जिनकर जिद से जिंदा बा शोला कला

“भोगोल सबाइ बनेर पाइ, मोनोसार इयाला सुदु आमराइ बनाइ (शोला से कदम के फूल केहू बना सकेला. बाकिर मनसा देवी के ड्याला खाली हमनी बनाइला),” मुंह में पान धरत अनेश्वरी बर्मन मुस्कियात कहली.

ठेहुना ले लुगा चढ़वले, कस के जूड़ा बनवले, 58 बरिस के अनेश्वरी आपन अंचरा से हाथ आ मुंह पोछत बाड़ी. फेरु ऊ तुरंते बहार के साफ कइल अंगना के सीमेंट वाला हिस्सा में बइठ जात बाड़ी. घर-गिरहस्ती आ कलाकारी दुनो के बीच तालमेल बिठावत, एगो आउर लमहर दिन उनकर बाट जोहता.

शोला (एस्चिमोमीन एस्पेरा एल) एगो डंठल वाला पौधा बा, आ दलदली जमीन में उगेला. एकरा से पूजा-पाठ आ सजावट के सामान बनावल जाला. पस्चिम बंगाल के नामी हस्तशिल्प परंपरा में एकर गिनती होखेला. उत्तर जिला कूच बिहार के सिधेश्वरी गांव. सन् 2011 में भइल जनगणना के मुताबिक इहंवा के आबादी 4,467 बा. एह गांव के कइएक परिवार शोला कारीगरी पर निर्भर बा. बाकिर कूच बिहार- ब्लॉक नंबर दू के एह गांव में अनेश्वरी के परिवार जइसन गिनल-चुनल लोग ही मनसा के ड्याला बनावे के बिरासत संभरले बा. ई शोला के मोलायम गुदा से बनल ढांचा बा, जेकरा में सर्पदेवी मनसी के फोटो बनावल रहेला.

ऊ गुमान करत कहली, “जदि राउर परिवार में एकरा बनावे के परंपरा नइखे, त रउआ एकरा बनाहूं ना सकीं. बाकिर हमनी बना सकिला, काहेकि हमनी के परिवार में ई बनत आइल बा.” उनकर घरवाला के परिवार राजबंसी समुदाय से बा, जे पस्चिम बंगाल में अनुसूचित जाति के रूप में पहचानल जाला.

उपमहाद्वीप के एह हिस्सा में जहंवा कइएक जंगल, नदी आ दलदली जमीन बा, बहुते सांप पावल जाला. लोग मनसा देवी के पूजा करेला, कि ऊ सांप के काटे आ संक्रामक रोग से बचावस आ संतान आ समृद्धि के आशीर्वाद देस.

अइसे त हर जाति, समुदाय के लोग मां मनसा के शरण में आवेला, बाकिर ड्याला पूजा के परंपरा उत्तरी बंगाल के राजबंसी समुदाय में जादे प्रचलित बा. ड्याला, खासकर बरसात में चढ़ावल जाला जब सांप के काटे के खतरा सबले जादे होखेला. “सावन, भादो, आसिन (बंगाली पंचांग के हिसाब से मध्य जुलाई से मध्य अक्टूब तक के बीच तीन महीने)- एह तीन महीना में सभे देसी मानसी (राजबंसी) लोग ड्याला पूजेला,” अनेश्वरी जे ड्याला बनावेली, ऊ बंगला आ राजबंसी के एगो अनोखा मिश्रण होखेला.

कूच बिहार के आमबारी गांव में जनमल आ पलाएल-पोसाएल अनेश्वरी, सुभाष बर्मन से बियाह के बाद सिधेश्वरी आके बस गइली. पनरह बरिस के नइकी दुल्हिन अऩेश्वरी आपन घरवाला आ देवर के शोला के काम करत देखस, त बहुते उत्साहित होखस. बाकिर एह दुनिया में घुसे में उनका समय लागल. अनेश्वरी कहेली, “हो सकेला ऊ लोग सोचले होई कि हम काम बिगाड़ देहम.”

