد میجر سنگھ کو قرض کے جال میں الجھا ہوا دیکھ کر، اور کم از کم امدادی قیمت (ایم ایس پی) پر دھان فروخت کرنے کی کوشش کرتے ہوئے منڈیوں میں ان کی تذلیل کے بعد پرگٹ سنگھ نے زراعت سے دوری اختیار کرنے کا فیصلہ کیا۔

پٹیالہ ضلع کے پَٹران میں ایک انڈسٹریل ٹریننگ انسٹی ٹیوٹ (آئی ٹی آئی) سے کورس کرنے کے بعد، پرگٹ نے ایک جدید ڈیری فارم شروع کیا۔ لیکن ان کی چاروں گائیں ۲۰۲۲ میں لمپی اسکن ڈزیز (ایک انتہائی متعدی وائرل بیماری جو مویشیوں کو متاثر کرتی ہے) کے پھیلنے کے بعد مر گئیں۔ ’’ریاستی حکومت نے معاوضہ کا وعدہ کیا، لیکن ہمیں ایک پیسہ نہیں دیا گیا،‘‘ وہ کہتے ہیں۔ اس کے بعد انہوں نے یورپ یا امریکہ جانے کے راستے تلاش کرنا شروع کر دیے۔ آخرکار، جون ۲۰۲۴ میں وہ امریکہ کے ایک طویل سفر پر روانہ ہوئے – جسے پنجاب میں ڈنکی روٹ کہا جاتا ہے۔

’’میں برازیل پہنچ گیا،‘‘ پرگٹ اپنے غیرمعمولی سفر کا ذکر کرتے ہوئے پاری کو بتاتے ہیں۔ ’’وہاں، ڈنکروں [ٹریول ایجنٹوں کے مقامی گائیڈ جو لوگوں کو غیر قانونی طور پر امریکہ میں داخل کراتے ہیں] نے ہم میں سے ۸۰ افراد کا ایک مضبوط گروپ بنایا۔ پہلے ہم نے بولیویا، ایکواڈور، کولمبیا اور پیرو جیسے ممالک کا سفر بس کے ذریعہ کیا۔ پھر ہمیں کوسٹاریکا، نکاراگوا، ہونڈوراس اور گواٹیمالا کے جنگلوں میں دھکیل دیا گیا۔ آخر میں ہم میکسیکو پہنچے۔ ہم نے دو دنوں کے راشن کے ساتھ جنگل میں پانچ دن تک سفر طے کیا۔

’’آخر کے تین دنوں تک ہم صرف پانی پر زندہ رہے۔ راستے میں ایک مافیا نے ہمیں ۱۵ دنوں تک اغوا کر کے رکھا۔ ہمیں آزاد کرنے کے لیے اس نے ایک رقم کا مطالبہ کیا۔ وہ ہمارے ساتھ اس وقت تک مار پیٹ کرتے رہے جب تک ہم نے ان کو تاوان ادا نہیں کر دیا۔‘‘ پرگٹ اپنے سفر کو ایسے یاد کرتے ہیں گویا وہ کل کی ہی بات ہو۔

امریکہ میں قدم رکھنے کے بعد انہیں دوسرے لوگوں کے ساتھ گرفتار کر لیا گیا اور ٹیکساس کی ہوسٹن جیل کے ۱۰x۳ فٹ کے سیل میں قید کر دیا گیا۔ وہ چھ ماہ تک قید میں رہے۔ گزشتہ ۱۰ فروری کو انہیں بیڑیاں پہنا کر نیویارک سے دہلی جانے والی پرواز میں ڈال دیا گیا۔ لیکن یہ ان کی مصیبت کا خاتمہ نہیں تھا، پرگٹ افسوس ظاہر کرتے ہوئے کہتے ہیں۔

’’جب میں دہلی پہنچا تو امیگریشن حکام نے مجھے تہاڑ جیل بھیجنے کی دھمکی دی۔ میں ٹوٹ گیا اور ان سے کہا: ’آپ مجھے گولی کیوں نہیں مار دیتے؟ میں پہلے ہی بہت مصیب جھیل چکا ہوں‘۔‘‘ اس پورے سفر پر ان کے ۵۰ لاکھ روپے خرچ ہوئے۔ اس سفر کے اخراجات کو پورا کرنے کے لیے پرگٹ نے اپنی ڈیڑھ ایکڑ پشتینی زمین، اپنی ماں سمرجیت کور (۴۳ سالہ) کے سونے کے زیورات بیچ دیے اور اپنے رشتہ داروں سے بھی رقم ادھار لی تھی۔

