’جب تک آنکھوں میں بینائی ہے، میں بھوکی نہیں مروں گی‘

’’بھوگول سبائی بنیر پائی، مونوسار ڈَیلا سُدو آمرائی بنائی [سولا یا بھینڈ سے کدمب کے پھول تو کوئی بھی بنا سکتا ہے، لیکن منسا دیوی کا ڈَیلا صرف ہم ہی بناتے ہیں]،‘‘ انیشوری برمن منہ میں پان دباتے ہوئے مسکرا کر کہتی ہیں۔

گھٹنوں تک ساڑی چڑھائے، بالوں کو جوڑے میں باندھے، ۵۸ سالہ انیشوری اپنے ہاتھ اور چہرے کو اپنی ساڑی کے آنچل سے پونچھتی ہیں اور اس آنگن کے سیمنٹ کے پختہ حصہ میں بیٹھ جاتی ہیں جسے انہوں نے ابھی ابھی جھاڑو دے کر صاف کیا ہے۔ گھریلو کام کاج اور کاریگری دونوں کو انجام دینے کا ایک اور لمبا دن ان کا انتظار کر رہا ہے۔

بھینڈ (ایسچِنومین ایسپیرا ایل، جسے بنگالی میں ’سولا‘ کہتے ہیں) ایک آبی پودا ہے، جس سے پوجا پاٹھ سے متعلق اور سجاوٹی چیزیں بنتی ہیں۔ یہ مغربی بنگال کی مشہور دستکاری کی روایات میں سے ایک ہے۔ ریاست کے شمالی ضلع کوچ بہار میں ۴۴۶۷ لوگوں کی آبادی (مردم شماری ۲۰۱۱) والے سدھیشوری گاؤں میں کئی خاندان سولا کاری پر منحصر ہیں۔ لیکن کوچ بہار۔دوئم بلاک کے اس گاؤں میں انیشوری جیسے خاندان کے چنندہ افراد ہی مانسا کا ڈَیلا بنانے کی وراثت سنبھالے ہوئے ہیں۔ یہ بھینڈ یا سولا کے تنے کے اندر موجود سفید رنگ کے ملائم اور ہلکے حصہ سے بنا وہ ڈھانچہ ہے، جس میں سانپوں کی دیوی منسا کی پینٹ کی ہوئی تصویر ہوتی ہے۔

’’اگر یہ روایت آپ کی فیملی میں نہیں ہے، تو آپ کو اسے بنانے کی اجازت نہیں ہوتی۔ لیکن ہم بنا سکتے ہیں، کیوں کہ یہ ہمارے خاندان کی روایت رہی ہے،‘‘ وہ فخریہ انداز میں کہتی ہیں۔ ان کے شوہر کا خاندان راج بنشی برادری سے ہے، جو مغربی بنگال میں درج فہرست ذات کے طور پر درج ہے۔

برصغیر کے اس حصہ میں جہاں متعدد جنگل، ندیاں اور دلدلی زمینیں ہیں، سانپ کثرت سے پائے جاتے ہیں۔ لوگ سانپوں کے کاٹنے اور متعدی امراض سے تحفظ اور اولاد اور خوشحالی سے متعلق آشیرواد کے لیے دیوی منسا کی پوجا کرتے ہیں۔

حالانکہ، ہر ذات برادری کے لوگ ماں منسا کی پناہ حاصل کرتے ہیں، لیکن ڈیلا پوجا کی روایت شمالی بنگال کی راج بنشی برادری میں زیادہ عام ہے۔ ڈیلا چڑھانے کی یہ رسم خاص کر مانسون کے مہینوں میں ادا کی جاتی ہے، جب سانپ کے کاٹنے کا خطرہ بڑھ جاتا ہے۔ ’’شراون، بھادر اور اشوِن [بنگالی کیلنڈر کے مطابق، وسط جولائی سے وسط اکتوبر تک کے تین مہینے] – ان تینوں مہینوں میں سبھی دیشی مانسی [راج بنشی لوگ] ڈیلا پوجتے ہیں،‘‘ انیشوری جو ڈیلا بناتی ہیں، وہ بنگالی اور راج بنشی کی ایک دلچسپ آمیزش ہے۔

