دُوار میں کتابوں کے ذریعہ کھلتا دروازہ

’’دیدی، کیا ہم واقعی یہاں اپنی زبان پڑھ سکتے ہیں؟‘‘ کُروکھ زبان میں ایک کتاب اپنے ہاتھ میں لیے ۱۵ سالہ انش اوراؤں نے مجھ سے دریافت کیا۔

ہم مغربی بنگال کے جلپائی گوڑی ضلع کے ایک اسکول میں ہیں، جہاں چائے کے باغات میں کام کرنے والے مزدوروں کے بچے تعلیم حاصل کر رہے ہیں۔ وہ باغ جہاں انش کے اور میرے والدین کام کرتے ہیں، وہ لیش ندی کے کنارے واقع ہے۔

ہمارے کنبے یہاں کے زیادہ تر مزدوروں کی طرح اوراؤں قبیلہ سے تعلق رکھتے ہیں۔ ہمارے آباء و اجداد چار نسل قبل چھوٹا ناگپور کے پٹھاری (سطح مرتفع) علاقہ کے رانچی، گملا اور سمڈیگا اضلاع سے آئے تھے جو اب جھارکھنڈ میں ہے۔ گھر میں ہم اب بھی کُروکھ بولتے ہیں، جو ہماری برادری کی زبان ہے، لیکن گھر کے باہر ہم ہندی اور بنگالی بولتے ہیں۔ لہٰذا انش نے کبھی ہماری مادری زبان میں کوئی کتاب نہیں دیکھی۔

میری پرورش یہیں لیش ریور ٹی گارڈن کے اندر پتی باڑی میں ہوئی ہے۔ مردم شماری کی ہینڈ بک میں ندی کا نام ’لِش ریور‘ درج ہے، لیکن گاؤں والے اور مقامی انتظامیہ اسے ’لیش ریور‘ کے نام سے موسوم کرتے ہیں۔

ہر صبح آپ کو یہ نظارہ دیکھنے کو ملے گا، جب خواتین اپنی ٹوکریاں اٹھائے چائے کی پتیاں توڑنے جاتی ہیں، مرد فیکٹری کی طرف جاتے ہیں، اور بچے اپنی پرانی نیلی اور سفید یونیفارم میں اسکول جاتے ہیں۔

میرے والدین جس باغ میں کام کرتے ہیں وہاں موسم کے لحاظ سے کام بدلتے رہتے ہیں۔ کبھی چائے کی پتیاں توڑی جاتی ہیں، کبھی جھاڑیوں کی کٹائی ہوتی ہے، کبھی کھاد کا چھڑکاؤ کیا جاتا ہے اور کبھی پودوں کو صاف کیا جاتا ہے۔ دن میں آٹھ گھنٹے کام کرنے کی اجرت تقریباً ۲۵۰ روپے ہوتی ہے۔ میرے والد کا رول ایک سردار یا سپروائزر کا ہے۔

چھوٹے بچے گورنمنٹ کے زیر انتظام چلنے والے پاٹی باڑی پرائمری اسکول (درجہ ۱ سے ۵) میں پڑھتے ہیں - ہائی اسکول اسی کیمپس میں موجود ہے۔

۳۰ نومبر ۲۰۲۴ کو میں نے اسکول کے ایک خالی کمرے میں لائبریری کا آغاز کیا۔ یہ لائبریری دن میں دو بار، صبح ۹ بجے سے دوپہر ۱۲ بجے تک اور شام کو ۳ بجے سے ۶ بجے تک کھلی رہتی ہے۔

پہلے دن میں نے ہندی کہانی ’دادا جی کا چھاتا‘ بلند آواز میں پڑھ کر سنائی۔ اس میں بارش سے بچاؤ کے علاوہ دادا کی چھتری کے دیگر استعمال کے بارے میں بات کی گئی تھی، جیسے پھل توڑنا۔ کہانی سے یہ نصیحت ملتی ہے کہ اگر عقلمندی سے استعمال کیا جائے تو ایک ہی چیزسے کئی مقاصد پورے کیے جا سکتے ہیں۔ آخر میں، میں نے پوچھا، ’’تم نے کیا سیکھا؟‘‘ ایک چھوٹی بچی نے ایک تصویر کی طرف اشارہ کیا اور زور سے کہا، ’’استانی سے زیادہ بندر مزیدار ہے!‘‘ پورا کمرہ قہقہہ میں ڈوب گیا اور لائبریری زندہ ہو گئی۔

