چنچ پور ڈھگے میں سیلاب سے تباہی

’’رات میں بادل پھٹا اور سب کچھ بہہ گیا… خود دیکھ لیجئے۔ سب کچھ بہہ گیا ہے۔ ہم نے اپنا گھر اور چار مویشی کھو دیے۔ سب کچھ…‘‘ شری کوَل بھارت مورے ہمیں ٹن کی دیواروں اور شیڈ والے اپنے گھر کے آس پاس کی جگہ دکھاتے ہوئے بتا رہی ہیں۔ وہ مزید کہتی ہیں، ’’پانی کمر تک آ گیا تھا۔ ہمارے بیٹے نے ہمیں جگایا تو ہم بچ گئے۔ لیکن وہ پانی…‘‘

مورے ماوشی گھر میں جو کچھ بچا پائیں، اسے انہوں نے دھات کی الماری پر اکٹھا کر لیا۔ گھر میں مٹی کا فرش بہہ چکا ہے اور پیچھے ریتیلا اور اوبڑ کھابڑ فرش بچا ہے۔

دھاراشیو (سابقہ عثمان آباد) کے بھوم بلاک کے چنچ پور ڈھگے میں ۲۱ ستمبر، ۲۰۲۵ کو موسلا دھار بارش ہوئی تھی۔ یہ گاؤں گوداوری کی معاون ندی بان گنگا کے کنارے آباد ہے۔ اگلے دن، ۲۲ ستمبر کو بھی رات بھر بھاری بارش ہوتی رہی۔ گاؤں میں پانی بھر گیا۔ لوگوں نے اس خطرناک موسم کے بارے میں یوں بتایا، ’’ہم نے زندگی میں ایسا منظر پہلے کبھی نہیں دیکھا تھا۔‘‘

سوریہ کانت مورے نے ہمیں ندی دکھائی۔ کنارے پر موجود سارے کھیت بہہ گئے ہیں، جن میں ان کے ایک ایک ایکڑ کے دو انگور کے باغ بھی ہیں۔ مورے کہتے ہیں، ’’ہم اپنے مویشیوں کو وقت رہتے بچا پائے۔ وہ گردن تک پانی میں ڈوبے ہوئے تھے۔ میں نے انہیں چھوڑ دیا اور وہ بچ گئے۔ لیکن ٹن شیڈ میں جو کچھ رکھا تھا، سب بھیگ گیا۔ جوار، مونگ، اُڑد اور مونگ پھلی کی بوریاں، سب کچھ۔ سارا کڑبا یعنی جوار یا مکئی کے ڈنٹھل کی شکل میں رکھا چارہ بہہ گیا۔‘‘

مورے نے ڈیڑھ ایکڑ میں پیاز لگائی تھی۔ اب پورے کھیت میں صرف چٹانیں اور پتھر بھرے ہیں۔ اوپری مٹی کی زرخیز پرت والے سبھی پیاز کے پودے تیز پانی میں بہہ گئے۔

مرکزی سڑک کے بائیں طرف کے کھیت بزرگ سدھیشور بھگوان ڈھگے کے ہیں، جو ساٹھ سال کے ہیں۔ وہ کھیت میں ہی رہا کرتے تھے۔ وہ بتاتے ہیں، ’’پانی اتنا تیز تھا کہ اس نے درخت اکھاڑ ڈالے، جو میرے انگور کے باغ میں آ کر گرے۔ پورا ڈھانچہ ٹوٹ گیا ہے۔‘‘ انگور کے باغ میں ۱۹۹۵ میں پودے لگائے گئے تھے۔ ’’ہم نے اڑد کی فصل کاٹی تھی۔ وہ بھی بہہ گئی۔‘‘

