करजा के फांदा मं कुसियार कटेइय्या

सोमेश्वर एकनाथ सलगर नुहाय के बाद अपन तंबू के बहिर बइठे हवय अऊ कार्तिक (नवंबर) के गुरतुर घाम के मजा लेवत अपन ओद्दा चुंदी ला कोरत हवय. ये बखत कुछु बेरा सुस्ताय के आय, काबर के ओकर दिन ह बिहान पाहे के पहिली 4 बजे ले सुरु हो जाथे अऊ 12-13 घंटा बाद सिराथे.

सोमेश्वर फड़करी (कुसियार कटेइय्या बनिहार) आय, जेन ह अपन परिवार ला लेके आन सैकड़ों बनिहार मन के जइसने बूता करे बर कोल्हापुर आय हवय, जिहां कतको शक्कर कारखाना हवंय. कोल्हापुर जिला के पारगांव भडोले मं बसे वारणा शक्कर मिल मं तुमन ला कतको बनिहार परिवार तंबू मं रहते दिकहे ला मिल जाहीं, जेन मन उहाँ अवेइय्या 4-5 महिना कुसियार के कटई पूरा होय तक ले रइहीं.

वो मन ले अधिकतर अकाल वाले इलाका ले आय हवंय, जइसने के मराठवाड़ा के बीड जिला. सोमेश्वर भाऊ बीड जिला के मुंगी इलाका ले अपन परिवार के संग आय हवंय. बीड ले कोल्हापुर आये बर वोला 650 किमी के रद्दा नापे ला परिस, जेन मं तीन दिन लाग गे. कोल्हापुर महाराष्ट्र के तउन इलाका मन ले एक आय जिहां कुसियार के खेती सबलेजियादा होथे.

वो ह बताथे, मोर घरवाली परीमला अऊ हमर तीन झिन बेटा प्रमोद, विनोद अऊ दशरथ संग मं हवंय, वो मन ट्रेक्टर ट्राली मं अपन जिनिस अऊ दीगर जरूरी लादके अपन परिवार संग इहाँ आय रहिस. टेंट (झाला/कुरिया) के भीतरी अनाज के बोरी अऊ एक ठन गैस सिलेंडर रखाय हवय.

सोमेश्वर भाऊ पारी ले कहिथे, “हमन मुकादम [ठेकादार] के संग आये रहेन, जेन ह हरेक कोयटा (जोड़ा) ला डेढ़ लाख रूपिया दीस. मंय प्जिलीच ले ट्रैक्टर-ट्रॉली सुधारे अऊ डीजल मं 25,000 रूपिया खरचा कर देय हवं.”

वो ह कहिथे, हमन कुसियार काटबो, अऊ बयाना मं लेय रकम ला [अपन मजूरी] धीरे धीरे चुकता करबो. गर ये बछर नइ, त अवेइय्या बछर.” सोमेश्वर भाऊ बतावत जाथे, “हमन रोज 12-13 घंटा ले जियादा बूता करथन. एंर्रा अऊ माई दूनोच कुसियार काटथें, पाना निकारे के बाद वोला ट्राली मं लादथें.” कुसियार कटेइय्या मन ला टन पाछू 273 रूपिया देय जाही.

‘लाई बेकार काम आहे हे [ ये ह बेकार बूता आय]. [फेर] भारी मिहनत के बादेच पइसा मिलथे.”

सोमेश्वर भाऊ के घरवाली, परिमला के दिन त अऊ बड़े अऊ भारी होथे काबर के वोला खेत मं बूता करे के संगे-संग पानी के कमी, बिन बिजली अऊ शौचालय के गृहस्थी संभाले ला परथे. वो ह झाला के बहिर पानी तिपोवत बताथे, “मोर दिन कुकरा बासा ले पहिली 3 बजे ले सुरु हो जाथे अऊ रतिहा 10 बजे सिराथे.” परिमला ताई के कनिहा ह दिन भर सरलग पिरावत रहय, फेर वो ह काम मं नागा नइ मार सकय. वो ह कहिथे, हमन ला खाय भर तभेच मिलथे जब हमन बूता करथन.”

