’مرنے کے بعد بھی قرض پیچھا نہیں چھوڑتا‘

مہاراشٹر کے دھاراشیو ضلع میں رہنے والی ۴۲ سالہ سنجیونی بیڑگے کہتی ہیں، ’’ہم سرکاری اسکیموں کے بارے میں کیسے جانیں گے؟ ہمارے لیے بنی اسکیموں کی معلومات فراہم کرنے والا کوئی نہیں ہے۔‘‘ وہ تلجاپور تعلقہ کے جلکوٹ گاؤں میں کسان ہیں اور اپنی مالی حالت کو تھوڑا بہتر کرنے کی کوشش میں وہ دوسروں کے کھیتوں میں مزدوری بھی کرتی ہیں۔ سال ۲۰۲۰ سے ہی وہ مختلف سرکاری اسکیموں کے لیے رجسٹریشن کرانے کی کوشش کر رہی ہیں، لیکن ان کی ہر کوشش ناکام رہی ہے۔ سنجیونی بتاتی ہیں، ’’لاک ڈاؤن سے کچھ دنوں پہلے ۲۴ جنوری ۲۰۲۰ کو میرے شوہر شنکر نے اپنی جان دے دی۔ لیکن آدمی مر جاتا ہے، مگر قرض نہیں۔ میرے شوہر نے قرض کے بوجھ تلے دبا ہونے کی وجہ سے خودکشی کر لی۔ اب میں روزانہ اسی بوجھ کے ساتھ جی رہی ہوں۔‘‘

ان کے آنجہانی شوہر کے والد کے پاس جلکوٹ میں پانچ ایکڑ کی زرعی زمی ہے، جس پر شنکر اور ان کے تین بھائی مل کر کھیتی کرتے تھے۔ سنجیونی بتاتی ہیں، ’’ہمارے کھیت بارش پر منحصر ہیں اور یہاں سینچائی کا کوئی انتظام نہیں ہے، لیکن پھر بھی ہم کچھ ایسی فصلیں اُگاتے ہیں جس میں سینچائی کی زیادہ سے زیادہ ضرورت ہوتی ہے، کیوں کہ ان کی قیمت بہتر ملتی ہے۔ برسات میں ہم سویابین اور تور بوتے ہیں، اور دیوالی کے بعد جوار، گیہوں اور کالے چنے کی فصل لگائی جاتی ہے۔‘‘

سال ۲۰۱۱ سے ۲۰۱۴ تک جوار، گیہوں اور کالے چنے کی قیمت تقریباً ۲۲۰۰ روپے فی کوئنٹل تھی۔ سویابین اور تور کی قیمت تقریباً ۵۰۰۰ روپے فی کوئنٹل تھی۔ گھر کے کھانے کے لیے اناج الگ کرنے کے بعد ان کے پاس سردی کی فصل میں تقریباً ۴ کوئنٹل بچتا تھا۔ اس کی قیمت تقریباً ۲۶۴۰۰ روپے ہوتی تھی۔ سویابین اور تور کی فصل ۵-۵ کوئنٹل بچ جاتی تھی۔ اس کی قیمت تقریباً ۵۰ ہزار روپے ہوتی تھی۔ اس طرح ان کی سالانہ آمدنی تقریباً ۷۶ ہزار ۴۰۰ روپے تھی۔ سنجیونی نے بتایا کہ یہ پیسہ چار برابر حصوں میں چاروں بھائیوں کے خاندانوں کے درمیان تقسیم ہوتا تھا۔

وہ بتاتی ہیں، ’’ہم سب جس کچے گھر [پھوس کی چھت والا مٹی کا مکان] میں رہتے تھے، اس میں بہت پریشانیاں تھیں۔ خاص کر بارش میں چھت ٹپکتی تھی اور ہمارے بچے اکثر بیمار پڑ جاتے تھے۔ اور علاج بہت مہنگا ہے۔‘‘

