'बियाह का खाली मार खाए खातिर होखेला’

“जवान रहनी त सुंदर रहनी. बाकिर अब हमरी लगे आपन खयाल राखे के समय नईखे,” नूर (बदलल नाम) आह भरत के अपनी किराया के घर के सीढ़ी पर बईठल आराम के कुछ समय के आनंद लेत के कहेली.

नूर 22 बरिस के रहस तबे से मजूरी करत बाड़ी- ईंट-गारा ढोवे, कारखाना में मिहनत करे आउर फेरु घरे-घरे जाके साफ-सफाई के काम. आजकल ऊ दिल्ली में एगो प्राइवेट अस्पताल में झाड़ू-पोछा करेली. उ पारी के बतावेली, “जब से दिल्ली अईनी, तब से काम कर रहल बानी.”

रोहिणी सेक्टर 15 के अस्पताल में नूर नर्सिंग आ सफाई के कामन में मदद करेली. उ मरीजन के कमरा साफ़ करेली आ जरूरत पड़ला पर खाना पानी के वेवस्था करेली. नर्सन के पट्टी या मरीजन के देखरेख में मदद के जरूरत पड़ेला त नूर सहजोग करेली. “रोज कोई 12-13 घंटा काम करेनी. हम महीना में 11,000 रुपिया कमायेनी. दिल्ली जईसन शहर में एतना कमाई में जीयल मुश्किल बा,” उ कहेली. “हमके किराया, पानी आ बिजली पर खर्चा करे के पड़ेला.” नूर बतावेली कि ए खर्चन में महीना के लगभग 9,600 रुपिया चल जाला.

नूर अपनी मौसी आ मरद के संघे 2004 में दिल्ली अईली. मात्र 21 बरिस के उमिर में उनका पहिल बच्चा भइल रहे. ई परिवार बिहार के सुलिंदाबाद से काम आ बेहतर आमदनी के तलाश में राजधानी आईल. नूर एगो बेहतर जीवन के खोज में रहली.

दिल्ली-एनसीटी में 1991 आ 2001 के बीच प्रवासियन के मामला में बिहार दूसरा सबसे उंच स्थान पर रहे. पीरियाडिक लेबर फ़ोर्स सर्वे (2024) बता रहल बा कि ई स्थिति बदलल नईखे. सर्वे के अनुसार बिहार से दिल्ली में 11 लाख के अधिक लोगन के रोजी-रोटी चलते आपन गांव-घर छोड़ के दोसरा जगह जाए पड़ल.

दिल्ली अईला के बाद नूर के परिवार कश्मीरी गेट के झुग्गियन (अस्थायी आवास) में बस गईल. युवा गर्भवती दुल्हिन के पहिला काम निर्माण स्थलन पर मजदूर के रूप में रहे; बाद में उ स्वरुप नगर के एगो फैक्ट्री में काम करे लगली.

“हम बहुत कम उमिर में बियाह कर लेले रहनी आ कब्बो खुश ना रहनी,” उ कहेली. “हमरा बुझाला कि आज के ज़माने में लईकियन के लईकन के जरूरत नईखे. जब बाहर जा के उनके काम करे के बा आ घर चलावे के बा, त बियाह का खाली मार खाए खातिर करीं?” उ पूछेली.

दिल्ली सरकार के सड़क विस्तार आ यमुना नदी के सुन्दरीकरण योजना के वजह से 2006 में उनकी जईसन परिवारन पलायन खातिर मजबूर कईल गईल. नूर के परिवार पहिले मजनू का टीला गईल आ फिर दिल्ली के उत्तर-पश्चिम में भलस्वा जहांगीर पुर चल गईल. उहंवा उ अब अपनी चार गो बच्चन संघे एगो कमरा में रहेली. मारपीट आ गाली-गलौज करे वाला उनकर मरद अब उनकी संघे ना रहेला.

नूर मुस्लिम समुदाय से हई आ बतावेली कि उनकी खातिर घरेलू कामगार के रूप में काम मिलल मुश्किल रहे. “कई लोग कहलें कि उ मुस्लिम महिला के नोकरी पर ना राखल चाहेलें,” उ बतावेली. आखिरकार एगो परिचित के माध्यम से उ अस्पताल में नोकरी पावे में सफलता पवली.

