“চৰকাৰী আঁচনিৰ কথা আমি নিজে কেনেকৈ জানিম? আমাৰ বাবে যিবোৰ আঁচনি আছে, সেইবোৰৰ কথা আমাক কোনোৱে নকয়,” মহাৰাষ্ট্ৰৰ ধাৰাশিৱ জিলাৰ ৪২ বৰ্ষীয় সঞ্জীৱনী বেড়াগেয়ে কয়। তেওঁ তুলজাপুৰ তালুকৰ জলকোট গাঁৱৰ এগৰাকী খেতিয়ক। খেতিৰে নোজোৰে বাবে তেওঁ আনৰ পথাৰত হাজিৰা কৰি দুপইচা উপাৰ্জন কৰে। ২০২০ৰ পৰা তেওঁ বিভিন্ন আঁচনিৰ সুবিধা লাভৰ বাবে লাগি আছে যদিও বাৰে বাৰে তেওঁ বিফল হৈছে। “মোৰ স্বামী শংকৰে ২০২০ৰ ২৪ৰ জানুৱাৰীত আত্মহত্যা কৰিছিল, লকডাউন আৰম্ভ হোৱাৰ কেইদিনমান আগত,” সঞ্জীৱনীয়ে কয়। “মানুহ মৰি যায়, কিন্তু ধাৰ নমৰে। ঋণৰ বোজা সহিব নোৱাৰি মোৰ মানুহটো মৰিল। এতিয়া সেই বোজা মোৰ কান্ধত, তেনেকৈয়ে জীয়াবলগীয়া হৈছে।”
তেওঁৰ শহুৰেকৰ জলকোটত পাঁচ একৰ খেতিমাটি আছিল আৰু শংকৰকে ধৰি তিনি ভায়েকে তাতেই মিলি খেতি কৰিছিল। “আমাৰ খেতি বৰ্ষানিৰ্ভৰ, জলসিঞ্চনৰ পানীৰ সুবিধা নাই যদিও পানী বেছি প্ৰয়োজন হোৱা শস্যৰ খেতি আমি কৰোঁ, কিয়নো তাৰ পৰা পইচা বেছি আহে,” সঞ্জীৱনীয়ে কয়। “বাৰিষাৰ দিনত আমি ছয়াবিন আৰু বুটৰ দাইলৰ খেতি কৰোঁ। দেৱালীৰ পিছত জোৱাৰ, ঘেঁহু আৰু কলামাহৰ খেতি কৰোঁ।”
২০১১ৰ পৰা ২০১৪লৈ এক কুইণ্টল জোৱাৰ, ঘেঁহু বা ক’লা বুটমাহৰ দাম ২,২০০ টকা আছিল। ছয়াবিন আৰু বুটৰ দাইলৰ দাম আছিল কুইণ্টলত প্ৰায় ৫,০০০ টকা। পৰিয়ালে খাবৰ বাবে তাৰে এটা অংশ আচুতীয়াকৈ ৰাখি থোৱাৰ পিছত তেওঁলোকৰ হাতত থাকে শীতকালৰ প্ৰতিবিধ শস্যৰ প্ৰায় চাৰি কুইণ্টল মানকৈ। তাৰপৰা পইচা আহে ২৬,৪০০ টকা আৰু তাৰ লগত ছয়াবিন আৰু বুটৰ দাইলৰ পাঁচ কুইণ্টলকৈ থাকে। তাৰ পৰা আহে প্ৰায় ৫০ হাজাৰ টকা। বাৰ্ষিক প্ৰায় ৭৬,৪০০ টকামান উপাৰ্জন হয়। এইখিনি পইচা পৰিয়ালটোৰ চাৰিজন ভায়েকৰ মাজত ভাগ হয়, সঞ্জীৱনীয়ে এই প্ৰতিবেদকক জলকোটত এইখিনি কথা কয়।
“আমি যিটো খেৰীঘৰত আছিলো (খেৰৰ চালি দিয়া মাটি লেপা কেঁচা ঘৰটো), তাত সমস্যা বহুত আছিল,” তেওঁ বুজাই কয়। “বিশেষকৈ বাৰিষাৰ দিনত চাল উৰুখিছিল আৰু আমাৰ সন্তানকেইটা প্ৰায়ে বেমাৰত ভুগিছিল। চিকিত্সা ইয়াত বৰ মহঙা।”
