परदेस मं ‘अपन घर’ के सपना

“जवानी मं सुग्घर रहेंय. फेर अब मोर करा अपन सुध लेगे के बखत नइ ये,” नूर (बदले नांव) अपन भाड़ा के घर के सीढ़ी मं बइठके, फुरसतहा मजा लेवत संसो करत कहिथे.

22 बछर के उमर ले बूता करत आवत नूर ह इमारत बनाय के जगा, फेक्टरी अऊ ओकर बाद घर के चौका -पोंछा के काम करिस, जेकर बाद वो ला दिल्ली के एक ठन निजी अस्पताल मं साफ-सफई के ये नऊकरी मिलिस. वो ह पारी ला बताथे, “जब ले मंय दिल्ली आय हवं, बस बूताच करत हवंव.”

रोहिणी सेक्टर 15 के अस्पताल मं नूर नर्सिंग अऊ सफई के काम मं मदद करथे. वो ह मरीज मन के खोली ला साफ करथे अऊ जरुरत परे ले खाना अऊ पानी लाथे. गर नर्स मन ला पट्टी बांधे अऊ मरीज मन ला मदद के जरूरत रहिथे, त नूर करथे. वो ह कहिथे, “मंय रोज 12-13 घंटा काम करथों. महीना मं 11,000 रूपिया कमाथों. दिल्ली जइसने शहर मं येकर ले गुजारा नइ होवय. मोला भाड़ा, पानी अऊ बिजली के बिल भरे ला परथे.” नूर बताथे के ये खरचा मन ला मिलाके महीना मं करीबन 9,600 रूपिया हो जाथे.

साल 2004 मं, नूर अपन मौसी अऊ मौसिया संग दिल्ली आइस. वो बखत वो ह 21 बछर के रहिस अऊ पहिली लइका पेट मं रहिस. बिहार के सुलिंदाबाद के ये परिवार काम-बूता करे अऊ बढ़िया कमई के आस मं रजधानी आय रहिस. नूर बढ़िया जिनगी गुजारे ला चाहत रहिस .

साल 1991 अऊ 2001 के बीच मं, दिल्ली-एनसीटी मं अवेइय्या लोगन मन के मामला मं बिहार दूसर सबले बड़े नंबर मं रहिस. पीरियोडिक लेबर फोर्स सर्वे (2024) के आंकड़ा ले पता चलथे के ये मं कोनो बदलाव नइ आय हवय. सर्वे के मुताबिक, 11 लाख ले जियादा लोगन मन बिहार ले दिल्ली आइन, काम बूता करे येकर सबले बड़े कारन रहिस.

दिल्ली आय के बाद, नूर के परिवार कश्मीरी गेट के झुग्गी मं बस गीस. जवान, गरभ धरे दुल्हिन के पहिला काम इमारत बनाय के काम मं मजूरी रहिस; बाद मं वो ह स्वरूप नगर के एक ठन फेक्टरी मं काम करिस.

वो ह कहिथे, “कम उमर मं मोर बिहाव होगे रहिस अऊ मंय कभू खुस नइ रहंय.” सवाल करत वो ह कहिथे, “मुझे लगता है कि अभी के जमाने में लड़कियों को लड़के की ज़रूरत नहीं है. जब बाहर जाकर उन्हें ही काम करना है और घर चलाना है, तो वो आदमियों से क्या सिर्फ मार खाने के लिए शादी करे [ मोला लागथे के आज के जमाना मं माइलोगन मन ला मरद लोगन के जरूरत नइ ये, जब बहिर जाके ऊहीच ला कमाय अऊ घर चलाना हे, त वो काय मन मरद मन ले मार खाये बर बिहाव करंय].”

साल 2006 मं, दिल्ली सरकार के सड़क चौड़ीकरन अऊ यमुना नदिया ला सजाय के योजना सेती नूर जइसने परिवार ला अपन घर छोड़े ला परिस. नूर के परिवार पहिली मजनू का टीला अऊ ओकर बाद उत्तर-पच्छिम दिल्ली के भलस्वा जहांगीर पुर मं चले गीस, जिहां अब वो ह अपन चार झिन लइका के संग एक ठन खोली मं रहिथे. ओकर घरवाला, जेन ह ओकर संग लड़ई-झगरा करत रहय, अब ओकर संग नइ रहय.

नूर मुस्लिम समाज के आय, अऊ वो ह कहिथे के ओकर बर घर के काम बूता मिले मुस्किल रहिस. वो ह कहिथे, “कतको लोगन मन कहिन के वो मन कोनो मुस्लिम माइलोगन ला काम मं रखे नइ चाहंय.” आखिर मं, एक झिन पहिचान के लोगन ह वोला अस्पताल मं काम मं लगवा दीस.

