گھریلو تشدد سے لڑ کر گھر چلانے کی جدوجہد

’’جب میں جوان تھی تو بہت خوبصورت تھی، لیکن اب میرے پاس اس پر توجہ دینے کا وقت ہی نہیں ہے،‘‘ نور (تبدیل شدہ نام) ایک لمبی سانس لیتے ہوئے کہتی ہیں۔ وہ اپنے کرایہ کے مکان کی سیڑھیوں پر بیٹھ کر تھوڑی دیر کے لیے آرام کر رہی ہیں۔

تقریباً ۲۲ سال کی عمر سے کام کر رہیں نور نے کبھی تعمیراتی مقامات پر مزدوری کی، کبھی کسی فیٹکری میں اور پھر گھریلو ملازمہ کے طور پر کام کرنا شروع کیا۔ اب وہ دہلی کے ایک پرائیویٹ اسپتال میں صفائی ملازمہ کے طور پر کام کرتی ہیں۔ ’’جب سے میں دہلی آئی ہوں، بس کام ہی کر رہی ہوں،‘‘ وہ پاری سے کہتی ہیں۔

روہنی، سیکٹر ۱۵ کے اس اسپتال میں نور نرسنگ اور صفائی – دونوں کاموں میں مدد کرتی ہیں۔ وہ مریضوں کے کمرے صاف کرتی ہیں اور ضرورت پڑنے پر کھانے پینے کا انتظام بھی کرتی ہیں۔ اگر نرسوں کو پٹّی باندھنے یا مریضوں کی دیکھ بھال میں مدد چاہیے، تو اس میں بھی ہاتھ بٹاتی ہیں۔ ’’میں روزانہ تقریباً ۱۲-۱۳ گھنٹے کام کرتی ہوں۔ مجھے ۱۱ ہزار روپے ماہانہ ملتے ہیں۔ دہلی جیسے شہر میں گزارہ کے لیے اتنے پیسے کافی نہیں ہوتے،‘‘ وہ کہتی ہیں۔ ’’کرایہ، پانی اور بجلی سب کا پیسہ دینا پڑتا ہے۔‘‘ نور کے مطابق، ہر مہینے یہ سارے خرچ ملا کر تقریباً ۹۶۰۰ روپے ہو جاتے ہیں۔

نور سال ۲۰۰۴ میں اپنی خالہ اور شوہر کے ساتھ دہلی آئی تھیں۔ تب وہ ۲۱ سال کی تھیں اور اپنے پہلے بچہ کی ماں بننے والی تھیں۔ بہار کے سولند آباد سے ان کی فیملی بہتر آمدنی کی تلاش میں راجدھانی آئی تھی۔ نور کو بھی بہتر زندگی کی تلاش تھی۔

سال ۱۹۹۱ سے ۲۰۰۱ کے درمیان، دہلی-این سی ٹی میں آنے والے مہاجرین میں بہار کے لوگ دوسرے مقام پر تھے۔ پیریاڈِک لیبر فورس سروے (۲۰۲۴) کے مطابق، اس تعداد میں اب بھی کوئی تبدیلی نہیں آئی ہے۔ اس سروے میں مزید کہا گیا ہے کہ دہلی آنے والے ۱۱ لاکھ لوگوں میں سے زیادہ تر روزگار کی تلاش میں آئے تھے۔

دہلی پہنچنے کے بعد نور کی فیملی کشمیری گیٹ کی جھگیوں میں رہنے لگی۔ نوجوان اور حاملہ نور کی پہلی نوکری تعمیراتی مقام پر کام کرنے والی مزدور کی تھی۔ بعد میں وہ سوروپ نگر کی ایک فیکٹری میں کام کرنے لگیں۔

’’میری شادی بہت کم عمر میں ہو گئی تھی اور میں کبھی خوش نہیں رہی،‘‘ وہ کہتی ہیں۔ ’’مجھے لگتا ہے، ابھی کے زمانے میں لڑکیوں کو لڑکوں کی ضرورت نہیں ہے۔ جب باہر جا کر انہیں ہی کام کرنا ہے اور گھر چلانا ہے، تو وہ آدمیوں سے کیا صرف مار کھانے کے لیے شادی کریں؟‘‘

سال ۲۰۰۶ میں دہلی حکومت کی سڑکوں کو چوڑا کرنے اور یمنا ندی کے علاقہ کو خوبصورت بنانے کی اسکیموں کے سبب انہیں اور ان کے جیسے کئی خاندانوں کو وہاں سے ہٹنا پڑا۔ نور کی فیملی پہلے مجنوں کا ٹیلہ اور پھر شمال مغربی دہلی کے بھلسوا جہانگیر پوری میں آ کر رہنے لگی۔ اب وہ اپنے چار بچوں کے ساتھ ایک ہی کمرے میں رہتی ہیں۔ ان کا شوہر، جو ان کے ساتھ تشدد کرتا تھا، اب ان کے ساتھ نہیں رہتا۔

نور مسلمان ہیں اور بتاتی ہیں کہ گھریلو ملازمہ کے طور پر نوکری تلاش کرنا ان کے لیے مشکل تھا۔ ’’بہت سے لوگ کہتے تھے کہ وہ کسی مسلم عورت کو کام پر نہیں رکھنا چاہتے،‘‘ وہ کہتی ہیں۔ آخر میں ایک جان پہچان والے آدمی کے ذریعہ انہیں اسپتال میں کام مل گیا۔