बाकिर ऊ हार ना मानली. ऊ ओह लोग के काम करत चोरा के देखे लगली आ लुका-लुका के अभ्यास करे लगली. कुछे साल में एह कारीगरी पर उनकर पकड़ बने लागल. “हम खूब कोसिस करत रहीं, आउर हमेसा इहे सोचीं कि दिन-रात प्रयास करम त एक दिन जरूर सीख जाएम. इहो सोचीं कि मिहनत करम, त घर के आमदनी बढ़ी. इहे सब सोचत हम अपने सीख लेनी.”

आज ऊ सुभाष संगे कान्हा से कान्हा मिलाके साइटोल (मनसा के आकृति से सजल बेलनाकार शोला से बनल सामान) आउर भोगोल (शोला से बनल निओलामर्किया कदंब के फूल) बनावेली. इहे ना, एकरा संगे-संगे नामी ड्याला भी बनावेली आ परिवार के आमदनी बढ़ावे में सहजोग करेली.

साइटोल आ भोगोल त सालों भर बिकाला. बाकिर ड्याला के मांग बहुते जादे बा. बर्मन दंपत्ति हर साल कोई 700-800 ड्याला बनावे आ बेचेला. सीजन में एगो ड्याला 70-100 रुपइया आ आम दिन में 25-30 के भाव से बिकाला.

ऊ कहेली, “एइल्या काजोतो खुब खाटनी बाबा (एह काम में बड़ा खटनी बा). हमनी के शोला काटके लावे, गाड़ी से ढोवे पड़ेला. बाद में घाम में सुखाके, नाप के हिसाब से काटके ड्याला बनावल जाला.”

पस्चिम बंगाल, बिहार आ असम के नहर आ दलदल में शोला पहिले भरपूर उगे आ अनेश्वरी जइसन लोग मुफ्त में जुटा लेत रहे. अब एकर खेती बैसाख आ जेठ (मध्य-अप्रैल से मध्य-जून) में कइल जाला. अनेश्वरी आपन घर के पिछवाड़ा में उग रहल पौधा ओरी इसारा कइली, “हम काम सिखत रहीं, तब ई पौधा फोकट में मिल जात रहे. नहर में, एने-ओने सब ओरी उगत रहे.”

उनका हिसाब से पानी-बयार बदले चलते दलदली आ आद्र जमीन बहुत जादे सिकुड़ गइल बा. “अब त ई पौधा देखहूं के ना मिले. जदि उगियो गइल, त पइसा लागेला. एक-एक डंठल आठ-नौ रुपइया में कीने पड़ेला.” एही चलते शोला अब आसानी से आउर जादे मात्रा में ना भेंटाए.

बंगाली लोग इहंवा बियाह आ मुंहजुट्ठी (अन्नप्राशन) में शोला के माला आ मुकुट के कबो खूब चलन रहे. बाकिर अब एकर जगह सस्ता थर्मोकोल ले लेले बा. इहंवा ले कि डाकेर साज (मूरति के सजावट- पृष्ठभूमि आ गहना आदि) में भी मांग घटला से शोला के खेती करे वाला किसान लोग कम भइल चलत जा रहल बा.

ई एगो दुष्चक्र बा. शोला के खेती कम भइल जा रहल बा, आ कारीगरी मुरझा रहल बा. देस में कारीगर लोग के गिनती के लिहाज से पस्चिम बंगाल अव्वल बा. बाकिर तबो राज्य के सूक्ष्म, लघु आ मध्यम अद्यम आ वस्त्र विभाग ओरी से यूनेस्को संगे मिलके चलावल जा रहल रूरल क्राफ्ट एंड कल्चरल हब (आरसीसीएच) इनिशिएटिव में शोला कारीगर के बारे में ताजा जानकारी उपलब्ध नइखे. सन् 1995 के भारतीय वनस्पति सर्वेक्षण रिपोर्ट में राज्य के कोई 10.000 शोला कारीगर के जिकिर मिली. बाकिर उत्तर बंगाल के किसान, चाहे कलाकार लोग के खास बिसेष उल्लेख ना मिली.

अब त कूच बिहार के तूफानगंज उपखंड के रसिकबिल, नागुरहाट आ सालबाड़ी गांव में ही कुछ मुट्ठी भर किसान लोग शोला उगावता. आषाढ़ (बीच जून से बीच जुलाई) में कारीगर लोग शोला के खेत में जाला आ देर ले बातचीत आ मोल-मोलाई के बाद ऑर्डर देवेला. ऊ लोग या त टुकड़ा के हिसाब से पौधा कीनेला, चाहे पूरा खेत के फसल एकमुश्त ले लेवेला.