کوچ بہار کے آمباری گاؤں میں پیدا ہوئیں اور پلی بڑھیں انیشوری اپنی شادی سبھاش برمن سے ہونے کے بعد سدھیشوری آ گئیں۔ پندرہ سال کی نئی نویلی دلہن انیشوری اپنے شوہر اور دیور کو سولا پر کام کرتے دیکھ کر کافی خوش ہوئیں، لیکن اس دنیا میں داخل ہونے کی اجازت ملنے میں انہیں وقت لگا۔ ’’انہیں شاید لگا ہوگا کہ کام بگاڑ دوں گی اور سب گڑبڑ ہو جائے گا،‘‘ انیشوری کہتی ہیں۔

لیکن انہوں نے شکست تسلیم نہیں کی۔ انہیں دیکھتے دیکھتے اور چوری چھپے خود مشق کرتے ہوئے، کچھ ہی سالوں میں وہ کاریگری پکڑنے لگیں۔ ’’میں بار بار کوشش کرتی رہی اور سوچتی تھی کہ لگاتار کوشش کروں گی، تو ایک دن ضرور سیکھ جاؤں گی۔ شاید میری محنت گھر کی آمدنی میں مدد کرے، یہ سوچ کر میں نے خود ہی سیکھ لیا۔‘‘

آج وہ سبھاش کے ساتھ کندھے سے کندھا ملا کر سائٹول (منسا کی تصویر سے سجے بیلن نما سولا سے بنی چیزیں) اور بھوگول (سولا سے بنے نیولامرکیا کدمب کے پھول) بناتی ہیں، ساتھ ہی مشہور ڈیلا بھی بناتی ہیں اور اپنے گھر کی آمدنی میں اضافہ کرنے میں مدد کرتی ہیں۔

سائٹول اور بھوگول تو سال بھر فروخت ہوتے ہیں، لیکن ڈیلا کی مانگ ان سے کہیں زیادہ ہوتی ہے۔ برمن میاں بیوی ہر سال تقریباً ۷۰۰-۸۰۰ ڈیلا بیچتے ہیں۔ سیزن میں ایک ڈیلا ۷۰-۱۰۰ روپے میں اور عام دنوں میں ۲۵-۳۰ روپے میں فروخت ہوتا ہے۔

’’ایئِلیا کاجوٹو کھوب کھاٹنی بابا [اس کام میں بہت محنت ہے]،‘‘ وہ کہتی ہیں۔ ’’ہمیں سولا کاٹ کر لانا پڑتا ہے، گاڑی سے ڈھونا پڑتا ہے۔ پھر دھوپ میں سُکھا کر، پیمائش کے حساب سے کاٹ کر ڈیلا بناتے ہیں۔‘‘

کبھی مغربی بنگال، بہار اور آسام کی نہروں اور دلدلوں میں بھرپور اُگنے والا سولا، جسے انیشوری جیسے لوگ مفت میں جمع کر لیتے تھے، اب بیساکھ اور جیٹھ (وسط اپریل سے وسط جون) میں کھیتی کے طور پر اُگایا جاتا ہے۔ انیشوری اپنے گھر کے پیچھے اُگتے سولے کے پودے کی طرف اشارہ کرتی ہیں، ’’جب میں کاریگری سیکھ رہی تھی، تب یہ پودے بغیر کسی قیمت کے مل جاتے تھے۔ یہ نہروں میں، ہر جگہ اُگتے تھے۔‘‘

وہ بتاتی ہیں کہ ماحولیاتی تبدیلی سے دلدلی اور مرطوب زمینیں بری طرح سمٹ گئی ہیں: ’’اب یہ پودے کمیاب ہو گئے ہیں؛ اور اگر اُگ بھی جائیں تو مفت میں نہیں ملتے۔ ہر تنا ۸-۹ روپے میں خریدنا پڑتا ہے۔‘‘ اس سے سولا کی بہتات اور آسان دستیابی پر اثر پڑا ہے۔

