نامساعد حالات میں کام کرتے چیری کے کاشتکار

زرد رنگ کے ترپال پر تازہ توڑی گئی چیری (شاہ دانہ یا آلو بالو) کے انبار لگے ہوئے ہیں۔ اسی ترپال پر ساٹھ کی عمر پار کر چکے دو بھائی، عبد السلام خان اور نصراللہ خان پالتھی مار کر بیٹھے ہیں اور اپنے تجربہ کی بنیاد پر نہایت احتیاط سے پھلوں کی چھنٹائی اور درجہ بندی کر رہے ہیں۔ آبی مزاحم (واٹر پروف) کپڑے پر پڑ رہی دھوپ ان کے جھری دار چہروں کو روشن کر دیتی ہے، جن پر مشکلوں بھرے اس سیزن کے اختتام کی تھکن صاف دکھائی دے رہی ہے۔

ان کا باغ بہت چھوٹا ہے، صرف ایک چوتھائی ایکڑ، جو وسط کشمیر کے گاندربل ضلع کے سورف راؤ گاؤں میں واقع ہے۔

جون کی ایک چمکدار صبح عبد السلام کہتے ہیں، ’’اس سال حالات کافی مشکل بھرے رہے۔‘‘ یہ ۶۵ سالہ بزرگ مزید کہتے ہیں، ’’ہم گزشتہ ۴۰ سالوں سے یہ کام کر رہے ہیں، لیکن ایسا سیزن ہم نے پہلے کبھی نہیں دیکھا۔ موسم اور سیاحوں کی کمی نے مل کر ہمیں بری طرح متاثر کیا ہے۔‘‘

پشتون برادری سے تعلق رکھنے والے ان خان بھائیوں نے اس سال کی شروعات میں سورف راؤ کے الگ الگ علاقوں میں پھیلے دو ایکڑ کے چیری کے باغ پٹّہ پر لیے تھے۔ یہ گاؤں سرینگر سے ۴۹ کلومیٹر شمال میں واقع ہے اور ان کے گھر گُٹلی باغ سے یہاں تک پہنچنے میں تقریباً ۳۵ کلومیٹر کا فاصلہ طے کرنا پڑتا ہے۔

پھل توڑنے کے دوران فیملی کے اراکین اور اجرت پر رکھے گئے مزدور ساتھ مل کر کام کرتے رہے، لیکن مہینوں کی محنت کے بعد اب خریدار ملنا مشکل ہو گیا ہے۔

جموں و کشمیر کے محکمہ باغبانی کے مطابق، وادی کشمیر میں ہر سال تقریباً ۲۳ ہزار میٹرک ٹن چیری کی پیداوار ہوتی ہے۔

اکیلے گاندربل ضلع سے ہی تقریباً ۹۰۰۰ میٹرک ٹن چیری آتی ہے، جو کل پیداوار کا تقریباً ۳۹ فیصد ہے۔ گاندربل ضلع میں تقریباً ۵۰۰۰ کاشتکار اپنے معاش کے لیے اس پھل پر منحصر ہیں۔

دریائے سندھ کے کنارے آباد سورف راؤ ایک خوبصورت گاؤں ہے، جو بلندی پر واقع چیری کے باغات کے لیے مشہور ہے۔ یہاں کا درجۂ حرارت نسبتاً ٹھنڈا رہنے کے سبب چیری دیگر علاقوں کے مقابلے تاخیر سے پکتی ہے، جس سے یہ موسم کی آخری فصل بن جاتی ہے۔

مئی اور جون کے مہینوں میں سورف راؤ کی طرف جانے والی مرکزی سڑک کے دونوں جانب عارضی دکانیں لگ جاتی ہیں، جہاں تازہ توڑی گئی چیری اور آلو بخارے فروخت کیے جاتے ہیں۔ لیکن اس سال ان دکانوں پر چند ہی گاہک پہنچے۔

عبد السلام کہتے ہیں، ’’اس سیزن میں ہم نے چیری کے ۱۰ باغ ٹھیکہ پر لیے تھے، جن میں سے ہر ایک تقریباً ۲ سے ۳ کنال کا تھا (ایک کنال ۰ء۱۲۵ ایکڑ کے برابر ہوتا ہے، یعنی ہر باغ تقریباً ایک چوتھائی سے ایک تہائی ایکڑ کا تھا) اور ہم نے ہر باغ کے لیے ۳۰ ہزار روپے ادا کیے تھے۔ درختوں پر خوب پھول آئے تھے اور ہمیں اچھی فصل کی امید تھی۔‘‘ لیکن اب فیملی کو ہر باغ پر تقریباً ۲۰ ہزار روپے کے نقصان کا سامنا کرنا پڑ رہا ہے، یعنی مجموعی طور پر تقریباً ۲ لاکھ روپے کا خسارہ۔ وہ کہتے ہیں، ’’سب سے بڑی تشویش یہ ہے کہ کیا ہم اپنی لگائی ہوئی رقم بھی واپس نکال پائیں گے۔‘‘

