قرض کے جال میں پھنسے کولہا پور کے گنّا کسان

سومیشور ایکناتھ سلگر غسل کرنے کے بعد اپنے ٹینٹ کے باہر بیٹھے ہوئے ہیں اور نومبر کی گنگنی دھوپ کا مزہ لیتے ہوئے اپنے گیلے بالوں میں کنگھی کر رہے ہیں۔ یہ کچھ دیر آرام کرنے کا وقت ہے، کیوں کہ ان کا دن صبح ۴ بجے سے شروع ہوتا ہے اور ۱۲-۱۳ گھنٹے بعد ختم ہوتا ہے۔

سومیشور ایک پھڑکری (گنّا کٹائی مزدور) ہیں، جو اپنی فیملی کو لے کر باقی سینکڑوں مزدوروں کی طرح کام کی تلاش میں کولہاپور آئے ہیں، جہاں کئی چینی ملیں ہیں۔ کولہاپور ضلع کے پارگاؤں بھڈولے میں واقع وارنا چینی مل میں آپ کو کئی مزدور خاندان ٹینٹ میں رہتے ہوئے دکھائیں دیں گے، جو وہاں اگلے ۴-۵ مہینے گنے کی کٹائی ختم ہونے تک رہیں گے۔

ان میں سے زیادہ تر خشک سالی سے متاثرہ علاقوں سے آئے ہیں، جیسے کہ مراٹھواڑہ کا بیڈ ضلع۔

سومیشور بھاؤ بیڈ ضلع کے مُنگی علاقہ سے اپنی فیملی کے ساتھ آئے ہیں۔ بیڈ سے کولہا پور آنے کے لیے انہیں کل ۶۵۰ کلومیٹر کا فاصلہ طے کرنا پڑا، جس میں انہیں تین دن لگے۔ کولہا پور مہاراشٹر کے ان علاقوں میں سے ایک ہے جہاں گنے کی سب سے زیادہ کھیتی ہوتی ہے۔

وہ بتاتے ہیں، ’’میری بیوی پری ملا اور ہمارے تین بیٹے - پرمود، ونود اور دشرتھ ہمارے ساتھ ہیں،‘‘ وہ ٹریکٹر ٹرالی میں اپنا سامان اور ضروری سامان لاد کر اپنی فیملی کے ساتھ یہاں آئے تھے۔ ٹینٹ کے اندر اناج کی بوریاں اور ایک گیس سیلنڈر رکھا ہوا ہے۔

سومیشور بھاؤ پاری سے کہتے ہیں، ’’ہم مُکادم [ٹھیکیدار] کے ساتھ آئے تھے، جس نے ہر کوئیٹا [میاں بیوی] کو ڈیڑھ لاکھ روپے دیے۔ میں نے پہلے ہی ٹریکٹر ٹرالی کے رکھ رکھاؤ اور اس کے لیے ڈیزل پر ۲۵ ہزار روپے خرچ کر دیے ہیں۔‘‘

وہ کہتے ہیں، ’’ہم گنّا کاٹیں گے، اور ایڈوانس میں لی گئی رقم کو [اپنی مزدوری سے] دھیرے دھیرے ادا کر دیں گے۔ اگر اس سال نہیں تو اگلے سال۔‘‘ سومیشور بھاؤ مزید کہتے ہیں، ’’ہم روزانہ ۱۲-۱۳ گھنٹے سے زیادہ کام کرتے ہیں۔ مرد اور عورت، دونوں ہی گنّے کاٹتے ہیں، پتّے نکالنے کے بعد انہیں ٹرالی میں بھر دیتے ہیں۔‘‘ گنّا کٹائی مزدوروں کو ہر ایک ٹن کے عوض ۲۷۳ روپے کی ادائیگی کی جائے گی۔

’’لائی بیکار کام آہے ہے [یہ بیکار کام ہے]۔ [لیکن] کڑی محنت کرنے کے بعد ہی پیسہ ملتا ہے۔‘‘