بنگالی شادیوں اور انّ پراشن (پہلی بار چاول کھلانے کی رسم) میں سولا کی مالائیں اور تاج کبھی عام تھے۔ اب تھرموکول کے سستے متبادل ان رسومات میں سولا کی جگہ لے رہے ہیں۔ یہاں تک کہ ڈاکیر ساج (مورتیوں کی سجاوٹ – پس منظر اور زیورات وغیرہ) میں بھی مانگ کی کمی سے سولا کی کھیتی کرنے والے کسانوں کی تعداد کم ہوتی جا رہی ہے۔

یہ برا دور ہے جس کی وجہ سے کاریگری کے زوال اور سولا کی کھیتی میں کمی آئی ہے۔ ملک میں کاریگروں کی تعداد کے لحاظ سے مغربی بنگال سرفہرست ریاستوں میں ہونے کے باوجود، ریاست کی بہت ہی چھوٹی، چھوٹی اور اوسط درجے کی صنعتوں اور کپڑا کے محکمہ کے ذریعہ یونیسکو کے ساتھ مل کر چلائی جا رہی رورل کرافٹ اینڈ کلچرل ہب (آر سی سی ایچ) انیشیٹو میں سولا کاریگروں سے متعلق تازہ اعداد و شمار دستیاب نہیں ہیں۔ سال ۱۹۹۵ کے ہندوستانی نباتیاتی سروے کی رپورٹ میں ریاست میں تقریباً ۱۰ ہزار سولا کاریگروں کا ذکر ملتا ہے، لیکن شمالی بنگال کے کسانوں یا فنکاروں کا کوئی خصوصی حوالہ موجود نہیں ہے۔

اب کوچ بہار کے طوفان گنج سب ڈویژن کے رسیک بل، ناگُر ہاٹ اور سال باڑی گاؤوں میں کچھ مخصوص کسان سولا اُگاتے ہیں۔ آشاڑھ (وسط جون سے وسط جولائی) میں کاریگر سولا کے کھیتوں میں جاتے ہیں اور لمبی گفتگو اور مول بھاؤ کے بعد آرڈر دیتے ہیں۔ وہ یا تو ٹکڑوں کے حساب سے پودے خریدتے ہیں، یا پورے کھیت کی فصل یک مشت لے لیتے ہیں۔

’’پچھلے سال ہم نے ایک کھیت کی پوری فصل خرید لی،‘‘ انیشوری بتاتی ہیں۔ ’’چھ لوگوں نے مل کر نو کٹھّا [تقریباً ۲۸ء۰ ایکڑ] زمین کی فصل ۲۵ ہزار روپے میں لی۔ اس کے اوپر ہاجیرہ [یومیہ مزدوری] اور نقل و حمل کا خرچ بھی بہت آتا ہے۔‘‘ کسان کٹائی نہیں کرتے؛ مرد سولا کاریگر ہی فصل کاٹتے اور ڈھوتے ہیں، جس میں تقریباً ۲۰۰۰ روپے مزدوری اور ڈُھلائی پر خرچ ہوتے ہیں۔

پہلے یہ تمام لین دین سبھاش سنبھالتے تھے۔ اب ان کا ۲۸ سالہ بیٹا رنجن اپنے بوڑھے ہو رہے والدین کی مدد کرتا ہے – خاص کر فصل کاٹنے اور کھیت سے گھر تک سولا ڈھونے جیسے بھاری کاموں میں۔ وہ اپنی بیوی اور دو بچوں کے ساتھ برمن فیملی کے اسی احاطہ میں بنے ایک الگ حصہ میں رہتا ہے اور دہاڑی مزدور کے طور پر کام کرتا ہے۔ گزر بسر کے لیے وہ دھان، گیہوں اور چِرے (اُبلا ہوا چپٹا چاول) کے لیے چکّیاں لگانے میں بھی ہاتھ بٹاتا ہے۔ اس کی ماہانہ آمدنی ۱۰ سے ۱۵ ہزار روپے کے درمیان ہے۔ میاں بیوی کی بڑی اولاد، ۳۲ سالہ بیوہ اور زرعی مزدور انجنا رائے بھی سولا کے کام میں اپنے والدین کی مدد کرتی ہیں۔ وہ اپنے بچوں کے ساتھ اکثر میکے آتی ہیں – خاص کر منسا پوجا کے دوران۔