بیڑگے ۱۵ رکنی خاندان تھا، جو تین کمروں کے تنگ مکان میں انتہائی مشکل حالات میں رہتا تھا۔ جگہ کی تنگی کو کم کرنے کے لیے تمام بھائیوں نے اپنا الگ الگ گھر بنانے کا فیصلہ کیا۔ اس کے لیے انہوں نے اپنی آدھا ایکڑ زمین پر گھر بنانے کا منصوبہ بنایا۔ شنکر نے یہ خرچ اٹھا پانے کے لیے نجی ساہوکار سے قرض لیا۔ چونکہ ان کے اور سنجیونی کے دو بیٹے ہیں، اس لیے وہ چار لوگوں کے لیے دو کمروں اور باورچی خانہ والا گھر بنوانا چاہتے تھے۔

سال ۲۰۱۵ میں، شنکر نے اپنے گاؤں کے ایک نجی ساہوکار سے ۱۰ فیصد ماہانہ شرح سود پر ساڑھے تیرہ لاکھ روپے کا قرض لیا۔ سنجیونی اپنی ساڑی کا پلّو سر پر کھینچتے ہوئے کہتی ہیں، ’’تبھی سے ہماری مشکلیں بڑھنی شروع ہو گئیں۔‘‘ یہاں کی زیادہ تر بیوہ عورتوں کی طرح سنجیونی بھی کبھی بِندی (پیشانہ کا ٹیکہ) نہیں لگاتیں۔

سال ۲۰۱۵ کا مانسون مراٹھواڑہ خطہ کے لیے بیحد خراب رہا، خاص کر دھاراشیو ضلع کے لیے (جسے باضابطہ طور پر نام بدلنے سے پہلے عثمان آباد کہا جاتا تھا)۔ سال ۲۰۱۶ میں حکومت مہاراشٹر نے اس خطہ کو خشک سالی سے متاثرہ ہونے کا اعلان کر دیا۔ سنجیونی کہتی ہیں، ’’پینے کا پانی لانے میں ہی بہت مشقت کرنی پڑتی تھی، کھیت کی سینچائی کے لیے پانی کا انتظام کرنا تو ناممکن تھا۔‘‘ سال ۲۰۱۶ میں ہونے والی خشک سالی کے دوران سنجیونی کو ہر دوسرے دن تقریباً ایک کلومیٹر پیدل چل کر پاس کے کنویں سے پانی لانا پڑتا تھا، جہاں لمبی قطاریں لگی ہوتی تھیں۔ وہ بتاتی ہیں، ’’میں تین گھاگری [پانی کے گھڑے] بھر کر لاتی تھی۔ صبح چھ بجے اٹھ کر گھر کے سارے کام نمٹانے کے بعد تقریباً ۱۰ بجے پانی لینے نکلتی تھی۔‘‘ وہ کہتی ہیں کہ یہ خشک سالی ان کی زندگی کا سب سے مشکل وقت تھا۔ سنجیونی کہتی ہیں، ’’پینے کا پانی ہی نہیں تھا۔ گاؤں کے امیر کسان پورے ٹینکر کا پانی خرید لیتے تھے۔ ہمارے پاس اتنا پیسہ نہیں تھا کہ اتنا خرچ اٹھا پائیں۔ ہم اتنا خرچ نہیں اٹھا سکتے تھے۔ اوپر سے پانی لانے کی ذمہ داری کے سبب میں کسی اور کے کھیت میں مزدوری بھی نہیں کر سکتی تھی۔ یعنی پانی لانے کا مطلب تھا کہ مزدوری سے ہاتھ گنوانا۔

