देस के जंगल मं बघवा के राज

“हमन इहाँ ले जाय बर तियार नइ अन. हमन कहां जाबो? हमन ला बेघरबार लोगन मन कस दर-दर भटके ला परही,” मुन्ना लाल कुर्मी कहिथे. वो ह सरसेला रयत के एक झिन किसान आंय – ये ह तउन सात कम पांच कोरी (93) गाँव मन ले एक आय, जेन ह मध्य प्रदेश के दमोह जिला मं देस (भारत) के 54वां टाइगर रिज़र्व – वीरांगना दुर्गावती (वीडीटीआर) मं चले जाही. एक ठन नवा बात : इहाँ कोनो घलो बखत चितवा मन ला लाये जा सकथे.

वीडीटीआर बघवा मन के ठीहा बर समर्पित 58 ठन पार्क मन मं सबले नवा आय; चितवा ला दू ठन पार्क मं ठीहा मिलथे. ये जंगल (रिजर्व) मन अइसने जगा आंय जेन ह सिरिफ जंगली जानवर मन बर आय.

ये रिजर्व ला बनाय बर – जेन ह करीबन 80,000 वर्ग किलोमीटर धन देस के कुल वन इलाका के करीबन 10 फिसदी हिस्सा आय – कुल 257 ठन गाँव मन ला आने जगा ले जा के बसाय गे हवय, मतलब वो मन ला अपन घर ले बेदखल करे गीस; ये जानकारी जनजातीय मामला के केंद्रीय राज्य मंत्री दुर्गादास उइके ह दिसंबर 2025 मं लोकसभा ला दे रहिस. अऊ 730 आने गाँव, जेन मन ये रिज़र्व के भीतरेच बसे हवंय, अब उहाँ ले बेदखल करे के लाईन मं हवंय.

दमोह के डबा एक ठन अऊ अइसने गाँव आय, जेन ह नवा रिजर्व के दायरा मं आके नंदा जाही. नौरादेही अभयारण्य के तीर बसे ये गाँव के राधा रानी गोंड सवाल करथे, “हमन कहाँ रहिबो? हमन काय खाबो?” जड़कल्ला के घाम मं अपन अंगना मं बइठे, अपन तुरते लुये गहूँ ला हाथ ले सहलावत, 75 बछर के ये सियानिन महतारी सफ्फा-सफ्फा हलाकान होवत नजर आवत रहिस.

रिज़र्व के आधार ‘किलेबंदी वाला संरच्छन आय’ – मतलब वन्यजीव-जन्तु बर अइसने संरच्छित इलाका जिहां मइनखे मन के बास मं पाबंदी लगे होय. पर्यावरन के जानकार लोगन मन के कहना आय के ये ह एक ठन सीधा सोच आय के जेन मं बघवा अऊ मइनखे एके संग नइ रहे सकंय. असल बात त ये आय के देस मं जंगल के बासिंदा समाज हमेसा ले जंगली जानवर मन ले बनेच लगाव राखे हवय. जानका बाई कहिथे, “जंगल अऊ जानवर मन के देखभाल त हमेच मन करथन. वो लोगन मन हमन ला इहाँ ले निकारत हवंय, अऊ इहीच जगा मं वो मन सैलानी मन बर पहुना घर (गेस्ट हाउस) बनाहीं.” साल 2015 मं, पन्ना टाइगर रिज़र्व के विस्तार सेती ओकर गाँव उमरावन पूरा रिज़र्व मं चले गीस.

विस्थापित समाज मं अक्सर देस के सबले गरीब आदिवासी, दलित अऊ अन्य पिछड़ा वर्ग (ओबीसी) के लोगन मन होथें. ये उहिच लोगन मन आंय जेन मन अपन घर अऊ जमीन ले अपन जुड़ाव गंवा देथें. जंगल के भरोसे कमई के भार अचानक ले टूट जाथे, समाजिक नाता-गोता छरिया जाथे अऊ वो मन के राजनीतिक आवाज दब जाथे.

आदिवासी मन के विस्थापन सेती सिरिफ आरक्षित इलाकच ह नइ ये – फेर अइसने लागथे के ये बखत ये ह तेजी ले उभरत कारन बनगे हवय. जहाँ देस के कुल आबादी मं आदिवासी मन के हिस्सेदारी 8.6 फीसदी हवय, उहिंचे आजादी के बाद ले विस्थापित होय सब्बो भारतीय मन मं वो मन के हिस्सेदारी 55 फीसदी हवय. वो मन ला “बांध अऊ खदान बनाय बर, कल-कारखाना लगाय बर अऊ वन्यजीव पार्क अऊ अभयारण्य बनाय बर अपन मूल ले उजार देय गे हवय.”