منسا پوجا کے قریب آتے ہی برمن فیملی کے تمام ارکان سولا سے متعلق چیزیں بنانے میں مصروف ہو جاتے ہیں۔ ’’ان تین مہینوں [جولائی کے وسط سے اکتوبر کے وسط تک] کام بہت بڑھ جاتا ہے۔ ہم رات کے ۲-۳ بجے تک کام کرتے ہیں۔ میرا بیٹا کافی محنت کرتا ہے، میری بیٹی بھی کام کرتی ہے،‘‘ انیشوری کہتی ہیں۔ پڑوسی بھی ساتھ آ جاتے ہیں اور ان کے پانچ کمروں والے روایتی راج بنشی گھر کی نالی دار ٹین کی دیواریں اجتماعی محنت کی تیز آوازوں سے گونج اٹھتی ہے۔

’’اسے [سبھاش کو] کٹائی ٹھیک سے نہیں آتی، اس لیے وہ رنگ روغن کا کام کرتا ہے۔ ڈیلا کی سجاوٹ میں سنبھالتی ہوں،‘‘ کاٹا کی دھار کو تیز کرتیں انیشوری کہتی ہیں۔ وہ ڈنٹھل سے بھورے رنگ کی کھال اتارتی ہیں اور سولا کو پیمائش کے حساب سے کاٹتی ہیں؛ سبھاش ٹکڑوں کو متعینہ سائز میں جوڑتے ہیں۔ وہ ڈھینکی شاک (ڈپلازیَم ایسکولینٹم) کو اُبال کر اور کوٹ کر ہرے رنگ کا گوند تیار کرتے ہیں۔ یہ ہنر انہیں اپنے والد اور دادا سے ملا ہے۔ ایک جیسے ڈھانچوں سے ڈیلا کے چاروں کنارے بنتے ہیں اور ایک طرف کاغذ چپکایا جاتا ہے، جس پر کالی سیاہی سے ماں منسا کی تصویر بنائی جاتی ہے۔

بانس سے گھرے باورچی خانہ میں بیٹھیں انیشوری بھٹی میں پٹکاٹھی (جوٹ کی ڈنٹھل، کورکورس اولی ٹیریئس) کی خوشک ٹہنیاں جلاتی ہیں اور آگ پر رکھے برتن کی تلی میں سیاہی جم جاتی ہے۔ ’’میں اس سیاہی کو کھرچ کر بیل (ووڈ-ایپل) کے گوند میں ملاتی ہوں اور اچھی طرح پھینٹتی ہوں، تاکہ یہ سوکھا نہ رہے۔ پھر آہستہ آہستہ پانی ڈال کر ہلاتی ہوں۔ دھیرے دھیرے کاجل [سیاہی] الگ ہو کر پانی کی سطح پر تیرنے لگتا ہے۔‘‘

انیشوری کا دن تقریباً پانچ بجے صبح شروع ہوتا ہے۔ ’’گھر میں جھاڑو لگاتی ہوں، برتن صاف کرتی ہوں، نہاتی ہوں، چائے بناتی ہوں، کھانا پکاتی ہوں، پھر کھاتی ہوں۔‘‘ مصروف سیزن میں وہ اس معمول میں سولا کے کام کے ۵-۶ گھنٹے مزید جوڑ دیتی ہیں۔ یہ محنت صرف آمدنی کے لیے نہیں ہے؛ اپنی مصنوعات کے مختلف قسم کے مقدس استعمال سے ملنے والا اطمینان بھی اتنا ہی اہم ہے، انیشوری بتاتی ہیں۔

