डुआर्स मं ग्यान के मुहटा

“दीदी, काय सिरतोन हमन ओहन अपन भाखा मं पढ़ सकथन?” 15 बछर के अंश ओरांव ह मोला पूछथे, वो ह हाथ मं कुडुख किताब धरे रहिस.

हमन पश्चिम बंगाल के जलपाईगुड़ी जिला के चाय बगीचा मं बूता करेइय्या मजूर मन के स्कूल मं हवन. जेन बगीचा मं अंश के दाई-ददा अऊ मोर दाई-ददा बूता करथें, वो ह लीश नदी के पार मं हवय.

हमर परिवार, इहाँ के अधिकतर मजूर मन के जइसने, ओराँव जनजाति ले हवय. हमर पुरखा चार पुस्त पहिली छोटानागपुर पठारी इलाका – रांची, गुमला अऊ सिमडेगा जिला ले आय रहिन, जेन ह अब झारखंड मं हवय. घर मं, हमन अभू घलो अपन समाज के भाखा कुरुख बोलथन, फेर बहिर मं, हमन हिंदी अऊ बंगाली कहिथन. ते पायके, अंश ह कभू हमर महतारी भाखा मं कोनो किताब देखे नइ रहिस.

मंय इहींचे, लीश नदी चाय बगीचा भीतरी पाटीबारी मं पले-बढ़े हवंव. जनगणना पुस्तिका मं नांव लिशरिवर लिखाय हवय, फेर गांववाले अऊ स्थानीय प्रशासन लीश रिवर के हिज्जे करके लिखथें.

हरेक बिहनिया तुमन माईलोगन मन ला चाय के पत्ती/ पाना टोरे बर टुकना धरे जावत, मरद लोगन मन ला फेक्टरी जावत अऊ लइका मन ला अपन जुन्ना नीला अऊ सफेद स्कूल ड्रेस मं स्कूल जावत देख सकथो.

मोर दाई-ददा बगीचा मं बूता करथें, जिहां सीजन के हिसाब ले काम ह बदलत रहिथे – चाय के पत्ती/पाना टोरे, झाड़ी मन के छटाई करे, खातू डारे धन रुख-रई मन ला साफ करे. आठ घंटा बूता करे के बाद दिन भर के रोजी करीबन 250 रूपिया हवय. मोर ददा के काम सरदार धन सुपरवाइज़र के आय.

कम उमर के लइका मन सरकारी पटीबारी प्राइमरी स्कूल – मं पहिली ले पांचवीं क्लास तक पढ़थें. हाई स्कूल घलो उहिच अहाता मं हवय.

30 नवंबर, 2024 के दिन मंय स्कूल के एक ठन खाली खोली मं लाइब्रेरी सुरु करेंय. ये ह दिन मं दू बेर, बिहनिया 9 बजे ले 12 बजे तक अऊ संझा 3 बजे ले 6 बजे तक खुले रहिथे.

पहिली दिन, मंय हिंदी के एक ठन कहिनी, दादाजी का छाता, पूरा आवाज मं पढ़ेंय. ये मं दादाजी के छाता के बउरे के कतको काम ला बताय गे रहिस – जइसने बरसा ले बचाय के छोड़ फर टोरे. येकर ले ये सीख मिलथे के गर समझदारी ले काम करे जाय त एकेच चीज कतको काम के हो सकथे. आखिर मं, मंय पूछंय, “तुमन काय सीखो?” एक झिन नानचिक नोनी ह एक ठन फोटू डहर आरो करत नारिया के कहिथे, “बेंदरा टीचर ले जियादा मजेदार आय!” सब्बो हँस परिन. वो हँसी मं लाइब्रेरी मं परान आ गीस.

पढ़ के सुनाय (वाचन) के क्लास जेन मं सब्बो झिन आइन, बिना परिच्छा वाले अऊ सिरिफ अपन हिसाब ले हँसी-खुसी सीखत

मोर स्कूली पढ़ई दार्जिलिंग जिला के गयागंगा मं सेंट मैरी गर्ल्स हायर सेकेंडरी स्कूल मं होईस. मोर दाई ह मोला 24 कोस दूरिहा हंसक्वा चाय बगीचा मं मोर दादी करा रहे बर भेज दीस, जेकर ले मंय उहाँ जाके पढ़ सकंव. हमर स्कूल मं बढ़िया क्लासरूम, ट्रेंड टीचर अऊ एक ठन लाइब्रेरी रहिस. फेर चाय बगीचा के पढ़ेइय्या लइका मन ला यूनिवर्सिटी मं दाखिला के परिच्छा के तियारी करे मं मदद करेइय्या संस्था डहार के संग हफ्ता मं तीन बेर होवेइय्या ग्रुप स्टडी बखतेच सिरतोन मं मोर मन किताब मं रमिस.

