بھودان کی زمین کسی کی ملکیت نہیں ہے

’’گَل سنگھ نے ۲۹ اکتوبر کو گاؤں کے بنجاروں کے خلاف شکایت درج کرائی تھی کہ انہوں نے بھودان (عطیہ شدہ زمین) اسکیم کے تحت ہم بھیلالاؤں کو الاٹ کی گئی ۳۳ ایکڑ زرعی زمین پر ناجائز قبضہ کر لیا ہے اور وہاں جھونپڑیوں کی تعمیر شروع کر دی ہے۔ اس شکایت پر بنجارے مشتعل ہوگئے اور دو دن بعد انہوں نے گل سنگھ کو بے رحمی سے تشدد کا نشانہ بنایا۔ وہ اس حملے میں شدید طور پر زخمی ہو گئے۔ انہیں اندور کے ایک ہسپتال منتقل کیا گیا، جہاں ایک ماہ بعد ان کی موت ہو گئی تھی۔ ہم نے انتظامیہ سے بارہا شکایت کی، لیکن گاؤں کے بارسوخ لوگوں اور سیاسی دباؤ کی وجہ سے کوئی کارروائی نہیں ہوئی۔‘‘ گُنا کے پنیہٹی گاؤں میں زمین کے ایک ایسے قطعہ پر (جس کا بظاہر کوئی بھی مالک نہیں تھا) دو برادریوں کے درمیان ۲۰۲۴ میں ہونے والے پرتشدد تصادم کو یاد کرتے ہوئے کلّو بھیلالا نے یہ باتیں کہیں۔ وہ خود بھی اس واردات میں زخمی ہوئے تھے۔

گل سنگھ کی موت کی خبر پھیلنے کے بعد، بھیلالا آدیواسیوں اور بنجارا برادری کے درمیان پرتشدد جھڑپیں شروع ہو گئیں۔ اس کے نتیجے میں بنجاروں کے ۱۰ گھروں کو نذر آتش کر دیا گیا۔ دونوں برادریوں کے کئی کنبے بے گھر ہو گئے۔ خوف زدہ لوگ گاؤں چھوڑ کر بھاگنے اور کڑاکے کی سرد راتیں کھلے آسمان کے نیچے گزارنے پر مجبور ہو گئے۔

’’ہمارے اجداد کو بھودان کے پٹّے دیے گئے تھے،‘‘ ۴۶ سالہ گل سنگھ بھیلالا نے ۲۰۲۴ کے آغاز میں اس رپورٹر سے ملاقات کے دوران بتایا تھا۔ ’’وہ تقریباً ۵۰-۵۵ سال قبل یہاں آ کر آباد ہوئے تھے۔ آج ان پٹوں کو بھو سوامیتوا پٹہ [زمین کی ملکیت کی دستاویز] کے نام سے جانا جاتا ہے۔ لیکن اتنے سال گزرنے کے بعد بھی ہم زمین کا اصل مالکانہ حق حاصل کرنے میں ناکام رہے ہیں۔ یہ اس علاقہ کے تمام بھیل، بھیلالا [بھیلوں کا ذیلی گروپ] اور سہریا آدیواسیوں کے لیے ایک بہت ہی اہم مسئلہ ہے۔ یہاں باموری تحصیل میں ایسے کئی آدیواسی ہیں جن کے کھیتوں پر دبنگوں [غالب برادری سے تعلق رکھنے والے زمین مالکان] نے قبضہ کر رکھا ہے۔‘‘

’’بھودان کے کئی پٹے گاؤں کے خسرہ [زمین کا شناختی نمبر] کے تحت آتے ہیں،‘‘ انہوں نے اس وقت وضاحت کرتے ہوئے بتایا تھا۔ ’’اور دوسروں نے ان پر ناجائز قبضہ کر رکھا ہے۔ پٹواری، تحصیلدار، کوئی بھی آج تک ہمارے لیے اس زمین کی حد بندی نہیں کرسکا ہے۔‘‘ محکمہ مالیات کے افسران کی جانب سے اس عمل کو مکمل نہ کیے جانے کی وجہ سے مختلف برادریاں مسلسل باہم متصادم رہتی ہیں۔ گل سنگھ نے یہ باتیں ایسے ہی ایک واقعہ میں اپنی جان گنوانے سے کئی ماہ قبل بتائی تھیں۔

