ممبئی: ترقی کے نام پر انہدامی کارروائی

غریب نگر کی فضا گرد وغبار اور غم میں ڈوبی ہوئی ہے۔

ممبئی کے باندرہ ایسٹ (مشرق) میں ۱۹ سے ۲۳ مئی ۲۰۲۶ کے درمیان چلائی جانے والی تجاوزات مخالف مہم میں تقریباً ۵۰۰ جھگیوں کو توڑ دیا گیا۔ یہ جھگیاں اُن مزدوروں اور گھریلو ملازماؤں کی تھیں جو یومیہ اجرت پر کام کرتے ہیں۔

یہاں چاروں طرف ملبہ بکھرا پڑا ہے۔

عالیہ شیخ، رخسار خان افسر، اسماء شیخ اور حنا خان ایک ترپال کے نیچے سر جوڑ کر بیٹھی ہیں۔ اس مسلم اکثریتی علاقہ میں وہ اس فٹ پاتھ پر سو رہی ہیں، جس کے بالکل سامنے ان کے گھر ہوا کرتے تھے، جو کئی دہائیوں سے یہاں موجود تھے۔

غریب نگر کے رہائشیوں کو ۱۷ مئی کی شام ایک نوٹس جاری کیا گیا، جس میں کہا گیا تھا کہ باندرہ جنکشن کے ارد گرد کی تمام بستیوں کو دو دن کے اندر مسمار کر دیا جائے گا۔

کچھ دنوں بعد عید تھی، جسے اس بستی کے زیادہ تر رہائشی مناتے ہیں۔ ’’انسان کی انسانیت کہاں ہے؟‘‘ ۵۲ سالہ گھریلو خاتون عالیہ اس رپورٹر سے سوال کرتی ہیں۔ انہوں نے اپنی بہو اور تین پوتے پوتیوں کے لیے جو نئے کپڑے خریدے تھے، وہ ان کے دیگر سامان کے ساتھ اب بھی بندھے پڑے ہیں۔

یہ انہدامی کارروائی بامبے ہائی کورٹ کے ۲۹ اپریل ۲۰۲۶ کے ایک حکم نامہ پر عمل کرتے ہوئے چلائی جا رہی تھی۔ اس حکم نامہ میں مغربی ریلوے کو ’’اس کے توسیعی منصوبہ کے تحت باندرہ اسٹیشن کے قریب ریلوے کی زمین پر غیر قانونی تسلیم کی جانے والی تعمیرات کو مسمار کرنے کا سلسلہ جاری رکھنے کی اجازت دی گئی تھی۔‘‘

غریب نگر کے رہائشی اس صورتِ حال سے بے خبر تھے۔ رخسار بتاتی ہیں، ’’پولیس گاڑیوں میں سوار ہو کر آئی اور لاؤڈ اسپیکر پر اعلان کیا کہ ہم اپنا سامان ہٹا لیں، کیونکہ بی ایم سی کی گاڑیاں آ رہی ہیں۔‘‘

رخسار نے چند کپڑوں اور ایک چارپائی پر مشتمل اپنا سامان جمع کیا اور کلیم سیٹھ کی اسکریپ (کباڑ) کی دکان سے باہر آ گئیں، جسے انہوں نے اسی صبح جھاڑو لگا کر صاف کیا تھا۔

یہاں منہدم مکانوں کا ملبہ ہٹانے کا کام اب بھی جاری ہے۔ بے بس مکین کسی اور فٹ پاتھ پر منتقل ہو گئے ہیں، لیکن یہاں گشت کر رہی پولیس کا کہنا ہے کہ وہ جگہ بھی ان کے لیے غیر قانونی ہے۔

دریں اثنا، مقامی رہائشی اور رضاکار اب بے گھر ہو چکے کنبوں کے لیے کھانا اور پانی لے کر آ رہے ہیں۔ کسی سرکاری امداد کا اعلان نہیں کیا گیا ہے۔ اس رپورٹر نے مغربی ریلوے سے رابطہ کرنے کی کوشش کی، لیکن ان کی طرف سے کوئی جواب نہیں ملا ہے۔

انہدامی کارروائی سے پہلے، رخسار غریب نگر کی دکانوں میں جھاڑو لگا کر روزانہ تقریباً ۲۰۰ روپے کما لیتی تھیں۔ اب وہ تمام دکانیں ملبے کا ڈھیر بن چکی ہیں۔ وہ کوئی کرایہ نہیں دیتی تھیں۔ کلیم سیٹھ کی دکان کے باہر رات گزارنے کے عوض، وہ ہر صبح وہاں جھاڑو لگا کر صفائی کر دیا کرتی تھیں۔