مسلسل دو رات، ۲۱ اور ۲۲ ستمبر کو اس علاقہ میں موسلا دھار بارش ہوئی تھی۔ گینش مورے کہتے ہیں، ’’۲۱ ستمبر کی رات ۸ بجے سے موسلا دھار بارش شروع ہوئی اور صبح ۱۰ بجے تک ہوتی رہی۔‘‘ گنیش بتاتے ہیں، ’’گاؤں سے کسی نے ہمیں آدھی رات کے بعد ڈیڑھ بجے فون کیا تو ہم اٹھے۔ سوال یہ تھا کہ اپنے بچوں کو بچائیں یا مویشیوں کو۔ اور ہم نے چار کو کھو دیا۔ دو بھینس اور دو جرسی گائے۔ سبھی دودھ دینے والے جانور تھے۔‘‘

پہلے دن کی بھاری بارش کے بعد ستیش تامبے اپنے والد سے فون پر بات کرنے کی کوشش کر رہے تھے۔ جب ۲۳ ستمبر، ۲۰۲۵ کو ہم ان کے گاؤں گئے تو انہوں نے ہمیں بتایا، ’’میں کئی دن سے ان سے رابطہ کرنے کی کوشش کر رہا ہوں۔ اب مجھے پتہ چلا کہ موبائل نیٹ ورک ٹاور بند ہو گیا تھا اور کسی سے رابطہ نہیں ہو پا رہا تھا۔‘‘ گاؤں کو مرکزی سڑک سے جوڑنے والا راستہ جزوی طور پر بہہ گیا تھا اور ایک دن تک کوئی بھی گاڑی نہیں نکل سکی۔ چنچ پور ڈھگے گاؤں کے تامبے ہمیں بتاتے ہیں، ’’دو دن تک بجلی بھی نہیں تھی۔‘‘

چنچ پور ڈھگے-والواڑ سڑک پڑوسی گاؤوں، بیلگاؤں، پمپل گاؤں، کارنڈی، بھوگل گاؤں، والواڑ، چُمبلی، سادے سانگوی اور گنے گاؤں کو جوڑنے والی واحد سڑک ہے۔ چنچ پور ڈھگے کے سرپنچ وشال سرجیراؤ ڈھگے کے مطابق، ’’دو دن کی بارش کے بعد سادے سانگوی پانی میں ڈوب گیا ہے۔ وہاں کوئی نہیں پہنچ سکتا۔ بیلگاؤں کی طرف جانے والا پل بہہ گیا ہے۔ کوئی وہاں بھی نہیں جا سکتا۔ تقریباً ۲۰۰-۲۵۰ خاندانوں کا دوسرے گاؤوں سے رابطہ ٹوٹ گیا ہے۔‘‘ ٹوٹے ہوئے پل پر کھڑے لوگوں کے گروپ کو ندی کے اِس پار کے لوگوں سے بات کرتے دیکھا جا سکتا ہے۔

مہارین پورٹل کے مطابق، اس سال یکم جون سے ۳۰ ستمبر، ۲۰۲۵ تک مراٹھواڑہ میں معمول کی ۵ء۶۷۹ ملی میٹر بارش کے مقابلے ۳ء۹۴۹ ملی میٹر بارش ہوئی۔ کئی تحصیلوں میں بارش مئی کے مہینہ میں شروع ہوئی، جس سے کھیتوں میں پانی بھر جانے کی وجہ سے بوائی کے موسم میں تاخیر ہو گئی۔ دھاراشیو ضلع میں اس مدت میں ۶۰۳ ملی میٹر بارش ہوتی ہے۔ مگر اس سال یہ ۷ء۹۷۴ ملی میٹر درج کی گئی، جو اوسط بارش سے ۵ء۱۶۱ فیصد زیادہ ہے۔ سب سے زیادہ بارش ستمبر کے مہینہ میں درج کی گئی۔

بھوم بلاک چنچ پور ڈھگے میں ہے، جہاں ستمبر میں ریکارڈ توڑ بارش ہوئی۔ بھوم میں ہر سال اوسطاً ۹ء۱۹۰ ملی میٹر بارش ہوتی ہے۔ سال ۲۰۲۴ میں یہ ۹ء۱۶۱ ملی میٹر تھی اور اس سال یہاں ۴ء۵۱۴ ملی میٹر بارش درج کی گئی، جو ستمبر ماہ کے اوسط سے ۸ء۳۲۰ فیصد زیادہ ہے۔