’’لوگ کہتے ہیں کہ سولا کا بڑا مقصد ہوتا ہے۔ کیا بغیر مقصد کے [ڈیلا] بن سکتا ہے؟‘‘ وہ سولا سے بنی چیزوں میں لگی محنت کی طرف اشارہ کرتے ہوئے پوچھتی ہیں۔ راج بنشی گھروں میں ڈیلا کا استعمال شادی اور گھر میں پہلی بار داخل ہونے کی پوجا میں چڑھاوے کی شکل میں بھی ہوتا ہے۔ بنگلہ دیش کے رنگ پور ضلع سے آئے دکشن دیشی راج بنشی، ڈیلاؤں کے ساتھ ساتھ سائٹولوں کی بھی پوجا کرتے ہیں۔ سائٹولوں پر بنی منسا کی تصویر، ڈیلاؤں والی تصویر سے مختلف ہوتی ہے۔ سولا سے بنے کدمب پھولوں کے بھوگول تہواروں اور پوجا پاٹھ میں سجاوٹ کے لیے استمعال ہوتے ہیں۔

کوچ بہار ضلع میں ڈیلا-سائٹول کی پوجا دیہی علاقوں میں عام ہے۔ موسم آنے پر انیشوری اور سبھاش ۵۰-۱۰۰ روپے دے کر ٹوٹو (بیٹری سے چلنے والا رکشہ) یا آٹو رکشہ کرایے پر لیتے ہیں اور بانیشور، بوکالی ماٹھ اور دھنگ دھِنگ گُڑی جیسے گاؤوں کے بازاروں تک جاتے ہیں۔ ’’کیا آپ کو معلوم ہے، میں بانیشور بازار میں مشہور ہوں؟ انہوں نے [دوسرے دکانداروں نے] مجھے بازار میں جگہ دے رکھی ہے،‘‘ مسکراتے ہوئے انیشوری فخر سے بتاتی ہیں۔ ’’اگر میں وہاں [لمبے عرصہ کے بعد] جاؤں، تو وہ پوچھتے ہیں، کاکی [چچی]، پہلے کیوں نہیں آئیں؟‘‘ مقامی بازار میں اپنی مقبولیت پر ان کا فخر صاف دکھائی دیتا ہے۔ یہ میاں بیوی مقامی دکانوں سے بھی یہ سامان سپلائی کرتے ہیں۔ کئی بار لوگ سیدھے برمن کے گھر آ کر بھی چیزیں خریدتے ہیں۔

انیشوری بتاتی ہیں کہ ان برسوں میں، انہوں نے کئی لوگوں کو بھوگول اور دیگر اشیاء بنانا سکھایا ہے۔ لیکن، ’’بدقسمتی کو نظر انداز کرتے ہوئے کئی لوگ اب ڈیلا بنانے لگے ہیں، جب کہ یہ روایت ان کے خاندان میں پہلے نہیں تھی،‘‘ انیشوری کہتی ہیں۔ ’’کچھ لوگ ہاتھ سے بنانے کی جگہ منسا کی تصویر کے پرنٹ آؤٹ ڈیلا پر چپکا دیتے ہیں، جس سے کم وقت میں زیادہ ڈیلے بن جاتے ہیں۔‘‘ برمن فیملی اس شارٹ کٹ کو نہیں اپناتی۔ سو تصویروں کا پرنٹ ۵۰۰-۷۰۰ روپے پڑتا ہے۔ ہاتھ سے تصویریں بنانا محنت طلب ہونے کے باوجود پرنٹنگ کا خرچ بچاتا ہے۔ ’’اسی لیے ہم یہ کام ہاتھ سے کرتے ہیں۔‘‘

