ब्लॉक प्रिंटिंग: मुनाफा कम, मिहनत जियादा

प्राकृतिक रंग ले रंगाय कपड़ा मन ला धोये बर बोहावत नदी के जरूरत परथे, अब्दुल हलीम कहिथे. “यहाँ तो हाथ धोने का पानी नहीं मिलता!”

हलीम तीसर पीढ़ी के ब्लॉक प्रिंटिंग कारीगर आय जेन ह सरलग घटत नफा अऊ नकली जिनिस मन के बढ़त चलन के संगे संग अपन कारखाना ला चलाय बर जूझत हवय. पानी के कमी वाले इंदौर शहर मं, ओकर करा रसायनिक रंग बउरे के छोड़ कोनो उपाय नइ ये, जेन ह रंग ला तुरते धर लेथे.

ब्लॉक प्रिंटिंग ह लकरी के ब्लॉकों के डिजाइन ले सुरु होथे, हलीम डिजाइन बनाथे जेन ला वो ह जयपुर, फर्रुखाबाद अऊ फतेहपुर के ब्लॉक बनेइय्या मन करा भेजथे. वो मन अक्सर ब्लॉक बनाय बर सागवान (सागौन) धन शीशम लकरी काम मं लाथें.

ये ब्लाक मन ला रंग मं डूबोय जाथे अऊ कपड़ा मं छापे जाथे. हलिम कहिथे, “ये हमर पुरखौती के हिस्सा आय,” चंदेरी दुपट्टा मं गुलाबी गुलाब छापे बर जब वो ह तरी कोती झुकथे, त धियान राखथे के अमिट रंग धुंधला झन हो जावय. वो ह जेन रंग ला काम मं लाय लावत हवय, वोला कपड़ा मं लगाय के पहिली जूट, मलमल कॉटन अऊ मच्छरदानी ले छान ले गे हे. मऊसम मुताबिक. खास करके बरसात बखत, सुखाय के काम ह ढेरिया जाथे, जेन मं करीबन 72 घंटा लगथे.

न्यू सियागंज मं अपन कारखाना मं बइठे, हलीम अपन डिजाइन मन के खासियत ला गरब ले बताथें, जेकर कतको ऐतिहासिक स्मारक अऊ मुगल चित्रकारी ले प्रेरित हवंय. वोल सुरता हवय के एक ठन प्रदर्सनी मं, वो ह हैदराबाद के एक झिन शिल्पकार के जटिल बिदरी (धातु हस्तकला के एक ठन किसिम) काम ले प्रेरित होय रहिस. बाद मं वो ह, ओ डिज़ाइन मन ला लुगरा मं छपई के मुताबिक बनाइस. हलीम मुचमुचावत सुरता करथे, “जब मंय वोला लुगरा मन के फोटू भेजेंय त वो ह भारी गदगद होगे.”

हलीम के परिवार के मूल मध्य प्रदेश के चंदेरी ले जुड़े हवंय- जेन ह अशोकनगर जिला के एक ठन शहर आय अऊ नामी हथकरघा कपड़ा केंद्र आय. ओकर पुरखा मन बुनकर अऊ छपाई के काम करत रहिन अऊ महेश्वरी, चंदेरी अऊ टसर सिल्क जइसने कपड़ा के काम करत रहिन. जइसने-जइसने होड़ बढ़त गीस अऊ आमदनी कम होय लगिस, हलीम के ददा अब्दुल अलीम ह 1970 के दसक के आखिर मं पहिली मुंबई अऊ आखिर मं इंदौर मं बसे के कठिन फइसला करिस.

हलीम कहिथे के चंदेरी मं ओकर बनेच रिश्तेदार मन ये काम ला छोड़ दे हवंय.“अब वो मन ले अधिकतर मन मजूरी करत हवंय,” वो ह कहिथे. “ये काम मं जियादा मुनाफ़ा नइ ये, भारी मिहनत करे ला परथे.”

इंदौर मं हलीम के परिवार मं वोला मिलाके ओकर दाई-ददा, ओकर घरवाली नेहनाज अली, ओकर बेटा हवंय. 32 बछर के नेहनाज घलो ये बेवसाय मं सामिल हवय, वो ह बालपन ले अपन दीदी ले कढ़ाई, हाथ ले छपाई अऊ कशीदाकारी सीखे रहिस. बिहाव के बाद, वो ह महेश्वरी अऊ चंदेरी रेशम उपर हाथ ले छपाई सुरु करिस, अऊ प्रदर्सनी मन मं सराहे गीस. घर-गृहस्थी ला संभालत, नेहनाज रोज के तीन चार घंटा अपन ये कला मं लगा देथे, जटिल डिजाइन के काम करथे जेन ला पूरा होय मं काम के मुताबिक तीन ले सात दिन लागथे.

परिवार अपन बेवसाय के अधिकतर काम के प्रबंध, ब्लॉक डिजाइन करे ले लेके छापे तक, खुदेच करथे. ये काम माहिर मजूर खोजे भारी मुस्किल आय, काबर के इहाँ के अधिकतर कारीगर, बाग छपाई धन बटिक के काम मं माहिर हवंय.