سومیشور بھاؤ کی بیوی پری ملا کا دن تو اور بھی لمبا اور تھکا دینے والا ہوتا ہے کیوں کہ انہیں کھیتوں میں کام کرنے کے ساتھ ساتھ پانی کی کمی اور بجلی اور بیت الخلاء کے بغیر ہی گھر سنبھالنا پڑتا ہے۔ وہ ٹینٹ کے باہر پانی گرم کرتے ہوئے بتاتی ہیں، ’’میرا دن صبح ۳ بجے شروع ہوتا ہے اور رات ۱۰ بجے ختم ہوتا ہے۔‘‘ پری ملا تائی کو دن بھر کمر میں لگاتار درد ہوتا رہا، لیکن وہ کام سے چھٹی نہیں لے سکتیں۔ وہ کہتی ہیں، ’’ہمیں کھانا تبھی ملتا ہے جب ہم کام کرتے ہیں۔‘‘

بیڈ سے آیا سلگر خاندان یہاں مجبوری میں کام کرنے کے لیے آیا ہے کیوں کہ مہاراشٹر کے کئی علاقوں میں اتنی بارش نہیں ہو رہی کہ کھیتی پر منحصر رہا جا سکتے۔

سال ۲۰۱۱ کی مردم شماری، مہاراشٹر میں ۷۹ لاکھ سے زیادہ مہاجر ہیں، جو کسی بھی ریاست کے لیے مہاجرین کی سب سے زیادہ تعداد ہے۔ ہر سال تقریباً ۸-۱۰ لاکھ مہاجرین گنّے کے کھیتوں میں کام کرنے آتے ہیں، جہاں انہیں کڑاکے کی ٹھنڈ، پانی کی کمی اور صفائی سے متعلق سہولیات کی کمی کا سامنا کرتے ہوئے گزر بسر کرنا ہوتا ہے۔

وہ بانس، پلاسٹک اور تارپولن شیٹ سے بنے ٹینٹ میں رہتے ہیں، جس کے لیے انہیں ہر مہینے ۱۰۰۰ روپے کرایہ کے طور پر دینے پڑتے ہیں۔ یہ ٹینٹ پانچ رکنی فیملی کے لحاظ سے بیحد تنگ ہے۔

قریب کے ٹینٹ میں ماروتی کیندرے اور ان کی بیوی سندھو رہتے ہیں، جو بیڈ ضلع کے پرلی بلاک کے واکا گاؤں سے یہاں آئے ہیں۔ ان کے ساتھ ان کے چار بچے – پائل، پریم، رانی اور بالاجی بھی ہیں، جو ابھی چھ سال سے کم عمر کے ہیں۔

سندھو کہتی ہیں، ’’ہمارے گاؤں میں چار ایکڑ زمین ہے۔ ہم باجرہ اور کپاس اُگاتے ہیں، جو ہمارے گھر کے لیے کافی ہوتا ہے۔ سومیشور کے خاندان کی طرح، ماروتی اور سندھو کا تعلق بھی ونجاری برادری سے ہے، جسے ریاست میں خانہ بدوش قبیلہ کا درجہ دیا گیا ہے۔ سندھو بتاتی ہیں، ’’ہم یہاں ایک مُکادم [ٹھیکہ دار] کے ساتھ آئے ہیں، جس سے ہم نے چار لاکھ روپے ایڈوانس لیے ہیں،‘‘ سندھو نے واضح الفاظ میں بتایا کہ وہ لوگ اس سال یہ قرض نہیں ادا کر پائیں گے۔ انہوں نے جس امیر ٹھیکہ دار سے قرض لیا ہے، اس کے تئیں تلخی کا اظہار کرتے ہوئے وہ کہتی ہیں، ’’آمچیانے پھیڈتا ییت ناہی [ہم اس قرض کے جال میں پھنسے ہوئے ہیں]۔‘‘