ڈھگے کہتے ہیں، ’’مندراچیا شکھرالا پانی لاگلا ہوتو [پانی مندر کے اوپر تک پہنچ گیا تھا]۔‘‘ ماروتی مندر کے سامنے برگد کے درخت کے نیچے کچھ لوگ جمع ہیں۔ وہ مندر کی دیوار اور مغرب کی طرف موجود آئی سی ڈی ایس سینٹر کی دیوار پر تقریباً ۱۰-۱۲ فٹ اونچے پانی کے نشان دکھاتے ہوئے کہتے ہیں، ’’ دو دن سے پانی اتنی اونچائی پر بہہ رہا تھا۔‘‘ سینٹر بند تھا، اس لیے ہم اندر ہوئے نقصان کو نہیں دیکھ سکے۔ لیکن بعد میں (۳۰ ستمبر کو) آئی سی ڈی ایس کارکن، جیویتا پاٹل نے ہمیں فون پر بتایا کہ سیلاب آنگن واڑی کا سارا سامان اور ریکارڈ بہا لے گیا۔ جیویتا تائی کہتی ہیں، ’’ریکارڈ رکھنے کے لیے ایک بھی رجسٹر نہیں بچا ہے۔ ٹفن باکس، پلیٹیں اور پیالے، سب کچھ چلا گیا۔‘‘

برگد کے درخت کے پاس ایک بینچ پر کستورا بائی چوہان بے پرواہ بیٹھی ہیں۔ کہتی ہیں، ’’میٹھ مرچیچا ڈبّہ سُدّھا گیلا واہون [ندی سب کچھ بہا لے گئی…یہاں تک کہ نمک، مسالے کا ڈبہ بھی]۔‘‘ جس ٹن شیڈ میں وہ اور ان کے شوہر رہتے ہیں، وہ پوری طرح بہہ گیا ہے۔ پیشہ سے لوہار اس بزرگ میاں بیوی نے اپنے تمام اوزار کھو دیے ہیں۔ ’’ہمارے سارے کپڑے، برتن اور کڑھائی سب تباہ ہو گئے۔ میرے پاس تین گرام سونا اور چار چاندی کی بچھیا تھی۔ بس اتنا ہی بچا۔‘‘ پچھلے دو دن سے کستورا بائی اور ان کے ۷۵ سالہ شوہر ایکناتھ چوہان لوگوں کے رحم و کرم پر ہیں۔ پڑوسی باری باری سے انہیں کھانا کھلا رہے ہیں۔ ان کی بیٹی اور ان کے شوہر الہیہ نگر (پہلے احمد نگر) سے مدد کے لیے آئے ہیں۔

ٹوٹے پھوٹے، ادھ کھلے دروازے والے ایک چھوٹے سے ٹن شیڈ میں ۷۵ سالہ شاہ جی باپو سانگلے کا ہیئر کٹنگ سیلون کا کام چل جاتا تھا۔ یہ عام سی جگہ گاد سے بھر گئی۔ لکڑی کی ایک ٹوٹی ہوئی کرسی کے علاوہ وہاں کچھ نہیں بچا ہے۔ سانگلے کہتے ہیں، ’’میرا گزارہ اسی کام سے ہوتا تھا۔‘‘ انہوں نے بتایا کہ اپنے دونوں بیٹوں کو دو دو ایکڑ زمین دینے کے بعد یہی ان کی آمدنی کا واحد ذریعہ بچا تھا۔