हलीम कहिथे के ओकर कारखाना ‘हुडा प्रिंटर्स एंड क्राफ्टर्स’ ला इंस्टाग्राम अऊ फेसबुक जइसने सोशल मीडिया प्लेटफॉर्म के जरिया ले सीधा बिक्री अऊ सरकारी एम्पोरियम मन ओकर बिक्री करके ओकर कला ला आगू ले जाय मं मदद करथे. वइसे, नकली जिनिस ओकर नफा के नुकसान करत हवय: हलीम ह मिहनत अऊ कच्चा माल के लागत के हिसाब करत बताथे, “असली चंदेरी कपड़ा 400 रूपिया मीटर ले कम मं नइ बिकावय. मिहनत के दाम 600 रूपिया रोजी आय. फेर ग्राहेक मन येला नइ समझंय. हमन ले 1,500 -2,000 रूपिया मं छपाई वाले लुगरा के बेचे के आस करथें.”

एक ठन लुगरा के छपई के काम मं 45 मिनट ले लेके 15 दिन लाग सकथे, जेन ह डिज़ाइन के काम मुताबिक होथे. लुगरा बुने मं अऊ घला जियादा बखत लग सकथे – दू दिन ले लेके तीन महिना तक.

हलीम अऊ ओकर ददा जइसने छपई के काम करेइय्या मन के कहना आय के ब्लॉक अऊ रंग बर सब्सिडी देय के सरकारी योजना मन ले मदद मिल सकथे. हलीम निरास होके कहिथे, “मध्य प्रदेश सरकार हाथ ले ब्लॉक धन बाग़ प्रिंटिंग, बटिक रंगाई धन चंदेरी बुनाई ला बढ़ावा देवत नइ ये, फेर ओकर दुनिया भर मं नांव हवय.”

कतको बिघन-बाधा के बाद घलो, हलीम अऊ अली अपन काम मं लगे हवंय. वो मन फैशन डिज़ाइन पढ़ेइय्या लइका मन बर घलो वर्कशाप करथें अऊ इंदौर के कॉलेज मन मं हैंड ब्लॉक प्रिंटिंग ला लेके जागरूकता के काम करथें.

कोविड-19 महामारी ले ओकर बेवसाय ला भारी मार परिस, जेकर ले ओकर सलाना आमदनी आधा होके 5-6 लाख रूपिया होगे हवय. कस्टम ब्लॉक अऊ रंग के बढ़त दाम ह ओकर पइसाके प्रबंध ला अऊ घलो जियादा असर डारे हवय.

हलीम कहिथे, “हमन ऑनलाइन बिक्री सुरु करेन, फेर ये ह येकर लइक नइ रहिस.” ग्राहेक मन जुन्ना लुगरा लहूटा देवत रहिन, सिकायत करे के लंबा काम अऊ जियादा कमीशन ह येला घाटा के सौदा बना दीस. वो ह अमेजन कारीगर अऊ अजियो जइसने बेवसाइट मन मं बेचे के कोसिस करिस, फेर वो ह देखिस के असली जिनिस के संग नकली माहेश्वरी लुगरा 300 रूपिया ले घलो कम दाम मं बेचे जावत हे. “तो जिन लोगों को असली-नकली की परख नहीं है, वो हमारा माल क्यों खरीदेंगे [त जेन लोगन मन ला असली-नकली के गियान नइ ये, वो मन हमर जिनिस काबर बिसोहीं?” हलिम कहिथे.

येकरे सेती परिवार ह ये प्लैटफ़ॉर्म मन मं बेचे ला बंद कर दीस. येला छोड़, वो मन कभू-कभू इंस्टाग्राम मं बनाय जिनिस के फोटू मन ला डारथें अऊ ग्राहेक मन पूछताछ करथें. बड़े नांव वाले ले मिले होड़ अऊ पइसा के जरूरत सेती दूकान खोले ह कोनो उपाय नो हे. गर वो मन बड़े नांव वाले के संग काम करे ला चाहथें घलो, त ये मं घलो कतको चुनोती होथे, काबर के वो मन के कड़ा नियम अऊ करार, वो बात मन ला धियान मं नइ राखय, जेकर ले छोटे कारीगर मन जूझथें, जइसने मऊसम के हालत धन उहाँ मिलेइय्या कच्चा माल.

“सरकारी विभाग त हवय, फेर वो मन जमीनी काम ला नइ करंय,” अलीम कहिथे. वो ह घलो कतको दीगर कारीगर मन के जइसने महामारी जइसने संकट बखत सरकार ले जियादा मदद के आस करिस. फेर येला छोड़, पुलिस ह ओकर कारखाना ला बंद कर दीस अऊ ओकर उपर 3 लाख के जुरमाना लगाइस.

अतको बिघन-बाधा के बाद घलो, ये परिवार अपन काम ला आगू ले जावत हवय. हलीम ला आस हवय के ग्राहेक बनाय हरेक जिनिस के मिहनत अऊ कला के कदर करहीं अऊ ओकर जइसने कारीगर मन बिन बाधा के सरलग अपन काम आगू बढ़ावत ले जाय सकहीं.

वो ह कहिथे, “दीगर कतको शिल्पकला जइसनेच हाथ ले ब्लॉक छपई ला घलो बचाय के जरूरत हवय. हमन ला अवेइय्या पीढ़ी बर ले जाय बर सही तरीका के मदद के जरूरत हवय.”

अनुवाद: निर्मल कुमार साहू