कोल्हापुर में गन्ना मजूर आ करजा के अंतहीन चक्र

सोमेश्वर एकनाथ सलगर नहा के अपनी तम्बू के बाहर बईठल बाड़ें आ नवम्बर के हल्का घाम में आपन भीजल बार संवारत बाड़ें. उनकरी आराम के ई छोटा सा समय हवे- उनकर दिन सबेरे 4 बजे से शुरू होखेला आ 12-13 घंटा बाद खतम होला.

सोमेश्वर एगो फड़करी (गन्ना काटे वाला) हवें आ सैकड़न परिवारन में से एक हवें जे काम के खोज में कोल्हापुर आईल बा जहां बहुत सारा चीनी के कारखाना बा. कोल्हापुर जिला के पारगांव भादोले में वारणा चीनी कारखाना में पूरा परिवार तम्बू लगवले बा जहां उ लोग अगिला चार से पांच महीना ले रहि के गन्ना कटाई के काम करी.

एमे से अधिकांश लोग सूखा-बाहुल्य क्षेत्र जईसे मराठवाड़ा के बीड़ से यात्रा कर के आईल बा. सोमेश्वर भाऊ अपनी परिवार संघे बीड़ जिला के मुंगी से आईल बाड़ें. उनके कोल्हापुर जिला ले पहुंचे खातिर 650 किलोमीटर के दूरी तय करे में तीन दिन दिन लागल, ई क्षेत्र गन्ना के फसल के अधिकतम सघनता वाला क्षेत्र हवे.

“हमार मेहरारू परिमला आ हमार तीन गो बेटा प्रमोद, विनोद आ दसरथ हमरी संघे बाड़ें सन,” उ कहेलन. एगो ट्रेक्टर ट्राली में उ लोग आ उनकर सामान एइजा पहुंचल. तम्बू के भीतर अनाज के बोरा आ एगो गैस सिलिंडर राखल बा.

“हमनी के मुकादम (मजदूर ठेकेदार) के संघे आईल बानी जा जवन हमनी के हर कोयता (जोड़ी) खातिर डेढ़ लाख रुपिया एडवांस देले बा,” सोमेश्वर भाऊ पारी से कहलें. पहिलहीं उनकर 25,000 रुपिया ट्रेक्टर ट्राली के डीजल का रखरखाव पर खर्चा हो चुकल बा.

“हमनी के गन्ना काटल जाई आ एडवांस चुका दिहल (अपनी दिहाड़ी से) जाई. ए साल न त अगिली साल,” उ कहेलन. “हमनी के हर दिन 12-13 घंटा से अधिका काम करेनी जा. आदमी औरत दूनो मिल के गन्ना काटेला, पतई साफ़ करेला आ ओके ट्राली में लोड करेला,” सोमेश्वर भाऊ आगे कहेलन. गन्ना काटे वालन के एक टन कटला पर 273 रुपिया मिलेला.

“लय बेकार काम आहे हे (ई भयानक काम हवे). (बाकिर) पईसा त हाड़तोड़ मेहनत से ही आवेला.”

सोमेश्वर भाऊ के मेहरारू परिमला के दिन अउरी लमहर होखेला काहें कि उनके खेत पर काम कईला के संघे संघे बिना बिजली, कम पानी आ बिना शौचालय के घर के भी सम्हारे के होला. “हमार दिन सबेरे 3 बजे शुरू होखेला आ राती के 10 बजे खतम होखेला,” उ तम्बू के बाहर पानी गरम करत के कहेली. परिमला ताई के पूरा दिन से पीठ में दरद हो रहल बा बाकिर उ काम से छुट्टी ना ले सकेली. “हमनी के काम करेनी जा त खायेनी जा,” उ कहेली.

बीड़ के सलगर परिवार के इहां मजबूरी में आवे के पड़ल काहें कि खेती पर निर्भर रहे लायक बरखा नईखे होत.

महाराष्ट्र में 79 लाख से अधिक लोग (जनगणना 2011) प्रवास करेला जवन देश के कवनो राज्य खातिर सबसे बड़ आंकड़ा हवे. हर साल लगभग 8-10 लाख प्रवासी गन्ना खेतन में काम करेला आ जबरदस्त ठंडा, पानी के कमी आ स्वच्छता सुविधा के अभाव से जूझत रहेला.

उ लोग तिरपाल के चादर, बांस आ प्लास्टिक से बनल तम्बुअन में रहेला जेकरी खातिर ओ लोगन के महीना के 1000 रुपिया किराया देवे के पड़ेला. पांच लोगन के परिवार खातिर ई जगह बहुत छोट बा.

उनकी पड़ोसी तम्बू में मारुती केंद्रे आ उनकर मेहरारू सिन्धु बीड़ जिला के पराली ब्लाक के वाका से एइजा आईल बा लोग. उनकरी संघे उनकर चारों बच्चा पायल, प्रेम, रजनी आ बालाजी आईल बाड़ें जिनकर उमिर छव साल के कम बा.