ان تمام تنازعات میں سب سے بڑا مسئلہ ایک سلگتا ہوا، انتہائی پیچیدہ، اور تہہ دار زمینی تنازع کا گورکھ دھندا ہے۔ یہ وہ تنازع ہے جس نے اس علاقہ کے ایک آدیواسی گروہ کو دوسرے آدیواسی گروہ کے مدمقابل کھڑا کر دیا ہے، اور انہیں کم وسائل والے دیگر پسماندہ طبقات، غالب برادریوں کے زمین مالکان، محکمہ جنگلات کے اہلکاروں اور سیاستدانوں کے ساتھ بھی تصادم کی راہ پر ڈال دیا ہے۔

اس رپورٹر نے ۲۰۲۲ میں، جب سے ان واقعات کو قلمبند کرنا شروع کیا ہے، آدیواسیوں کی زمین سے متعلق ایسے کئی تنازعات دیکھے ہیں۔ اسی سال مدھیہ پردیش کے گُنا کے دھنوریا گاؤں کی رام پیاری کو غالب ذات کے زمین مالکان نے ان کے اپنے ہی کھیت میں زندہ جلا دیا تھا۔ وہ بھی تب جب انہوں نے اپنی زمین کے حق کے لیے ۲۰ سال لمبی قانونی لڑائی جیتی تھی۔ زمین کے حقوق پر اس طرح کے پرتشدد تصادم ان کی موت سے قبل سے چلے آ رہے ہیں اور آج بھی شدت کے ساتھ جاری ہیں۔

تاریخ ہمیں ایک دہائی پر محیط اس تحریک کی جانب لے جاتی ہے، جسے ۱۹۵۱ میں ونوبا بھاوے نے چلائی تھی۔ جہاں اس گاندھی وادی سماجی مصلح نے ملک کے بڑے زمین مالکان سے اخلاقی اپیل کی تھی کہ وہ بے زمین لوگوں میں دوبارہ تقسیم کے لیے اپنی اراضی کا ایک حصہ رضاکارانہ طور پر عطیہ کر دیں۔

اس تحریک کے تحت لگ بھگ ۴۴ لاکھ ایکڑ زمین کا جو عطیہ کیا گیا تھا، وہ ایک لینڈ بینک کے طور پر محفوظ رہا، جسے حکومت کو بھودان ایکٹ کے ذریعہ منظم اور دوبارہ تقسیم کرنا تھا۔ سال ۲۰۱۷ کے کمیشن برائے اصلاحاتِ دستاویزاتِ اراضی کے مطابق، مدھیہ پردیش کے پاس بھودان کی ۸۲ ہزار ۷۸۰ ایکڑ زمین تھی جس میں سے ۵۲ ہزار ۶۳۳ ایکڑ زمین تقسیم کی گئی تھی۔ غیرتقسیم شدہ ۲۳ ہزار ۴۷۵ ایکڑ زمین کا بڑا حصہ مورینا، شیوپوری اور گُنا اضلاع میں موجود ہے۔

’’یہ ۱۹۷۳-۷۴ کا واقعہ ہے۔ دھار سے ہجرت کر کے آنے والے کئی بھیلالا کنبے گُنا میں آباد ہوئے تھے۔ یہ وہ زمانہ تھا جب اندرا گاندھی وزیر اعظم تھیں۔ انہی کے کہنے پر ہم یہاں آئے تھے،‘‘ ۷۰ سالہ منڈیا بھیلالا کہتے ہیں۔ ضلع دھار میں ان کے آبائی گاؤوں کَیروا اور کُواڈ میں کاشتکاری برائے نام تھی اور زمین بنجر تھی۔

’’کام کی کمی کی وجہ سے ہم فاقہ کشی کے خوف میں زندگی بسر کر رہے تھے۔ اسی لیے ہم نے نقل مکانی کی اور یہاں آباد ہو گئے۔ پہلے ہم کَرمدا گاؤں میں رہتے تھے۔‘‘ منڈیا کی عمر ۲۲ سال تھی جب وہ گُنا آئے تھے۔ ’’میری شادی اسی گاؤں میں ہوئی۔ میں، میرے سسرال والے، میرے رشتہ دار، ہم سب نقل مکانی کر کے اس مقام پر آئے تھے۔ ہم بطور مزدور کام کرتے تھے اور اس زمانے میں ہماری اجرت ۵ء۱ روپے اور ۸ آنے کی مالیت کی جوار ہوا کرتی تھی۔ ہم اسی پر گزارہ کرتے تھے۔ گندم کی قیمت ۱۲ آنے ہوا کرتی تھی،‘‘ وہ بتاتے ہیں۔

