पढ़ाई से जादे आपन जड़ से जोड़े वाला किताबघर

“दीदी, का इहंवा हमनी आपन भाषा में बात कर सकिला?” पनरह बरिस के अंश उरांव अपना हाथ में कुरुख किताब पकड़ले हमरा से पूछलन.

हमनी पस्चिम बंगाल के जलपाईगुड़ी जिला के एगो स्कूल में बानी. इहंवा चाय बागान मजूर लोग के बच्चा सब पढ़े आवेला. लीश नदी लगे पड़े वाला एह बागान में अंश आउर हमार माई-बाऊजी लोग काम करेला.

इहंवा काम करे वाला जादेतर मजूर जेका हमनियो के परिवार उरांव जनजाति से आवेला. हमनी के पुरखा लोग चार पीढ़ी पहिले छोटा नागपुर के पठारी इलाका मतलब झारखंड के रांची, गुमला, सिमडेगा जइसन जिला से आइल रहे. आपन-आपन घरे हमनी अभियो कुरुखे बोलेनी, ई हमनी के समाज के भाषा ह. बाकिर बाहिर हिंदी आ बंगाली बोलिला. एहि से अंश के अबले आपन माईबोली कुरुख के कवनो किताब के दर्शन ना भइल रहे.

हम इहंवा लीश रिवर के चाय बागान के पाटीबाड़ी इलाका में पलइनी-पोसइनी. जनगणना हैंडबुक में एकर नाम ‘लिशरिवर’ लिखल बा. बाकिर गांव आउर स्थानीय प्रशासन एकरा ‘लीश रिवर’ ही कहे आ लिखेला.

रोज भोरे एक जइसन बात होखेला, मेहरारू लोग चायपत्ती तुड़े टोकरी लेले चाय के बगइचा, मरदाना लोग करखाना आउर बच्चा लोग बुल्लू-उज्जर रंग के स्कूल ड्रेस में स्कूल ओरी निकलेला.

हमार माई-बाऊजी लोग बगइचे में काम करत रहे. उहंवा मौसम के हिसाब से लोग के काम बदलत रहेला. कइएक तरह के काम रहेला. चाय के पत्ती तुड़नाई, झाड़-झंखार छंटनाई, खाद, चाहे उर्वरक छिड़कनाई, चाहे लगे एने-ओने उगल वनस्पति के सफाई. हमार बाऊजी एह सब में सरदार, चाहे कहीं, पर्यवेक्षक के काम करेलन.

छोट बच्चा लोग सरकारी पाटीबाड़ी प्राथमिक विद्यालय (पहिला से पंचमा ले) में पढ़ेला. उच्चतम माध्यमिक विद्यालयो इहे अहाता में बा.

30 नवंबर, 2024 के दिन, हम स्कूल के एगो खाली पड़ल कमरा में लाइब्रेरी सुरु कइनी. ई दिन में दू बेरा खुलेला. भोरे 9 से दुपहरिया 12, आ दुपहरिया 3 से सांझे 6 बजे ले.

पहिलका दिन हम हिंदी के कहानी ‘दादीजी के छाता’ सभे के जोर-जोर से पढ़ के सुनइनी. कहानी में दादाजी के छाता बरखा से बचावे के अलावे आउर भी कइएक तरीका से इस्तेमाल हो सकेला, बतावल गइल रहे. जइसे फल तुड़े में. कहानी के संदेश रहे कि समझदारी से काम लेवल जाव, त एके चीज से कइएक तरह के काम लेवल जा सकेला. आखिर में हम पूछनी, “बताव, तू लोग एह कहानी से का सिखल?” एगो छोट लइकी फोटो ओरी देखावत चिल्लइली, “मास्टरजी से जादे त बंदरे मजेदार बा”. ई सुनके बच्चा सब के हंसी फूट पड़ल. किताब वाला कमरा में जइसे जान आ गइल.

पस्चिमी दुआर में पड़े वाला लीश रिवर, उत्तर बंगाल में लगावल गइल सुरुआती बागान में से बा. एकर पाटीबाड़ी, लीश आ होप मिलाके तीन डिवीजन बा. जवन नदी के पीछे एह चाय बागान के नाम पड़ल, ऊ कालिम्पोंग जिला में निकलेला आ तीन गांव से होखत आखिर में तीस्ता नदी में समा जाला.