اس کام میں کافی محنت لگتی ہے۔ سبھاش ڈھانچہ کے ایک طرف اے–۴ سائز کا کاغذ چپکاتے ہیں۔ پہلے سے بنائے بانس کے قلم اور انیشوری کی کالی سیاہی سے وہ اپنی بوڑھی انگلیوں سے منسا کی تصویریں بناتے ہیں۔ ساتھ ہی سانپ، بطخ اور کمل کے پھول بھی بنائے جاتے ہیں۔ ’’یہ ڈیلا اصل میں بیہولا اور لکھندر کا باسر گھر [نئی شادی کا گھر] ہے،‘‘ وہ منسا منگل اور پدم پران جیسے مقامی رزمیوں کا حوالہ دیتے ہوئے سمجھاتے ہیں۔

تُلسی تلا (گھر میں پوجا کی جگہ، جہاں اوسیمم سینکٹم کا پودا ہوتا ہے) کے پاس بیٹھ کر میاں بیوی کام کرتے ہوئے بیہولا کی اس کتھا (کہانی) کو یاد کرتے ہیں، جس میں سورگ (بہشت) تک بیڑا بہا کر ماں منسا کو خوش کرتی ہے اور کال ناگنی نام کے مادہ سانپ کے ڈسنے سے مرے اپنے شوہر لکھندر کو زندہ کراتی ہے۔ شیو بھکت چاند سداگر، جس نے منسا کی پوجا سے انکار کیا تھا، آخرکار شیو ٹھاکر کی بیٹی منسا کو نمن کرتا ہے، اور یہیں سے دھرتی پر ان کی پوجا کی شروعات مانی جاتی ہے۔ ’’یہاں ماں منسا کی اس شبیہ کو دیکھئے – ان کے پیروں میں جو تصویر ہے، وہ چاند سداگر کی ہے، جو ان کی پوجا کر رہا ہے۔ اور منسا کے سر کے پاس جو چہرہ ہے، وہ شیو ٹھاکر کا ہے،‘‘ سبھاش بتاتے ہیں۔

سبھاش مقامی دکان سے لائی گئی چھوٹی اسٹیل کی پیالیوں میں نارنجی اور گلابی رنگ ملاتے ہیں۔ جس برش کو وہ استعمال کر رہے ہیں، وہ ان کے پالتو بکرے کے بالوں سے بنا ہے۔ اسی دوران انیشوری سائٹول رنگتی رہتی ہیں، حالانکہ دیر تک پیر پھیلا کر بیٹھنے سے انہیں کافی پریشانی ہوتی ہے۔ ’’ہماری صحت ٹھیک نہیں ہے؛ پتہ نہیں کب تک ایسے کام کر پائیں گے۔‘‘

ایک بار پہلے کبھی کمر کے نیچے انہیں جزوی طور پر لقوہ مار گیا تھا اور ڈاکٹروں اور ایک کوی راج (آیوروید کا معالج) سے علاج کرانے کے بعد صحت یاب ہوئیں۔ پھر بھی وہ کہتی ہیں، ’’ہم نے یہ کام کرتے ہوئے کبھی اپنے جسم کے بارے میں نہیں سوچا۔ چاہے جو ہو جائے۔ سیزن کے درمیان ہم رک نہیں سکتے۔‘‘ ماہواری کے دوران بھی وہ کام کرتی ہیں۔ ’’یہی تو ہم ہیں جو اسے [منسا کی ڈیلا] کو جنم دیتے ہیں، ہم مائیں ہیں۔ ہم ’چھویا‘ [حیض کے دوران چھواچھوت] میں یقین نہیں رکھتے،‘‘ ان کی سادہ سی دلیل ان کی ذہانت کی عکاسی کرتی ہے۔