اجرت پر کام نہ ملنے کی صورت میں وہ جنگل پر انحصار کرتے تھے، جہاں سے وہ پُوار (سینّا تورا)، مہوا (مدھوکا لونگیفولیا) یا گوند جمع کرتے تھے۔ ’’ہمیں جنگل سے جو کچھ بھی حاصل ہوتا، ہم اسے کھا لیتے تھے۔ گاؤں والے ہمیں اپنے کنوؤں سے پانی تک نہیں پینے دیتے تھے۔ ہمارے ساتھ اچھوتوں جیسا سلوک کیا جاتا تھا۔‘‘ منڈیا کھڑی ہندی بولتے ہیں، جس میں ان کی اپنی مادری زبان نِماڑی کا لہجہ شامل ہے۔

’’دو سال بعد تحصیلدار نے ۳۰۰ روپے لیے اور ہمیں رہنے اور کاشتکاری کے لیے پنیہٹی میں زمین دے دی۔ یہ ۱۹۷۳ کی بات ہے، جب اندرا گاندھی کے دور اقتدار میں ہمیں بھودان کے تحت ۸ بیگھہ کا پٹہ ملا تھا۔ ہم نے کاشتکاری شروع کر دی۔ اور دو سال بعد، ایمرجنسی کے دوران، یہ زمین ہم سے چھین لی گئی،‘‘ منڈیا تاریخ کے ایک معروف دور کے ایک غیر واضح باب کو کھولتے ہوئے کہتے ہیں۔ اس دور میں حکومت کی جانب سے بھودان کی زمین ضبط کیے جانے کا کوئی دستاویزی ثبوت موجود نہیں ہے۔ یہ ایمرجنسی کے دوران متعارف کرائے گئے بیس نکاتی پروگرام کے تحت کسی چاپلوس یا بدعنوان سرکاری اہلکار کے ذریعہ لیا گیا فیصلہ ہو سکتا ہے۔

’’ہمیں بتایا گیا کہ یہ زمین شاسن [حکومت] کی ہے اور شاسن نے اسے واپس لے لیا ہے،‘‘ منڈیا اپنے مٹی کے بنے گھر کے برآمدے میں بیٹھے ہوئے کہتے ہیں۔ ’’بعد میں [ہمیں بتایا گیا] کچھ پلاٹ سہریا برادری [جو مدھیہ پردیش میں درج فہرست قبائل (ایس ٹی) کے طور پر درج ہیں] کو اور کچھ محکمہ جنگلات کو دے دیے گئے۔ جب انہوں نے بھودان کی وہ زمین چھین لی، تو ہم نے جنگل کے کچھ حصوں کو صاف کرنا شروع کیا،‘‘ وہ بتاتے ہیں۔

ایک بار جب بھودان کی زمین چھن گئی، تو انہیں کبھی واپس نہیں ملی۔ ’’پھر ہم نے جنگل کے ایک حصہ پر قبضہ کر کے اسے صاف کیا اور اس پر کھیتی باڑی شروع کر دی۔ یہ بھی ۵۰ سال قبل کی بات ہے، لیکن آج تک ہمیں اس زمین کا کوئی پٹہ نہیں ملا۔ محکمہ جنگلات ہمیشہ اعتراض کرتا ہے، اس کا عملہ ہمیں کاشتکاری سے روکنے کی کوشش کرتا ہے۔ یہاں تک کہ وہ ہمیں بورنگ کرنے یا کنواں کھودنے سے بھی باز رکھتے ہیں۔‘‘ منڈیا بھیلالا اس بات کی نشاندہی کرتے ہیں کہ ۲۰۰۶ کا جنگلات سے متعلق حقوق کا قانون بھی انہیں انصاف دلانے میں ناکام رہا ہے۔

ان کے چھوٹے بیٹے گوپال، جن کی عمر ۳۰ سے ۳۵ سال کے درمیان ہے، ہماری بات کاٹتے ہوئے کہتے ہیں، ’’یہاں بنا کسی لین دین [رشوت] کے کوئی کام نہیں ہوتا۔ ہمیں کھیتی کرنے اور اپنے ہی کھیتوں کو سیراب کرنے کے لیے محکمہ جنگلات کو رشوت دینی پڑتی ہے۔ اس دفعہ آبپاشی کی کمی کی وجہ سے ہمیں ۱۵ بیگھہ [تقریباً ۱ء۴ ایکڑ] کاشت کی گئی زمین سے صرف ۴۵ کوئنٹل گندم حاصل ہوا۔ اتنی زمین سے آسانی سے ۱۵۰ کوئنٹل پیداوار ملنی چاہیے تھی۔‘‘ گوپال غصے میں ہیں۔