چھ سال کی پائل ٹینٹ کے سامنے جھاڑو لگا رہی ہے۔ اس نے اپنے اسکول (یش رام پبلک اسکول، سرسالا) کی یونیفارم پہنی ہوئی ہے۔ اس نے بتایا، ’’ماجھی شالا سُٹلی [میرا اسکول چھوٹ گیا ہے]۔‘‘ گاؤں میں اس کی دیکھ بھال کرنے والا کوئی نہیں تھا، اس لیے وہ اپنے والدین کے ساتھ یہاں آ گئی۔ ان کے والد ماروتی سے ہمیں پتہ چلا کہ انہوں نے اپنے دو بچوں کا پرائیویٹ اسکول میں داخلہ کرایا ہے کیوں کہ گاؤں کے آس پاس کوئی سرکاری اسکول نہیں ہے۔ انہوں نے بتایا، ’’ہم نے دونوں بچوں کی اسکول کی فیس کے لیے ۴۰ ہزار روپے خرچ کیے ہیں۔‘‘

پائل نے اپنے اسکول کو یاد کرتے ہوئے بتایا، ’’ہمارے اسکول میں ہمیں کویتائیں (نظمیں) سکھائی جاتی ہیں اور چاکلیٹ اور کیک دیا جاتا ہے۔‘‘ وہ اپنے اسکول کو یاد کرتے ہوئے کافی خوش دکھائی دے رہی تھی۔ لیکن ہر سال چھ مہینے تک کسی اور علاقہ میں مہاجرت کرنے کی مجبوری نے ابتدائی تعلیم (پہلی جماعت سے چوتھی جماعت تک) کو بھی کافی چیلنجنگ بنا دیا ہے۔

زیادہ تر لوگ جو یہاں کام کی تلاش میں آئے ہیں، وہ مراٹھواڑہ اور اس کے ارد گرد کے خشک سالی سے متاثرہ علاقوں سے ہیں۔ ان کے بچے بھی اپنے والدین کے ساتھ آتے ہیں، اس لیے ان کا اسکول چھوٹ جاتا ہے۔

پیداوار کے کم ہونے اور پشتینی زمین پر بڑھتے دباؤ کی وجہ سے چھوٹے کسانوں کے پاس مزدوری کرنے کے علاوہ دوسرا کوئی متبادل نہیں بچا ہے۔ کیج بلاک کے ٹرنالی گاؤں کے بندو بانگر کا یہی مسئلہ ہے۔ بندو ایک درخت کے نیچے اپنی بیٹی کے ساتھ بیٹھے ہوئے نظر آئے۔ وہ بتاتے ہیں، ’’ہمارا ایک مشترکہ خاندان ہے اور ہمارے پاس پانچ ایکڑ زمین ہے۔ ہم باجرے کی صرف ایک فصل اگا پاتے ہیں۔ اس میں استقامت نہیں ہے کیوں کہ پیداوار اتنی کم ہے کہ اس سے لاگت بھی نکل نہیں پاتی۔‘‘

خاندان میں زیادہ تر لوگ تعمیراتی مقامات پر یومیہ ۵۰۰ روپے کی مزدوری پر کام کرتے ہیں۔ بندو مزید کہتے ہیں، ’’ہمیں کام کرنا ہی پڑتا ہے تاکہ ہمارا چولہا جلتا رہے۔‘‘

کولہا پور کی اس چینی مل کے بارے میں وہ کہتے ہیں، ’’ہمارا کام صبح ۴ بجے سے ہی شروع ہو جاتا ہے۔ رات کی بچی ہوئی بھاکری کھا کر ہم کام پر لگ جاتے ہیں۔ یہاں کوئی وقت متعین نہیں ہے۔‘‘ یہاں کام کرنے کے تجربہ پر بات کرتے ہوئے انہوں نے کہا، ’’گنّے کے گٹھروں کو ٹرالی میں رکھنا بہت مشکل کام ہے۔ ریمپ کی سیڑھیاں بھی برابر نہیں ہیں۔ میری ماں یہ کام کرتے ہوئے بری طرح سے زخمی ہو چکی ہیں۔‘‘

