मुंबई में: विकास जे नाले ते सरकार माण्हुनि जा घर डाहे रही आहे

ग़रीब नगर जी हवा दज़ियल आहे ऐं माहौल में उदासी पिणु आहे।

19 खां 23 मई 2026 जे विच में हिक अतिक्रमणु विरोधी मुहिम बांद्रा ईस्ट, मुंबई में लॻभॻि 500 झोपड़ियुनि खे तबाह करे छॾियो। डाहियल झूपड़ियूं घरेलू कमु कंदड़नि ऐं ॾिहाड़ी मज़ूरनि जूं हुयूं।

हर हंधि मलिबो ई मलिबो आहे।

हिकु तालपत्री जे हेठां, आलिया शेख़, रुख़सार ख़ान अफ़सर, असमा शेख़ ऐं हीना ख़ान गॾिजी वेठियूं आहिनि। इहे ड॒हाकनि खां इन मुस्लिम घणाई वारे इलाइक़े में पंहिंजनि घरनि में आबादु हुयूं, हाणे फ़ुटपाथ ते सुम्हनि पियूं।

ग़रीब नगर जे माण्हुनि खे 17 मई, 2026 जी शाम जो इंतिज़ामिया पारां इहो नोटिस डि॒नो वियो त बांद्रा जंक्शन जे आसपासि सभेई वसंदियूं ॿिनि ॾींहनि जे अंदरि केराइबियूं।

हिते जा केतिरा ई माण्हू ईद मल्हाईंदा आहिनि, ऐं ईद अचण में थोरा ई ॾींहं रहिजी विया हुआ। अटिकल 52 सालनि जी घरधियाणी आलिया हिन ख़ाबिरू खां पुछे थी, “इंसान की इंसानियत कहां है [माण्हुनि में माण्हिपाई किथे आहे]?” हुन पंहिंजी नुंहुं ऐं पोटनि पोटियुनि जे लाइ नवां कपड़ा ख़रीदु कया हुआ, उहे अञा बि बाक़ी सामान सां गॾु ॿधियल आहिनि।

बॉम्बे हाई कोर्ट द्वारां 29 अप्रैल, 2026 जो ॾिनल हुकुमु बैदि हीअ कारवाई कई वेई, जंहिं हुकुम में वेस्टर्न रेलवे जे वाधारे जी रिथा तहति बांद्रा स्टेशन वटि रेलवे जी ज़मीन ते बेइख़्तियार वसंदियुनि खे डाहिण जी मोकल हुई।

ग़रीब नगर जा रहिवासी बिलकुलु बेख़बर हुआ। रुख़सार चवे थी, “पुलिस गाॾियुनि में आई ऐं लाउडस्पीकरन ते ऐलानु कयो त पहिंजो सामान हटायो छो त बीएमसी जूं गाॾियूं अची रहियूं आहिनि।”

हुन पंहिंजा टपड़ ब॒धी छॾिया— जंहिं में लटा वगै़रह ऐं हिकड़ी चारपाई[खट] हुई, ऐं कलीम सेठ जे भंगार जे दुकान ॾांहुं हली वेई जिते हुन सुबुह जो ई ॿुहारी ॾिनी हुई।

साइट ते मलिबो हटाइण जो कमु जारी आहे। लाचार कुटुंब ॿीअ फुटपाथ ते लॾण जी कोशिश पिया कनि, पर लाॻीतो ईंदड़ पुलिस चवे थी त इहा जाइ बि झूपिड़ियुनि वारनि लाइ कोन्हे।

इन दौरानि मकानी रहिवासी ऐं रज़ाकार हाणे बेघरु परीवारनि जे लाइ दाणे पाणी जो बंदोबस्तु कंदा पिया अचनि। को बि सरकारी राहत जो ऐलानु न कयो वियो आहे। हिन रिपोर्टर वेस्टर्न रेलवे सां राबितो कयो, पर को बि जवाबु न मिलियुसि।

वसंदी केराइण खां अॻु, रुख़सार खे ग़रीब नगर जे दुकाननि मां ॿुहाराणी तौरु 200 रुपया जुड़ी पवंदा हुआ। उहे सभेई दुकान हाणे मलबे में तब्दील थी विया आहिनि। उन्हनि जूं मसिवाड़ूं ई न हुयूं। मोट में हूअ राति जो कलीम सेठ जे भंगार जे दुकान जे ॿाहिरि सुम्हंदी हुई ऐं हर रोज़ु सुबुह जो दुकानु साफ़ु कंदी हुई।