चाय के बगइचा में दिन बड़ा जल्दी सुरु हो जाला. मेहरारू लोग एकदम भोरे-भोरे चारे बजे उठ जाला. साफ-सफाई, घर के काम आ खाना बनावेला. खाना में जादे करके भात चाहे रोटी, आ नून रहेला. घर में कवनो तरकारी रही, त बनेला. फेरु सब लोग काम पर निकल जाला. भोरे छव बजे ले मजूर लोग के टोली कान्हा पर कपड़ा वाला झोरा टंगले चाय के झाड़ ओरी निकलत लउकेला.

स्कूल त भोरे 10 बजे सुरु हो जाला, एहि से लरिका सब अपने से तइयार होखेलन स. अपने घर के कुछ छोट-मोट कामो निपटा देवेलन. सभे घर में पानी के सुविधा ना होखे. एहि चलते लरिकन सब के पड़ोस के कवनो घर, चाहे मोहल्ला के हैंडपंप से पानी भर के लावे पड़ेला.

केतना बच्चा लोग स्कूल में खाली मिड-डे मील के लालच में आवेला. बहुते बच्चा अठमा के बाद स्कूल छोड़ देवेला. आउर जादेतर बारहमा से आगू ना पढ़े. ऊ लोग चाय बागान में काम करे लागेला, चाहे मजूरी खातिर दोसर राज्य सब में चल जाला. गिनन-चुनल बच्चा लोग कॉलेज के मुंह देख पावेला.

हम दार्जिलिंग जिला के गायागंगा में पड़े वाला सेंट मैरी गर्ल्स हायर सेकेंडरी स्कूल में पढ़नी. माई हमरा इहंवा से 72 किमी दूर पड़े वाला हंसक्वा चाय बागान में हमार नानी संगे रहे खातिर भेज देली, जेसे हम उहंवा रहीं आ स्कूल जा सकीं. हमार स्कूल में पक्का क्लासरूम रहे, प्रशिक्षित टीचर लोग रहे, आउर एगो लाइब्रेरियो रहे. बाकिर असल में हमार मन किताब में तब लागल जब हम हफ्ता में तीन दिन होखे वाला ग्रुप स्टडी सेशन में जाए लगनी. सेशन दाहर नामके एगो संस्था करावेला. ई चाय बागान समुदाय के छात्र के विश्वविद्यालय प्रवेश परीक्षा के तइयारी में सहायता करेला.

कॉलेज के सपना मन में सजवले पढ़ाई के खरचा निकाले खातिर हम अगस्त 2021 में बागान के बच्चा सब के ट्यूशन लेवे सुरु कइनी. ओकरा में से केतना बच्चा लोग ठीक से पढ़, चाहे लिख ना पावत रहे. जुलाई 2023 में बेंगलुरु पहुंचनी. उहंवा अजीम प्रेमजी विश्वविद्यालय में डेवलपमेंट स्टडीज में मास्टर्स पढ़ावे लगनी.

हमरा बहुत दिन से गांव में एगो लाइब्रेरी खोले के मन रहे. खाली परीक्षा के तइयारी करावे के ना रहे, बलुक पढ़े-लिखे, कहानी सुने-सुनावे आ खुसी बांटे के एगो माहौल आ जगह बनावे खातिर. हम इहे चाहत रहीं कि बच्चा लोग किताब से प्यार करे, एकरा से डरे ना.

स्कूल के अहाता में एगो कमरा खाली पड़ल रहे. स्कूल बनला के बाद से ऊ कवनो काम में ना लावल गइल रहे. हेडमास्टर सज्जन मोक्तान पूरा सहजोग देलन. ऊ कहलन, “ठीक बा, ई कमरा ले ल. जदि बच्चा लोग खातिर एकर इस्तेमाल करे के बा, त बहुते नीमन बात बा.” एकरा बाद हम पंचायत के दू ठो सदस्य लोग से भेंट कइनी. ऊ लोग हमार बात ध्यान से सुनलक आ कहलक, “हमनी तोहरा साथे बानी.” ओह लोग के हौसला बढ़ावे से गांव-टोला में लाइब्रेरी के मान बढ़ल आ सबके भरोसा बन गइल.

