नदिया सब्बो बोहाके लेगे

“रतिहा मं बादर फटिस अऊ सब्बो कुछु बोहागे...खुदेच देख लेवव. सब्बो कुछु बोहागे. हमर घर अऊ चार ठन मवेसी चले गे. सब्बो कुछु...” श्रीकवल भारत मोरे हमन ला टीना के भिथि अऊ छानी वाले अपन घर के तीर-तखार ला दिखावत कहत हवंय. “पानी कनिहा तक ले रहिस. हमर बेटा ह नरियाके हमन ला जगाइस त हमन बांच गेन. फेर वो पानी,” वो ह आगू बतावत जाथे.

मोरे मावशी (मौसी) ह घर के लोहा के रेक मं जेन कुछु बचे पाइस वोला संकेल लीस. घर के भुईंय्या बोहागे अऊ रेती भरागे अऊ ऊबड़-खाबड़ होगे हवय.

21 सितंबर, 2025 मं धाराशिव (पहिली उस्मानाबाद) के भूम ब्लॉक के चिंचपुर ढगे मं झड़ी लगे रहिस. ये गाँव गोदावरी के सहायक नदी बाणगंगा के पार मं बसे हवय. दूसर दिन, 22 सितंबर मं घलो रात भर घलो झड़ी धरे रहिस. गाँव पानी मं बूड़गे. लोगन मन ये जलप्रलय ला अइसने बताथें, “हमन अपन सरी जिनगी मं अइसने कभू देखे नइ रहेन.”

सूर्यकांत मोरे हमन ला नदिया दिखाथें, पार के सब्बो खेत बोहागे हवंय, ओकर एक-एक एकड़ के अंगूर के दू ठन बगीचा घलो. मोरे कहिथे, “हमन अपन मवेसी मन ला बखत रहते बचा लेन. वो मन घेंच तक ले पानी मं बूड़े रहिन. मंय वो मन ला ढील देंय अऊ वो मन बांच गीन. फेर टीना के छानी मं जेन कुछु रखाय रहिस, सब्बो फीलगे. जवार, मूंग, उरीद अऊ मूंगफली के बोरी मन सब्बो कुछु. कड़वा, जवार धन जोंधरा के चारा, सब्बो बोहागे.”

मोरे ह डेढ़ एकड़ मं गोंदली लगाय रहिस. अब जम्मो खेत मं सिरिफ पथरा अऊ बजरी हवय. उपर के रसहा माटी समेत सब्बो गोंदली थरहा पानी के तेज धार मं बोहागे.

मेन रोड के डेरी कोती के खेत साथ बछर के सियान सिद्धेश्वर भगवान ढगे के आय. वो ह इहीच खेत मं रहिथे. वो ह कहिथे, “पानी के धार अतक तेज रहिस के रुख मन जरी ले उखड़ के मोर अंगूर के बगीचा मं गिर गीस. जम्मो ढांचा टूट गे हवय.” बगीचा मं 1995 ठन रुख लगाय गे रहिस. हमन उरीद लुये रहेन. वो ह घलो बोहागे.”

21 अऊ 22 सितंबर सरलग दूनों रतिहा ये इलाका मं झड़ी धरे रहिस. गणेश मोरे कहिथे, “21 सितंबर के रात 8 बजे ले झड़ी सुरु होइस अऊ बिहनिया 10 बजे तक ले बरसत रहय. गाँव के कोनो मइनखे ह हमन ला आधा रात पहाय के बाद डेढ़ बजे फोन करिस, त हमन जाग गेन. सवाल ये रहिस के अपन लोग-लइका मन ला बचाव धन मवेसी मन ला. अऊ हमर चार परानी बोहा गे. दू ठन भंइसी अऊ दू ठन जर्सी गाय. ये सब्बो दूधारू रहिन.”

पहिलीच दिन भारी झड़ी के बाद सतीश तांबे अपन ददा ले फोन मं बात करे के कोसिस करत रहिस. 23 सितंबर, 2025 के दिन हमन जब गाँव गे रहेन, त वो ह हमन ला बताइस, “मंय कतको दिन ले ओकर ले बात करे के कोसिस करत हवं. अब मोला पता चलिस के मोबाइल टावर बंद होगे रहिस अऊ कोनो ले बात नइ हो पावत रहिस.” मेन रोड तक जवेइय्या गाँव के रोड के कुछु हिसा बोहागे रहिस अऊ दिन भर कोनो गाड़ी निकरे नइ सकिस. चिंचपुर ढगे गाँव के तांबे बताथें, “दू दिन तक ले बिजली घलो नइ रहिस.”