جیسے ہی ندی کا پانی گاؤں میں تیزی سے پھیلا اور اس کی گلیوں میں گھُسا، کئی ناگہانی حالات پیدا ہو گئے۔ درد زہ سے کراہتی ہوئی ایک عورت زچگی کے لیے سرکاری پرائمری ہیلتھ سب سینٹر پہنچی تو وہاں دروازے کے پاس ہی سڑک پر ایک بڑا سا گڑھا بن چکا تھا۔ ہیلتھ سینٹر کی اے این ایم، اے بی تھیٹے کو اس خاتون کو قریبی پرائمری ہیلتھ سینٹر لے جانا پڑا اور وہاں زچگی میں اس کی مدد کرنی پڑی۔ ’’بارش مسلسل ہو رہی تھی۔ ایسے میں ہمیں اس خاتون کو دوسری جگہ لے جانا پڑا، جس کی آج علی الصبح زچگی ہوئی تھی۔‘‘ انہوں نے بھوم میں اپنے سینئرز کو فون کیا اور آگے کی ہدایتوں کا انتظار کیا۔ کلینک تک پہنچنے کا کوئی اور راستہ نہیں ہے۔ سامنے کی سڑک بھی جزوی طور پر بہہ چکی ہے۔

بھوم اپنے دودھ اور ڈیری مصنوعات خاص کر کھوا (کھووے) کے لیے جانا جاتا ہے۔ چنچ پور اور گرد و نواح کے کئی گاؤں والے مویشی پالتے ہیں اور بھوم کے کلکشن سنٹرز میں دودھ بھیجتے ہیں۔ گاؤں کے ایک مشہور آدمی بابا صاحب کتورے کہتے ہیں، ’’پچھلے دو دنوں سے ہم دودھ نہیں پہنچا پا رہے ہیں۔‘‘ انہوں نے کہا، ’’چنچ پور میں ہماری چھ ڈیری ہے اور یہاں سے تقریباً ۵-۶ ہزار لیٹر دودھ اکٹھا کرکے بھوم بھیجا جاتا ہے۔ سیلاب نے مرکزی سڑک کو توڑ دیا ہے۔ دو دن سے گاؤں میں کوئی گاڑی نہیں آئی ہے۔‘‘ کئی کسان مویشی پالتے ہیں اور دودھ اور اس سے بنی مصنوعات سے اپنی آمدنی میں اضافہ کرتے ہیں۔

کتورے ہمیں بتاتے ہیں، ’’اس سیلاب میں ہمارے تقریباً ۲۰۰-۲۵۰ مویشی مر گئے ہوں گے۔ لیکن اس نے کسی کو بھی اتنا متاثر نہیں کیا، جتنا پمپل گاؤں کے اس ایک کسان کو۔‘‘ وہ وشوناتھ داتکھلے کا ذکر کر رہے ہیں۔ ندی نے اپنا راستہ بدل دیا اور سیلاب کے پانی نے ان کے پورے مویشی گھر کو ڈبو دیا، جس میں ۲۷ گائیں اور بچھڑے تھے۔ سبھی ستونوں سے بحفاظت بندھے ہوئے تھے۔ وہ نہیں بچ پائے۔ وہ بتاتے ہیں، ’’دکھ یہیں ختم نہیں ہوا۔ مردہ مویشی اگلے دن سیلاب میں بہہ گئے۔‘‘

کئی نوجوان کسان بھی ڈیری کاروبار میں اپنی قسمت آزما رہے تھے۔ امول ڈھگے نے اپنی چھ گائیں، ایک بھینس اور ایک بچھڑا کھویا۔ وہ بتاتے ہیں، ’’صرف جانور نہیں، میرے کڑبا (چارہ) کے ۲۰۰۰ ڈنٹھل، ۴۵ ہزار روپے کی کڑبا کُٹّی [چارہ کاٹنے کی] مشین اور دودھ نکالنے کی مشین بھی چلی گئی۔‘‘ نقصان لاکھوں میں ہوا ہے۔ وہاں جمع ہوئے کئی کسانوں نے ہمیں بتایا کہ کیسے انہوں نے اپنے مویشی کھوئے، کسی نے دو تو کسی نے چار جانور گنوا دیے۔

