बाघ बसावे खातिर आदिवासी काहे उजाड़ल जाता?

“हमनी ना हटम. कहंवा जाएम, बताईं त? बेघर लोग जेका एने-ओने भटके पड़ी,” मुन्नालाल कुरमी कहेलन. ऊ मध्य प्रदेस के दमोह जिला के सरसेला रायत गांव के किसान बाड़न. ई गांव वइसन 93 गांव में से बा, जे भारत के 53वां टाइगर रिजर्व- वीरांगना दुर्गावती (वीडीटीआर) चलते बर्बाद होखे के कगार पर बा. ऊपर से इहंवा जल्दिए चीतो लावे के तइयारी हो रहल बा.

वीडीटीआर (वीरांगना दुर्गावाती टाइगर रिजर्व) नयका 58 टाइगर पार्क में से सबले नया वाला बा. एकरा में से दू ठो में चीतो रखल जाई. ई रिजर्व सब खाली जंगली जानवर सब खातिर संरक्षित कइल गइल बा. ई इलाका आदमी के दखल से पूरा तरीका से अछूता रखल जाला.

मोटा-मोटी 80,000 किमी के इलाका में फइलल एह टाइगर रिजर्व खातिर अबले 257 गांव के लोग के आपन घर से हटावल जा चुकल बा. आदिवासी मामला के राज्य मंत्री दुर्गादास उइके दिसंबर 2025 में लोकसभा में ई जानकारी देलन. अबही 730 गांव आउरी बा, जवन रिजर्व के भीतरी बा आ जल्दिए हटावल जा सकेला.

दमोह के डबा गांव भी जल्दिए रिजर्व के हिस्सा बने जा रहल बा. राधा रानी गोंड पूछत बाड़ी, “हमनी कहंवा रहम? का खाएम?” उनकर गांव नौरादेही अभयारण्य के किनारे बसल बा. सरदी में घाम में बइठल ऊ गेहूं के फसल सहलावत बाड़ी, जइसे ओकरा में कुछो खोजत होखस. गेहूं के ई फसल अबही ताजा-ताजा कट के आइल बा. एकरा में हाथ डाल के बइठल 75 बरिस के बूढ़ माई के मुंह पर चिंता साफ लउकता.

रिजर्व बनावे के पीछे जानवर के सुरक्षा खातिर जंगल के ‘किलाबंदी’ करे के सोच रहे. जानवर बचावल जाव आ आदमी सब के बाहर रखल जाव. पर्यावरण के जानकार लोग एकरा बहुत सरलीकृत सोच मानत बा- कि बाघ आ आदमी संगे ना जी सके. हकीकत त ई बा कि जंगल किनारे बसे वाला लोग बरसन से जंगली जानवरन संगे रहत आ जियत आइल बा. “जंगल आ जानवर के संभारे आ बचावे वाला हमनी बानी आ आज हमनिए के इहंवा से निकाल बाहर कइल जा रहल बा. हमनी के निकाल के इहंवा गेस्टहाउस बनावल जा रहल बा,” जनका बाई कहत बाड़ी. सन् 2015 में जब पन्ना टाइगर रिजर्व क्षेत्र के विस्तार देवल गइल, त उनकर गांव उमरावन एह योजना के भेंट चढ़ गइल रहे.

एह देस में विस्थापन के चक्की में सबले जादे गरीब आदिवासी, दलित आ अन्य पिछड़ा वर्ग (ओबीसी) ही पिसात बा. घर-बार छूट जाता, जमीन से नाता टूट जाता. जंगल पर टिकल रोजी-रोटी अचानक एक झटका में खतम हो जाला. नाता-रिस्ता टूट जाला, आ राजनीतियो में उनकर बात कहे वाला केहू नइखे होखत.

खाली टाइगर रिजर्वे चलते आदिवासी लोग विस्थापित नइखे होखत, बाकिर हां, वर्तमान में ई ओह लोग के विस्थापन के एगो बड़ कारण जरूर बन चुकल बा. देस में आदिवासी लोग के संख्या मात्र 8.6 प्रतिशत बा, जबकि आजादी के बाद से अबले विस्थापित लोग में 55 प्रतिशत लोग आदिवासी बा. कबो बांध के नाम पर, त कबो खदान, कबो उद्योग-धंधा आ वन्यजीव अभयारण्य बनावे के नाम पर” हर बार आ हर जगह उहे लोग हटावल जा रहल बा.

वीडीटीआर के दायरा, बाघ आ चीता खातिर बढ़ावल जा रहल बा. ई जल्दिए मुन्नालाल के छव एकड़ जमीन, उनकर ईनार आ बैल, उनकर घर सब लील जाई. पचास बरिस के मुन्नालाल 15 लाख के मुआवजा के रकम के लेके खिसियाइल बाड़न. उनकर कहनाम बा, “15 लाख से का होई. हमनी कहूं ना जाए वाला बानी. ऊ लोग एक करोड़ भी दीही, तबो कम पड़ी.”