مغربی دوار میں واقع لیش ریور گارڈن شمالی بنگال میں لگائے جانے والے پہلے باغات میں سے ایک ہے۔ پاٹی باڑی اس کے تین حصوں میں سے ایک ہے؛ دیگر دو کے نام ہیں لیش اور ہوپ۔ وہ ندی جس پر اس چائے کے باغ کا نام رکھا گیا ہے کالیم پونگ ضلع سے نکلتی ہے اور تیستا میں ضم ہونے سے پہلے تین گاؤوں سے گزرتی ہے۔

چائے کے باغ میں دن جلد شروع ہو جاتا ہے۔ خواتین ساڑھے چار بجے کے قریب بیدار ہوتی ہیں، کھانا تیار کرتی ہیں، اکثر نمک کے ساتھ چاول یا روٹی اور اگر دستیاب ہو تو سبزی، اور کام پر چلی جاتی ہیں۔ صبح ۶ بجے تک مزدوروں کے گروہوں کو کپڑے کا جھولا (تھیلا) لیے چائے کی جھاڑیوں کی طرف جاتے ہوئے دیکھا جا سکتا ہے۔

چونکہ اسکول صبح ۱۰ بجے شروع ہوتا ہے، اس لیے بچے خود ہی تیار ہوتے ہیں، اور باہر نکلنے سے پہلے گھر کے کام بھی انجام دیتے ہیں۔ ہر ایک گھر میں پانی تک رسائی نہیں ہے، اور پانی لانے کی ذمہ داری بچوں پر ہوتی ہے۔ وہ پڑوسی کے گھروں یا کمیونٹی ہینڈ پمپ سے پانی لے کر آتے ہیں۔

کچھ بچے صرف دوپہر کے کھانے کے لیے اسکول آتے ہیں۔ بہت سے بچے آٹھویں جماعت کے بعد پڑھنا چھوڑ دیتے ہیں، اور زیادہ تر ۱۲ویں سے آگے نہیں بڑھتے ہیں۔ وہ یا تو چائے کے باغ میں نوکری کرتے ہیں، یا یومیہ اجرت پر کام کرنے کے لیے دوسری ریاستوں میں چلے جاتے ہیں۔ کالج کا منہ دیکھنا بہت کم کو نصیب ہوتا ہے۔

میری پڑھائی دارجلنگ ضلع کے گایا گنگا میں واقع سینٹ میری گرلز ہائر سیکنڈری اسکول میں ہوئی۔ میری ماں نے مجھے ۷۲ کلومیٹر دور ہنسکوا ٹی گارڈن میں میری دادی کے ساتھ رہنے کے لیے بھیجا تھا، تاکہ میں وہاں سے اسکول جا سکوں۔ ہمارے اسکول میں باقاعدہ کلاس روم تھے، تربیت یافتہ اساتذہ تھے اور ایک لائبریری بھی تھی۔ لیکن چائے کے باغات کی برادریوں کے طالب علموں کو یونیورسٹی میں داخلہ کے امتحانات کی تیاری میں مدد کرنے والی تنظیم ’داہَر‘ کے ساتھ ہفتہ میں تین بار گروپ اسٹڈی کے دوران کتابوں سے میری حقیقی دلچسپی پیدا ہونا شروع ہوئی۔

کالج میں داخلہ کی تمنا لیے میں نے اگست ۲۰۲۱ میں اپنے اخراجات پورے کرنے کی غرض سے باغ کے بچوں کو ٹیوشن دینا شروع کیا۔ بہت سے بچے ایسے تھے جو صحیح ڈھنگ سے پڑھ یا لکھ نہیں سکتے تھے۔ جولائی ۲۰۲۳ میں عظیم پریم جی یونیورسٹی سے ڈیولپمنٹ اسٹڈیز میں ماسٹرز کرنے کے لیے میں بنگلور روانہ ہوئی۔

میں ایک کمیونٹی لائبریری کھولنا چاہتی تھی۔ صرف امتحانات کے لیے نہیں بلکہ پڑھنے کے لیے، کہانیوں کے لیے اور خوشی کے لیے۔ میں چاہتی تھی کہ بچے کتابوں سے محبت کریں، ان سے خوفزدہ نہ ہوں۔

اسکول کے کیمپس میں ایک کمرہ تھا، جو موجودہ عمارت کی تعمیر کے بعد استعمال میں نہیں تھا۔ ہیڈ ماسٹر سجّن موکتَان نے بہت معاونت کی۔ ’’ہاں، کمرہ لے لو۔ اگر یہ بچوں کے لیے ہے تو اچھا ہے،‘‘ انہوں نے کہا۔ پھر میں نے دو پنچایت ممبران سے ملاقات کی، جنہوں نے مجھے غور سے سنا اور کہا، ’’آپ کو ہماری مکمل حمایت حاصل ہے۔‘‘ ان کی حوصلہ افزائی نے برادری میں لائبریری کے لیے وسیع تر قبولیت فراہم کی۔