पइसा नइ पूरय, फेर नूर कहिथे के वो ह अपन लइका मन ला जरूरत के हरेक चीज देय के कोसिस करथे. छुट्टी के दिन नूर कभू-कभू वो मन के संग स्मार्टफोन मं फिलिम देखथे (ओकर टीवी कुछेक महीना पहिली खराब होगे रहिस) अऊ वो मन के हँसी 12 गुना 12 के घर भर मं गूँजत रहिथे, नूर कहिथे, “ये मोर जिनगी के सबले बढ़िया घड़ी आय.”

नूरेच के मोहल्ला मं रहेइय्या अंजू (बदलले नांव) कहिथे, “मोर तीन झिन बेटी मन मोर दुनिया आय. मोर सरी जिनगी वो मन के संग किंजरत हवय. मोर दिन वो मन बर बेरा मं खाय बर रांधे ले सुरु होथे अऊ ओकर बाद वो मन ला स्कूल भेज देथों.” जब बेटी मन स्कूल चले जाथें, त अंजू करा थोकन बखत सुस्ताय के रहिथे. वो ह कहिथे, “ये बिल्डिंग मं मोर एक झिन सहेली हवय, कभू-कभू हमन अपन-अपन घरवाला ले के बतियाथन अऊ हँसी ठिठोली चलथे!” अंजू जब बिहाव के पहिली अपन घरवाला ले मिले रहिस अऊ वो मन मं मया होगे, वो बखत वो ह 15 बछर के रहिस. वो ह येला “वो अल्हड़ उम्र का प्यार” कहिथे. जव ओकर दाई ददा ला पता चलिस, त अंजू ओकरेच ले बिहाव करे बर अड़ गे रहिस. वो ह कहिस, “गर मोर बिहाव कोनो दीगर ले होईस त मंय मर जाहूँ.”

अंजू बताथे के बिहाव के बाद दूनों के दिन हंसी-खुसी गुजरे लगिस. फेर चीज मन बदले लगिन. “वो ह मारपीट करे लगिस. मोला पता रहिस के वो ह दरूहा आय. वो ह मोला पीटय अऊ कुछु बखत बाद, वो ह दारू ला दोस देवत माफ़ी मांग लेवय.”

कोविड-19 लॉकडाउन के बखत ओकर मारपीट बढ़गे, जब ओकर ट्रक ड्राइवरी चले गीस अऊ वो ह ड्रग्स लेय ला घलो सुरु कर दीस. अंजू कहिथे, “हमन भाड़ा के घर मं रहिथन अऊ 2000 रूपिया भाड़ा देय घलो मुस्किल होगे हवय . हमन दू महीना के भाड़ा नइ दे हवन. मंय काम करे ला सोचेंय, फेर मंय अपन बेटी मन ला अकेल्ला छोड़े नइ सकत रहंय. मोला डर लगे रहय के ओकर ददा वो मन ला मारही. वो ह पहिलीच ले मोर सबले छोटे बेटी ला मार चुके हवय.” अब ओकर घरवाला ऑटो रिक्शा चलाथे, जेकर बर वोला रोज के 350 रूपिया भाड़ा देय ला परथे.

राष्ट्रीय महिला आयोग के आंकड़ा के मुताबिक, देस (भारत) मं साल 20 23-24 के बखत घरेलू अतियाचार के 6,000 मामला दर्ज करेगे रहिस, जउन मं उत्तर प्रदेश (15,762) अऊ दिल्ली (2,387) मं सबले जियादा मामला के संग सबले उपर रहिस. नेशनल फैमिली हेल्थ सर्वे 5 (2019-2021) के रिपोर्ट के मुताबिक, 18-49 बछर के 31.2 फीसदी बिहाये माइलोगन मन अपन घरवाला के अतियाचार झेलथें.

अंजू के बीमार ददा लकठाच मं रहिथे अऊ अपन घर के देखभाल के छोड़, वोला ओकर घलो सेवा करे ला परथे काबर के दाई गुजर चुके हवय. वो ह कहिथे, “मोर एक झिन छोटे बहिनी हवय, जेन ह घर चलाथे, ते पायके मंय अपन ददा के सेवा करे ला चाहत हवं अऊ ओकर मदद करे ला चाहथों.”

अंजू कहिथे, “मंय अपन घरवाला ला छोड़े नइ सकंव, मइच वोला चुने रहेंय.” ओकर बहिनी कभू-कभू वोला अपन घर लहूट आय ला कहिथे. वो ह मोला पूछथे, ‘तंय अभू घलो ये रक्सा संग काबर रहत हस?’ फेर मंय अपन ददा उपर बोझा बने नइ चाहंव. मेरी यही किस्मत है, इसे झुठला तो नहीं सकती (मोर इहीच किस्मत आय, येला झुठलाय त नइ जाय सकाय).”

अनुवाद: निर्मल कुमार साहू