अनेश्वरी बतावेली, “पछिला साल हमनी एगो खेत के समूचा फसल कीन लेले रहीं. छव गो लोग मिलके नौ कट्ठा (कोई 0.28 एकड़) जमीन के फसल 25,000 रुपइया में लेवेला. एकरा ऊपर हाजिरा (दिहाड़ी) आ आवे-जाए के खरचा भी बहुते पड़ेला.” किसान कटाई ना करे, शोला कारीगर (मरद) लोग ही फसल काटे आ ढोवेला. एह सब में लगभग 2,000 रुपइया मजूरी आ ढुलाई पर खरचा हो जाला.

पहिले ई सब लेन-देन सुभाषे करत रहस. अब सब कुछ उनकर 28 बरिस के लइका संभारेलन. रंजन आपन बूढ़ हो रहल माई-बाऊजी के मदद से सब करेलन, खासकरके फसल काटे आउर खेत से घर ले शोला ढोवे जइसन भारी काम. ऊ आपन घरवाली आ दू ठो लइकन संगे बर्मन परिवार के उहे अहाता के एगो हिस्सा में रहेलन आउर दिहाड़ी मजूरी करेलन. गुजारा खातिर ऊ धान, गेहूं आ चीरे (उसिनल चपटा चाउर) खातिर चक्की लगावे में भी हाथ बंटावेलन. उनका एह सब से महीना के 10,000 से 15,000 के कमाई हो जाला. दंपत्ति के सबले बड़ लइकी, 32 बरिस के विधवा खेत मजूर अंजना रायो शोला के काम में माई-बाऊजी के मदद करेली. ऊ अक्सरहा आपन बाल-बच्चा संगे नइहर आ जाली, खास करके मनसा पूजा घरिया.

बर्मा परिवार मनसा पूजा लगे आवते शोला के सामान सब बनावे में जुट जाला. “ई तीन महीना (बीच जुलाई से बीच अक्टूबर ले) काम बहुते रहेला. हमनी रात के 2-3 बजे ले काम करिला. हमार बेटो बहुते खटेला, आउर हमार लइकियो काम करेली,” अनेश्वरी कहेली. पड़ोसी लोग भी हाथ बंटावे आ जाला. पांच कमरा वाला पारंपरिक राजबंसी घर के टीन के लहरदार देवाल सभे के भागमभाग से गूंज उठेला.

“उनका (सुभाष) कटाई के काम ठीक से ना आवे, एही से ऊ पेंटिंग के काम करेलन. ड्याला सजावे के काम हम करिला,” काटा के धार तेज करत अनेश्वरी कहे लगली. ऊ डंठल के भुअर छिलका उतारे में लागल बाड़ी. फेरु एकरा ऊ शोला के नाप से कटीहन. सुभाष टुकड़ा सब के तय आकार में जोड़ेलन. ऊ ढंकी शाक (डिप्लाजियम एस्कुलेन्टम) के उसिन के कूटके हरियर रंग के गोंद बनावेलन. ई लुर ऊ आपन बाऊजी आ दादा से सिखले बाड़न. एक जइसन चार ठो ढांचा से ड्याला के चारों कोना बनेला. एक ओरी कागज चिपकावल जाई, जेकरा पर करियर सियाही से मां मनसा देवी के फोटो बनावल जाई.

आपन बांस से घेरल रसोई में अनेश्वरी बइठ के भट्टी में पटकाठी (जूट के डंठल, कोरकोरस ओलिटिरियस) के सूखल टहनी जरावतारी आ आग पर धइल बरतन के तली में कालिख जमत जा रहल बा. “कालिख सब खुरचके बेल (वुड एप्पल) के गोंद में फेंट देहम, जेसे ई सूखल ना रहे. ओकरा बाद धीरे-धीरे पानी डालके हिलावत जाए. धीरे-धीरे काजल (स्याही) अलग होके पानी के ऊपर तइरे लागेला.”