बीड ले आय सलगर परिवार इहां मजबूरी मं बूता करे आय हवय काबर के महाराष्ट्र के कतको इलाका मन मं अतक पानी नइ गिरिस के खेती के भरोसे रहे जा सकय.

साल 2011 के जनगणना मुताबिक, महाराष्ट्र मं 79 लाख ले जियादा प्रवासी हवंय, जेन ह कोनो घलो राज के प्रवासी मन ले जियादा हवय. हरेक बछर क़रीबन 8-10 लाख प्रवासी कुसियार के खेत मं बूता करे बर आथें, जिहां वो मन ला भारी जाड़, पानी के कमी अऊ बिन सफई सुविधा ले जूझत गुजारा करे ला होथे.

वो मन बांस, प्लास्टिक अऊ तारपोलिन पनपनी ले बने झाला मं रहिथें, जेकर बर वो मन ला 1,000 रूपिया महिना भाड़ा देय ला परथे. ये झाला पांच परानी के परिवार ला देखत भारी छोटे आय.

लकठा के झाला मं मारुति केंद्रे अऊ ओकर घरवाली सिंधु रइथें जेन मन बीड जिला के परली ब्लॉक के वाका गाँव ले इह आय हवंय. ओकर मन के संग वो मन के चार झिन लइका पायल, प्रेम, रानी अऊ बालाजी घलो हवंय, जेन मं ये बखत छै बछर ले कम उमर के हवंय.

सिंधु कहिथे, हमर गाँव मं चार एकड़ खेत हवय. हमन बाजरा अऊ कपसा कमाथन, जेन ह हमर घर बर भरपूर होथे. सोमेश्वर के परिवार जइसने, मारुति अऊ सिंधु घला वंजारी समाज ले हवंय, जेन ला महाराष्ट्र मं अन्य पिछड़ा वर्ग (ओबीसी) मं रखे गे हवय. सिंधु बताथे, “हमन इहाँ एक झिन मुकादम [ठेकादार] के संग आय हवन, जेकर ले हमन चार लाख रूपिया बयाना लेगे हवन,” सिंधु सफ्फा सफ्फा बताथे वो लोगन मन ये बछर करजा छूटे नइ सकंय. वो मन जेन ठेकादार ले बयाना लेगे हवंय, वोला लेके अपन गुस्सा जाहिर करथे, “आमच्याने फेडता येत नाही [हमन ये करजा के फांदा मं फंसे हवन].”

छै बछर के पायल झाला के आगू बुहारत हवय.वो ह अपन स्कूल (यशराज पब्लिक स्कूल, सिरसाला) के ड्रेस पहिरे हवय. वो ह बताथे, “माझी शाळा सुटली [ मोर स्कूल छूट गे हे].” गाँव मं ओकर देखभाल करेइय्या कोनो नइ रहिस, येकरे सेती अपन दाई-ददा के संग इहाँ आ गे. ओकर ददा मारुति ले हमन ला पता चलिस के वो ह अपन दूनों लइका मन ला निजी स्कूल मं भर्ती कराय हवय काबर के गाँव के तीर-तखार मं कोनो सरकारी स्कूल नइ ये. वो ह बताइस, “हमन दूनों लइका के स्कूल के फ़ीस बर 40,000 रूपिया पटाय हवन.”

पायल ह अपन स्कूल ला सुरता करत बताइस, हमर सकुन मं हमन ला कविता सिखाय जाथे अऊ हमन ला चाकलेट अऊ केक मिलथे.” वो ह अपन स्कूल ला सुरता करत भारी खुस नजर आवत रहिस. फेर हरेक बछर छै महिना तक कोनो दीगर जगा मं जाय के मजबूरी ह प्राथमिक शिक्षा (कक्षा 1-4) ला भारी चुनौतीवाले बना दे हवय.

अधिकतर लोगन मन जेन मं इहाँ बूता करे आय हवंय वो मन मराठवाड़ा अऊ तीर-तखार के अकाल वाले इलाका ले हवंय. वो मन के लइका घलो अपन दाई ददा के संग आथें येकरे सेती वो मन के स्कूल छूट जाथे

उपज घटे अऊ पुश्तेनी जमीन कमतियात सेती छोटे किसान मं करा बनिहारी करे के छोड़ क्लोनो दीगर उपाय नइ बांचे. केज ब्लॉक के टर्नाली गाँव के बंदू बांगर के इहीच समस्या आय. बंदू एक ठन रूख तरी अपन बेटी के संग बइठे दिखिस जेन ह बताथे, “हमर समिलात परिवार आय अऊ हमर करा पांच एकड़ जमीन हवय. हमन बाजराच कमाय सकथन. येकर ले परता नइ परे काबर के उपज भारी कम हे के ओकर ले बिजहा घलो नइ निकरे.”