رخسار کے اخراجات کم تھے لیکن ناگزیر تھے۔ انہیں باندرہ اسٹیشن کے پل کے نیچے موجود عوامی بیت الخلاء میں غسل کرنے کے لیے ۲۵ روپے اور کپڑے دھونے کے لیے ۲۰ روپے ادا کرنے پڑتے تھے۔

صرف صفائی ستھرائی پر روزانہ ان کی آمدنی کا تقریباً ایک چوتھائی حصہ، یعنی ۴۵ روپے خرچ ہو جاتا ہے۔ کھانے کے بارے میں رخسار کا کہنا ہے کہ ان کے پڑوسیوں نے اپنے باورچی خانے ان کے لیے کھول دیے تھے۔ عالیہ اس کی تصدیق کرتے ہوئے کہتی ہیں، ’’ہم سب مل کے دیتے تھے کھانا، ہمارے ساتھ ہی کھاتی تھی۔‘‘

یہ پہلا موقع نہیں ہے جب رخسار کو بے سروسامانی کے عالم میں از سر نو زندگی کی شروعات کرنی پڑ رہی ہو۔ وہ ممبئی کے مختلف علاقوں میں ایک دہائی تک سڑکوں پر زندگی گزارنے کے بعد، ۲۰۰۶ میں غریب نگر آئی تھیں۔ یہاں پہنچ کر ہی انہیں زندگی میں پائیداری کا احساس ہوا تھا۔ وہ کہتی ہیں، ’’جب میں رات کو یہاں سوتی تھی تو کوئی مجھے تنگ نہیں کرتا تھا۔‘‘

برسوں تک بےگھر رہنے کے بعد وہ جو واحد گھر انہوں نے تعمیر کیا تھا، وہ بھی اب ختم ہو چکا ہے۔

آندھرا پردیش کے شری ستیہ سائیں ضلع میں پیدا ہوئیں رخسار کا پرانا نام آدی لکشمی ریڈی تھا۔ وہ ۱۹۹۰ میں ایک سیاح کے طور پر ممبئی آئی تھیں۔ کوڈپا گنی پلّی گاؤں کی رہنے والی آدی لکشمی ریڈی نے بعد میں اپنے مرحوم شوہر، شیر افسر خان کے ساتھ بھاگ کر شادی کر لی تھی اور نیا نام اور نیا مذہب اختیار کر لیا تھا۔

یہ شادی زیادہ عرصہ تک نہ چل سکی۔ ان کا کہنا ہے کہ ۱۹۹۶ میں جب وہ اپنے چوتھے بچے کے ساتھ حاملہ تھیں، تو سسرال والوں نے انہیں گھر سے زبردستی نکال دیا تھا۔ اگرچہ ان کے چاروں بچے اب جوگیشوری میں رہتے ہیں، جو غریب نگر سے تقریباً ۱۰ کلومیٹر دور ہے، لیکن دو دہائیوں سے زیادہ عرصے سے ان کا اپنے بچوں سے کوئی رابطہ نہیں ہے۔

رخسار کو باندرہ ٹرمینس پر پلاسٹک کی بوتلیں چھانٹنے کے کام کی پیشکش کی گئی ہے۔ ’’پلاسٹک کی بوتل سے لیبل نکالنے کا، چاقو سے ڈھکن نکالنے کا،‘‘ وہ بتاتی ہیں۔

اس نئے انتظام کے ساتھ کئی مشکلات بھی وابستہ ہیں۔ رخسار کہتی ہیں، ’’وہاں بیت الخلاء کی سہولت نہیں ہے۔ ہر صبح نہانے اور کپڑے دھونے کے لیے مجھے یہاں واپس آنا پڑے گا۔ یہاں تک پیدل پہنچنے میں ایک طرف سے تقریباً ۱۰ سے ۱۵ منٹ کا وقت لگتا ہے۔‘‘

اس نئی ملازمت سے ان کے اخراجات پورے ہو جائیں گے اور انہیں سونے کی جگہ بھی مل جائے گی۔ رخسار کہتی ہیں، ’’کدھر بھی جائیں گے تو تھوڑے دن کے ہی مہمان ہیں، پھر بھٹک کے ادھر ہی آنا پڑے گا۔‘‘