मुंबई मं विकास के मार झेलत गरीब

गरीब नगर के हवा ह धुर्रा अऊ दुख ले भराए हवय.

19 ले 23 मई, 2026 तक चलाय गे अतिक्रमण-विरोधी अभियान मं मुंबई के बांद्रा ईस्ट मं करीबन 500 झुग्गी टोरे गिस. ये झुग्गी मन रोजी मजूरी करेइय्या अऊ घर-घर जाके काम करेइय्या मन के घर रहिस.

हरेक जगा मलबा परे हवय.

एक ठन तिरपाल तरी आलिया शेख, रुखसार खान अफ़सर, अस्मा शेख अऊ हिना खान एक संग बइठे हवंय. ओ मन कतको बछर ले ये मुस्लिम-बहुल इलाका मं अपन जुन्ना घर के ठीक आगू फुटपाथ मं सोवत हवंय.

17 मई के संझा गरीब नगर के बासिंदा मन ला एक ठन नोटिस मिलिस के बांद्रा जंक्शन के तीर-तखार के सब्बो बस्ती मन ला दू दिन के भीतर गिरा दे जाही.

इहाँ रहेइय्या अधिकतर लोगन मन ईद के तिहार मनाथें, अऊ ये तिहार बस मुछेक दिन मं अवेइय्या रहिस. 52 बछर के घर गृहस्थी वाली आलिया ये रिपोर्टर ले सवाल करत कहिथे,”इंसान की इंसानियत कहाँ है?” अपन बहूरिया अऊ तीन झिन पोता-पोती मन बर बिसोय नवा कपड़ा ओकर मन के बाक़ी सामान के संग वइसनेच भराय राखे हवय.

ये तोड़-फोड़ बॉम्बे हाई कोर्ट के 29 अप्रैल, 2026 मं जारी वो आर्डर के तहत करे गिस, जेन मं वेस्टर्न रेलवे ला अपन विस्तार योजना के तहत बांद्रा टेसन के तीर रेलवे ज़मीन मं बने वो निर्मान मन ला टोरे के काम करत रहे के इजाजत दे गे रहिस, जेन ला वो ह गैर क़ानूनी मानथे.

गरीब नगर के लोगन मन अचानक होय ये कार्रवाई ले हैरान रहिगे. रुखसार कहिथे, ‘पुलिस गाड़ी मन मं आइस अऊ लाउडस्पीकर (पोंगा) मं घोसना करिस के हमन अपन सामान हटा लेवन, काबर के बीएमसी के गाड़ी मन आवत हवंय’

वो ह अपन सामान- कुछु कपड़ा अऊ एक ठन चारपाई (खटिया)- संकेल लिस अऊ कलीम सेठ के कबाड़ दुकान ले बहिर निकर गिस, जेन ला वो ह आज बिहनिया बुहारे रहिस.

वो जगा ले मलबा हटाय के काम चलत हवय. लाचार परिवार दूसर फुटपाथ मं चले गे हवंय, फेर पुलिस के कहना आय के उहाँ घलो जाय के मनाही हवय अऊ ओ मन घेरी-बेरी उहाँ चक्कर लगावत रहिथें.

येकर बीच, इहाँ के बासिंदा अऊ समाजिक कार्यकर्ता मन बेघर परिवार मन बर खाय-पीये के जिनिसभेजत हवंय. अब तक ले कोनो सरकारी राहत के घोसना करे नइ गे हवय. ये रिपोर्टर ह वेस्टर्न रेलवे ले संपर्क करिस, फेर कोनो जुवाब नइ मिलिस.

टूटे के पहिली, रुखसार गरीब नगर के दुकान मन मं झाड़ू लगाके रोज के करीबन 200 रूपिया कमावत रहिस: अब वो सब्बो दुकान मन मलबा के ढेरी बन चुके हवंय. ओला कोनो भाड़ा देय ला नइ परत रहिस. कलीम सेठ के दुकान के बहिर रतिहा मं सुते के बदले, वो ह रोज बिहनिया दुकान के झाड़ू-पोछा करत रहिस.

रुखसार के खरचा कम रहिस, फेर जरूरी रहिस: बांद्रा टेसन के पुल तरी मं बने सार्वजनिक शौचालय मं नुहाय बर 25 रूपिया अऊ कपड़ा धोय बर 20 रूपिया.

रोज के 45 रूपिया- जेन वो कमाथे ओकर करीबन एक चौथाई – सिरिफ साफ़-सफ़ाई मं खरचा हो जाथे. रुखसार कहिथे के खाय बर,ओकर परोसी मन अपन रसोई खोल दे हवंय. आलिया ओकर गवाही देवत कहिथे, “हम सब मिलके देते थे खाना, हमारे साथ ही खाती थी.”

ये ह पहिली बेर नो हे जब रुखसार ला सब्बो कुछु गंवा के नवा सुरुआत करे ले परे हवय. मुंबई के अलग-अलग इलाका मं दस बछर तक ले सड़क मं रहे के बाद, वो ह साल 2006 मं गरीब नगर आइस. इहाँ वो ह एक किसम के थिरअऊ सुरच्छा मसूस करिस. वो ह कहिथे, “जब मंय रात मं इहाँ सुतत रहंय, त कोनो घलो मोला परेशान नइ करत रहिस.”

अब, कतको बछर तक ले बेघर रहे के बाद वो ह जेन एक कुरिया बनाय रहिस, वो ह घलो चले गे.

आंध्र प्रदेश के श्री सत्य साईं जिला मं आदि लक्ष्मी रेड्डी के रूप मं जन्मे रुखसार साल 19 90 मं घूमे बर मुंबई आय रहिस. कोडपागनीपल्ली गाँव के बासिंदा रुखसार ह बाद मं अपन गुजरे घरवाला शेर अफ़सर खान के संग घर छोड़ दिस अऊ बिहाव के बाद नवा नांव अऊ धरम अपना लिस.

ओकर बिहाव जियादा दिन तक ले नइ चलिस. साल 1996 मं, जब वो ह अपन चौथा लइका के महतारी बनेइय्या रहिस, त ओकर कहना आय के ओला ससुराल ले निकार दे गिस. वइसे ओकर चारों लइका अब जोगेश्वरी मं रहिथें, जेन ह गरीब नगर ले करीबन 3 कोस दूरिहा हवय, ओकर बाद घलो बीते 20 बछर ले जियादा बखत ले ओकर लइका मन ले कोनो संपर्क नइ रहे हवय.

रुखसार ला बांद्रा टर्मिनस मं प्लास्टिक के बोतले निमारे के काम मिले हवय. वो ह बताथे, “प्लास्टिक की बोतल से लेबल निकालने का, चाकू से. ढक्कन निकालने का.”

ये नवा बेवस्था के संग कतको समस्या घलो हवंय. रुखसार कहिथे, “उहाँ कोनो शौचालय नइ ये. हरेक बिहनिया मोला नुहाय-धोय बर इहाँ आय ला परथे. आय-जाय मं 10-15 मिनट रेंगे ला परथे.”

लगे काम-बूता ले ओकर खरचा निकरही अऊ वोला सुते के जगा घलो मिलही. रुखसार कहिथे, ”किधर भी जाएंगे,थोड़े दिन के ही मेहमान हैं, फिर भटक के इधर ही आना पड़ेगा.”