اس سال باغبانی کے شعبہ میں آئی گراوٹ ایک ساتھ چل رہے کئی بحرانوں کا نتیجہ ہے۔

اپریل ۲۰۲۵ میں، پہلگام میں ہوئے دہشت گردانہ حملے میں ۲۶ لوگوں کی ہلاکت کے بعد، جموں و کشمیر کی معیشت کی ریڑھ تصور کیا جانے والا سیاحتی شعبہ اب تک بری طرح متاثر ہے۔

عبد السلام کہتے ہیں، ’’سیاح عام طور پر ہمارے کاروبار کا ۷۰ فیصد تعاون فراہم کرتے ہیں۔ ان کے بغیر پورا سیزن ویران سا لگنے لگتا ہے۔‘‘

اس موسم کا نقصان گزشتہ برسوں کے سلسلہ میں ایک اور اضافہ ہے۔ عبد السلام مایوس لہجہ میں کہتے ہیں، ’’پچھلے چار سالوں سے بے موسم بارش اور ژالہ باری نے درختوں پر لگی فصلوں کو نقصان پہنچایا ہے۔‘‘

کشمیر میں عام طور پر چیری کے باغ خان فیملی جیسے ٹھیکیداروں کو پٹہ پر دیے جاتے ہیں۔ اچھے سال میں انہیں فصل سے پورا منافع مل سکتا ہے، لیکن موجودہ سیزن جیسے سالوں میں پورا نقصان بھی انہیں ہی برداشت کرنا پڑتا ہے۔ عبد السلام مزید کہتے ہیں، ’’ہم پھولوں کو دیکھ کر پیداوار کا اندازہ لگاتے ہیں، لیکن جوکھم ہمیشہ بنا رہتا ہے۔‘‘

چیری کی فصل وقت کے لحاظ سے بیحد نازک ہوتی ہے۔ درختوں پر اپریل اور مئی میں پھل آتے ہیں۔ اس سال انھیں مہینوں میں بارش اور اچانک ہوئی ژالہ باری نے فصل کا بڑا حصہ برباد کر دیا۔ چیری ایک نازک پھل ہے اور خراب موسم کی وجہ سے پھلوں پر صاف داغ پڑ گئے۔ گاندربل کے کاشتکار بتاتے ہیں کہ داغ والے پھلوں کی بازار میں کوئی قیمت نہیں ملتی۔

کشمیر کے شعبۂ باغبانی کے لیے ۲۰۲۵ کافی مشکل سال رہا۔ ستمبر میں، جو کشمیر میں سیب توڑنے کا موسم ہوتا ہے، بھاری بارش نے پلوامہ، شوپیاں اور بارہمولہ میں باغوں اور دھان کے کھیتوں کو غرقاب کر دیا۔ اس سے بھاری نقصان ہوا، سڑکیں بند ہو گئیں اور نقل و حمل رک گیا۔ ٹرک کئی دنوں تک پھنسے رہے، جس سے کسانوں کو متبادل اور مہنگے راستے اپنانے پڑے۔

چیری کے کاشتکار، جو پہلے سے ہی اس پھل کی کم عمر کے سبب دباؤ میں رہتے ہیں، سب سے زیادہ متاثر ہوئے۔ جو ڈبہ پہلے ۲۰۰ روپے میں فروخت ہوتا تھا، وہ جون ۲۰۲۵ میں ۶۰ سے ۸۰ روپے میں فروخت ہو رہا تھا۔ عبد السلام کہتے ہیں، ’’یہ تو کھاد اور حشرہ کُش کے چھڑکاؤ پر کیے گئے خرچ کا آدھا بھی نہیں ہے۔‘‘ وہ مزید کہتے ہیں، ’’ہماری زیادہ تر فصل ڈبوں میں بغیر فروخت ہوئے پڑی ہے اور کچھ ہی دنوں میں یہ خراب ہو جائے گی۔‘‘

مشہور و معروف سیاحتی مقام سونمرگ کی طرف گاندربل سے جانے والی سڑک کے کنارے چیری کے اسٹال ایسے بغیر فروخت والے ڈبوں سے بھرے پڑے ہیں۔

تقریباً ۳۰ سال کے اختر خان کہتے ہیں، ’’پہلے میں ایک دن میں ۳۰ سے ۴۰ ڈبے تازہ چیری بیچ لیتا تھا، لیکن پہلگام کے واقعہ کے بعد اب مشکل سے ۵ سے ۱۰ ڈبے ہی فروخت ہوتے ہیں، وہ بھی صرف مقامی گاہک ہی خریدتے ہیں۔‘‘ وہ مزید کہتے ہیں، ’’وادی میں کوئی سیاح نہیں ہے۔ اپنی جان کی قیمت پر یہاں کون آنا چاہے گا؟‘‘

سرکاری اعداد و شمار کے مطابق، ۲۰۲۴ میں جموں و کشمیر میں سیاحوں کی تعداد ۲ کروڑ ۳۶ لاکھ کی ریکارڈ سطح پر پہنچ گئی تھی۔