कॉलेज जाय के मन रहिस, ते पायके अगस्त 2021मं मंय अपन खरचा निकारे बर बगीचा मं लइका मन ला ट्यूशन पढ़ाय सुरु कर देंय. कतको लइका ठीक ले पढ़ धन लिख ​​नइ पावत रहिन. जुलाई 2023 मं, मंय अज़ीम प्रेमजी यूनिवर्सिटी मं डेवलपमेंट स्टडीज़ मं एमए करे बर बैंगलोर चले गेंय.

मंय एक ठन सार्वजनिक लाइब्रेरी खोले चाहत रहेंय. सिरिफ परिच्छा सेती नइ, फेर पढ़े, कहिनी सुनाय अऊ खुसी सेती. मंय चाहत रहेंय के लइका मन ला किताब ले मया हो जावय, वो मन किताब ले डेर्राय झन.

स्कूल के अहाता मं एक ठन खोली रहिस जेन ह ये बखत बिल्डिंग बने के बाद ले काम मं नइ आवत रहिस. हेडमास्टर, साजन मोक्तान, बहरी मदद करेइय्या रहिस. वो ह कहिस, “हव, खोली ले ले. गर ये ह लइका मंन बर आय त बढ़िया होही.” ओकर बाद मंय पंचायत के दू झिन पंच ले मिलेंय, वो मन चेत धरे सुनिन अऊ कहिन, “तोला हमर पूरा समर्थन हवय.” वो मन के समर्थन ह लाइब्रेरी ला बड़े समाज मं पहिचान बना दीस.

खोली भारी असकट रहिस, भितरी दारु के बोतल अऊ गिलास रहिस. बहिर मं भारी बन-कांदी जामे रहिस. हमन साफ-सफई करेन. गाँव के टूरा-टूरी मन मदद करिन. दू हफ्ता तक ले झाड़े बुहारे चलत रहिस, पोंछा लगायेन. पुताई करेन, बांस के बाड़ा बनायेन अऊ राखे बर अलमारी बनायेन.

तीर ले जावतएक झिन मइनखे ह पूछिस, “तुमन इहाँ काय बनावत हव?” मंय कहेंय, “एक ठन लाइब्रेरी.” वो ह हंसिस अऊ कहिथे, “पढ़े बर कोन आही?”

मंय संझा के गोदाम गेंय, जब मजूर मन चाय के पत्ती टोर के आइन. वो ह खुल्ला अऊ लोगन ले भरे जगा रहिस जेन ह तुरते टोरे चाय पत्ती के महक अऊ गोठ-बात ले भरे रहिस. मंय वो मन ले लाइब्रेरी के उदिम ला लेके बात करेंय अऊ ये घलो के ये वो मन के लइका मन बर काबर जरूरी हवय.

वो मन के जुवाब उछाह ले भरे रहिस. एक झिन माईलोगन ह कहिथे, “गर मोर बेटी ला स्कूल ले आय के बाद पढ़े बर जगा मिल जाही, त मोला भारी खुसी होही.” एक झिन मइनखे ह पूछथे, जब तंय चले जाबे त येला कोन चलाही?” एक झिन ह मजाक करत कहिथे, “गर तोला किताब मिल जाहीं, त मंय तोला एक ठन कुर्सी दिहूँ.” लोगन मन मदद करे सुरु करिन. कुछु मन 20 धन 100 रूपिया दीन, जतक देय सकत रहिन. हमन करीबन 6,000 रूपिया जमा कर लेन. कुछेक लोगन मन जुन्ना कतको किताब दीन. अऊ कुछु मन जगा बनाय मं मदद करे बर अपन बखत दीन.

अलमारी भरे बर, मंय कतको सिविल सोसाइटी ऑर्गनाइज़ेशन मन ला लिखेंय. कुछेक मन किताब भेजिन. एक झिन इहाँ के जवान लइका युवक जैक्रियस बारा ह किताब, ओपन यूनिवर्सिटी के मटीरियल अऊ सरकारी भर्ती परिच्छा के तियारी करेइय्या मन ला काम के साधन दान करिस. मोर तीर स्कूल के अपन कतको किताब रहिस. अब हमर करा हिंदी, बंगाली, इंग्लिस अऊ कुडुख किताब मन रहिन.

जब अंश ह कुड़ुख किताब देखिस त अचमित होके पूछिस, “दीदी, लाइब्रेरी मं हमर अपन भाखा?”

कुड़ुख, एक ठन नॉर्थ द्रविड़ भाखा आय, जेन ह ओरांव समाज के संस्कृति, लोकगीत अऊ कतको रीति-रिवाज ले जुड़े बोलचाल के परंपरा आय. अब येला लिखे घलो जावत हवय. भारत मं 20 लाख ले घलो कम लोगन मन येला बोलथें. कुड़ुख ला यूनेस्को के ‘नंदावत जावत भाखा के एटलस’ मं एक ठन असुरच्छित भाखा के रूप मं राखे गे हवय.