سنجیونی بتاتی ہیں، ’’تو ۲۰۱۶-۱۷ میں خشک سالی رہی اور ۲۰۱۸-۱۹ میں بھی یہی حال رہا۔ ان برسوں میں لگاتار فصلیں برباد ہوئیں۔ ہماری سالانہ کمائی گھٹ کر تقریباً ۱۳ ہزار روپے رہ گئی۔ اس دوران میرے شوہر قرض نہیں ادا کر پائے۔ اور بڑھتے قرض کے بوجھ سے مایوس ہو کر انہوں نے اپنی جان دینے کا فیصلہ کر لیا۔‘‘ چوبیس جنوری ۲۰۲۰ کو شام تقریباً ۴ بجے شنکر نے پڑوسی کے کھیت میں ایک درخت سے پھانسی لگا لی۔ نیشنل کرائم ریکارڈ بیورو (این سی آر بی) کے اعدادوشمار کے مطابق، صرف اسی سال پورے ملک میں ۱۰ ہزار ۶۰۰ سے زیادہ کسانوں اور زرعی مزدوروں نے خودکشی کی تھی۔ شنکر بھی ان میں سے ایک تھے۔

این سی آر بی کی سالانہ رپورٹوں سے حاصل کردہ ریاست وار اعدادوشمار کے مطابق، ۱۹۹۵ سے ۲۰۱۸ کے درمیان ہندوستان میں تقریباً ۴ لاکھ کسانوں نے خودکشی کی۔ مہاراشٹر گزشتہ ایک دہائی سے زیادہ وقت سے کسانوں کی خودکشی کی سب سے زیادہ تعداد والی ریاست رہی ہے۔ صرف سال ۲۰۲۵ کے پہلے تین مہینوں میں ہی ریاست میں ۷۶۷ کسانوں نے خودکشی کی۔ ان میں سے صرف مراٹھواڑہ علاقہ میں ۲۶۹ معاملے درج ہوئے۔ یہ تعداد ۲۰۲۴ کے مقابلے ۳۲ فیصد زیادہ ہے۔ پی ٹی آئی کی رپورٹ کے مطابق، سال ۲۰۲۴ میں اس مدت کے دوران ۲۰۴ کسانوں کی خودکشی درج کی گئی تھی۔

شنکر کی فیملی کو ایک لاکھ روپے کا معاوضہ دیا گیا، جس میں ۳۰ ہزار روپے کا چیک اور پوسٹ آفس اسکیم کے تحت ۷۰ ہزار روپے کی ایف ڈی شامل ہے جو پانچ سال بعد (۲۰۲۶ میں) میچیور ہوگی۔ سنجیونی نے ۳۰ ہزار روپے کا چیک ساہوکار کو دے دیا، تاکہ شنکر کے ذریعہ لیے گئے قرض کی جزوی ادائیگی کی جا سکے۔

سنجیونی کہتی ہیں، ’’شوہر کی موت کے ساتھ ہی مجھے لگا کہ اب سب ختم ہو گیا ہے۔ ان کے بغیر میں اور میرے بیٹے کیسے زندگی بسر کریں گے؟ ایک مہینہ تک میں کچھ سوچ ہی نہیں پائی۔ تبھی [کورونا وبائی مرض کے سبب] لاک ڈاؤن کا اعلان کر دیا گیا۔ اور پھر ایک کے بعد ایک ہمیں کئی مشکلوں کا سامنا کرنا پڑا!‘‘