کمرہ بہت گندا تھا۔ اندر شراب کی بوتلیں اور شیشے بکھرے پڑے تھے۔ باہر جھاڑیاں اگی ہوئی تھیں۔ ہم نے صفائی شروع کر دی۔ گاؤں کے لڑکے اور لڑکیاں مدد کے لیے ساتھ آئے۔ دو ہفتوں تک ہم نے جھاڑو لگائے، دھلائی کی، پینٹ کیا، بانس کی باڑیں بنائیں اور دراز لگائے۔

وہاں سے ایک شخص گزر رہا تھا۔ اس نے پوچھا، ’’تم لوگ یہاں کیا بنا رہے ہو؟‘‘ میں نے کہا، ’’لائبریری بنا رہے ہیں۔‘‘ اس نے ہنستے ہوئے کہا، ’’کون آئے گا پڑھنے؟‘‘

میں شام کو گودام میں گئی۔ یہ وہ وقت ہوتا ہے جب مزدور چائے کی پتیاں لے کر واپس لوٹتے ہیں۔ یہ ایک کھلی اور مصروف جگہ تھی، جہاں چائے کی تازہ پتیوں کی خوشبو تھی اور مزدوروں کی گفتگو کا شور تھا۔ میں نے ان سے لائبریری کے بارے میں بات کی اور بتایا کہ یہ ان کے بچوں کے لیے کیوں ضروری ہے۔

انہوں نے مثبت رد عمل ظاہر کیا۔ ایک خاتون نے کہا، ’’اگر میری بیٹی کو اسکول کے بعد پڑھنے کے لیے جگہ مل جائے تو مجھے خوشی ہوگی۔‘‘ ایک شخص نے دریافت کیا کہ جب تم چلی جاؤ گی تو اسے کون چلائے گا؟ کسی نے از راہ مذاق کہا، ’’اگر آپ کو کتابیں ملیں تو میں آپ کو کرسی دوں گا۔‘‘ لوگ مدد کرنے لگے۔ کسی نے سکے دیے، کسی نے ۲۰ روپے یا ۱۰۰ روپے دیے، سب نے اپنی حیثیت کے مطابق دیا۔ ہم نے تقریباً ۶۰۰۰ روپے جمع کیے۔ کچھ لوگوں نے پرانی کتابیں دیں۔ اور کچھ لوگوں نے لائبریری کے قیام میں مدد کے لیے اپنا وقت دیا۔

درازوں کو کتابوں سے بھرنے کے لیے میں نے بہت سی سول سوسائٹی کی تنظیموں کو خط لکھا۔ بعض نے چند کتابیں بھیجیں۔ ایک مقامی نوجوان جیکریاس بارا نے سرکاری امتحانات کی تیاری کرنے والوں کے لیے کتابیں، اوپن یونیورسٹی کا مواد اور وسائل کا عطیہ دیا۔ میرے پاس اسکول کی اپنی کتابیں تھیں۔ اب ہمارے پاس ہندی، بنگالی، انگریزی اور کُروکھ کی کتابیں موجود تھیں۔

اَنش نے کُروکھ کی کتاب دیکھی تو حیرت سے پوچھا، ’’دیدی، ہماری اپنی زبان کسی لائبریری میں موجود ہے؟‘‘

کُروکھ ایک شمالی دراوڑی زبان ہے، جس کی ایک زبانی روایت ہے جو اوراؤں برادری کی ثقافت، لوک گیتوں اور رسومات سے منسلک ہے۔ اب اسے زیر تحریر بھی لایا جا رہا ہے۔ ہندوستان میں یہ زبان ۲۰ لاکھ سے بھی کم لوگوں کے ذریعہ بولی جاتی ہے۔ کُروکھ کو یونیسکو نے زیر خطر زبانوں کے ایٹلس میں ایک کمزور زبان کے طور پر درج کیا ہے۔

ہم نے ثقافتی نشستیں بھی کیں۔ ایک شام ہم نے چائے کے باغات میں کام کرنے کے لیے جھارکھنڈ سے مغربی بنگال اور آسام میں آدیواسیوں کی نقل مکانی پر مبنی فلم کوڈا رجّی دکھائی۔ یہ فلم ان کی جدوجہد کی عکاسی کرتی ہے۔ فلم میں دکھایا گیا ہے کہ کیسے وہ چائے کی پتی توڑتے ہیں، اور کس طرح ان کے خاندان یہاں آباد ہوئے ہیں۔ سب نے خاموشی سے فلم دیکھی۔ فلم کے اختتام پر ایک بزرگ کھڑے ہوئے اور کہنے لگے، ’’یہ تو ہماری کہانی ہے۔‘‘