वीडीटीआर के माई इलाका, जेन ह अब बघवा अऊ अवेइय्या बखत मं अवेइय्या चितवा मन बर आय, मुन्नालाल के छै एकड़ खेत, ओकर चुंवा, बइला अऊ ओकर घर, सब्बो कुछु चले जाही. 50 बछर के मुन्नालाल, मुआवजा के रूप मं मिले 15 लाख रूपिया के रकम ला लेके बगियाय हवय. “15 लाख रूपिया मं भला कोनो काय कर सकथे? ते पायके, हमन इहाँ ले कहूँ नइ जावन. गर वो मन हमन ला एक करोड़ रूपिया घलो दे देवंय, त ले घलो ये ह भरपूर नइ होवय.”

पारी ह पाइस के तीर के दमोह शहर मं, 15 लाख रूपिया मं करीबन 500-700 वर्ग फ़ीट जमीन बिसोय जा सकथे – जेन ह ये बखत ओकर घर के एक ठन खोली के बरोबर आय.

“इहाँ के कोनो घलो गाँव मं, तुमन ला अपासी वाले धनहा खेत 10 ले 15 लाख रूपिया एकड़ ले कम मं नइ मिलय,” सरसेला के एक झिन बासिंदा कहिथें, जेन ह अपन सरकारी नउकरी सेती अपन नांव उजागर करे ला नइ चाहंय. “इहाँ तक के भर्री-भाठा जमीन घलो पाँच लाख रूपिया एकड़ हवय.”

ये साफ आय के राष्ट्रीय बाघ संरक्षण प्राधिकरण (एनटीसीए) के हरेक सियान 15 लाख रूपिया के पुनर्वास पैकेज, ओतक बड़े मुआवज़ा नो हे, जतक येला बताय जाथे.

जेन लोगन मन येला ले लेथें, वो मं सिरिफ आधा अधूरा घरेच बिसोय पाथें, जिहां पानी अऊ साफ-सफई घलो होय नइ ये. शांति (बदले नांव) के हाल के ये अनुभव रहिस. “ये जमीन मं बड़े-बड़े खंचवा रहिस जेन ला पाटे ला परिस, अऊ ये मं हमर एक लाख ले जियादा खरचा होगे. अऊ ये घर ला बनाय मं नौ लाख रूपिया लगिस. ये पइसा भरपूर नइ रहिस. घर ला पूरा बनाय बर हमन ला करजा लेगे ला परही,” वो ह पारी ला बताइस.

सागर जिला के रेहली गाँव मं किसान हमीर यादव ह साल 2024 मं एक एकड़ बर 13.5 लाख रूपिया देय रहिस. जब हमन दिसंबर 2025 मं ओकर ले भेंट करे रहेन त वो ह कहिस, “अब ये ह 15 लाख रूपिया हवय. आज एक दाम अऊ कालि दूसर अऊ जियादा दाम.”

यादव, ओकर चरों भाई अऊ ओकर मन के परिवार पटनामोहली ले बहिर जाय मं लगे हवंय. ये ह अभयारण्य के भीतरी बसे एक ठन नान-कन गाँव आय, जहाँ इलाज अऊ स्कूल जइसने बुनियादी सुविधा नहीं के बरोबर रहिस. काबर के ये पाँचों परिवार ह मिलके अपन पइसा जमा करे के फइसला करिन, येकरे सेती वो मन जमीन अऊ घर दूनों मामला मं अऊ संगे संग बैंक मं जमा रकम के रूप मं थोकन बने सौदा करे सकिन. सिरिफ उहिच परिवार मन के हालत कुछु बढ़िया हवय, जेन मं सियान मन जियादा हवंय. वइसे, मुआवजा सियान मन के हिसाब ले तय करेगे हवय. जमीन, मवेसी अऊ दीगर संपत्ति बर कोनो अलग मुआवज़ा देय नइ जावय, जेकर हर्जा ये परिवार ला उठाय ला परत हवय. अभयारण्य इलाका के मुन्नालाल जइसने लोगन मन ये सौदा मं सबले जियादा नुकसान उठेइय्या लोगन मन होहीं.