پیسے ابھی بھی کم ہیں، لیکن نور کہتی ہیں کہ وہ اپنے بچوں کی ضروریات پورا کرنے کی پوری کوشش کرتی ہیں۔ چھٹی کے دنوں میں کبھی کبھی وہ اپنے بچوں کے ساتھ موبائل فون (ان کا ٹی وی کچھ دنوں پہلے خراب ہو گیا تھا) پر فلم دیکھتی ہیں، اور ۱۲ ضرب ۱۲ فٹ کے اُس کمرے میں بچے قہقہہ لگانے لگتے ہیں۔ ’’یہی میرے زندگی کے کچھ سب سے اچھے لمحات ہیں،‘‘ نور کہتی ہیں۔

’’میری تینوں بیٹیاں ہی میری دنیا ہیں۔ میری پوری زندگی انھیں کے ارد گرد گھومتی ہے،‘‘ انجو (تبدیل شدہ نام) کہتی ہیں۔ وہ نور کے ہی پڑوس میں رہتی ہیں۔ ’’میرے دن کی شروعات ان کے لیے کھانا بنانے سے ہوتی ہے، اور پھر انہیں اسکول بھیجتی ہوں۔‘‘ بیٹیوں کے اسکول جانے کے بعد انجو کے پاس کچھ خالی وقت بچتا ہے۔ ’’اس بلڈنگ میں میری ایک سہیلی ہے، کبھی کبھی ہم اپنے شوہروں کے بارے میں باتیں کرتے ہیں اور ان پر ہنستے ہیں!‘‘ وہ مسکراتے ہوئے کہتی ہیں۔ انجو کی اپنے شوہر سے ملاقات تب ہوئی، جب وہ صرف ۱۵ سال کی تھیں اور تبھی انہیں ان سے پیار ہو گیا۔ اسے وہ ’’الھڑ عمر کا پیار‘‘ کہتی ہیں۔ جب ان کے ماں باپ کو پتہ چلا، تو انجو نے اسی سے شادی کرنے کی ضد پکڑ لی۔ ’’میں نے کہہ دیا تھا کہ اگر کسی اور سے شادی کرنی پڑی تو میں مر جاؤں گی۔‘‘

انجو بتاتی ہیں کہ شادی کے بعد، شروع شروع میں انہوں نے کچھ خوشحال دن گزارے۔ اور پھر سب کچھ بدلنے لگا۔ ’’وہ تشدد پر آمادہ ہو گیا۔ مجھے معلوم تھا کہ وہ شراب پیتا ہے۔ وہ مجھے مارتا پیٹتا اور پھر کچھ دیر بعد شراب کو قصوروار ٹھہرا کر معافی مانگ لیتا۔‘‘

کووڈ۔۱۹ لاک ڈاؤن کے دوران تشدد اور بڑھ گیا، جب اس کی ٹرک ڈرائیور کی نوکری چلی گئی اور اس نے منشیات لینا بھی شروع کر دیا۔ انجو بتاتی ہیں، ’’ہم کرایہ کے مکان میں رہتے ہیں اور ۲۰۰۰ روپے کرایہ دینا اب تقریباً ناممکن ہو گیا ہے۔ ہم پچھلے دو مہینے سے کرایہ نہیں دے پائے ہیں۔ میں نے باہر جا کر کام کرنے کے بارے میں سوچا، لیکن میں اپنی بیٹیوں کو اکیلا نہیں چھوڑ سکتی۔ مجھے ڈر ہے کہ ان کا باپ انہیں مارے گا۔ وہ میری سب سے چھوٹی بیٹی کو پہلے بھی مار چکا ہے۔‘‘ ان کا شوہر اب آٹو رکشہ چلاتا ہے، جس کے لیے اسے روزانہ ۳۵۰ روپے بطور کرایہ ادا کرنے پڑتے ہیں۔

قومی خواتین کمیشن کے اعداد و شمار کے مطابق، سال ۲۰۲۳-۲۰۲۴ میں ہندوستان میں گھریلو تشدد کے ۶۰۰۰ سے زیادہ معاملے درج کیے گئے، اور عورتوں کے خلاف جرائم کی سب سے زیادہ شکایتیں اتر پردیش (۱۵ ہزار ۷۶۲) اور دہلی (۲ ہزار ۳۸۷) میں درج کی گئیں۔ نیشنل فیملی ہیلتھ سروے۔۵ (۲۰۱۹-۲۰۲۱) کے مطابق، ۱۸ سے ۴۹ سال کی ۳۱ اعشاریہ ۲ فیصد شادی شدہ عورتوں کو اپنے شوہر سے گھریلو تشدد کا سامنا کرنا پڑتا ہے۔

انجو کے بیمار والد پاس ہی رہتے ہیں، اور اپنے بال بچوں کے ساتھ ساتھ انہیں ان کی بھی دیکھ بھال کرنی پڑتی ہے، کیوں کہ ان کی ماں کا انتقال ہو چکا ہے۔ ’’میری چھوٹی بہن گھر سنبھالتی ہے، اس لیے میں بھی اپنے والد کی دیکھ بھال کرنا اور اس کی مدد کرنا چاہتی ہوں،‘‘ وہ کہتی ہیں۔

’’میں اپنے شوہر کو چھوڑ نہیں سکتی،‘‘ انجو مزید کہتی ہیں، ’’اس کا انتخاب تو میں نے خود کیا تھا۔‘‘ ان کی بہن کبھی کبھی انہیں اپنے میکے واپس آنے کے لیے کہتی ہے۔ ’’وہ مجھ سے پوچھتی ہے، ’تم اب بھی اُس راکشس کے ساتھ کیسے رہتی ہو؟‘ لیکن میں اپنے والد پر بوجھ نہیں بننا چاہتی۔ میری یہی قسمت ہے، اسے جھٹلا تو نہیں سکتی۔‘‘

ترجمہ نگار: قمر صدیقی