ایک اور شام ہم سب نے مل کر لوک گیت گائے اور ماندر ڈھول بجایا۔ یہ ایک روایتی قبائلی ڈھول ہے، جو لکڑی کا بنا ہوا ہوتا ہے۔ اس کی شکل بیلن نما ہوتی ہے اور اس کے دونوں سرے چمڑے سے مڑھے ہوتے ہیں۔ اس ساز کو کبھی ڈنڈوں سے یا کبھی کبھی ہاتھوں سے بجایا جاتا ہے۔ آدیواسیوں کے اجتماعات اور رقص میں ماندر کی آواز مرکزی حیثیت رکھتی ہے۔ یہ جگہ ایسے ایک ثقافتی اکھاڑے کی طرح محسوس ہوئی، جہاں علم، کہانیاں اور روایات بزرگوں سے نوجوانوں میں منتقل ہوتی ہیں۔

لائبریری کی حیثیت ریڈنگ روم سے زیادہ ہوچکی تھی۔ یہ جگہ یاد دلاتی تھی کہ ہم کون ہیں۔

پڑھنے اور ٹیوشن کی نشستوں میں شرکت کے لیے بچوں نے اسکول کے بعد لائبریری میں آنا شروع کر دیا ہے۔ ہر ہفتہ کے آخر میں کہانی سنانے، پڑھائی کا حلقہ بنانے، لوک گیت اور گروپ اسٹڈی کی سرگرمیاں ہوتی ہیں۔ ہیڈ ماسٹر نے کہا کہ ’’لائبریری ہمارے طلباء کو پڑھنے کی ترغیب دیتی ہے اور انہیں کتابوں تک رسائی فراہم کرتی ہے، جو بصورت دیگر ان کے پاس نہیں ہوتیں۔‘‘

زیادہ تر والدین حوصلہ افزائی کرتے ہیں۔ جیسا کہ ایک مزدور ہیم لتا ٹوپو نے کہا، ’’میں چاہتی ہوں کہ میرے بچے تعلیم حاصل کریں اور مجھ سے بہتر زندگی گزاریں۔‘‘ اساتذہ بھی ان کا ساتھ دیتے ہیں۔ جیسا کہ پرمیلا تِرکی نے مجھے بتایا، ’’ہمارے بہت سے بچوں کے گھروں میں کتابیں نہیں ہیں۔ اگر وہ لائبریری میں وقت گزار سکتے ہیں، تو اس سے واقعی ان کی پڑھنے کی عادت میں بہتری آئے گی۔‘‘

رین رائڈ، چرواہا اور بھیڑیا، اور کیری می، ممّا مقبول کتابیں ہیں۔ میں نے ۱۰۰ کتابوں سے شروعات کرنے کی امید کی تھی، لیکن ہم نے ۱۵۰ سے زیادہ کتابوں سے شروعات کی۔ ہماری لائبریری میں اب ۳۰۰ کتابیں جمع ہو چکی ہیں۔

جب میں پاٹی باڑی سے نکلی تو گاؤں کے نوجوانوں نے مورچہ سنبھال لیا۔ وہ ہر روز لائبریری کھولتے ہیں، کتابوں کی دیکھ بھال کرتے ہیں اور بچوں کو آتے رہنے کی ترغیب دیتے ہیں۔ والدین مجھ سے کہتے ہیں، ’’ہمارے بچے دراصل اب پڑھ رہے ہیں۔‘‘

لائبریری چھوٹی ہے۔ یہ عطیات اور لوگوں کو اپنا وقت دینے سے چلتی ہے۔ لیکن یہ میری امید سے کہیں زیادہ اوپر پہنچ چکی ہے۔ یہ وہ جگہ ہے جہاں بچے ہنستے ہیں، عورتیں جمع ہوتی ہیں اور ہماری ثقافت کو یاد کیا جاتا ہے۔

کتابوں سے بھرا ہوا، بانس کی باڑ سے گھرا ایک چھوٹا سا کمرہ آس پاس کے لوگوں کی موجودگی میں زندہ ہو جاتا ہے۔ جب بھی میں یہاں بچوں کو پڑھتے یا گاتے دیکھتی ہوں، تو مجھے یاد آتا ہے کہ ہم نے اسے کس مقصد سے بنایا تھا۔ کتابیں صرف کاغذ نہیں ہیں۔ وہ دروازے ہیں۔ اور پہلی دفعہ، ہمارے لیے ایک دروازہ کھلا ہے۔

ترجمہ نگار: شفیق عالم