’’ہم ادیواسیوں کو سننے والا کوئی نہیں ہے۔ سرپنچ، سچیو (سکریٹری)، ادھیکاری (حکام)، سب ہمیں لوٹنے میں لگے ہیں۔ ہماری کہیں سنوائی نہیں ہوتی۔ راج نیتا (سیاسی لیڈران) بھی ہماری نہیں سنتے،‘‘ وہ کہتے ہیں۔ تمام بڑے لیڈر پارٹیاں بدلتے رہتے ہیں، لیکن ہم آدیواسی کہاں جائیں؟ ہماری اور ہمارے حقوق کی حفاظت کرنے والا کوئی نہیں ہے۔

یہاں برادری میں بہت سے لوگ ایسے ہیں جنہیں نہ تو کبھی بھودان کی زمین ملی، اور نہ ہی وہ جنگل کی زمین کے کسی حصے پر قبضہ کرسکے۔ پرہلاد بھیلالا (۳۴) بھی انہی لوگوں میں شامل ہیں۔ ان کی فیملی تقریباً ۴۰ سال قبل ان کے والد منگو لال بھیلالا کے ساتھ دیواس سے پنیہٹی آئے تھی۔ وہ کئی نسلوں سے مزدوری پر گزارہ کرتے آ رہے ہیں، اور کبھی کبھی کام کی تلاش میں آس پاس کے گاؤوں کا بھی رخ کرتے ہیں۔

’’ہمارے پاس کوئی زمین نہیں ہے؛ ہم صرف بٹائی (حصہ داری) پر کھیتی اور مزدوری کر کے گزارہ کرتے ہیں۔ اس کے علاوہ، جب ہم کھیتی کر رہے ہوتے ہیں، تو ہمیں پانی نہیں ملتا۔ یہاں تک کہ پینے کا پانی بھی دستیاب نہیں ہے۔ امیر اور طاقتور لوگوں کے پاس ٹیوب ویل ہیں۔ ہم پانی مانگنے کے لیے ان کے پاس جاتے ہیں، لیکن ہم بہت ڈرے ہوئے ہوتے ہیں۔ وہ ہمیں گالیاں دیتے ہیں۔‘‘ پرہلاد ہم سے بات کرتے ہوئے اپنی عارضی جھونپڑی کی ملبے کو سمیٹ رہے ہوتے ہیں۔ گزشتہ شام کے طوفان نے ان کے گھر کو پوری طرح تباہ کر دیا ہے۔

پنیہٹی سے ۸ کلومیٹر دور، کرمدا میں خصوصی طور پر کمزور قبائلی گروپ سے تعلق رکھنے والے سہریا آدیواسیوں کے حالات بھی اتنے ہی ابتر ہیں۔ پورن سہریا کہتے ہیں، ’’میری عمر ۶۰ سال ہے۔ میرے والد بھی اسی گاؤں میں پیدا ہوئے تھے۔ میں اسی ۷-۸ بیگھہ [۹ء۱ سے ۲ء۲ ایکڑ] زمین پر کھیتی کرتا ہوں، جسے ہم نے صاف کیا تھا۔ محکمہ جنگلات اس پر اعتراض کرتا ہے۔ آج تک ہمیں جنگلات کے حقوق کا پٹہ نہیں ملا۔‘‘ ان کے بھودان کا پٹہ بھی کہیں کھو گیا ہے اور انہیں معلوم نہیں کہ وہ کہاں ہے۔

’’ارے صاحب، دسیوں بار کلکٹری میں لکھ کر آئے (تحریری شکایت کی)،‘‘ راکیش سہریا (۳۸) ہماری بات کاٹتے ہوئے کہتے ہیں۔ ان کی کہانی بھی بالکل ویسی ہی ہے۔ ’’افسران ہمارے مسائل کو کوئی مسئلہ ہی نہیں سمجھتے۔ ہمارے پرکھوں کے وقت کے بھودان کے پٹوں کی زمین کی آج تک پیمائش [حد بندی] نہیں کی گئی۔ محکمہ جنگلات اور بااثر لوگوں نے ہماری زمینوں پر قبضہ کر رکھا ہے۔ حکومت اور انتظامیہ میں ہماری سنوائی نہیں ہوتی ہے۔‘‘