परिवार के अधिकतर लोगन मन काम-बूता वाले जगा मं 500 रूपिया रोजी मं बूता करथें, बंदू बतावत जाथे, “हमन ला कमायच ला परथे जेकर ले घर के पेट भरय.”

कोल्हापुर के ये शक्कर मिल ला लेके वो ह कहिथे, “ हमर बूता कुकरा बासा 4 बजे लेच सुरू हो जाथे. रतिहा के बचे भाखरी खाके हमन बूता मं लग जाथन. इहाँ कोनो बखत तय नइ ये.” इहाँ के बूता ला लेके वो कहिथे, “कुसियार के गट्ठा ला ट्राली मं जोरे भारी मुस्किल बूता आय. चढ़े के टिकेसी घलो बरोबर नइ ये. मोर दाई संग बूता करत भारी अलहन हो चुके हे.”

फेर वो मन करा दीगर रद्दा नइ ये. बंदू अऊ ओकर घरवाली अऊ दू झिन आन जोड़ा उपर मिलके 7 लाख के करजा हवय जेन ला वो मन बयाना मं लेगे रहिन. बंदू बताथे. “गर हमन पइसा चुकता करे नइ सकन त महाजन ह हिसाब लगाय सुरु कर देथे.” गर कोनो परिवार छूटे नइ सकय त अवे इय्या बछर बर घलो येकर बोझा उठाय ला परथे. मतलब ये के वो मन करजा के फंदा मं फंस जाथें. महाजन ह हरेक महिना 3 ले 5 फीसदी बियाज लेथे, जेन ह सलाना 36 ले 60 फीसदी तक जाथे. फेर बंदू कहिथे के ओकर करा कोनो दीगर उपाय नइ ये, येकरे सेती जरूरत परे ले लोगन मन ला इहीच महाजन मन करा जाय ला परथे.

संझा हो गे हे अऊ ठंडा हवा चलत हे फेर लइका मन अभू घलो बूता मं लगे हवंय. वो मं कुसियार के ढेंठा काटत हवंय जेकर ले वोला बाद मं वोला चारा के रूप मं बेच सकंय, बंदू के लइका, विजय अऊ अजय, कुसियार के गट्ठा अऊ ओकर मुड़ी ला बंधे मं मदद करत हवंय. एक ठन गट्ठा मं 10 ठन मुड़ी होथे अऊ 25 गट्ठा के ढेरी 100 रूपिया मं बिकाथे, कुसियार के हरियर पाना मवेसी मं के चारा के काम मं आथे.

अजय ह मोला बताइस, “मंय पांचवीं मं हों अऊ विजय तीसरी कच्छा मं हे.” दूनों टर्नाली के अहिल्यादेवी आश्रम स्कूल के लइका आंय. वो ह बताथे, “मंय ये बछर इस्कूल नइ जाय सकंय. अवेइय्या बछर इस्कूल के गुरूजी मन अगला कच्छा मं पठो दिहीं. मोला पढ़े ला आथे अऊ मंय 10 तक के पहाड़ा सुना सकथों.” वोला लगथे के विजय के किस्मत ओतक बढ़िया नइ होही काबर के वोला सिरिफ 11 के पहाड़ा आथे. वो ह चौथी कच्छा मं नई जाय सकही,”

विजय बताथे, “हमर स्कूल बड़े अकन हवय. उहाँ हमन ला दिन मं चार बेर खाय ला मिलथे. हमन ला किताब अऊ कापी घलो देय जाथे.” अजय के बहिनी स्वाति सातवीं क्लास मं हवय. फेर वो अब स्कूल नइ जावय. वो ह बताथे, ‘वो हमर संग फेक्टरी मं आय हवय.” ओकर ददा बंदू हमर गोठबात ला सुनत रहिस. “हमन कुसियार काटके अपन परिवार के पेट भरबो धन लइका मन के पढ़ई मं खरचा करबो? मोर परिवार तीन पीढ़ी ले कुसियार काटे के बूता करत हवय. सरकार ला हमर दिक्कत मन के डहर चेत धरे ला चाही.”