ओह घरिया ऊ कमरा बड़ा गंदा रहे. भीतरी दारू के बोतल, गिलास सब एने-ओन्ने छितराइल रहे. बाहर घास-फूस रहे. सफाई सुरु कइल गइल. गांव के लइका आ लइकी लोग मदद कइलक. दू हफ्ता ले हमनी झाड़ू लगइनी, पक्का धोनी, बांस के बाड़ लइगइनी आ शेल्फ लगइलन.

उहंवा से गुजरत एगो आदमी ई सब देख के पूछे लागल, “इहंवा कथी बन रहल बा?” हम बतइनी, “लाइब्रेरी.” ऊ मजाक उड़ावे लागल आ कहलक, “के पढ़े आई हो?”

सांझ में जब मजूर लोग चाय के पत्ता लेके लउटे लागल, हम गोदाम पहुंचनी. ओह घरिया गोदाम खुलल रहे, खूब रमन-चमन रहे. हवा में चाय के पत्ता के महक रहे, लोग आपस में बतियावत रहे. हम ओह लोग से लाइब्रेरी आ उनकर बच्चा लोग खातिर एकर महत्व पर बात कइनी.

जवाब में लोग हमरा से बहुते गरमजोशी से मिलल. एगो मेहरारू कहली, “केतना अच्छा विचार बा, जदि हमार बेटी के स्कूल के बाद पढ़े के एगो जगह मिल जाव.” एगो आदमी पूछलन, “तू जब इहंवा ना रहबू, तब एकरा के चलाई?” केहू मजाके-मजाक में कहलक, “जदि तू किताब लावतारू त हम तोहरा एगो कुरसी देहम.” एह तरीका से लोग मदद करे लागल. कुछ लोग पइसा देलक, त केहू 20 रुपइया, केहू 100 रुपइया के नोट. जेतना जे दे सकत रहे. हमनी लगे कोई 6,000 रुपइया जुट गइल. कुछ लोग आपन पुरान किताब से मदद कइलक. केहू समय देके एह जगह के तइयार करे में मदद कइलक.

शेल्फ सब में रखे खातिर किताब के बारे में कइएक नागरिक समाज संगठन के चिट्ठी लिखल गइल. ओकरा में से कुछ संगठन कुछ किताब भेजलक. गांवे के एगो जवान लइका, जैक्रियास बड़ा ओपन यूनिवर्सिटी के सामग्री आ सरकारी परीक्षा के तइयारी खातिर उपयोगी संसाधन सब दान कइलन. हमरो लगे स्कूल के कुछ किताब रहे. अब हमनी लगे हिंदी, बंगाली, अंगरेजी आ कुरुखो के किताब उपलब्ध बा.

अंश जब कुरुख के किताब देखलन, त अचरज में पड़ गइलन, “दीदी, हमनी के आपनो भाषा कवनो लाइब्रेरी में मिल सकेला?”

कुरुख, उत्तर द्रविड़ भाषा समूह के एगो भाषा बा. ई उरांव समुदाय के संस्कृति, लोकगीत आ अनुष्ठान से जुड़ल एगो मौखिक परंपरा रहल बा. अब एकरा लिखलो जाए लागल बा. भारत में एह भाषा के 20 लाख से भी कम लोग बोलेला. यूनेस्को के “एटलस ऑफ एनडेंजर्ड लैंगवेजेज” में कुरुख एगो संकटग्रस्त भाषा के रूप में चिन्हित बा.

हमनी सांस्कृतिक कार्यक्रमो के आयोजन कइनी. एक दिन सांझ के बच्चा लोग के कोड़ा रज्जी फिलिम देखवनी. ई झारखंड से पस्चिम बंगाल आ असम ले चाय बागान में काम करे आवे वाला आदिवासी समुदाय के लोग के प्रवास के कहानी बा. एकरा में ओह लोग के दिक्कत, चाय के पत्ता तुड़े के ओह लोग के तरीका आ परिवार सब के इहंवा बसे के प्रक्रिया देखावल गइल बा. सब लोग शांत होके फिलिम देखत रहल. फिलिम खतम भइल, त एगो बुजुर्ग उठलन आ कहलन, “ई त हमनी के कहानी बा.”