ہم ایسے لوگوں سے گھرے ہوئے ہیں جو اپنے ہاتھوں میں دستاویزات لیے پہنچ رہے ہیں – کچھ جلی ہوئی، کچھ پھٹی ہوئی، اور کچھ ایسی جن کی روشنائی مدھم پڑ چکی ہے۔ بہت سے لوگ محکمہ جنگلات کی نوٹسیں، درخواستیں اور زمین و پٹوں سے متعلق دیگر سرکاری کاغذات لے کر آئے ہیں۔ کچھ لوگ اپنے ہاتھوں میں بھودان کی کتابیں تھامے ہوئے ہیں، لیکن انہیں نہیں معلوم کہ اس کتاب میں درج زمین درحقیقت کہاں واقع ہے۔

راکیش مجھے زمین کے عطیہ کے ۱۹۷۵ کے کاغذات دکھاتے ہیں۔ ’’ہمارے اجداد وفات پا چکے ہیں، لیکن پھر بھی ہمیں زمین کا قبضہ نہیں ملا۔ کلکٹر سے لے کر تحصیلدار تک، ہم نے سب کو درخواستیں دی ہیں۔ وہ محض حد بندی کی یقین دہانیاں کرواتے ہیں، لیکن ہوتا کچھ بھی نہیں۔ حکومت کو ہماری زمین ہمارے حوالے کرنی چاہیے۔‘‘

ہجوم میں کھڑے کملیش کہتے ہیں، ’’میری زمین کی بھی حد بندی نہیں ہوئی ہے۔ ہم برسوں سے اس پریشانی میں مبتلا ہیں۔ ہم نے ابھی کچھ دن پہلے ہی حد بندی کے لیے دوبارہ درخواست دی ہے۔ پٹواری اور تحصیلدار ہمیں بیوقوف بناتے ہیں۔ وہ اپنا وعدہ پورا نہیں کرتے۔ جنہوں نے حد بندی کروائی ہے، انہوں نے افسران کو رشوت دیے ہیں۔ بھیل، بھیلالا اور دیگر لوگ سہریا قبائل کی زمین پر قبضہ کر رہے ہیں، جو یہاں کئی دہائیوں سے آباد ہیں۔ اس کی وجہ سے ہمارے درمیان پرتشدد جھگڑے ہوئے ہیں۔ اگر ایک بار صحیح ڈھنگ سے حد بندی ہو جائے، تو یہ تنازعات دوبارہ نہیں کھڑے ہوں گے۔ لوگوں کو معلوم ہو جائے گا کہ ان کی زمین کہاں ہے۔‘‘

گُنا میں زمین کے حقوق کے لیے آدیواسی برادریوں کے ساتھ کام کرنے والی تنظیم، ایکتا پریشد کے سورج سہریا کہتے ہیں، ’’باموری-فتح گڑھ تحصیل کے ۳۰ سے ۴۰ گاؤوں کے بھیل، بھیلالا اور سہریا آدیواسیوں کو بھودان کے پٹے ملے تھے۔ لیکن ان میں سے زیادہ تر کے پاس اب صرف پٹے کی کتاب ہی رہ گئی ہے۔ کوئی بھی یقین کے ساتھ نہیں کہہ سکتا کہ ان کی زمین دراصل ہے کہاں۔ اگر انہیں معلوم بھی ہو، تو بھی اس پر رسوخ دار لوگوں نے قبضہ کر رکھا ہے۔ آپ کرمدا گئے تھے، جہاں ۳۴ سہریا آدیواسیوں کے پاس پٹے ہیں، اس کے باوجود وہ زمین کے مالک نہیں ہیں۔ کبھی ان کی زمین محکمہ جنگلات کے پاس نکلتی ہے، تو کبھی وہ امیروں اور طاقتور لوگوں کے قبضے میں ہوتی ہے۔‘‘

کچھ انوکھے معاملوں میں، جیسے کہ گُنا کے گاؤں پروندہ میں، پانچ آدیواسی کنبے اپنے حق میں حکم نامہ جاری کروانے میں کامیاب ہو گئے۔ اور بالآخر ۲۷ مارچ ۲۰۲۱ کو مدھیہ پردیش لینڈ ریونیو کوڈ کے تحت انہیں زمین الاٹ کر دی گئی۔ لیکن پانچ سال گزر جانے کے بعد بھی وہ اب تک اس حکم نامہ پر عمل درآمد کے انتظار میں بیٹھے ہیں۔ دبنگوں نے ان کی زمین پر قبضہ کر رکھا ہے۔