चिंचपुर ढगे -वालवाड़ रोड परोस के गाँव – बेलगांव, पिंपलगांव, कारंडी, भोगलगांव, वालवाड़, सुंबली, साड़े सांगवी अऊ गनेगांव – ला जोड़ेइय्या एकेच रोड आय. चिंचपुर ढगे के सरपंच विशाल सरजेराव ढगे के मुताबिक, “ दू दिन के झड़ी के बाद, सादे सांगवी पानी मं बूड़गे, उहाँ कोनो घलो हबरे नइ सकय. बेलगाँव डहर जवेइय्या पुल बोहागे. कोनो घलो इहाँ जाय नइ सकय. करीबन 200-250 परिवार के आने गाँव ले संपर्क टूट गे हवय.” टूटे पुल उपर ठाढ़े लोगन मन के एक ठन टोली नदिया के ये पार ले लोगन मन ले गोठियावत देखे जा सकत रहिस.

महारेन पोर्टल के मुताबिक, ये बछर -1 जून ले 30 सितंबर, 2025 तक- मराठवाड़ा मं सामान्य 679.5 मिमी बारिस के बनिस्बत 949.3 मिमी बारिस होइस. कतको तहसील मं, बारिस मई के महीनाच मं सुरु होगे रहिस, जेकर ले खेत मं पानी भरे सेती खेती किसानी घलो ढेरियाके होइस. धाराशिव जिला मं ये बखत मं 603 मिमी बारिस होथे. फेर ये बछर ये ह 974.7 मिमी दरज करे गीस –जेन ह अऊसत ले 161.5 फीसदी जियादा हवय. सबले जियादा बरसा सितंबर महीना मं दरज करे गीस.

चिंचपुर ढगे के भूम ब्लॉक मं सितंबर मं रिकॉर्ड तोड़ बारिस होय हवय. भूम मं हरेक बछर अऊसतन 190.9 मिमी बारिस होथे. साल 2024 मं ये ह 161.9 मिमी रहिस अऊ ये बछर 514.4 मिमी बारिस दरज करे गीस, जेन ह सितंबर महीना के अऊसत ले 320.8 फीसदी जियादा हवय.

“मंदिरच्या शिखराला पाणि लागलो होतो. [पानी मंदिर के उपर तक हबर गे]” ढगे कहिथे. मारुति मंदिर के आगू बरगद रुख तरी कुछु लोगन मन संकलाय रहिन. “ दू दिन तक ले, पानी अतक उपर बोहावत रहय,” वो ह मन्दिर के भिथि अऊ बूड़ति मं आईसीडीएस सेंटर के पानी के चिन्हा ला दिखावत कहिथे – करीबन 11-12 फीट ऊंच. सेंटर बंद रहिस ते पायके हमन भीतरी के नुकसान ला देखे नइ सकेन. फेर बाद मं (30 सितंबर) के आईसीडीएस कार्यकर्ता, जीविता पटेल ह हमन ला फोन मं बताइस के पुर के पानी आंगनबाड़ी के सब्बो सामान अऊ कागजात ला बोहा ले गीस. जीविता ताई कहिथे, “रिकार्ड रखे बर एके ठन घलो रजिस्टर नइ बांचिस. टिफिन डब्बा, प्लेट अऊ कटोरा मन ... सब्बो चले गीस.”

बरगद के रुख तीर एक ठन बेंच मं कस्तूराबाई चव्हाण कलेचुप बइठे रहिस. “मीठ मिरची सा डब्बा शुद्धागेलावा (नदिया सब्बो कुछु बोहा लेगे... इहाँ तक के नून-मसाला के डब्बा घलो),” वो ह कहिथे.जेन टीना के घर मं वो अपन घरवाला संग रहिथे, वो ह पूरा बोहागे. लोहार के काम करेइय्या, ये डोकरा सियान जोड़ा के सब्बो अउजार घलो बोहागे. “हमर जम्मो कपड़ा-लत्ता, बरतन भाड़ा सब्बो बोहागे. मोर करा तीन ग्राम सोन अऊ चांदी के चार ठन बिछिया रहिस. बस अतकाच मोर करा रहिस.” बीते दू दिन ले कस्तूराबाई अऊ 75 बछर के सियान ओकर घरवाला, एकनाथ चव्हाण लोगन के दया के भरोसे हवंय. परोसी मन पारी पारी ले वो मन ला खवावत हवंय. ओकर बेटी अऊ दमान अहिल्यानगर (पहिली अहमदनगर) ले मदद करे बर आय हवंय.