पारी पता लगइलक त पइलक कि दमोह में 15 लाख रुपइया में मुस्किल से 500 से 700 वर्ग फुट जमीन आई, माने उनकर घर के मात्र एगो छोट कमरा ओमें बनी.

सरसेला गांव के रहे वाला (सरकारी नौकरी बचावे खातिर आपन नाम ना जाहिर कइला के शर्त पर) बतावत बाड़न, “इहंवा कवनो गांव में पानी के सुविधा वाला नीमन खेतिहर जमीन 10 से 15 लाख रुपइए एकड़ से कम में ना मिली. खराबो जमीन के भाव 5 लाख से कम नइखे.”

साफ बा कि एनटीसीए (नेशनल टाइगर कंजरवेशन अथॉरिटी) के 15 लाख प्रति वयस्क के पुनर्वास पैकेज, ओतना भरपूर मुआवजा नइखे, जेतना बतावल जा रहल बा.

जे लोग ई मुआवजा लेवेला, ऊ खाली आधा-अधूरा घर बना पावेला. एकरा में पानी आ शौच के सुविधा खातिर आउर पइसा के जरूरत पड़ेला. शांति (नाम बदलल बा) के हाल के अनुभवो इहे रहल. “ओह जमीन पर बड़का बड़का गड्ढा रहे, भरावे में एक लाख से जादे लाग गइल. घर बनावे में नौ लाख लागल, काम अबही बाकिए बा. पूरा करे खातिर करजा उठावे के पड़ी,” ऊ पारी से बतइली.

सागर जिला के रहली गांव के रहनिहार, किसान हमीर यादव सन् 2024 में एक एकड़ जमीन साढ़े 13 लाख में कीनलन. सन् 2025 के दिसंबर में भेंट भइला पर ऊ बतइलन, “अब उहे जमीन 15 लाख में मिलता. आज कुछुओ, त काल कुछुओ.”

यादव, उनकर चार ठो भाई आ परिवार अब पटनामोहली (सेंचुरी के भीतरी पड़े वाला एगो टोला) से निकले के तइयारी में बा. उनकर कहनाम बा कि इहंवा अस्पताल आ स्कूल जइसन मूल सुविधा बहुत कम बा. पांचो परिवार मिलके पइसा जोड़लक, त जमीन-घर तनी ठीक मिल गइल आ बैंक में कुछ पइसो बच गइल. बाकिर ई फायदा उहंई मिलता, जहंवा परिवार में वयस्क (सयान) लोग जादे बा. मुआवजा हर व्यस्क व्यक्ति के हिसाब से तय होखेला. जमीन, मवेशी आउर परिवार के दोसर नुकसान अलग से कवनो मुआवजा ना मिले. एह हाल में अभयारण्य इलाका के मुन्नाल जइसन लोग सबसे जादे घाटा में बा.

यादव परिवार के जिनगी के बड़ काम, मवेशी पालल अब मुहाल हो जाई. हमीर यादव के मेहरारू पिंकी यादव तनी मुस्कात कहतारी, “हमनी खाली आपने मवेसी के दूध पिहिला.” बाकिर अब जंगल में चराई छूटे से खरचा बढ़ी आ दिक्कत होई.

जनका बाई विस्थापित भइली, त उनकर बसल-बसावल घर राई-छित्ती हो गइल. चना, मसूर, गेहूं, तिल उगावल, जंगल से अचार, महुआ, आमला, तेंदु लावल, बरसात में तरकारी, जड़ी-बूटी लावल सब खत्म हो गइल. ऊ कहेली, “जंगले हमनी के सहारा रहे.”

देस भर में कोई 27.5 करोड़ लोग आजीविका खातिर जंगल पर टिकल बा, बाकिर तबो ऊ लोग गरीबी से पीछा नइखे छोड़ा पावत. जंगल से विस्थापित भइला के चौबीसे घंटा में जिनगी बदल जाला. ऊ लोग छोट किसान, चाहे सस्ता मजूर बन के रह जाला.

जनका बाई आपन विस्थापन के पूरा दरद एके लाइन में उड़ेल देत बारी, “ईंटा देखा के पत्थर मारते हैं ये लोग (ईंटा के सपना देखा के पत्थर थमा देवेला ई लोग)”

भारत के जंगल में जहंवा एक ओरी आदिवासी लोग के बसावट बा, उहे ठाम देस के सभे खनिज भंडार दबल बा. एकरा हथियावे खातिर राष्ट्रीय सुरक्षा, विकास, बुनियादी ढांचा आ हरित ऊर्जा जइसन मुद्दा के सहारा लेवल जा रहल बा. बाकिर एह सब मुद्दा के पीछे असली निशाना त जमीन, बॉक्साइट, मैंगनीज, लौह अयस्क जइसन खनिज संपदा बा.