“हमनी के गांव में चार एकड़ जमीन बा. हमनी के बाजरा आ कपास उगावेनी जा, जवन घर खातिर पर्याप्त होला,” सिन्धु कहेली. सोमेश्वर निहर मारुती आ सिन्धु भी वंजारी हवे लोग जिनके राज्य में घुमंतू जनजाति के रूप में पहचानल गईल बा. “हमनी के एइजा मुकादम (ठेकेदार) के संघे बानी जा जे चार लाख रुपिया एडवांस लेले बा,” उ कहेली. सिन्धु एकदम स्पष्ट बाड़ी कि ए साल उ लोग पैसा वापस ना कर पाई. “अम्च्याने फेडना होत नाही (हमनी के कर्जा के चक्र में फंस गईल बानी जा),” अमीर ठेकेदार के प्रति कड़वाहट देखावत के उ बतावेली.

छव साल के पायल तम्बू के बहरी के जमीन पर झाड़ू लगावतिया. उ अपनी स्कूल – सिरसला में यशराज पब्लिक स्कूल के ड्रेस पहिनले बिया. “माझी शाला सुटली (हमार स्कूल छूट गईल बा),” उ कहेले. गांव में ओकर केहू देखभाल करे वाला ना रहित, एसे उहो अपनी मई बाबू संघे आ गईल बा. ओकर पिता मारुती कहेलन कि उनकर दू गो बच्चन के प्राइवेट स्कूल में नाम लिखावल गईल बा काहें कि उनकी गांव के लगे कवनो सरकारी स्कूल नईखे. “हमनी के दूनो के मिला के 40,000 रुपिया फीस देवेनी जा,” उ बतवलें.

“हमनी के स्कूल में कविता सिखावल जाला आ चॉकलेट आ केक मिलेला,” पायल अपनी स्कूल के सुंदर याद साझा कर कहेले. बाकिर हर साल छव महीना ले प्रवास कईला से प्राथमिक शिक्षा (कक्षा 1-4) पूरा कईल भी बड़ चुनौती बन जाता.

ए काम के खोज में आवे वाला ज्यादातर लोग मराठवाड़ा आ आसपास के सूखा प्रभावित क्षेत्रन से आईल बाड़ें. बच्चन के अपनी माई बाबू के संघे आवे खातिर पढाई छोड़े के पड़ेला.

गिरत पैदावार आ पैत्रिक भूमि पर दबाव के वजह से छोट किसानन जईसे केज ब्लाक के तर्नाली के बंडू बांगर के लगे कवनो अउरी विकल्प नईखे रहि गईल. अपनी छोट बेटी संघे एगो पेड़ के नीचे बईठल बंडू कहेलन, “हमनी के संयुक्त परिवार हवे आ सबकर मिला के पांच एकड़ जमीन बा. हमनी के खाली एक फसल बाजरा उगावेनी जा. ई करे लायक नईखे काहें कि ए पैदावार से लागत भी नईखे निकल पावत.”

परिवार के अधिकांश सदस्य 500 रुपिया के दिहाड़ी पर निर्माण स्थलन पर काम करेला. “हमनी के काम करत रहे के पड़ेला ताकि चूल्हा जरत रहे,” बंडू कहेलन.

इहां कोल्हापुर में चीनी कारखाना में, “हमनी के सबरे 4 बजे से काम शुरू करेनी जा. हमनी के बचल भाकरी खाईल जाला आ काम शुरू कर दिहल जाला. कवनो समय फिक्स नईखे,” उ कहेलन. “गन्ना के बंडल के ट्राली में चढ़ावल कठिन काम हवे. सीढ़ी पर कदम छोट बड़ बा. ई करत के हमरी माई के बुरी तरह से चोट लागल बा,” उ कहेलन.

बाकिर कवनो विकल्प नईखे काहें कि दू गो अन्य जोड़न के संघे बंडू आ उनकर मेहरारू के ऊपर कुल मिला के सात लाख रुपिया के कर्जा बा जेके चुकावे के बा. “अगर हमनी के ना चुका पाईब जा त साहूकार के गिनती शुरू हो जाई,” उ कहेलन. यदि परिवार कर्जा चुकावे में असफल रहि गईल त इ अगिला साल खसक जाई जेसे उ लोग एगो अउरी शोषण करे वाला चक्र में फंस जाई. निजी साहूकार लोग हर महीना 3 से 5 प्रतिशत ब्याज लेवेला जवन वार्षिक रूप से 36 से 60 प्रतिशत ले जाला. बाकिर बंडू के कहनाम बा कि कवनो विकल्प नईखे एसे लोगन के जरूरत के समय ओइजा जाए के पड़ेला.

सांझ हो गईल बा, हवा में ठंडक बा बाकिर बच्चा लोग जीव-जान से मेहनत करे में लागल बा. उ लोग गन्ना के डंठल काट रहल बा जेके चारा के रूप में बेचल जा सकेला. बंडू के बच्चा विजय आ अजय गन्ना के किनारी आ बंडल बान्हे में मदद कर रहल बाड़ें. एक बंडल में दस किनारी होला आ 25 बंडलन के एगो ढेरी 100 रुपिया में बिकाला. किनारी के हिस्सा मवेशियन के चारा के रूप में उपयोग कईल जाला.