لیکن ان کے پاس دوسرا کوئی راستہ نہیں ہے۔ بندو اور ان کی بیوی اور دو دیگر جوڑوں پر مشترکہ طور پر ۷ لاکھ روپے کا قرض ہے جو انہوں نے ایڈوانس کے طور پر لیا تھا۔ بندو بتاتے ہیں، ’’اگر ہم پیسہ ادا نہیں کر پاتے ہیں تو ساہوکار حساب لگانا شروع کر دیتا ہے۔‘‘ اگر کوئی خاندان قرض نہیں ادا کر پاتا ہے تو انہیں اگلے سال کے لیے بھی اس کا بوجھ اٹھانا پڑتا ہے۔ یعنی کہ وہ ایک اور استحصال والے سسٹم میں پھنس جاتے ہیں۔ پرئیویٹ ساہوکار ہر مہینے ۳ سے ۵ فیصد تک سود لیتے ہیں، جو سالانہ ۳۶ سے ۶۰ فیصد تک ہو جاتا ہے۔ لیکن بندو کہتے ہیں کہ ان کے پاس کوئی دوسرا متبادل نہیں ہے، اس لیے ضرورت پڑنے پر لوگوں کو انہی ساہوکاروں کے پاس جانا پڑتا ہے۔

شام ہو چکی ہے اور ہوا میں خنکی ہے، لیکن بچے اب بھی محنت کر رہے ہیں۔ وہ گنّے کے ڈنٹھل کاٹ رہے ہیں تاکہ انہیں بعد میں چارہ کے طور پر بیجا جا سکتے۔ بندو کے بچے – وجے اور اجے گنے کے گٹھر اور ان کے سروں کو باندھنے میں مدد کر رہے ہیں۔ ایک گٹھر میں ۱۰ سرے ہوتے ہیں اور ۲۵ گٹھروں کا ڈھیر ۱۰۰ روپے میں فروخت ہوتا ہے۔ گنّے کی پتیاں مویشیوں کے چارہ کے طور پر استعمال کی جاتی ہیں۔

اجے نے مجھے بتایا، ’’میں پانچویں میں ہوں اور وجے تیسری جماعت میں ہے۔‘‘ دونوں ٹرنالی کے اہلیا دیوی آشرم اسکول کے طالب علم ہیں۔ اس نے بتایا، ’’میں اس سال اسکول نہیں جا پایا۔ اگلے سال اسکول کے ٹیچر مجھے اگلی کلاس میں پہنچا دیں گے۔ مجھے پڑھنا آتا ہے اور میں ۱۰ تک پہاڑے سنا سکتا ہوں۔‘‘ اسے لگتا ہے کہ وجے کی قسمت اتنی اچھی نہیں ہوگی کیوں کہ اسے صرف ۱۱ کا پہاڑا آتا ہے۔ ’’وہ چوتھی کلاس میں نہیں جا پائے گا۔‘‘

وجے نے بتایا، ’’ہمارے اسکول کی عمارت بہت بڑی ہے۔ وہاں ہمیں دن میں چار ٹائم کھانا دیا جاتا ہے۔ ہمیں کتابیں اور کاپیاں بھی دی جاتی ہیں۔‘‘ اجے کی بہن سواتی ساتویں کلاس میں ہے۔ لیکن وہ اب اسکول نہیں جاتی۔ اس نے بتایا، ’’وہ ہمارے ساتھ کارخانہ آئی ہے۔‘‘ ان کے والد بندو ہماری باتیں سن رہے تھے۔ ’’ہم گنّا کاٹ کر اپنے خاندان کا پیٹ بھریں یا بچوں کی پڑھائی پر خرچ کریں؟ میرا خاندان تین نسلوں سے گنّا کٹائی کا کام کر رہا ہے۔ سرکار کو ہماری پریشانیوں پر دھیان دینا چاہیے۔‘‘

اس مسئلہ سے سب سے زیادہ متاثر آدیواسی مزدور ہیں۔ ان کی نہ تو پڑھنے کی صلاحیت اچھی ہے اور نہ ہی ان کے پاس مالی خواندگی ہے۔ بہت کم لوگوں کے پاس ان کے گاؤں میں زمین ہے، اور اس لیے انہیں دوسرے کے کھیتوں میں نرائی گُڑائی جیسے زرعی کاموں پر منحصر رہنا پڑتا ہے۔