एह इलाका सब में एगो आउर बहाना बनावल जाला. बाघ आ चीता पार्क के नाम पर देशभक्ति जगाव आ एकर आड़ में बड़का प्रोजक्ट मंजूर करवा ल. 60 वर्ग किमी के इलाका में फइलल पन्ना टाइगर रिजर्व के मुख्य हिस्सा नदी जोड़ परियोजना खातिर जल्दिए पानी में डूबे वाला बा.

मध्य प्रदेस में बाघ खातिर सबले जादे, कुल नौ टाइगर रिजर्व बा. जवन गांव खाली करावल जा रहल बा, उहंवा के लोग जंगल से मिले वाला लकड़ी के अलावे बाकी उपज (एनटीएफपी) पर गंभीर रूप से निर्भर बा. बाकिर राज्य के खाली एक तिहाई आदिवासी लगे छोट, चाहे सीमांत जमीन बा. नीति आयोग के रिपोर्ट सब के हिसाब से मध्य प्रदे में हर पांच में से एक आदमी अकाट्य गरीबी से जूझ रहल बा.

लगे के बोरिया पंचायत के घासी राम आदिवासी आपन गांव छोड़ के नइखन जाए के चाहत. उनकर कमाई के जंगले एकमात्र जरिया बा. उनकर कहनाम बा, “अब त जंगल बंद कर देवल गइल बा, आ बसो अब नइखे आवत.” उनकर बात से साफ बा कि गांव के लोग के धीरे-धीरे महसूस करावल जाता कि अब उनका लगे जगह छोड़ के जाए के अलावे कवनो दोसर चारा नइखे.

दमोह के डबा आदिवासी टोला में आज ले बिजली नइखे पहुंचल. एही चलते बढ़त उमिर के बावजूद लक्ष्मी रानी गोंड कहेली कि ऊ हट जइहें, जेसे उनकर बच्चा आ नाती-पोता के मूल सुविधा सब मिल सके.

वन्यजीव संरक्षण कानून 1972 आ प्रोजेक्ट टाइगर (2006) से पहिले जंगल के लकड़ी से होखे वाला आमदनी के बड़ जरिया मानल जात रहे. नामी पर्यावरण इतिहासकार प्रोफेसर महेश रंगराजन पारी के बतइलन, “वन विभाग के मुख्य काम रहे- जैव संसाधन, जंगल उपज (एनटीएफपी आ एमएफपी), लकड़ी कटाई, मजूर से काम आ खेती से जुड़ल गतिविधि पर नियंत्रण रखे के रहत रहे.”

ऊ इहो बतइलन, “वन अधिकार कानून 2006 (एफआरए) एह ऊपर से थोपल गइल ऐतिहासिक नीति सब के ढांचा के सुधारे के कोसिस कइलक. बाकिर एनटीसीए के अइला से स्थिति बदल गइल. ई बाघ के मुख्य बसेरा (क्रिटिकल टाइगर हैबिटेट/सीटीएच) बनइलक, जहंवा एफआरए के कवनो असर ना रहे. एही से एफआरए के तहत अधिकार हासिल कइल कठिन हो गइल.”

भारत में जंगल सब में एनटीसीए के हाथ में बहुते ताकत बा. एकरा 2006 में पर्यावरण, वन आ जलवायु परिवर्तन मंत्रालय के एगो केंद्रीय योजना के रूप में बनावल गइल रहे. पहिलके साल में एकरा में 25 ठो टाइगर रिजर्व जोड़ देवल गइल. जवन इलाका में लोग पीढ़ियन से रहत आइल, ऊ बफर जोन अचके ‘कोर इलाका’ (मुख्य) बन गइल. लोग के रोजी-रोटी छूट गइल, विस्थापित होखे के पड़ल.

भारत के जंगल में रहे वाला रघुलाल जाटव जइसन लोग पूछता, “हमनी के जंगल से काहे खदेड़ल गइल?” मध्य प्रदेस के कूनो के जंगल में पलाएल-पोसाएल दलित रघुलाल ई सवाल इहो चलते उठावत बाड़न कि सन् 1999 में उनकर परिवार सहित 16,000 लोग के शेर सब के बसावे खातिर उहंवा से हटा देवल गइल रहे. ऊ शेर सब अबले ना आएल. बीस बरिस से जादे समय बाद उहंवा चीता लावल गइल.

ओह विस्थापन चलते उनकर जिनगी मुहाल हो गइल. आज 27 साल बादो, जादेतर सहरिया आदिवासी आ दलित समुदाय कवनो तरह से गुजारा कर रहल बा. मुआवजा पर्याप्त ना रहे. खेती के जमीन आ जवन मूल सुविधा देवे के वादा रहे, ऊ आज ले पूरा ना भइल.