سورج سہریا کہتے ہیں، ’’باموری کی ۸۰ گرام پنچایتوں میں ۷۰۰۰ ونادھیکار (جنگلات کے حقوق) کے پٹے زیر التوا ہیں۔ بھودان کے تحت عطیہ کی گئی زمین کی حد بندی کے احکامات کئی بار جاری ہو چکے ہیں، یہاں تک کہ حکام کے دورے بھی ہو چکے ہیں، لیکن اس کے باوجود انتظامیہ ان طاقتور لوگوں کے دباؤ کے آگے جھکتی آ رہی ہے – اور اب تک زمین کی حد بندی نہیں ہوسکی ہے۔‘‘

کھوئی ہوئی زمین، کورے کاغذات، اور ایک جانب افسر شاہی اور دوسری جانب زمین مافیا کے جال میں سالہا سال پھنسے رہنا، یہاں کی تقریباً ہر دوسرے گھر کی کہانی ہے۔

شیوپور اور شیوپوری میں فعال ایک آدیواسی سماجی کارکن، رام پرکاش شرما بتاتے ہیں، ’’عطیہ شدہ زمینیں کلکٹر کی اجازت کے بغیر فروخت نہیں کی جا سکتیں۔ اس کے باوجود ایسی زمینیں فروخت کی جا رہی ہیں، حالانکہ علاقے میں بے شمار بے زمین آدیواسی موجود ہیں۔ دوسری بات یہ ہے کہ بھودان پر آج تک عمل درآمد نہیں ہوسکا، اور آدیواسی اسی امید پر بیٹھے ہوئے ہیں۔ جبکہ بھودان تحریک کے تحت آدیواسیوں کو عطیہ کی گئی زمینوں پر اب امیر اور طاقتور لوگوں کا قبضہ ہے۔‘‘

ایکتا پریشد کے رام دت تومر کہتے ہیں، ’’مقامی انتظامیہ زمین مافیا کے سامنے بالکل بے بس ہے۔ یہاں تک کہ ریونیو کمشنر اور پرنسپل سکریٹری کے جاری کردہ حد بندی کے خطوط بھی تحصیل کے دفتر میں دھول چاٹ رہے ہیں۔ قانون کے مطابق آدیواسیوں کے لیے زمین کی حد بندی مفت ہونی چاہیے، لیکن اکثر انہیں اس کے لیے بھی بھاری رقم چکانی پڑتی ہے۔

گُنا کی باموری تحصیل میں ۱۳ آدیواسی سرپنچ، دو جنپد (تعلقہ) پنچایت ممبران اور ایک ضلع پنچایت ممبر ہیں۔ لیکن ان میں سے کوئی بھی اس حلقہ کے ۴۵۰۰۰ سہریا اور ۴۳۰۰۰ بھیل اور بھیلالا ووٹروں کی زندگیوں میں کوئی مثبت تبدیلی لانے میں کامیاب نہیں ہوسکا ہے۔

آج بھی محکمہ جنگلات آدیواسیوں کو ان کے اپنے ہی کھیتوں کو جوتنے سے روکتا ہے اور ان کی کھڑی فصلوں کو مسلسل تباہ کر رہا ہے۔ لوگ پٹہ ملنے کے انتظار میں ہیں، اور زمین کی حد بندی ابھی تک التوا کا شکار ہے۔ دوسری جانب، گاؤں کے نزدیک ایک نئے ڈیم، ’پنیہٹی ڈیم‘ پروجیکٹ کو منظوری مل چکی ہے، جس سے جنگلاتی اور ریونیو زمینوں کے غرقاب ہونے کا خطرہ پیدا ہو گیا ہے۔ آدیواسی اب ہمیشہ کے لیے ڈوب جانے کے خوف میں جی رہے ہیں۔ حد بندی اور زمین کی باقاعدہ ملکیت کی دستاویز نہ ہونے کی صورت میں، یہ ایسا نقصان ہوگا جس کا کوئی معاوضہ بھی نہیں ملے گا۔

یہ اسٹوری سب سے پہلے ہندی میں رپورٹ ہوئی تھی۔