انیشوری بتاتی ہیں کہ ایک مکمل ڈیلا کن کن چیزوں سے بنتا ہے۔ سولا پیٹھ سے بنے چار ڈھیاپ (نمفیا نوچلی یا نیلوفر) ڈیلا کی چاروں سمت میں لگائے جاتے ہیں۔ ڈیلا کو فروخت کرتے وقت کھول کر رکھا جاتا ہے اور پوجا پاٹھ سے ٹھیک پہلے جوڑا جاتا ہے۔ بانس کی ایک چھڑی سے درمیان میں بھوگول لگایا جاتا ہے۔ اور سبھی حصوں کے اوپر، سب سے اوپر ہوتا ہے پھیان یا پھیانا، یعنی ناگ کا پھن۔ کیلے کا جھکی [گچھا] سندور سے بنا ہوا یا بطح کے انڈے جیسے منت کے نذرانے ڈیلا کے اندر کے خالی حصے میں رکھے جاتے ہیں۔ پوجا ختم ہونے کے بعد ڈیلا کو کیلے کے تنے سے بنے بیڑے پر رکھ کر قریب کے تالاب، جھیل یا ندی میں بہا دیا جاتا ہے۔

انیشوری کے ذریعہ سمجھائے جاتے وقت سبھاش تصویروں کو سُکھانے کی تیاری کرتے ہیں۔ وہ سُپاری کے پتّے کو آگ دکھاتے ہیں۔ وہ کہتے ہیں، ’’اگر آسمان صاف ہوتا اور دھوپ ہوتی، تو اس مرحلہ کو چھوڑا جا سکتا تھا۔‘‘ اپریل ۲۰۲۵ میں جب پاری نے اس میاں بیوی سے ملاقات کی، تب لگاتار بارش ہو رہی تھی، جس سے انیشوری اور سبھاش کو اپنا یومیہ کھیتی کا کام بھی روکنا پڑا۔

سولا دستکاری کے تین مہینوں کے موسم کے علاوہ، وہ باقی سال دھان کی بوائی اور کٹائی میں لگاتے ہیں۔ وہ جوٹ اور آلو کے کھیتوں میں بھی مزدوری کرتے ہیں اور جن دنوں کام مل جاتا ہے، ۳۰۰-۳۵۰ روپے کما پاتے ہیں۔

’’آج کل بہت کم کام ملتا ہے، کیوں کہ لوگ دھان کی کٹائی اور بھوسی نکالنے میں مشینیں استعمال کرنے لگے ہیں،‘‘ انیشوری مایوسی سے کہتی ہیں۔ برمن فیملی کے پاس تقریباً آدھا ایکڑ زمین ہے، جس میں ان کا گھر اور ایک بانس کا جھرمٹ بھی شامل ہے۔ رنجن بتاتے ہیں کہ کبھی کبھی آلو کے موسم میں انہیں بٹائی پر کام کرنے کا موقع مل جاتا ہے۔

تقریباً ڈیڑھ سال پہلے انہوں نے مرکزی حکومت کی مکان سے متعلق اسکیم، پردھان منتری آواس یوجنا (پی ایم اے وائی) کے تحت گھر کے لیے درخواست دی تھی۔ کچھ پڑوسیوں کو نئے گھر مل گئے ہیں؛ برمن فیملی اب بھی اس کا انتظار کر رہی ہے۔ بی پی ایل خاندانوں کے لیے ملنے والا مفت راشن اور حکومت مغربی بنگال کی لکشمی بھنڈار اسکیم کے تحت ملنے والے ماہانہ ۱۰۰۰ روپے گزارہ کے لیے کافی نہیں پڑتے۔ ’’ہمیں تو چاول بھی خریدنا پڑتا ہے،‘‘ انیشوری کہتی ہیں۔ قابل کاشت زمین نہ ہونے کا ملال ان کی آواز میں صاف جھلکتا ہے۔

’’میری پریشانیاں ختم نہیں ہوتیں۔ ہماری بیٹی نے اپنے شوہر کو کھو دیا ہے اور کسی طرح گزارہ کر رہی ہے۔ ہم ہمیشہ اس کی مدد نہیں کر پاتے اور بار بار قرض لے کر کسی طرح کام چلا رہے ہیں۔ بندھن [بینک] کا ۳۰ ہزار روپے کا قرض بھی ابھی باقی ہے،‘‘ انہوں نے پاری کو بتایا۔