हमन सांस्कृतिक पारी घलो रखेन. एक दिन संझा मं हमन कोडा राजजी नांव के एक ठन फिलिम देखायेन, जेन ह झारखंड ले पश्चिम बंगाल अऊ असम मं चाय बगीचा मं काम करे बर अवेइय्या आदिवासी मन के पलायन ला लेके रहिस. ये मं ओकर मन के जूझे, चाय के पत्ती टोरे के ओकर मन के तरीका अऊ इहाँ परिवार के बसे, येला दिखाय गे हवय. सब्बो लोगन मन कलेचुप देखत रहिन. फिलिम सिराय के बाद, एक झिन डोकरा सियान ठाढ़ होगे अऊ कहिथे, “ये हमर कहिनी आय.”

आने दिन एक अऊ संझा मं, हमन लोकगीत गायेन अऊ मांदर ढोल बजायेन. पारंपरिक आदिवासी ढोल, जेन ह गोल आकार के होथे अऊ लकरी के बने होथे जेकर दूनों मुड़ी मं चमड़ा छवाय होथे, वोला डंडा ले धन कभू कभू हाथ ले बजाय जाथे. मांदर के आवाज आदिवासी सभा मन मं अऊ नाचे गाये के माई हिस्सा होथे. वो जगा एक ठन अखरा जइसने लगत रहय –एक ठन सांस्कृतिक सभा जिहां गियान, कहिनी अऊ परंपरा सियान ले के लइका मन तक हबरथे.

लाइब्रेरी सिरिफ पढ़े के खोली ले कहूँ बड़े बनगे रहिस. ये हमन ला ये सुरता करावत घलो रहिस के हमन कोन आन.

लइका मन स्कूल के बाद लाइब्रेरी आय लगे हवंय – पढ़े अऊ ट्यूशन सेशन मं सामिल होय बर. हर हफ्ता के आखिर दिन मं कतको कार्यक्रम होथे – कहिनी सुनाय, पढ़के सुनाय, लोकगीत अऊ टोली बनाके पढ़ई. हेडमास्टर कहिथे, “लाइब्रेरी हमर स्कूल के लइका मन ला पढ़े बर उछाह भरथे अऊ वो मन ला अइसने किताब देथे जेन ह वो मन ला नइ मिलय.”

अधिकतर दाई ददा हिम्मत बढ़ावत हवंय. जइसने के एक झिन वर्कर, हेमलता टोप्पो ह कहिस, “मंय चाहत हवं के मोर लइका मन पढ़ें अऊ मोर ले बढ़िया जिनगी गुजारें.” टीचर मन घलो मदद करथें. जइसने के प्रमिला तिर्की ह मोला बताइस, हमर कतको लइका मन करा घर मं पढ़े बर किताब नइ यें. गर वो मन लाइब्रेरी मं आके पढ़हीं, त येकर ले सिरतोन मं वो मन के पढ़े के आदत बढ़िया हो जाही.”

रेन राइड, चरवाहा अऊ भेड़िया, अऊ कैरी मी, मम्मा पॉपुलर नांव आंय. मोला आस रहिस के मंय 100 किताब ले सुरू करहूँ फेर हमन 150 ले जियादा किताब ले सुरु करेन. हमर लाइब्रेरी मं अब 300 ले जियादा किताब होगे हवय.

जब मंय पाटीबाड़ी छोड़ के गेंय, त गाँव के जवान लइका मन ये जिम्मेवारी ले लीन. वो मन हरेक दिन लाइब्रेरी खोलथें, किताब मन ला जतन करके राखथें अऊ लइका मन ला आय के हिम्मत बंधाथें. दाई-ददा मन मोला कहिथें, “अब लइका मन सिरतोन पढ़त हवंय.”

लाइब्रेरी नान-कन हवय. ये ह दान अऊ लोगन मन के देय बखत ले चलत हवय. फेर ये ह मोर आस के कहूँ जियादा बड़े हवय. ये एक ठन अइसने जगा आय, जिहां लइका मन हँसी-ठिठोली करथें, माईलोगन मन जुरथें, अऊ हमर संस्कृति ला सुरता करे जाथे.

कतको किताब ले भरे बांस के बाड़ा वाले नान-कन खोली तीर-तखार के लोगन मन बर जोरदार जिनिस आय. जब घलो मंय इहाँ लइका मन ला पढ़त धन गावत देखथों, त मोला सुरता आथे के हमन येला काबर बनाय रहेन. किताब मन सिरिफ कागज भर नो हें. वो मन मुहटा आंय. अऊ पहिली बेर, हमर तीर एक ठन मुहटा हवय.

अनुवाद: निर्मल कुमार साहू