75 बछर के शाहजी बापू सांगले ह टूटे, आधे खुला फेरका वाले एक ठन नान कन टीना के कुरिया मं सेलून लगावत रहिस. ये जगा ह गाद ले भरागे रहिस. एक ठन टूटे लकरी के कुर्सी के छोड़ कुछु नइ बांचिस. सांगले कहिथे, “मोर गुजारा इहीच काम ले चलत रहिस.” वो ह बताथे के अपन दूनों बेटा मन ला दू-दू एकड़ खेत दे के बाद, इहीच ओकर आमदनी के जरिया रहिस.

जइसनेच नदिया के पानी गाँव मं तेजी ले खुसरिस अऊ गली मन मं भरगे, कतको आपत हालत बनगे. जचकी के पीरा झेलत एक झिन माइलोगन ह सरकारी अस्पताल (प्राथमिक स्वास्थ्य उपकेंद्र) गीस, त मुहटा के तिरेच मं रोड मं एक ठन बड़े खंचवा होगे. अस्पताल के एएनएम सुश्री ए बी थिटे ला लकठा के सरकारी अस्पताल मं ले जाके जचकी मं मदद करे ला परिस. “झड़ी लगे रहय.अइसने मं, हमन ला वो माइलोगन ला आने जगा ले जाय ला परिस, जेन ह बिहनिया ले जचकी के पीरा झेलत रहिस.” वो ह भूम मं अपन उपर के करमचारी मन ला फोन करिस अऊ वो मन के निर्देस ला अगोरत रहय. अस्पताल तक जाय बर कोनो दीगर रद्दा नइ ये. आगू के रोड के घलो थोकन हिस्सा बोहागे रहिस.

भूम दूध अऊ ओकर ले बने जिनिस, खासकरके खवा (खोवा) सेती जाने जाथे. चिंचपुर अऊ तीर-तखार के गाँव के कतको लोगन मन पशुपालन करथें अऊ भूम के सोसयटी (संग्रह केंद्र) मं दूध देथें. गाँव के एक झिन बड़े सियान, बाबासाहेब कतुरे कहिथे, “बीते दू दिन ले हमन दूध लेके जाय नइ सकत हवन.” वो ह बताथे के “चिंचपुर में हमर छै ठन गोशाला हवंय अऊ इहाँ करीबन 5,000 ले 6,000 लीटर दूध संकेलके भूम ले जाय जाथे. पुर ले मेन रोड ह बोहागे हवय. दू दिन ले गाँव मं कोनो गाड़ी नइ आय हवय.” कतको किसान पशुपालन करथें अऊ दूध अऊ ओकर ले बने जिनिस ले थोकन अऊ कमा लेथें.

कतुरे हमन ला बताथे, “ये पुर मं हमर करीबन 200 ले 250 मवेसी मारे गे हवंय. फेर कोनो दीगर उपर अतक खराब असर नइ परिस जतक पिंपलगाँव के ये किसान उपर परिस.” वो ह विश्वनाथ दतखिले के बात करत हवंय. नदिया अपन रद्दा छोड़ दीस अऊ पुर के पानी मं ओकर जम्मो गोशाला बूड़गे, जेन मं 27 ठन गाय अऊ बछरू रहिन, ये सब्बो खंभा मं बंधाय रहिन. वो मन बचे नइ सकिन. वो ह कहिथे, “दुख इहींचे नइ सिरावय. मरे मवेसी मन दूसर दिन पुर मं बोहागे.”