بکریاں اور بھیڑیں بھی ڈوب کر بہہ گئیں۔ شندے کہتے ہیں، ’’میں اپنی بیوی کے ساتھ اپنے کھیت پر گیا اور دیکھا کہ سب کچھ بہہ گیا تھا۔ چھپّر تو بہا ہی، بکریوں کا بھی نام و نشان تک نہیں تھا۔ مجھے دور سے چھت کے کچھ ٹن دکھائی دے رہے تھے۔ ہمیں ندی سے کبھی کوئی پریشانی نہیں ہوتی تھی۔ لیکن اس سال ’کھوری تلا تال‘ پھٹ گیا اور سیلاب آ گیا۔ تیز بہتا پانی راستے میں آنے والی ہر چیز کو بہا لے گیا۔‘‘ ان کا اشارہ ندی کے اوپر کی جانب بنے ایک چھوٹے سینچائی ٹینک کی طرف ہے، جو تقریباً ۱۰ سال پہلے بنایا گیا تھا۔

کئی کسانوں نے کڑی محنت کی تھی اور پیسے بچا کر باغبانی میں قسمت آزمائی تھی۔ انگور کے باغ، انار اور بہترین امرود کے باغوں سے اچھی کمائی ہوتی تھی۔ نقصان بہت بڑا ہے۔ شری رام ڈھگے کا ۱۵ ایکڑ کا انگور کا باغ تھا۔ ڈھگے کہتے ہیں، ’’یہ پوری طرح بہہ گیا ہے۔ دھات کا ڈھانچہ سیمنٹ کی بنیاد کے ساتھ اکھڑ گیا ہے۔‘‘

سُہاس گنیش ڈھگے اور ان کے چھوٹے بھائی کیشو اسی قسم کی کھیتی کرتے تھے۔ والد کے انتقال کے بعد سہاس ہی ان کے کھیت کی دیکھ بھال کر رہے تھے۔ ’’ان کا پورا امرود کا باغ برباد ہو گیا ہے۔ آنے والے ہفتہ میں بازار کے لیے پھلوں سے لدے تقریباً ۱۰۰۰ درخت تیار تھے۔ سیلاب نے سب کچھ تہ و بالا کر دیا ہے۔‘‘ ہم سے یہ باتیں شیئر کرنا لوگوں کے لیے کافی تکلیف دہ تھا۔

اسی کے ساتھ سہاس کی دو ایکڑ سویابین کی فصل اور اناج کے درختوں کا ایک چھوٹا سا ٹکڑا بھی تباہ ہو گیا ہے۔ سیلاب میں ان کا چھوٹا ٹریکٹر اور بجلی ٹرانسفر بھی بہہ گیا۔

ہم سہاس سے نہیں مل سکے۔ کیوں؟ وہ نوجوان سولاپور کے ایک اسپتال میں زندگی اور موت کی جنگ لڑ رہا ہے۔ کتورے بتاتے ہیں، ’’تین ہفتے پہلے اسے سانپ نے کاٹ لیا۔ مقامی کلینکوں میں کچھ کام نہیں آیا، اس لیے اسے وہاں داخل کرایا گیا۔ اس کا پانچ بار ڈائلیسس ہو چکا ہے۔ ہمیں ابھی تک اسے سیلاب کے بارے میں بتانا باقی ہے۔‘‘ کیشو کا اُداس چہرہ اور دھنسی ہوئی آنکھیں صدمہ اور تکلیف کو بیان کرنے کے لیے کافی تھیں۔

کھیتوں اور کھڑی فصل کے ساتھ ہی پینل والے ۱۰۰ سے زیادہ سولر پمپ بھی بہہ گئے۔ پانی بچانے کے لیے استعمال کیے جانے والے ڈرپ اور اسپرنکلر سیٹ بھی طغیانی ندی بہا لے گئی اور اب سبھی کنوؤں میں سیلاب سے آئی گاد اور جھاڑیاں بھری ہیں۔