انہوں نے اپنے کھیت میں کام کرنے کے علاوہ دوسروں کے کھیتوں میں مزدوری کرنا شروع کیا۔ سنجیونی کہتی ہیں، ’’مجھے ہفتہ میں دو بار ہی کام ملتا تھا۔ کھیت کے مالکوں کو جتنی ضرورت ہوتی بس اتنا ہی۔ فروری سے مئی تک کٹائی اور پھر گھاس پھوس صاف کرنے کا کام ہوتا تھا۔ سال ۲۰۲۰ سے ۲۰۲۲ کے درمیان مجھے روزانہ ۱۰ روپے مزدوری ملتی تھی۔ اب مزدوری ۲۰۰ روپے یومیہ ہے۔‘‘ وہ مہینہ میں تقریباً ۱۲۰۰ روپے کماتی تھیں جو ان کی تین رکنی فیملی کے لیے بہت کم تھا۔ وہ مزید کہتی ہیں، ’’کورونا نے میرے بچوں کی پڑھائی پر بھی اثر ڈالا۔ میرا چھوٹا بیٹا، ابھشیک [جس کی عمر اب ۲۰ سال ہے] تک ۱۲ویں کلاس میں تھا۔ فیملی میں موت کے فوراً بعد میں اسمارٹ فون نہیں خرید پائی [اُس وقت ساری پڑھائی آن لائن ہو رہی تھی]۔ نتیجہ یہ ہوا کہ اس نے اسکول چھوڑ دیا۔ تب سے میرا چھوٹا بیٹا بھی روزانہ مزدوری کرنے لگا ہے۔ مجھے کافی تکلیف ہوتی ہے کہ میری مالی تنگی میرے بچوں کے مستقبل کو اس طرح متاثر کر رہی ہے۔‘‘

سنجیونی کا بڑا بیٹا رشی کیش ۲۱ سال کا ہے۔ اس نے ۲۰۲۰ میں ۱۲ویں کلاس کی تعلیم مکمل کر لی تھی اور آگے کی پڑھائی کے لیے کالج میں داخلہ لینے کی تیار کر رہا تھا۔ لیکن فیملی کی مالی تنگی کو دیکھ کر اسے لگا کہ وہ کالج کی فیس کے لیے ماں پر دباؤ کیوں ڈالے اور ۲۰۲۵ تک اس نے کچھ سالوں کا وقفہ لینے کا فیصلہ کیا۔ حالانکہ، اس سال اس نے نل دُرگ (دھاراشیو ضلع) کے بالا گھاٹ کالج میں داخلہ لیا ہے۔ اب وہ بی کام کے سال اول کا طالب علم ہے۔ اس کے کالج کی سالانہ فیس ۱۰۵۰ روپے ہے۔

سنجیونی کہتی ہیں، ’’ہمارے گاؤں کی کچھ بیوہ خواتین نے مجھے ودھوا پگار (سنجے گاندھی نرادھار انودان یوجنا) کے بارے میں بتایا۔ ورنہ مجھے اس اسکیم کے بارے میں کبھی پتہ ہی نہیں چلتا۔‘‘ اس اسکیم کے تحت ہر مہینے ۱۰۰۰ روپے کی سیدھی نقد رقم بے سہارا عورتوں کو دی جاتی ہے، جن میں بیوائیں بھی شامل ہیں۔ دلچسپ بات یہ ہے کہ اس اسکیم کو عام بول چال میں ودھوا پگار (بیوہ پنشن) کہا جاتا ہے۔ حالانکہ، اس اسکیم کے مستفیدین میں بیوائیں صرف ایک زمرہ ہیں۔ اس اسکیم کا رجسٹریشن تلجاپور کے تحصیل دفتر میں ہوتا ہے۔

سنجیونی کہتی ہیں، ’’میں اسکیموں کے لیے ضروری دستاویزوں کے بارے میں معلومات حاصل کرنے کے لیے سیدھے تحصیل دفتر تک گئی۔ وہاں جانے آنے میں رکشہ کا کرایہ ۲۰۰ روپے لگ جاتا ہے۔ وبائی مرض کے دوران تو بسیں بھی نہیں چل رہی تھیں۔ اس کے علاوہ، وہاں جانے کا مطلب ہے کہ دن بھر کا کام چلا جاتا ہے – جس سے مجھے ۱۵۰ روپے کا ایک اور نقصان ہوتا ہے۔ یعنی کہ جلکوٹ سے تلجاپور ۳۲ کلومیٹر کا سفر کر کے لوٹنے میں انہیں روزانہ ۳۵۰ روپے کا نقصان ہوا۔