کافی بحث کے بعد، مہاجر مزدور کملیش رام سنگھ راوتاڑے اس رپورٹر سے بات کرنے کے لیے راضی ہوئے۔ پاورا قبیلہ سے تعلق رکھنے والے ۳۲ سالہ کملیش نے بتایا، ’’ہم جلگاؤں کے چوپڑا تعلقہ سے ہیں۔ لیکن میں کام کی تلاش میں ناسک چلا گیا تھا۔ ہمیں گاؤں میں صرف محکمہ جنگلات کی نرسریوں میں ہی تھوڑا بہت کام ملتا ہے۔‘‘ انہوں نے مزید بتایا کہ مرد و خواتین، دونوں کو آٹھ گھنٹے کی مزدوری کے صرف ۱۳۰ روپے ملتے ہیں۔

کملیش اور ان کا خاندان ایک مالَک (ٹھیکیدار) کے ساتھ یہاں آیا ہے اور انہوں نے ایک ٹینٹ لگا لیا ہے۔ کملیش بتاتے ہیں، ’’یہاں پانی کے لیے ایک ہینڈ پمپ ہے، لیکن بجلی نہیں ہے۔‘‘ کملیش اور ان کی بیوی کے ساتھ ایک دوسرے جوڑے نے اس کام کے لیے ایک لاکھ روپے کا ایڈوانس لیا ہے۔ دو سے چار ٹرالی گنّا لادنے میں انہیں روزانہ ۱۴-۱۶ گھنٹے سے بھی زیادہ وقت لگ جاتا ہے۔

کملیش اور دوسرے مزدوروں کو یہ نہیں معلوم کہ ان کی مزدوری کیسے طے ہوتی ہے اور کس طرح سے اسے اُن پر چڑھے قرض سے اتارا جاتا ہے۔ کملیش بتاتے ہیں، ’’اگر ہم اپنے مالک سے پوچھتے ہیں، تو وہ بس اتنا کہتا ہے، ’تم نے پیسے اُدھار لیے ہیں، اس لیے تم بس کام کرتے رہو‘۔‘‘ ان کی بیوی حاملہ ہیں، لیکن انہیں اپنا قرض ادا کرنے کے لیے کام کرنا پڑ رہا ہے۔

کملیش اپنے بیٹے پون کو بلاتے ہیں، جو کسی وجہ سے رو رہا ہے، ’’یہ پونیا، اِکڈے یے!‘‘ ان کا بیٹا اسکول نہیں جاتا۔ کملیش اس کی وجہ بتاتے ہیں، ’’ہم سب مزدور ہیں۔ کوئی اسکول پر توجہ نہیں دیتا۔ ہمارے معاشرہ میں بہت سے لوگ ناخواندہ ہیں۔‘‘ یہاں رہنے والے آدیواسی خاندان اہیرانی بولی بولتے ہیں، لیکن اسکول کی پڑھائی مراٹھی میں ہوتی ہے۔ کملیش کہتے ہیں، ’’یہ بھی ایک مسئلہ ہے، کیوں کہ یہاں ہماری زبان کو کوئی ٹھیک سے سمجھ نہیں پاتا۔‘‘

وہ اس لیے فکرمند ہیں کہ مہاجرت کے سبب ان کے بچے اسکول نہیں جا پا رہے ہیں۔ لیکن پھر رک کر وہ تھوڑی دیر سوچتے ہیں اور کہتے ہیں، ’’ہمارے گاؤں میں بھی حالات کچھ الگ نہیں ہیں۔ جن کے پاس زمین ہے، صرف انہی کے بچے اسکول جاتے ہیں۔‘‘

کملیش ایک سرد آہ بھرتے ہوئے کہتے ہیں، ’’خوشی ہو یا کوئی تکلیف، ہمیں تو بس کام اور صرف کام کرنا ہے۔ چینی مل کے بند ہونے سے پہلے ہم واپس نہیں جا سکتے۔‘‘

’’یہ بندھوا مزدوری ہے۔‘‘

یہ اسٹوری بنیادی طور پر مراٹھی میں لکھی گئی تھی۔

ترجمہ نگار: قمر صدیقی