इंदौर प्रिंटिंग: असली रंग के जंग

“प्राकृतिक डाई (रंगल कपड़ा) धोवे खातिर बहत नदी के जरूरत होला,” अब्दुल हलीम कहेलन. “यहां पे तो हाथ धोने का पानी नहीं मिलता (इहां त हाथ धोये के पानी नईखे मिलत)!”

हलीम तीसरी पीढ़ी के ब्लाक प्रिंटिंग कारीगर हवें जे लगातार घटत जा रहल मुनाफा आ नकली उत्पादन के बढ़े से अपनी कार्यशाला के चलावे खातिर संघर्ष कर रहल बाड़ें. पानी के कमी से जूझ रहल इंदौर शहर में उनकी लगे जल्दी रंग पकड़े वाला रासायनिक रंगन के उपयोग करे के अलावा कवनो विकल्प ना रहे.

ब्लाक प्रिंटिंग लकड़ी के ब्लाक के डिजाईन करे से शुरू होला आ हलीम डिजाईन बना के जयपुर, फर्रुखाबाद आ फतेहपुर के ब्लाक बनावे वालन के लगे भेजेलन. उ आमतौर पर ब्लाक बनावे खातिर सागवान (टीक) या शीशम (भारतीय रोजवुड) के उपयोग करेलन.

ई ब्लाक रंग में डुबावल जाला आ कपड़ा पर प्रिंट कईल जाला. “ई हमनी के विरासत के हिस्सा हवे,” हलीम कहेलन. उ चंदेरी दुपट्टा पर गुलाबी रंग के गुलाब प्रिंट करे खातिर ध्यान से झुकल बाड़ें ताकि अदृश्य रंग धुंधला ना हो जाये. रंगन के जवनी मिश्रण के उपयोग उ करत बाड़ें, ओके जूट, मलमल काटन आ मच्छरदानी के माध्यम से छनला के बाद कपड़ा पर लगावल जाला. मौसम के स्थिति, खासकर बारिश के मौसम के दौरान, सूखे के प्रक्रिया अउरी जटिल हो जाला जवन आमतौर पर 72 घंटा ले चलेला.

न्यू सियागंज के अपनी कार्यशाला में बईठल हलीम अपनी डिजाईनन के विशेषता के बारे में गर्व से बतावेलन जेमे से कई गो ऐतिहासिक इमारतन आ मुग़ल रूपांकन से प्रेरित बा. उ याद करेलन कि एगो प्रदर्शनी में, हैदराबाद के एगो कारीगर के जटिल बिदरी (एक प्रकार के धातु के हस्तकला) काम से प्रेरणा मिलल रहे. उ बाद में ओ डिजाईन के साड़ी पर प्रिंट करे खातिर अपना लिहलें. “जब हम ओके साड़ी के फोटो भेजनी त उ बहुत खुश भईल,” हलीम मुस्करात के याद करेलन.

हलीम के परिवार के जड़ मध्य प्रदेश के चंदेरी से जुड़ल बा, जवन अशोकनगर जिला के एगो क़स्बा हवे आ एगो प्रसिद्ध हस्तशिल्प वस्त्र केंद्र हवे. उनकर पूर्वज बुनकर आ प्रिंटर रहे लोग जे महेश्वरी, चंदेरी आ टसर सिल्क जईसन कपड़न पर काम करें. जईसे जईसे प्रतिस्पर्धा बढ़ल आ आमदनी घटे लागल, हलीम के पिता अब्दुल अलीम 1970 के अंत में मुंबई जाए के कठिन फैसला लिहलें आ आखिर में इंदौर पहुंचलें.

हलीम कहेलन कि चंदेरी में उनकर ज्यादातर रिश्तेदार लोग ए कला के छोड़ देले बा. “ओमे से ज्यादातर लोग अब मैनुअल श्रमिक के रूप में काम कर रहल बा,” उ बतावेलन. “ए काम में अब पर्याप्त कमाई नईखे रहि गईल आ बहुत मेहनत करे के पड़ेला.”

इंदौर में हलीम के परिवार में ऊ, उनकर माता पिता, उनकर मेहरारू नेहनाज अली आ उनकर बेटा बाड़ें. नेहनाज (32) काम में भी हिस्सेदार बाड़ी, उ अपनी बहिन से बचपन में ही कढ़ाई, हैण्ड पेंटिंग आ क्रोशिया के काम सिखली. बियाह के बाद, उ महेशवरी आ चंदेरी सिल्क पर हैण्ड पेंटिंग शुरू कईली जेके प्रदर्शनियन में सफलता मिलल. घरेलू जिम्मेदारियन के निभावत के नेहनाज तीन से चार घंटा रोज अपनी कला के देवेली आ जटिल डिजाईनन पर काम करेली जेमे डिजाईन के जटिलता के अनुसार उनके तीन से सात दिन पूरा करे में लाग जाला.

परिवार अपनी व्यवसाय के ज्यादातर काम, जईसे ब्लाक डिजाईन से प्रिंट ले, अपने से करेला. कुशल श्रमिकन के खोजल कठिन काम बा काहें कि ज्यादातर स्थानीय कारीगर लोग या त बाग प्रिंटिंग या बटिक के काम के विशेषज्ञ बाड़ें.