अनेश्वरी भोरे पांचे बजे उठ जाली. “घर बहारिला, बरतन-बासन साफ करिला, नहाइला, चाय बनाइला, खाना बनाइला. फेरु खाइला.” भागमभाग वाला सीजन में ऊ रोज के काम में शोला के काम के 5 से 6 घंटा भी जोड़ देवेली. एतना मिहनत खाली पइसा कमाए खातिर ना होखे. आपन सृजन के पावन काम से मन के गाढ़ा सुकून मिलेला, अनेश्वरी फरिया के कहली.

“लोग शोला के मकसद बहुत बड़ा बतावेला. का बिना मकसदस के (ड्याला) ना बन सके?” ऊ शोला से बनल चीज सब में लागल आपन मिहनत ओरी इशारा करत पूछली. राजबंसी घरन में ड्याला से बियाह आ गृह-प्रवेश के पूजा में चढ़ावा के सामान सब तइयार होखेला. बांग्लादेस के रंगपुर जिला से आइल दक्षिणदेसी राजबंसी, ड्याला सब के साथे-साथे साइटोला सब के भी पूजेला. साइटोला सब पर बनल मनसा के चित्र, ड्याला वाला से अलग होखेला. शोला से बनल कदंब फूल सब के भोगोल त्योहार आ अनुष्ठान सब में सजावट खातिर इस्तेमाल होखेला.

कूच बिहार जिला में ड्याला-साइटोल पूजा के चलन जादेतर गांव-देहात में बा. मौसम अइला पर अनेश्वरी आ सुभाष लोग 50-100 रुपइया देके टोटो (बैटरी से चले वाला रिक्सा), चाहे ऑटो रिक्सा किराया पर उठावेला आ बानेश्वर, बोकालिमठ आ दांग धिंगगुड़ी जइसन गांव के हाट ले जाला. “रउआ मालूम बा, बनेश्वर बजार में हमार बहुते नाम बा? ऊ लोग (दोसर किराएदार) हमरा बजार में जगह देले बा,” अनेश्वरी तनी मुस्कात गर्ब से बतावेली. “बहुते दिन बाद गइला पर ऊ लोग पूछेला, ‘चाची, पहिले काहे ना अइलू?’” लोकल बजार में आपन लोकप्रियता पर उनकर गर्ब साफ झलकेला. ई मरद-मेहरारू लोग लोकल दोकाने में ई सामान सब सप्लाई करेला. केतना बेरा लोग सीधा बर्मन के घरे आके भी चीज सब कीन के ले जाला.

अनेश्वरी बतावेली कि पछिला कइएक बरिस से ऊ गांव के लोग के भोगोल आ दोसर सामान सब बनावे के सिखावत बाड़ी. बाकिर, “अब त केतना लोग ड्याला बनावे लागल बा, जबकि एह काम के परंपरा परिवार में पहिले ना रहे,” अनेश्वरी बतइली. “केतना लोग हाथ से बनावे के जगह मनसा के फोटो के प्रिंट करवाके ड्याला पर साट देवेला. एकरा से कम समय में जादे ड्याला बन जाला,” बर्मन परिवार अइसन शॉर्टकट वाला काम ना करे. सौ फोटो के प्रिंट में 500 से 700 खरचा हो जाला. हाथ से चित्र बनावे के काम मिहनत वाला होखेला, बाकिर एकरा से प्रिंट वाला खरचा बचेला. “एही से हमनी ई काम हाथ से करिला.”

एह काम में कड़ा मिहनत लागेला. सुभाष ढांचा के एक ओरी ए-4 कागज चिपकावेलन. पहिले से बनावल बांस के कलम आ अनेश्वरी के बनावल कालिख वाला सियाही से ऊ आपन बूढ़ अंगुरी से मनसा के फोटो बनावेलन. संगही, बत्तख आ कमल के फूलो बनावल जाला. “ई ड्याला असल में बेहुला आ लखिंदर के बसरघर (कोहबर/नवविवाह कक्ष) बा,” ऊ मनसामंगल आ पद्मपुराण जइसन लोक-महाकाव्य के हवाला देके समझावत बारन.