फेर मवेसी पाले –जेन ह यादव परिवार के जिनगी के बड़े हिस्सा आय – अब मुस्किल मं होही. “हमन त सिरिफ अपन मवेसी के गोरस बउरथन,” ओकर घरवाली, पिंकी यादव मुचमुचावत कहिथे. फेर अब, जब चार बर जंगल नइ ये, त ये ह महंगा अऊ कठिन बूता बन जाही.

जानका बाई के घर-गृहस्थी के जिनिस – जेन मं वो चना,मसूर, गहूँ अऊ तिल कमावत रहिस अऊ जंगल ले अचार, मऊहा, आँवला, तेंदू अऊ बरसाती साग-भाजी, कंद-मूल अऊ जड़ी-बूटी लावत रहिस, वो बखत खतम होगे, जब वो मन ला उहाँ ले बेदखल कर दे गीस. “हमन जंगलेच के भरोसे रहेन,” वो ह पारी ला बताथे.

देस भर मं 27.5 करोड़ लोगन मन के जीविका जंगल के भरोसे हवय, अऊ वो मन अब तक ले गरीबी ले निकरे नइ सके हवंय. रातों रात वो मन जियादा ले जियादा सीमांत किसान बन जाथें, फेर अधिकतर झिन बनिहार-भुतियार बनके रहि जाथें.

जनका बाई ह अपन विस्थापन के अनुभव के सार ला कहिथे,“ईंट दिखाकर पत्थर मारते है इन लोग.”

देस (भारत) के जंगल, देस के आदिवासी अऊ देस के धरती भीतरी समाय खनिज संपत्ति, ये सब्बो एक-दूसर के उपर हवंय: एकर मन के मेल एकदम सटीक हवय. इहाँ तक ले हबरे के लुकाय रद्दा (पासवर्ड) ये आय: राष्ट्रीय सुरक्षा, अधोसंरचना,विकासअऊ अक्षय ऊर्जा. एकर बदले जेन खजाना मिलथे, वो आय जमीन,बॉक्साइट, मैंगनीज,लोहा अऊ अऊ घलो बनेच कुछू.

भीतर जाय के एक ठन अऊ जुगत हवय, बघवा अऊ चितवा पार्क बनाय के मांग करे जाय, अऊ जंगली बिलाई मन के नांव ले के देस के मान-सम्मान जगाना. फेर मजा के बात ये आय के इहीच जगा मन मं निर्मान काम (इंफ्रास्ट्रक्चर प्रोजेक्ट्स) के मंज़ूरी मिल जाथे: नदिया मन ला जोड़े बर पन्ना टाइगर रिजर्व के 60 वर्ग किलोमीटर के माई (कोर) इलाका पानी मं बूड़ जाही; शाहबाद के एक ठन जरूरी वन्यजीव गलियारा ला 'पम्प्ड स्टोरेज रिजर्व' बना दे जाही, अऊ खनन चालू करे बर सरिस्का रिजर्व के बफर जोन ला छोटे कर दे गे हवय.

मध्य प्रदेश मं बघवा मन बर सबले जियादा रिजर्व हवंय - कुल नौ ठन. जेन गाँव मन ला विस्थापित करे जाय ला हवय, उहाँ अइसने लोगन मन रहिथें जेन मन पूरा पूरी गैर-लकरी वन उपज (एनटीएफपी) के भरोसे हवंय. मध्य प्रदेश मं हर तीन झिन मं कम से कम एक आदिवासी भूमिहीन आय. इहाँ तक ले नीति आयोग के रिपोर्ट घलो बताथे के मध्य प्रदेश मं हर पाँच मं एक झिन मइनखे हर किसम ले गरीब हवय.

तीर के बोरिया पंचायत के, घासी राम आदिवासी बहिर जाय नइ चाहय काबर के जंगल छूट जाही – ओकर बड़े आमदनी – खतम हो जाही. “अभी तो जंगल बंद कर दिया है, और बस भी रुका दिया [वो मन हमर बर जंगल बंद कर दे हवंय. वो मन हमर गाँव मं अवेइय्या बस घलो बंद कर दे हवंय],” वो ह कहिथे, अऊ तउन अलग-अलग तरीका के बारे मं बताथे जेकर ले इहाँ के लोगन मन ला लागथे के ओकर मन करा कोनो रद्दा बांचे नइ ये.