रुख़सार जा ख़र्च एतिरा न हुआ, पर उन्हनि बिना सरंदी बि न हुई। बान्द्रा स्टेशन जे पुल जे हेठां पब्लिक टॉयलट में सनान जा 25 रुपया ऐं कपड़ा धोइण जा 20 रुपया।

ॾींहं जा 45 रुपया — हुनजी कमाई जो अटिकल चौथों हिस्सो — सिर्फ़ि साफ़ु-सुथरो रहण ते ख़र्चु थी वञे थो। रुख़सार ॿुधाए थी त संदसि पाड़ेवारा हुन खे मानी खाराए छॾींदा हुआ। आलिया बि हामी भरे थी,”हम सब मिलके देते थे खाना, हमारे साथ ही खाती थी [असीं सभु मिली करे रुख़सार खे मानी ॾींदा हुआसीं, असां सां गॾु ई खाईंदी हुई]।”

रुख़सार जे लाइ इहो पहिरियों भेरो नाहे, जॾहिं खेसि धुर खां वरी शुरू करणो पियो पवे। मुंबई जे जुदा-जुदा इलाइक़नि में अटिकल ॾहनि सालनि ताईं सड़कुनि ते गुज़ारण बैदि हूअ 2006 में ग़रीब नगर में आई हुई। हिते ई अची पहिरियों भेरो अहिसासु थियसि त हाणे हुन वटि रहण जे लाइ अझो आहे। हूअ चवे थी, “रात जो सुम्हंदे महिल केरु बि तंगु न कंदो हो।”

हाणे सालनि खां बेघर ज़िंदगी बैदि जेको आख़िरीं आसिरो हुयो उहो बि हुन खां खसिजी वियो आहे।

आंध्र प्रदेश जे श्री सत्य साई ज़िले जे कोडापागनिपल्ली ॻोठ में आदि लक्ष्मी रेड्डी जे नाले सां पैदा थियल रुख़सार 1990 में हिक सैलानी तौरु मुंबई आई हुई। पोइ पंहिंजे मरहूमु मुड़िसु शेर अफ़सर ख़ान सां गॾु हिते भॼी आई। निकाह बैदि नओं नालो रखियाईं ऐं नओं मज़हबु क़बूल कयाईं।

पर हीअ शादी नाकामु थी वेई। रुख़सार ॿुधाए थी त 1996 में, जॾहिं चोथें दफ़े पेट सां थी, त साहुरनि घरां कढे छडि॒यो। संदसि चारेई ॿार हाणे ग़रीब नगर खां अटिकल 10 किलोमीटर जोगेश्वरी में रहनि था। पर गुज़िरियल वीह सालनि खां उन्हनि सां को रस्तो नाहे।

रुख़सार खे हाणे बांद्रा टर्मिनस ते प्लास्टिक जूं बोतलूं चूंडण जो कमु मिलियो आहे। हूअ चवे थी,”स्टिक की बॉटल से लेबल निकालने का, चाकू से ढक्कन निकालने का [मूंखे प्लास्टिक जी बोतल मां लेबल लाहिण ऐं कप सां ढकि लाहिण जो कमु करणो हूंदो आहे]।”

लेकिनि इन नएं कम सां गॾु नयूं मुश्किलूं बि आहिनि। रुख़सार चवे थी, “हिते काकूस ई नाहे। रोज़ानो सुबुह जो सनान ऐं कपड़ा धोइण जे लाइ मूंखे 10–15 मिंट पंधु करणो पवंदो आहे।”

उमेद आहे त इन कम सां संदसि ख़र्चु निकरी ईंदो ऐं सुम्हण लाइ जाइ बि थी वेंदसि। रुख़सार चवे थी, किधर भी जाएंगे तो थोड़े दिन के ही मेहमान हैं, फिर भटक के इधर ही आना पड़ेगा [जिते बि वेंदासीं हुते थोरनि ॾींहनि जा मिज़मान ई हूंदासीं, पोइ त धिका झले हिते ई अचणो पवंदो]।”