दूनो मरद-मेहरारू लोग तुलसी तला (घर में पूजा के जगह, जहंवा ओसिमम सैंक्टम के पौधा होखेला) के लगे बइठके काम करत बेहुला के कथा इयाद करेला. एह कथा में बेहुला स्वर्ग ले बेड़ा बहाके मां मनसा के खुस करेली आ कालनागिनी नाम के मादा सांप के डंसे से मरल आपन घरवाला, लखिंदर के जिंदा करावेली. शिव भक्त चांद सदागर, जे मनसा पूजे से मना कइले रहस, आखिर में शिव ठाकुर के बेटी मनसा के नमन करेलन. आउर इहंई से धरती पर उनकर पूजा सुरु मानल जाला. सुभाष बतावेलन, “इहंवा मां मनसा के ई छवि देखीं. उनकर गोड़ में चांद सदागर के फोटो बनल बा, जे उनका पूजत बाड़न. आ मनसा के माथा लगे शिव ठाकुर के चेहरा बा.”

सुभाष, लोकल दोकान सब से लावल छोट स्टील के कटोरी सब में नारंगी आ गुलाबी रंग मिलावेलन. ऊ आपन पालतू बकरी के बाल से बनल ब्रश से रंग भरे के काम करेलन. एही घरिया अनेश्वरी साइटोल रंगे में लागल रहेली. अइसे जादे देर ले गोड़ फइला के बइठे में उनका दिक्कत होता, साफ लउकता. “हमनी के तबियत ठीक ना रहे. मालूम ना कबले एह तरीका से काम कर पाइब.”

एक बेरा उनका कमर से नीचे आधा लकवा मार गइल रहे. कइएक डॉक्टर आ एगो कविराज (आयुर्वेदिक चिकित्सक) से इलाज करइला के बाद ऊ ठीक भइली. तबो ऊ कहेली, “हमनी ई काम करे घरिया कबो आपन देह के बारे में ना सोचनी. चाहे जे हो जाए, पीक सीजन में हमनी रुक ना सकीं.” ऊ माहवारियो घरिया काम करेली. “हमनी माता बानी, हमनिए त एकरा (मनसा ड्याला) के जनम दीहिला. हम ‘छोया’ (माहवारी घरिया छुआछूत) में बिस्वास ना करीं,” उनकर सहज तरीका से कहल बात से गहिर ज्ञान झलकेला.

अनेश्वरी एगो ड्याला के बनावे में लागे वाला हर हिस्सा के विस्तार से समझावेली. शोलापीठ से बनल चार गो ढयाप्स (निम्फिया नौचली, चाहे जलकुंभी/नीलोत्पल) ड्याला के चहूं दिसा में लगावल जाला. ड्याला बेचे घरिया खोल के रखल जाला आउर अनुष्ठान के ठीक पहिले जोड़ल जाला. बांस के एगो छड़ी से बीच में भोगोल लगावल जाला, आउर सभे हिस्सा के ऊपर, सबले ऊपर होखेला. फ्यान चाहे फ्याना. माने नाग के फण. केला के झुकी (घौद, गुच्छा) सिंदूर में सनल, चाहे बत्तख के अंडा जइसन मनौती के भेंट सब ड्याला के भीतर के खाली हिस्सा में रखाला. पूजा संपन्न भइला के बाद ड्याला के केला के तना से बनल बेड़ा पर रखके लगे के तालाब, झील, चाहे नदी में बहा देवल जाला.

अनेश्वरी जब समझावत बारी, उहे घरिया सुभाष पेंटिंग के सुखावे के तइयारी में बाड़न. ऊ सुपारी के पत्ता (एरेका कैटेचू) के आग के धाह पर सेंकत बाड़न. ऊ कहेलन, “आसमान साफ होखे, आ घाम पूरा होखे, त ई काम छोड़ल जा सकेला.” अप्रिल 2025 में जब पारी एह दुनो प्राणी से भेंट कइलक, पानी लगातार पड़त रहे. एतना कि अनेश्वरी आ सुभाष के आपन दिहाड़ी खेती के कामो रोके पड़ल रहे.

साल के तीन महीना शोलाकला बनेला, ओकरा अलावे बाकी के साल ऊ लोग धान बोए आ काटे के काम करेला. ऊ लोग जूट आ आलू के खेत में मजूरियो करेला. जवन दिन काम मिल जाला, 300 से 350 कमाई हो जाला.

“अब त मजूरी के काम बहुत कम मिलेला. लोग धान काटे आ भूसी निकाले के काम मसीन से करे लागल बा,” अनेश्वरी मेहराइल कहली. बर्मन परिवार लगे कोई आधा एकड़ जमीन बा. एकरा में उनकर घर आ बांस के एगो झुरमुटो बा. रंजन बतावेलन कि कबो-कबो आलू के मौसम में उनका बटाई पर काम करे के मौका मिल जाला.