दमोह के ये आदिवासी गाँव, डबा मं, आज तक बिजली हबरे नइ ये. ते पायके, बढ़त उमर के बाद घलो, लक्ष्मी रानी गोंड कहिथे के वो ह अपन लइका अऊ नाती-पोता मन बर बुनियादी सुविधा हासिल करे बर अब कहूँ आने जगा जाके बस जाही.

वन्यजीव संरक्षण अधिनियम 1972 अऊ प्रोजेक्ट टाइगर [2006] के पहिली, जंगल इलाका मन ला खास करके लकरी ले कमई वाले जगा के रूप मं देखे जावत रहिस. पारी ले गोठ-बात करत, जाने-माने पर्यावरन इतिहासकार प्रोफ़ेसर महेश रंगराजन कहिथे, “वन विभाग के बड़े काम बायोमास, एनटीएफपी अऊ एमएफपी ला अपन काबू मं राखे, लकरी काटे, काम बर मजूर राखे अऊ खेती करे रहिस.”

“एफआरए [वन अधिकार अधिनियम 2006] ह ये ऐतिहासिक ऊपर ले तरी वाले रवैइय्या ला सुधारे के कोसिस करिस, फेर एनटीसीए आइस अऊ वो ह क्रिटिकल टाइगर हैबिटैट्स (सीटीएच) बनाके सब्बो कुछु बदल दिस, जिहां एफआरए करा कोनो अधिकार नइ रहिस,” रंगराजन कहिथे. एफआरए के तहत अधिकार हासिल करे भारी मुस्किल हो गे.”

देस के जंगल मन मं, एनटीसीए करा कतको अधिकार हवंय. येकर स्थापना साल 2006 मं पर्यावरन, वन अऊ जलवायु परिवर्तन मंत्रालय के एक ठन केंद्र प्रायोजित योजना के रूप मं करे गे रहिस. अपन बने के पहिलीच बछर मं, ये ह बघवा मन बर 25 ठन अऊ रिजर्व जोड़ दिस. बफर जोन, जिहां लोगन मन सदियों ले रहत आवत रहिन, रातों-रात बघवा मन के ठीहा सेती भारी जरूरी कोर जोन बन गिन; जेकर कारन लोगन मन के जीविका छिन गिस अऊ वो मन ला विस्थापित होय ला परिस.

“हमन ला [जंगल ले] बहिर काबर निकार दे गिस?” देस के जंगल मं बास करेइय्या लोगन मन, जइसने के रघुलाल जाटव, एक झिन दलित जेन ह मध्य प्रदेश के कूनो के जंगल मं पले बढ़े हवय, ये सवाल करथे. वो ह येकरे सेती पूछथे काबर के साल 1999 मं, वोला अऊ ओकर परिवार ला, संग मं 16,000 दीगर लोगन मन ला, बघवा मन बर उहाँ ले निकारे गे रहिस – फेर बघवा कभू आइसच नइ. बीस बछर ले घलो जियदा बखत बाद, ओकर जगा चितवा आ गिस.

विस्थापन सेती वो मन ला भारी तकलीफ झेले ला परिस, अऊ 27 बछर बाद घलो ये समाज – जेन मं अधिकतर सहरिया आदिवासी अऊ दलित हवंय - आज घलो गुजरा करे बर जूझत हवंय; मुआवजा के रकम अपूर रहिस, अऊ खेती लइक जमीन अऊ लोगन मन ला सुविधा देय के वादा आज घलो वो मन ला मिले नइ ये.

फेर पार्क अऊ जानवर मन के हालत बढ़िया होथे. कोनो रिजर्व ला सबले जियादा बजट मिलथे, अऊ राज के वन विभाग मन ला येकर फायदा होथे. एनटीसीए के बजट (2025- 2026) मं 153 करोड़ रूपिया के जिकर करे गे हवय, जेन ला स्टाफ के सैलरी बढ़ाय, वो मन ला बढ़िया सुविधा देय, पुनर्वास पैकेज अऊ आने जिनिस मन बर करे जाही.