‘हुडा प्रिंटर्स एंड क्राफ्टर्स’ कार्यशाला के माध्यम से आ इन्स्टाग्राम फेसबुक जईसन सोशल मीडिया प्लेटफ़ॉर्मन के जरिये प्रत्यक्ष बिक्री आ सरकारी इम्पोरियम के बिक्री उनकी कला के समर्थन करे में मदद करेला, हलीम बतावेलन. हालांकि नकली उत्पादन से उनकर फायदा खतम होखल जाता. “असली चंदेरी कपड़ा एक मीटर 400 रुपिया से कम में ना मिल सकेला,” हलीम कच्चा माल आ कारीगर के खर्चा जोड़त के बतावेलन. “श्रम के लागत 600 रुपिया प्रतिदिन होखेला बाकिर ग्राहक लोग एके ना समझेला. बाजार चाहेला कि कि हमनी के प्रिंटेड साड़ियन के 1500-2000 रुपिया में बेचल जाओ.”

एगो साड़ी के प्रिंटिंग के प्रक्रिया में डिजाईन के जटिलता के अनुसार 45 मिनट से ले के 15 दिन तक ले के समय लाग सकेला. एगो साड़ी के बुनाई में एहू से अधिका दू दिन से तीन महिना तक ले के समय लागेला.

हलीम आ उनकर पिता जईसन प्रिंटर लोगन के कहनाम बा कि ब्लॉक्स आ डाई खातिर सब्सिडी देवे वाला सरकारी योजनन से मदद मिल सकेला. “मध्य प्रदेश सरकार हैण्ड ब्लाक या बाग पेंटिंग, बटिक डाईंग या चंदेरी के बुनकरी के ओकरी विश्वव्यापी मान्यता के बावजूद प्रोत्साहित नईखे करत,” हलीम निराशा में कहेलन.

एकरी बावजूद हलीम आ अलीम अपनी कला के ले के प्रतिबद्ध बाड़ें. इ लोग फैशन डिजाईनिंग के विद्यार्थियन खातिर कार्यशाला भी आयोजित करेला आ इंदौर के कालेजन के माध्यम से हैण्ड ब्लाक प्रिंटिंग के बारे में जागरूकता बढ़ावेला.

कोविड-19 महामारी से उनकर व्यवसाय पर बहुत असर पड़ल आ उनकर वार्षिक आमदनी आधा हो के खाली 5-6 लाख रहि गईल. कस्टम ब्लाक आ रंगन के बढ़त लागत से उनकर वित्तीय स्थिति अउरी तनावपूर्ण हो गईल बा.

“हमनी के ऑनलाइन बेचे शुरू कईनी जा बाकिर फायदा ना भईल,” हलीम कहेलन. ग्राहकन द्वारा उपयोग कईल साड़ी लौटावल, लम्बा शिकायत प्रक्रिया आ हाई कमीशन रेट के वजह से ए काम में फायदा ना होखे. उ लोग अमेज़न कारीगर आ अजिओ जईसन सेलिंग साइट्स के जरिये भी बेचे के कोशिश कईलें त पता चलल कि असली उत्पादन के संघे नकली महेश्वरी साड़ी 300 रुपिया जईसन कम दाम में मिल रहल बा. “तो जिन लोगों को असली-नकली की परख नहीं है, वो हमारा माल क्यों खरीदेंगे (जवनी लोगन के असली-नकली के फरक नईखे पता उ लोग हमनी के माल काहें खरीदी)?” हलीम पूछेलन.

ए कुल वजहन से परिवार ए प्लेटफ़ॉर्मन पर बेचल बंद कर दिहलस. एकरी बजाय उ लोग कबो कबो उत्पादन के फोटो इन्स्टाग्राम पर डाल के ग्राहकन के सवाल पूछे देला. भौतिक रूप से स्टोर खोलल कवनो विकल्प नईखे काहें कि बहुत पईसा के जरूरत बा आ बड़ ब्रांडन से प्रतिस्पर्धा करे के पड़ी. अगर उ लोग बड़ ब्रांडन संघे काम कईल चाहें त एकर अलग चुनौती बा; उनकर कठिन नियम आ शर्त छोट कारीगरन के परेशानियन जइसे मौसम के स्थिति या कच्चा माल के उपलब्धता के ध्यान ना राखेला.

“सरकारी विभाग बनल बा बाकिर जमीन पर काम ना होला,” अलीम कहेलन. उनके आ उनकी जईसे बहुत से कलाकारन के सरकार से मदद के उम्मीद बा खास तौर पर महामारी जईसन समय में. एकरी बजाय पुलिस ओ लोगन के वर्कशॉप बंद कर दिहलस आ 3 लाख रुपिया के जुरमाना लगा दिहलस.

रुकावटन के बावजूद परिवार काम कईल जारी रखले बा. हलीम के उम्मीद बा कि ग्राहक लोग हर टुकड़ा के निर्माण में लगे वाला मेहनत आ कला के सराहना करिहें आ उनकरी जईसन कलाकार लोग बिना संघर्ष आपन जीवन गुजार सकिहें.

“कई कला रूपन निहर हैण्ड ब्लाक प्रिंटिंग के भी संरक्षित करे के चाहीं,” उ कहेलन. “भविष्य के पीढ़ियन खातिर ए कहानी के संरक्षित करे में हमनी के पूरा मन से समर्थन बा.”

अनुवाद: विमल चन्द्र पाण्डेय