पईसा पर्याप्त नईखे बाकिर नूर के कहनाम बा कि जवन कुछ भी उनकर बच्चन के चाहीं, उ देवे के उ पूरा कोशिश करेली. छुट्टियन के दिन में कबो-कबो नूर उन्हनी के संघे स्मार्टफोन पर (उनकर टीवी कुछ महीना पहिले खराब हो गईल) फिलिम देखेली आ उन्हनी के हंसी 12 बाई 12 के घर के पूरा गुलजार कर देवेला. “ई हमरी जीवन के कुछ सबसे बढ़िया समय हवे,” नूर कहेली.

“हमार तीन गो बेटी हमार दुनिया हईं सन. हमार जिनगी उन्हन्हिए के चारू ओर घूमेला,” अंजू (बदलल नाम) कहेली. ऊ नूरे के इलाका में रहेली. “हम आपन दिन उनकरी खातिर दाल-रोटी बना के शुरू करेनी आ फिर उन्हनी के स्कूले भेज देनी.” अपनी बेटियन के गईला के बाद अंजू के लगे खाली समय रहेला. “ए इमारत में हमार एगो दोस्त बा, कबो-कबो हमनी के अपनी पतियन के बारे में बात करेनी जा उन्हनी पर हंसेनी जा,” उ कहेली. अंजू जब 15 बरिस के रहली त ऊ अपनी पति से मिलली आ उनके प्यार हो गईल. “उ अल्हड़ उमिर के प्यार रहे,” उ कहेली. जब उनके माता-पिता के पता चलल त अंजू ओकरी से बियाह करे पर अड़ गईली. “हम कहनी कि हम केहू अउरी से बियाह करब त मर जाईब.”

उ बतावेली कि बियाह के बाद अंजू आ उनकर पति संघे कुछ अच्छा दिन बितावल लोग. आ ओकरी बाद, कुल बदले लागल. “उ मार-पीट करे लगलन. हम जानत रहनी कि उ शराबी हवे. उ हमके पीटे आ कुछ समय बाद, शराब के दोष के हमसे माफ़ी मांग लेवे.”

कोविड-19 लॉकडाउन में मार-पीट बढ़ गईल. घरवाला के ट्रक ड्राईवर के नोकरी चल गईल रहे आ उ नशा पताई करे शुरू कर देले रहस. अंजू कहेली, “हमनी के किराया पर रहेनी जा आ 2000 रुपिया महीना दिहल लगभग असंभव हो गईल बा. हम दू महीना से किराया नईखी देले. हम बाहर काम करे जाए के भी सोचनी बाकिर अपनी बेटियन के अकेल ना छोड़ सकेनी. हमरा डर बा कि उन्हनी के बाप उन्हनी के पीटी. एक बेर उ हमरी सबसे छोट बेटी के पीट चुकल बा.” अब उनकर पति ऑटो रिक्शा चलावेला जेकरी खातिर ओके रोज 350 रुपिया किराया देवे के पड़ेला.

राष्ट्रीय महिला आयोग के आंकड़ा के अनुसार भारत में घरेलू हिंसा के 6,000 मामला दर्ज कईल गईल बा. एमे उत्तर प्रदेश (15,762) आ दिल्ली (2,387) सबसे आगे बा (2023-2024). राष्ट्रीय परिवार स्वास्थ्य सर्वेक्षण 5 (2019-2021) के अनुसार 18-49 बरिस के उमिर के 31.2 प्रतिशत विवाहित महिला लोग आपन घर में पति के मार-पीट सहेला.

अंजू के बेमार पिताजी भी आसपास रहेलन आ अपनी घर के देखभाल के संघे संघे उनकरो देखभाल करे के पड़ेला काहें कि उनकी माई अब नइखी. उ कहेली, “हमार एगो छोट बहिन बा, जवन घर चलावेले एसे हम अपनी पिता के देखभाल आ ओकर मदद करे चाहेनी.”

“हम अपनी पति के ना छोड़ सकेनी,” अंजू कहेली, “हम ही त ओके चुनले रहनी.” उनकर बहिन कबो-कबो उनके घरे लउट आवे के कहेले. “‘तें अब्बो ओ राक्षस संघे काहें रहत बाड़े?’ उ हमसे पूछेले बाकिर हम अपनी पिता पर बोझ ना बने चाहेनी. इहे हमार किस्मत हवे, एसे भाग ना सकेनी.”

अनुवाद: विमल चन्द्र पाण्डेय