ये दिक्कत ला सबले जियादा आदिवासी मजूर झेलत हवंय. वो मन करा न तो पढ़ई के ताकत हवय अऊ न वो मन करा पढ़ई बर पइसा हवय. बनेच कम लोगन करा गाँव मं खेत-खार हवय, येकरे सेती वो मन ला दीगर लोगन के बनिहारी के भरोसे रहे ला परथे.

भारी झझकत, प्रवासी मजूर कमलेश रामसिंग रावताड़े ये रिपोर्टर ले बात करे बर मानिस. पावरा जनजाति के 32 बछर के कमलेश ह बताइस, “हम जलगांव के चोपड़ा तालुका ले अन. फेर बूता करे बर नासिक चले गे रहेंव. हमन ला गाँव मं सिरिफ वन विभाग के नर्सरी मन मं थोर-बहुत काम मिलथे.” वो ह बतावत गीस के एंर्रा अऊ माई, दूनों ला आठ घंटा के बूता के सिरिफ 130 रूपिया रोजी मिलथे.

कमलेश अऊ ओकर परिवार एक झिन मालक (ठेकादार) के संग इहाँ आय हवय अऊ वो मं एक ठन झाला मार लेय हवंय. कमलेश बताथे, “इहाँ पानी बर एक ठन बोरिंग हवय, फेर बिजली नइ ये.” कमलेश अऊ ओकर घरवाली के संग एक आन जोड़ा ह ये बूता बर एक लाख रूपिया बयाना ले हवय. दू ले चार ट्रॉली कुसियार लादे मं वो मन ला रोजके 14-16 घंटा ले घलो जियादा बखत लग जाथे.

कमलेश अऊ दीगर मजूर मन ला ये पता नइ के वो मन के मजूरी कइसने तय करे जाथे अऊ कइसने ढंग ले वो मन के करजा ले काटे जाथे. कमलेश बताथे, “गर हमन अपन मालक से पूछथन, त वो ह बस अतकेच कहिथे, तंय पइसा बयाना मं लेगे हस, येकरे सेती तंय सिरिफ बूता करत रह.” ओकर घरवाली गरभ ले हवय, फेर वोला अपन करजा चुकाय बर बूता करे ला परत हवय.

“ये पोर्या, इकडे ये,” कमलेश अपन बेटा पवन ला बलावत कहिथे, जेन ह कोनो बजा ले रोवत हवय. ओकर बेटा स्कूल नइ जावय. कमलेश येकर वजा बताथे, “हमन सब्बो मजूर अन. कोनो स्कूल ऊपर धियान नइ देवय. हमर समाज मं बनेच अकन लोगन मन अनपढ़ हवंय.” इहां रहेइय्या आदिवासी परिवार अहिराणी भाखा कहिथें, फेर स्कूल के पढ़ई मराठी मं होथे. कमलेश कहिथे, “ये घलो एक ठन समस्या आय, काबर के इहाँ हमर भाखा ला कोनो बने करके समझे नइ पाय.”

वो ये बात ला लेके संसो करत हवय के इहाँ आय के सेती ओकर लइका मन स्कूल जाय नइ सकत हें, फेर वो ह थोकन बखत ठहर के सोचे लगथे अऊ कहिथे, “हमर गाँव के हालत घलो कुछु अलगा नइ ये. जेकर करा जमीन हवय, सिरिफ ओकरेच लइका मं स्कूल जाथें.”

कमलेश धीरे ले कहिथे, “खुसी होय धन कोनो दुख, हमन ला तो बस बूता अऊ सिरिफ बूता करना हे. शक्कर मिल के बंद होय के पहिली हमन लहुट के जाय नइ सकन.”

“ये ह बंधुआ मजूरी आय.”

ये कहिनी मूल रूप मं मराठी मं लिखे गे रहिस.

अनुवाद: निर्मल कुमार साहू