कोई डेढ़ बरिस होखत होई, ऊ प्रधानमंत्री आवास योजना (पीएमवई) के तहत घर खातिर अरजी देले रहस. कुछ पड़ोसी लोग के त नया घर मिल गइल, बाकिर बर्मन दंपत्ति अबले इंतजार में बा. बीपीएल पिरवार के मिले वाला मुफ्त रासन आ पस्चिम बंगाल सरकार के लक्ष्मी भंडार योजना में मिले वाला महीनवारी 1,000 रुपइया से गुजारा ना होखे. अनेश्वरी कहेली, “हमनी के त चाउरो कीने पड़ेला.” उनकर आवाज में खेती लायक जमीन ना होखे के टीस साफ झलकता.

ऊ पारी से कहली, “हमार परेसानी के ओर-अंत नइखे. हमार लइकी के घरवाला चल बसलन, अब ऊ केहूं तरहा जियत बाड़ी. हरमेसा ओकर मदद ना कर पाईं हमनी, केहूंगे उधार लेले के काम चल रहल बा. बंधन (बैंक) के तीस हजार रुपइया के उधारियो चुकावे के बा.”

भरपूर काम वाला तीन महीना के कमाई पर उनकर गुजर-बसर हो रहल बा. “शोला के काम से खाली चनाचूरे (चिनियाबदाम) भर कमाई होखेला, बाकिर ई ना करब त रोटी कहंवा से आई?” अनेश्वरी के बात से समझ आवेला कि मनरेगा में काम के कमी बा. गनीमत बा कि शोला के कामे बा. एकरा चलते कुछ अरमान त पूरा हो जाला. दुर्गा पूजा में एकरे कमाई से सब खातिर नया कपड़ा कीनाला.

बाकिर रोज-रोज एक जइसन कमाई ना रहे. “कबो-कबो बजार में माल ना बिकाला, त कबो माल कम पड़ जाला. जइसे एह साल हमनी के पूरा सामान ना बिकाएल,” अनेश्वरी तनी ठहर के कहेली. “एह काम में मुनाफा बा, बाकिर तब्बे जब माल 10,000 में कीनाए आ 30 से 35,000 में बिकाए. हर चीज लागत आ बिक्री पर निर्भर बा.” पछिला बरिस के बचल सामान सब बड़का-बड़का पन्नी में संभार के रखल जाला आ सीजन से पहिले बेच देवल जाला.

बातचीत चलते रहे कि एगो पड़ोसी ड्याला कीने अइलन. अनेश्वरी मुस्कात ग्राहक से बतियावत बाड़ी. ऊ धीरे से ई बात मानेली, “जान-पहचान वाला लोग पूरा दाम ना देवे. हमार घरवाला त बड़ा सरल बाड़न, बाकिर हमरा ठगल संभव नइखे.”

अब उनका कम देखाई देवे लागल बा. घर से कोई 10 किमी दूर पड़े वाला आंख के अस्पतालो गइला पर उनकर दिक्कत ठीक ना भइल. पूछला पर कि ऊ आपन कला आगू जिंदा कइसे रखिहन, पान-सुपारी वाला मुंह से ऊ आपन जानल-पहचानल मुस्का बिखेरत कहली, “जबले आंख से लउकी...”

आउर ओकरा बाद का?

“की आर कोरा जाबे? पाइले खामु, ना पाइले खामु ना (आउर का कइल जा सकता? जब लउकी, खाएम, न लउकी, भुखले रहम. जबले लउकी, भुखले ना मरम).”

आपन काम के सामान सब सहेजत, अनेश्वरी घर के मनसा मंदिर में सांझ के दिया-बाती करे उठली. ढलत सांझ में, अंगना में बइठल सुभाष ड्याला में आखिरी रंग भर रहल बाड़न.

रिपोर्ट मृणालिनी मुखर्जी फाउंडेशन (एमएमएफ) के एगो फेलोशिप के तहत वित्तीय सहायता से तइयार कइल गइल बा.

रिपोर्ट मूल रूप से बांग्ला में रहे.

अनुवाद: स्वर्ण कांता