बाकिर पार्क आ जानवर सब बेहतर स्थिति में रहेला. एगो रिजर्व के बड़ा बजट मिलेला आउर राज्य के वन विभाग सब के एकर फायदा होखेला. एनटीसीए के 2025-26 के बजट में स्टाफ के तनखाह बढ़ावे, ओह लोग के जादे नीमन सुविधा देवे, पुनर्वास पैकेज आ दोसर मद खातिर 153 करोड़ रुपइया के इंतजाम कइल गइल बा.

संरक्षण के जवन बजट होखेला, ओकरा में सबले जादे हिस्सा बाघ के मिलेला. एकरा बारे में जीवविज्ञानी प्रोफेसर रमन सुकुमार के कहनाम बा, “एही से जंगल वाला इलाका सब में टाइगर रिजर्व लावे के एक तरह के हड़बड़ी देखाई पड़ेला.” ऊ 28 मार्च 2026 के नेशनल बोर्ड फॉर वाइल्डलाइफ के स्थायी समिति के बैठक से लउटे के बाद पारी से ई बात कहलन.

भारत के 3,682 बाघ सब (पैंथेरा टाइग्रिस) में से एक-तिहाई संरक्षित इलाका से बाहर रहेला. एह सब के भविष्य वइसन लाखन लोग के भविष्य से अलग ना कइल जा सकेला, जे एह इलाका के अलग-बगल रहेला.

प्रोजेक्ट टाइगर के आवे के 53 साल में बाघ के गिनती मोटा-मोटी 2000 से बढ़के दोगुना हो गइल. एही दौरान भारत के आबादियो बढ़के कोई तीन गुना हो गइल. जमीन पर दबाव जादे होखे से इंसान-जानवर के आपस में टकराहट तय बा

“लक्ष्य खाली बाघ के गिनती बढ़ावे के रहल. एकर नतीजा का होई, ओकरा बारे में कवनो तइयारी ना भइल,” अशरफ शेख पारी से बतइलन. ताडोबा अंधेरी अभयारण्य के लगे के इलाका में ऊ वन्यजीव जीवविज्ञानी के रूप में काम कर रहल बाड़न. उहंवा उनका सामने पछिला एक साल (2025) में इंसान पर मोटा-मोटी 250 से 300 हमला के मामला सामने आइल. ऊ चेतावत बाड़न, “बाघ आदतन घूमत-फिरत रहेला. ऊ रिजर्व के भीतरी अलग-थलग ना रह सके.” ऊ इहो बतावत बाड़न कि विकास परियोजना चलते वन्यजीव गलियारा सिकुड़ रहल बा, जे एगो बड़का खतरा बा.

हर हफ्ता बाघ के फोटो वायरल वीडियो आ अखबार के हेडलाइन में आवत रहेला. ऊ कबो घर में, कबो पब्लिक में, कबो हाईवे पार करत, चाहे नदी में डूबत देखाई देवेला. जनवरी से मार्च 2026 के बीच रिजर्व के बाहर (एनटीसीए) मोटा-मोटी 45 बाघ मर चुकल बा.

दुख के बात बा कि रिजर्व के भीतरी रहे वाला लोग सायदे कबो बाघ देख पाइल. दमोह के मुन्नालाल जंगली जानवर सब के मौजूदगी पर सवाल करेलन. ऊ कहेलन, “बतावल जाला कि 25 ठो बाघ बा. हमनी के एक्को त लउके के चाहीं. बाकिर अज ले एगो बाघ नजर ना आइल, नामेनिशान नइखे.”

उनके जेका, जंगल के लगे रहे वाला अइसन केतना लोग बा, जेकर घर पहिले बफर जोन में रहे. आउर ऊ लोग के आपन गांव छोड़े के कवनो कारण ना नजर आवे.

“इतिहास देखीं, त रिजर्व के भीतरी आदिवासी आ समाज के दोसर लोग संगे रहते हुए भी बाघ के गिनती बढ़ावल जा सकेला,” प्रोफेर रमन सुकुमार कहेलन. ऊ तमिलनाडु के सत्यमंगलम आ कर्नाटक के बिलिगिरी रंगास्वामी टेंपल रिर्जव के उदाहरण देत बाड़न.

“अइसन केतना टाइगर रिजर्व बा, जहंवा बाघे नइखे. त पहिले उहंवा ओह लोग के गिनती बढ़ावे पर ध्यान काहे नइखे देवल जात? ऊ सब करे के बजाय हमनी के हटावे के जल्दबाजी कइल जा रहल बा,” ऊ इहो कहलन.

कहानी लिखे में रिपोर्टर के सहजोग खातिर दमोह के चंदल लाल आ पन्ना के देवश्री सोमानी के आभार रही.