گاندربل کے وائل گاؤں کے رہنے والے تعمیراتی مزدور اختر چار رکنی فیملی کی کفالت کرتے ہیں، جس میں ان کی اہلیہ، دو سال کا بیٹا اور نو سال کی بیٹی شامل ہے۔ مئی اور جون میں چیری توڑنے کے موسم میں وہ گاندربل ضلع کے وُسّن علاقہ میں سڑک کنارے اسٹال لگا کر چیری بھی بیچتے ہیں۔

اس سیزن میں اختر تعمیراتی مقام پر کام کرنے کے لیے لوٹنے سے بچنے کی کوشش کر رہے ہیں۔ وہ کہتے ہیں، ’’میں نے ایک ٹھیکیدار سے ۴۰۰۰ ڈبے چیری منگوائی تھی۔ اب چاہے میں انہیں فروخت کر پاؤں یا نہیں، مجھے وہ ڈبے لینے ہی ہوں گے۔‘‘

خوش قسمتی سے کسان اور پھل فروشوں کے درمیان ثالثی کا کردار ادا کرنے والے اس ٹھیکیدار نے سرینگر کی تھوک منڈیوں میں ۴۰۰۰ ڈبے کھپانے میں ان کی مدد کی۔ اختر کہتے ہیں، ’’اگر وہ مدد نہیں کرتا، تو مجھ پر کئی لاکھ روپے کا قرض چڑھ جاتا۔‘‘

اختر کی طرح ہی گاندربل سے سونمرگ تک کی تقریباً ۵۰ کلومیٹر لمبی سڑک کے کنارے درجنوں اسٹال مالک گاہکوں کے انتظار میں بیٹھے رہتے ہیں۔

ان اسٹالوں پر موجود ہر شخص مانتا ہے کہ سیاحوں کی تعداد میں آئی کمی نے کاروبار کو بری طرح متاثر کیا ہے۔ اس کاروبار میں صرف وہی باغ مالک نسبتاً محفوظ ہیں، جو درختوں پر پھول آنے کے وقت ہی اپنی فصل پہلے سے بیچ دیتے ہیں۔

پٹّہ کی رقم اور باغ کی دیکھ بھال کے علاوہ، فروخت ہو یا نہ ہو، کاشتکاروں کو مزدوری کا خرچ اٹھانا ہی پڑتا ہے۔ عبد السلام کہتے ہیں، ’’ہم اپنے مزدوروں کو روزانہ ۶۰۰ روپے دیتے ہیں اور اس سال پھل توڑنے کی رفتار دھیمی ہونے کے باوجود مجھے پوری مزدوری چکانی پڑ رہی ہے۔‘‘

وہ مزید کہتے ہیں، ’’اگر پھل اچھی طرح تیار ہوں تو ایک مزدور دن میں ۱۰ ڈبے تک توڑ سکتا ہے۔ پھل خراب ہو جائیں تو انہیں توڑنا ہی مشکل ہو جاتا ہے۔ اب تو دن میں پانچ ڈبے مل جائیں تو خود کو خوش قسمت مانتے ہیں۔‘‘

خان برادران چیری کی کئی قسمیں اُگاتے ہیں، جن میں اول نمبر (گین پوپیرا پریسے)، ڈبل (بگارو نیپولین)، مخملی (گین نائر ہتیو) اور مشری (بگارو نائر گروسا) شامل ہیں۔ عبد السلام کہتے ہیں، ’’مشری ہی واحد قسم ہے جسے ہم باہر بھیج سکتے ہیں، کیوں کہ اس کی عمر زیادہ ہوتی ہے۔ باقی قسمیں ہمیں مقامی بازار میں ہی بیچنی پڑتی ہیں۔‘‘

خان فیملی کو ملنے والی قیمت پر ان کا کنٹرول نہ کے برابر ہوتا ہے، کیوں کہ قیمتیں منڈی کے تاجر ہی طے کرتے ہیں۔ عبد السلام کہتے ہیں، ’’ہم چیری کو ڈبوں میں بھیجتے ہیں اور جیسے ہی وہ منڈی پہنچتی ہے، بازار کی حالت اور پھل کے معیار کی بنیاد پر قیمت طے کرنا تاجروں پر منحصر ہوتا ہے۔ اس میں ہمارا کوئی رول نہیں ہوتا۔‘‘

ان تمام جھٹکوں کے باوجود، ان کا حوصلہ برقرار ہے۔ وہ کہتے ہیں، ’’یہ کاروبار کبھی آسان نہیں رہا۔ اس سال ایک ساتھ سب کچھ بگڑ گیا۔ موسم بھی، بازار بھی اور سیاحوں کی کمی بھی۔ لیکن ہم کام کرتے رہتے ہیں، کیوں کہ یہی ہماری روزی روٹی ہے اور ہم یہی جانتے ہیں۔‘‘

یہ اسٹوری پاری سینئر فیلوشپ ۲۰۲۵ کے تحت شائع کی گئی ہے۔

ترجمہ نگار: قمر صدیقی