“हम पांचवी में बानी आ विजय कक्षा तीन में बा,” अजय हमके बतावेला. दूनो तर्नाली के अहिल्यादेवी आश्रम स्कूल के छात्र हवें सन. “हम ए साल स्कूले ना गईली,” उ कहेला. “स्कूल के अध्यापक लोग हमके अगिला कक्षा में भेज दिही लोग. हम पढ़ सकेनी, गिनती गिन सकेनी आ 100 ले पहाडा याद बा. ओकरा बुझाता कि विजय के भाग ठीक नईखे काहें कि उ खाली 11 के पहाड़ा जानेला. “उ कक्षा 4 में ना जाई.”

“हमनी के स्कूल एगो बड़ बंगला में बा. ओइजा हमनी के एक दिन में चार बेर खाए के मिलेला. हमनी के किताब आ कॉपी भी मिलेला,” विजय बतावेला. अजय के बहिन स्वाति कक्षा 7 में बिया बाकिर अब उ स्कूले ना जले. “उ हमनी के संघे कारखाना आईल बा,” उ बतावेला. ओकर पिता बंडू हमनी के बात सुनत बाड़ें. “हमनी के गन्ना काट के परिवार के पेट भरल जाई कि बच्चन के स्कूले भेजल जाई? हमनी के परिवार में तीन पीढ़ी गन्ना काटे वाला मजदूरन के रूप में काम कईले बा. सरकार के हमनी के परेशानियन पर ध्यान देवे के चाहीं.

आदिवासी श्रमिक लोग सबसे पीड़ित होला- उनकर पढाई के क्षमता आ वित्तीय साक्षरता दूनो कम बा. कुछ लोगन के लगे अपनी गांव में जमीन बा बाकिर उ लोगन के दूसरी लोगन के खेत में निराई जईसन कृषि कार्यन पर निर्भर रहे के पड़ेला.

बहुत हिचकिचाहट के बाद प्रवासी मजदूर कमलेश रामसिंह रावताड़े ए पत्रकार से बात आकरे के तैयार भईलें. पावरा आदिवासी कमलेश (32) कहेलन, “हमनी के जलगांव के चोपड़ा तालुका से हईं जा बाकिर हम काम के खोज में नाशिक गईल रहनी. हमनी के गांव के कुछ जमीन पर वन विभाग द्वारा उगावल नर्सरियन में खाली कुछ काम मिल पावेला.” मरद मेहरारू दूनो के आठ घंटा के काम के 130 रुपिया मिलेला, उ कहेलन.

त कमलेश आ उनकर परिवार एगो मालक (ठेकेदार) संघे एइजा आईल आ तम्बू गाड़ दिहलस. “पानी खातिर एगो हैण्ड पम्प बा बाकिर बिजली नईखे,” उ बतावेलन. कमलेश, उनकर मेहरारू आ एगो अन्य जोड़ा ए काम खातिर एक लाख एडवांस लिहले बा. ए लोगन के काटल गन्ना से दू से चार ट्राली भरे में एक दिन के 14-16 घंटा लाग जाला.

कमलेश आ ओ लोगन के समूह नईखे जानत कि ओ लोगन के वेतन के गणना कईसे कईल जाला आ उनकर एडवांस उनकी कमाई के संघे कईसे समायोजित होला. “अगर हमनी के मालक से पूछीं जा त उ सीधे कहेला, ‘तू लोग पईसा लेले बाड़ा, अब तहं लोगन के बस आपन काम करे के चाहीं.’” कमलेश के मेहरारू गर्भवती बिया बाकिर एडवांस लिहला के वजह से ओकरो काम करे के पड़ेला.

“ये पोरया, इकडा ये,” कमलेश अपनी बेटा के बोलावत बाड़ें जवन कवनो वजह से रो रहल बा. उ स्कूले ना जाला. “हमनी के सब दिहाड़ी मजदूर ह. केहू स्कूल पर ध्यान ना देला. हमनी के समुदाय में बहुत लोग अइसन बा जे अनपढ़ बा.” इहां आदिवासी परिवार लोग अहिराणी बोलेला बाकिर स्कूलिंग मराठी में होला. “एही से बहुत दिक्कत होला काहें कि एइजा केहू समझबे ना करेला,” कमलेश कहेलन.

उनका चिंता बा कि ए प्रवासन के वजह से उनकरी बच्चन के स्कूल छूट जाता. उ थोड़ा रुक के सोचत के कहेलन, “हमनियो के गांव में कुछ अलग नईखे. जेकरी लगे जमीन बा, ओकरे बच्चा स्कूले जा पावेलें सन.

“खुशी होखे या दुःख, हमनी के बस काम करत रहे के बा. हमनी के चीनी मिल बंद होखला से पहिले नईखी जा लौट सकत,” कमलेश कहेलन.

“ई एक तरह के गुलामी हवे.”

ई स्टोरी मूल रूप से मराठी में रिपोर्टिंग रहे.

अनुवाद: विमल चन्द्र पाण्डेय