संरच्छन बजट के सबले बड़े हिस्सा बघवा मन ला मिलथे, अऊ येकरे सेती, बघवा अभयारण्य मन ला घोसित करे के भारी जियादा जल्दबाजी रहे हवय,” जीवविज्ञानी प्रोफ़ेसर रमन सुकुमार बताथें. वो ह नेशनल बोर्ड फ़ॉर वाइल्डलाइफ़ (एनबीडब्ल्यूएल) के स्थायी समिति के 28 मार्च, 2026 मं होय बैठक ले लहूटे के तुरते बाद पारी ले गोठ-बात करत रहिन.

देस (भारत)के 3,682बघवा मन (पैंथेरा टाइग्रिस) ले एक-तिहाई संरच्छित इलाका के बहिर रहिथें, अऊ ओकर मन के भविष्य तउन लाखों लोगन मन के भविष्य ले अलग करके सुरच्छित नइ राखे जाय सकय, जेन मन ये इलाका के सरहद मं रहिथें.

प्रोजेक्ट टाइगर के 53 बछर बाद घलो, बघवा मन के संख्या 2,000 ले घलो कम बढ़के करीबन दुगुना होगे हवय. इहीच बखत मं, देस के लोगन मन के आबादी करीबन तीन गुना बढ़गे हवय. जमीन उपर दुवाब भारी जियादा हवय अऊ टकराव होना तय आय.

“मकसद बघवा मन के आबादी बढ़ाय रहे हवय, फेर येकर सफलता बर कोनो योजना बनाय नइ गे हवय,” अशरफ शेख ह पारी ला बताइस. वन्यजीव जीवविज्ञानी अशरफ शेख ताडोबा अंधेरी अभयारण्य अऊ ओकर तीर तखार के इलाका मं काम करत हवंय, ओकर मुताबिक जिहां बीते बछर साल (2025) मं लोगन मन के उपर करीबन 250-300 हमला दरज करे गे हवय. “ बघवा मन के आदत घूमत रहे के होथे, अऊ वो मन अभयारण्य मन मं अलग-थलग आबादी के रूप मं जिये नइ सकंय,” शेख ह चेताथे, जउन ह विकास परियोजना मन के कब्जा करे जावत कमतियात गलियारा मन के कतको खतरा ला लेके लिखे हवय.

हर हफ्ता, वायरल वीडियो अऊ अख़बार मन के पहिली पन्ना मं बघवा मन के फोटो देखे बर मिलथे, कभू घर मं, कभू सार्वजनिक जगा मन मं, कभू हाईवे पार करत, त कभू नदिया मं बूड़त. जनवरी ले मार्च 2026 के बीच, 45 ठन बघवा मर गीन: ये मं करीबन आधा बघवा रिजर्व इलाका के बहिर जान गंवाइन (एनटीसीए).

फेर सोचे के बात ये आय के रिजर्व के भीतरी के बासिंदा मन वो मन ला सायदे कभू देखे होंय. दमोह के मुन्नालाल जंगली जानवर मन के होय ला लेके सवाल करथें: “वो (वन विभाग) मन कहिथें के नौरादेही मं 25 ठन बघवा हवंय, फेर तुमन सोचहू के हमन कम से कम एको ठन ला देखेच होबो, फेर हमन कभू एको ठन ला नइ देखेन. इहाँ तक के एको ठन निशान [पग मार्क] घलो नइ.”

ओकर जइसने, जंगल के तीर रहेइय्या कतको लोगन मन, जेन मं पहिली बफर जोन मं आवत रहिन, उहाँ ले उजारे के कोनो कारन नइ देखंय.

इतिहास ह ये बताय हवय के रिजर्व के भीतरी आदिवासी अऊ दीगर समाज के संग रहे के बाद घलो बघवा मन के आबादी बढ़ सकथे,” सुकुमार कहिथे, अऊ येकर बर वो ह सत्यमंगलम [तमिलनाडु] अऊ बिलिगिरी रंगस्वामी मंदिर [कर्नाटक] रिजर्व मं बघवा मन के आबादी मं होय बढ़ोतरी के उदाहरन देथे.

“कतको टाइगर रिजर्व अइसने हवंय जिहां बघवा नइ यें; ओकर बाद घलो, बघवा मन ला कहूँ अऊ ले जाय के हड़बड़ी करे के छोड़, काबर पहिली वो जगा मन मं बघवा मन ला बसाय उपर धियान नइ दे जाय?”

रिपोर्टर ये कहिनी के रिपोर्टिंग बखत बड़े मन ले मदद सेती दमोह के चंदन लाल अऊ पन्ना के देवश्री सोमानी के आभार जतावत हवय.