لیکن ایسی تباہی صرف بارش نے ہی نہیں مچائی۔

بان گنگا ندی کے اوپری حصہ میں تین چھوٹے سینچائی تالاب ہیں۔ سورج ڈھگے بتاتے ہیں، ’’وارے وڈگاؤں، سابلے واڑی اور برودواڑی میں تینوں تالاب ٹوٹ گئے اور سارا پانی ندی میں چلا گیا۔ اس کے ساتھ ہی لگاتار بارش ہوئی۔ پھر ۲۱ تاریخ کی صبح پانی بڑھنا شروع ہوا اور ۲۳ [ستمبر] کی صبح ہی کم ہوا۔‘‘ چنچ پور روڈ کے مشرق جانب ایک کیٹی [کولہاپور ٹائپ] باندھ ہے۔ ’’گرمیوں میں گیٹ نہیں کھولے گئے تھے۔ سیلاب کا پانی اپنے ساتھ پیڑ، جھاڑیاں اور دوسرا کچرا لے آیا۔ اس وجہ سے نالا جام ہو گیا۔‘‘ ندی نے اپنا نیا راستہ ڈھونڈ لیا اور کھیتوں اور گاؤں میں گھس گئی۔ قدرتی راستہ مرکزی گاؤں سے تقریباً ۵۰۰ میٹر دور ہے۔

لوگ سمجھدار ہیں اور اس قسم کی تباہی کے اسباب کا پتہ لگا پاتے ہیں۔

سوریہ کانت مورے کے بھائی سمجھاتے ہیں، ’’اگر آپ مجھ سے پوچھیں تو ۱۹۸۰ کی دہائی تک ندی کے کنارے تمام زمینیں بنجر تھیں۔ انھیں چراگاہوں کے لیے محفوظ رکھا گیا تھا۔ اب ان پر کھیتی ہو رہی ہے۔ ندی کے کناروں پر غیر قانونی قبضہ ہو چکا ہے۔‘‘

اس سیلاب کے بارے میں عورتوں کا کیا کہنا ہے؟

وہ ہمیں بتاتی ہیں، ’’تائی، ہمارا گاؤں گوشا کے مطابق چلتا ہے۔‘‘

گوشا ایسی رسم ہے جس میں ’اونچی‘ ذات کے ہندو خاندانوں کی عورتیں باہری لوگوں، خاص کر مردوں سے میل جول نہیں رکھتیں۔ مراٹھواڑہ کے کئی گاؤوں میں آج بھی اس پر عمل ہوتا ہے۔ عورتوں کو ساڑی سے اپنا سر ڈھکنا پڑتا ہے اور کوئی بھی ان کے چہرے نہیں دیکھ سکتا۔

دو مردوں نے فخر سے بتایا، ’’ہم سب ایک ہی خاندان کے ہیں۔ جب مرد بات کر رہے ہوتے ہیں تو ہماری عورتیں گھر سے باہر نہیں نکلتیں۔‘‘

ندی نے سب کچھ بہا دیا۔ لیکن کیا واقعی ایسا ہوا؟ صدیوں پرانی پابندیاں آج بھی برقرار ہیں۔

پس نوشت:

ضلع کلکٹر نے ۳ اکتوبر، ۲۰۲۵ کو اطلاع دی کہ دھاراشیو ضلع کے سبھی ۴۲ علاقوں میں کافی بارش ہوئی ہے اور تقریباً ۴ لاکھ ۴۹ ہزار ۶۸۹ ہیکٹیئر زرعی زمین کو نقصان پہنچا ہے، جس میں سے ۸۰۰۰ ہیکٹیئر پوری طرح بہہ گئی ہے۔ تقریباً ۲۲۱ سڑکیں، ۱۴۶ رساؤ ٹینک اور ۱۹ دوسرے پانی کے ٹینک ٹوٹ پھوٹ گئے ہیں۔ بارش اور سیلاب میں ۷۰-۸۰ فیصد سرکاری اسکولوں کو نقصان پہنچا ہے۔

ترجمہ نگار: قمر صدیقی