سیزن کے بیچوں بیچ تین مہینے کی آمدنی ان کی گزر بسر کے لیے بیحد ضروری ہے۔ ’’سولا کی کاریگری سے بس چناچور [مونگ پھلی] ہی ملتا ہے، لیکن انہیں بنائے بغیر پیٹ کیسے بھرے گا؟‘‘ انیشوری کے الفاظ منریگا کے تحت کام کی کمی کی جانب بھی اشارہ کرتے ہیں۔ سولا دستکاری کا ہنر ہی ان کی کچھ خواہشوں کو پورا کر پاتا ہے۔ درگا پوجا کے دوران یہی آمدنی سب کے لیے نئے کپڑے بنوانے کا سبب بنتی ہے۔

لیکن یہ آمدنی مستقل نہیں ہے۔ ’’کبھی بازار میں مال نہیں فروخت ہوتا، تو کبھی مانگ پوری نہیں کر پاتے۔ جیسے اس سال ہم اپنا سارا سامان نہیں بیچ پائے،‘‘ انیشوری رک کر کہتی ہیں۔ ’’یہ فائدہ مند ہے، مگر تبھی جب ہم ۱۰ ہزار روپے میں سامان خریدیں اور تیار مال ۳۰ سے ۳۵ ہزار روپے میں فروخت کر سکیں۔ سب کچھ لاگت اور فروخت کی قیمت پر منحصر ہے۔‘‘ پچھلے سال فروخت ہونے سے بچ گئے ٹکڑوں کو بڑے پالی تھین بیگوں میں بحفاظت رکھ لیا جاتا ہے اور سیزن آنے پر مانگ پوری کرنے میں استعمال کیا جاتا ہے۔

بات کرتے کرتے ایک پڑوسی ڈیلا خریدنے آ جاتے ہیں۔ مسکراتے ہوئے انیشوری گاہک سے بات کرتی ہیں۔ دھیمی آواز میں وہ یہ مانتی ہیں، ’’جان پہچان والے ہمیں ٹھیک دام نہیں دیتے۔ میرے شوہر ایک سیدھے سادے انسان ہیں، لیکن مجھے ٹھگنا آسان نہیں ہے۔‘‘

حالیہ دنوں میں ان کی بینائی کمزور ہوئی ہے۔ گھر سے ۱۰ کلومیٹر دور آنکھوں کے اسپتال جانے پر بھی راحت نہیں ملی۔ جب ان سے پوچھا گیا کہ وہ اپنے ہنر کو کیسے آگے بڑھائیں گی، تو پان سُپاری سے بھرے منہ کے ساتھ اپنی خاص مسکراہٹ بکھیرتے ہوئے انیشوری کہتی ہیں، ’’جب تک آنکھیں دیکھ پائیں گی۔‘‘

اور اس کے بعد؟

’’کی آر کورا جابے؟ پائلے کھامو، نا پائلے کھامو نا [اور کیا کیا جا سکتا ہے؟ جب تک آنکھوں میں بینائی ہے، میں بھوکی نہیں مروں گی؛ جب نظر نہیں آئے گا، تب کھانے کو نہیں ملے گا]۔‘‘

اوزار ایک طرف رکھ کر انیشوری اپنے گھر کے منسا مندر میں شام کا چراغ جلانے کے لیے اٹھتی ہیں۔ اور آنگن میں، ڈھلتی شام کی روشنی میں، سبھاش ڈیلا کو آخری شکل دیتے ہوئے برش گھما رہے ہیں۔

یہ رپورٹ مرنالنی مکھرجی فاؤنڈیشن (ایم ایم ایف) کی ایک فیلوشپ کے تحت لکھی گئی ہے۔

یہ اسٹوری سب سے پہلے بنگالی زبان میں لکھی گئی تھی۔

ترجمہ نگار: قمر صدیقی