एक और दिन सांझ में हमनी मिलके लोकगीत गइनी, मंदार ढोल बजइनी. ई एगो पारंपरिक आदिवासी ढोल बा, जे बेलनाकार होखेला. ई लकड़ी के होखेला आउर एकर दूनो सिरा पर चमड़ा तानल रहेला. एकरा कबो डंडी से आ कबो हाथ से बजावल जाला. आदिवासी लोग के गीत-संगीत आ नाच में मंदार जरूर बजावल जाला. ओह दिन सांझ में अखाड़ा जइसन माहौल हो गइल. बड़ा लोग आपन बात, कहानी आ परंपरा के बारे में बच्चा आ जवान लोग के बतावत रहे.

लाइब्रेरी खाली पढ़े के जगह भर ना रहे. ई हमनी के आपन पहचान याद दिलावे में मदद कइलक.

अब त स्कूल के बाद बच्चा लोग लाइब्रेरी आवे लागल बा. ऊ लोग इहंवा पढ़ेला, ट्यूशन करेला. शनिचर आ एतवार के दिन इहंवा कई तरह के गतिविधि होखेला. कहानी सुनावल जाला, रीडिंग सर्कल, लोकगीत आ ग्रुप स्टडीज होखेला. हेडमास्टर कहेलन, “लाइब्रेरी हमनी के बच्चा लोग के पढ़े खातिर प्रेरित करेला. ओह लोग के वइसन किताब उपलब्ध करावेला, जे ओह लोग लगे ना होखे.”

जादेतर माई-बाप लोग हमनी के उत्साह बढ़ावेला. एगो मजूर, हेमलता टोप्पो के कहनाम बा, “हम चाहिला कि हमार बच्चा लोग पढ़े आ हमरो से नीमन जिनगी जिए.” मास्टर लोग भी सहजोग करेला. प्रमिला तिरकी हमरा से कहली, “हमनी के केतना बच्चा लोग के घर में किताब नइखे. जदि ऊ लोग लाइब्रेरी में बइठी, त ओह लोग के पढ़े का आदत सांचो नीमन हो जाई.”

‘रेन राइड’, ‘चरवाहा आ भेड़िया’, ‘कैरी मी’, ‘मम्मा’ किताब सब बच्चा लोग के पसंदीदा किताब बा. सुरु में हमरा सौ किताब से सुरुआत के उम्मीद रहे. बाकिर हमनी 150 से जादे किताब से सुरु कइनी. अब त हमनी के लाइब्रेरी में 300 से जादे किताब हो चुकल बा.

पाटीबाड़ी से निकलनी, त गांव के जवान उमिर के लइका सब एकर जिम्मेदारी संभार लेलक. उहे लोग रोज लाइब्रेरी खोलेला, किताब संभारेला आ उहंवा के बच्चा लोग के नियम से आवे खातिर प्रोत्साहित करेला. बच्चा सब के माता-पिता लोग कहेला, “हमनी के बच्चा लोग अब सांचो पढ़े लागल बा.”

लाइब्रेरी छोट बा आउर लोग के मदद आ दान से चलेला. बाकिर जेतना सोचले रहीं, ओकरा से जादे कर रहल बा. ई उहे जगह बा जहंवा बच्चा लोग हंसेला, मेहरारू लोग जुटेला आ हमनी के संस्कृति के याद ताजा होखेला.

बांस के बाड़ से घिरल ई छोट कमरा किताब से भरल बा. लोग के आवे से एह में प्राण फूंका जाला. इहंवा जब बच्चा लोग के पढ़त चाहे गावत देखिला, त भीतरी से एहसास होखेला कि हमनी एकरा काहे बनइले रहीं. किताब खाली कागज के पुलिंदा ना होखे. ऊ त एगो दरवाजा बा. आउर पहिल बेर, हमनियो लगे एगो दरवाजा बा.

अनुवाद: स्वर्ण कांता