سنجیونی کہتی ہیں، ’’تحصیل آفس میں مجھ سے کہا گیا کہ شوہر کا ڈیتھ سرٹیفکیٹ، بینک پاس بک، آدھار کارڈ کی کاپی، ووٹر آئی ڈی کارڈ، بی پی ایل (خط افلاس سے نیچے کا) سرٹیفکیٹ، رہائشی سرٹیفکیٹ اور اپنی تصویر کی کاپیاں لانی ہوں گی۔ میں گھر لوٹ آئی۔ پاس کے ایک اسٹوڈیو میں جا کر میں نے اپنی تصویر کھنچوائی۔ ان تمام دستاویزوں کو جمع کرنے میں مجھے ایک مہینہ کا وقت لگ گیا۔‘‘

آخرکار، ہر مہینے ۱۰۰۰ روپے کی پنشن پانے کی امید میں سنجیونی تمام ضروری دستاویزوں کے ساتھ تحصیل آفس واپس گئیں۔ لیکن وہاں انہیں اور بھی کئے مطالبات بتائے گئے۔

سنجیونی کہتی ہیں، ’’انہوں نے مجھ سے پوچھا کہ میں نے راشٹریہ کٹمب لاکھ یوجنا کا فارم کیوں نہیں بھرا۔ جب تک کوئی مجھے نہیں بتائے گا، مجھے اس فارم کے بارے میں کیسے پتہ چلے گا؟ میں تھک گئی ہوں روزانہ اس بات کو ثابت کرتے کرتے میں وہی لینے آئی ہوں جس پر میرا حق ہے۔‘‘ تین سال سے زیادہ وقت ہوگیا ہے، پھر بھی وہ ابھی تک اس اسکیم میں رجسٹر نہیں ہو پائی ہیں۔

سنجیونی ابھی بھی شنکر کے ذریعہ لیے گئے قرض کے بوجھ تلے دبی ہیں۔ انہوں نے بتایا، ’’پچھلے دو سال میں اپنی کمائی سے میں نے کسی طرح نجی ساہوکار کو ۵۰ ہزار روپے ادا کیے ہیں جو مجھ سے لگاتار پیسہ مانگتا رہتا ہے۔‘‘ حالانکہ، انہیں ابھی بھی سود کی رقم اور اصلی رقم ملا کر ۱۳ لاکھ روپے ادا کرنے ہیں۔

سنجیونی کہتی ہیں، ’’جب سے ہم اپنے مشترکہ خاندان سے الگ ہوئے ہیں، تب سے زرد راشن کارڈ کے لیے جدوجہد کر رہے ہیں۔ راشن کی دکان کے مالک نے مجھے بتایا کہ میرا نام مستفیدین کی فہرست میں شامل ہے، لیکن وہ راشن کارڈ تبھی دے گا جب میں اسے ۱۰۰۰ روپے دوں۔ یہ پیسہ میں کہاں سے لاؤں؟ خط افلاس سے نیچے (بی پی ایل) آنے والوں کے لیے یہ زرد راشن کارڈ ہوتا ہے، جس کے لیے ہم سے پیسہ مانگا جا رہا ہے۔ جو اسکیم ہمارے لیے بنائی گئی ہے اسی میں رجسٹریشن کرانا اتنا مشکل بنا دیا گیا ہے کہ یہ جدوجہد کبھی ختم نہیں ہوتی۔‘‘

اگر آپ کے من میں خودکشی کا خیال آتا ہے یا آپ ایسے انسان کو جانتے ہیں جو پریشان ہے، تو براہ کرم قومی ہیلپ لائن ’کرن‘ کو ۱۸۰۰-۵۹۹-۰۰۱۹ (۲۴/۷ ٹال فری) پر یا ان میں سے کسی بھی قریبی ہیلپ لائن نمبر پر کال کریں۔ ذہنی صحت کے شعبہ میں کام کر رہے لوگوں اور خدمات کے بارے میں معلومات حاصل کرنے کے لیے، براہ کرم ایس پی آئی ایف کے ذہنی صحت سے متعلق رہنما خطوط دیکھیں۔

ترجمہ نگار: قمر صدیقی