رندیپ کے چچا دھرم پال کہتے ہیں، ’’ہماری غریبی ہمیں جانوروں کی طرح سفر کرنے پر مجبور کرتی ہے۔‘‘ غیر قانونی طور پر سفر کرنے والے یا امریکہ سے واپس آنے والوں میں سے زیادہ تر معمولی کسان ہیں۔ رندیپ کے ایک بے روزگار چچیرے بھائی، ۲۴ سالہ لکھوندر سنگھ کہتے ہیں، ’’یہاں پنجاب میں کوئی پڑھا لکھا شخص ۱۰ سے ۱۲ ہزار روپے کماتا ہے، تو کوئی پوسٹ گریجویٹ ۱۵ ہزار روپے کماتا ہے، آپ اس سے کیا کرسکتے ہیں؟ حکومت نے انکم ٹیکس میں ۱۲ لاکھ روپے تک کی چھوٹ دی ہے۔ کیا آپ نے کسی کو ایک لاکھ روپے ماہانہ کماتے ہوئے سنا ہے؟ لوگ اکثر نوجوانوں پر بیرون ملک جانے کا الزام لگاتے ہیں، لیکن یہاں کی حکومت ان کے لیے کیا کر رہی ہے؟‘‘

رندیپ کی موت کو آٹھ دن ہوچکے ہیں، لیکن ان کے گھر میں سوگواروں کی آمد کا سلسلہ جاری ہے۔ جس لمحے کوئی اندر داخل ہوتا ہے، بلوندر سنگھ کی آنکھیں خاموش امید کے ساتھ ان کی طرف دیکھتی ہیں، جیسے کسی مدھم خواب سے چمٹی ہوئی ہوں۔

ماتم اور آہ وزاری کی آوازیں بلند ہوتی جاتی ہیں۔ ’’اوہ پُت، اک باری آ جا، اک باری کہہ دے، ’ممی میں ٹھیک ہاں۔ میرا رولا جھوٹھا۔‘ [بیٹا، صرف ایک بار واپس آ جاؤ، بس ایک بار مجھ سے کہہ دو، ’ماں، میں ٹھیک ہوں، میری موت کی خبر جھوٹی ہے‘]۔‘‘ رندیپ کی ۵۲ سالہ ماں گیان کور رو رہی ہیں، مزید بات کرنے سے قاصر ہیں – ان کے رونے پیٹنے کی آواز گونجتی رہتی ہے۔ دوسری عورتیں انہیں تسلی دینے کی کوشش کرتی ہیں، لیکن ان کی چیخیں ان کی تکلیف کے ساتھ بلند ہو جاتی ہیں۔

جیسے ہی ہم وہاں سے نکلنے کے لیے تیار ہوتے ہیں، بلوندر آہستہ آہستہ ستھر سے اٹھتے ہیں۔ وہ خاموشی کے ساتھ دروازے تک ہمارے پیچھے آتے ہیں۔ اپنے گلے میں پھنستی ہوئی آواز کے ساتھ وہ آخری بار کہتے ہیں: ’’باڈی لیکے اَون دا دیکھو۔‘‘ ایسا لگتا ہے کہ ان کے الفاظ پہلے ہی ’غیر قانونی تارکین وطن‘ کے شور میں کھو چکے ہیں۔

-----

پس نوشت:

رندیپ کی موت کے تقریباً ایک ماہ بعد بلوندر سنگھ کے بیٹے گھر واپس آ گئے۔ رندیپ کی لاش ہندوستان پہنچی اور بالآخر ۱۹ مارچ کو ان کے گاؤں میں ان کی آخری رسومات ادا کر دی گئیں۔ لیکن اس کی بھاری قیمت ادا کی گئی۔ نقل و حمل کے اخراجات کے مد میں فیملی کو ۶ لاکھ روپے ادا کرنے پڑے، جبکہ وہ پہلے سے ہی قرض میں ڈوبے ہوئے تھے۔ انہیں بالکل اندازہ نہیں ہے کہ وہ اس قرض کو کیسے چکائیں گے۔

اس دوران پرگٹ نے پاری کے ساتھ وہ ویڈیوز اور تصاویر شیئر کیں جو انہوں نے نو ممالک کے سفر کے دوران بنائی تھیں، جہاں انہیں انسانی اسمگلر لے گئے تھے۔ ان میں وہ کلپ بھی شامل ہے، جس میں انہیں ایک کشتی کے ذریعہ کولمبیا سے پاناما لے جایا گیا تھا۔ دوسری کلپ پاناما کے جنگلوں میں سفر کے دوران کی ہے، جب وہ میکسیکو میں داخل ہونے والے تھے۔ اس کے علاوہ، اس خوفناک حادثہ کی کلپ بھی ہے جو میکسیکو میں ایک ’محفوظ مقام‘ تک پہنچنے کے لیے تیز رفتار ڈرائیونگ کی وجہ سے رونما ہوا تھا۔ اس حادثے میں کئی لوگ زخمی ہوئے تھے۔ اس سے قبل کولمبیا میں ہوئے ایک حادثہ میں پرگٹ کے دو ساتھی مسافروں کی موت ہو گئی تھی – لیکن اس ویڈیو کو اس فوٹیج میں شامل نہیں کیا گیا ہے۔

یہ صرف دو تارکین وطن کی ہی کہانی نہیں ہے، بلکہ ہزاروں دوسرے لوگوں کی مصیبت کی بھی داستان ہے۔

ترجمہ نگار: شفیق عالم