नवा पीढ़ी के कतको किसान घलो डेयरी के कारोबार मं अपन किस्मत अजमावत रहिन. अमोल ढगे ह अपन छै ठन गाय, एक ठन भंइसी अऊ एक ठन बछरू गंवा दीस. “सिरिफ मवेसी नइ, मंय कड़बा (चारा) के 2000 डंठल, 45,000 रूपिया के कड़बा कुट्टी (चारा काटे) के मसीन अऊ गोरस दुहे के मसीन घलो बोहागे.” नुकसान लाखों मं होय हवय. उहाँ जुरे कतको किसान मन हमन ला बताइन के कइसने वो मन के मवेसी गंवा गीन, ककरो दू ठन त ककरो चार.

छेरी अऊ भेड़ी/ मेढ़ा घलो बूड़ गीन अऊ बोहा गीन. भैरवनाथ शिंदे बताथे के काय होय रहिस. “ मंय अपन मंगलनिन संग अपन खेत गे रहेंय अऊ देखेंय के सब्बो कुछु बोहागे रहिस. छानी बोहा गे, छेरी मन के चिन्हा तक ले नइ. मोला दूरिहा ले छानी के टीना दिखत रहिस,” शिंदे कहिथे. “हमन ला नदिया ले कभू कोनो तकलीफ नइ होइस, फेर ये बछर ‘खोरीतला ताला’ फूटगे अऊ पुर आगीस. तेज पानी ह रद्दा मं अवेइय्या सब्बो जिनिस ला बोहाके लेगे.” वो ह नदिया का उपर डहर बने के ठन छोटे बाँध ला बतावत रहिस जेन ला 10 बछर पहिली बनाय गे रहिस.

कतको किसान मन भारी मिहनत करे रहिन अऊ बागवानी मं पइसा लगाके अपन किस्मत अजमाय रहिन. अंगूर के बगीचा, अनार अऊ बढ़िया किसिम के जाम के बगीचा ले बढ़िया आमदनी होय रहिस. नुकसान घलो बनेच बड़े हवय. श्रीराम ढगे के 15 एकड़ के अंगूर के बगीचा रहिस. ढगे कहिथे, “वो जम्मो बोहागे. लोहा-सीमेंट ले बने के ढांचा नींव के संग उखड़गे.”

सुहास गणेश ढगे अऊ ओकर छोटे भाई केशव अइसने खेती करत रहिस. अपन ददा के गुजर जाय के बाद, सुहास ह ओकर खेत के देखरेख करत रहिस. “वो मन के जाम के जम्मो बगीचा बरबाद होगे हवय. अवेइय्या हफ्ता मं 1,000 रुख मं फरे फर बजार मं बेचे टोरे लइक होगे रहिस. पुर ह सब्बो ला बरबाद कर दे हवय.” लोगन मन ला ये बात बताय भारी दुखभरे आय.

येकरे संगे संग, सुहास के दू एकड़ मं लगे सोयाबीन के फसल अऊ अनार के रुख मन के कुछु हिस्सा घलो खराब होगे हवय. पुर ह वो मन के छोटे ट्रेक्टर अऊ बिजली के ट्रांसफार्मर ला घलो बोहाके ले गीस.

हमन सुहास ले मिले नइ सकेन. काबर? वो जवान लइका सोलापुर में एक ठन अस्पताल मं जिनगी अऊ मऊत ले जूझत हवय. “तीन हफ्ता पहिली वोला सांप काट ले रहिस. इहाँ के क्लिनिक मन के इलाज काम नइ आइस, ते पायके वोला इहींचे भर्ती कराय गीस. ओकर पाच पईंत डायलिसिस हो चुके हवय,” कतुरे बताथे. “हमन अब तक ले वोला ये पुर के बारे मं बताय नइ अन.” केसव के अइलाय चेहरा अऊ भीतर धंसे आंखी सदमा अऊ सदमा ला बताय बर काफी रहिस.

खेत अऊ खड़े फसल के संगे संग, पैनल वाले 100 ले जियादा सोलर पंप घलो बोहागे. छींचके पानी बचाय के काम अवेइय्या ड्रिप अऊ स्प्रिंकलर सेट घलो उफनत नदिया मं बोहागे. अऊ अब सब्बो चुंवा पुर के संग आय गाद अऊ झाड़-झंखाड़ ले भरगे हवय.

फेर सिरफ़ बरसाच ह अतक तबाही नइ मचाय हवय.

बाणगंगा नदिया के ऊपरी इलाका मं तीन ठन छोटे बांध बने हवय. सूरज ढगे बताथे, “वारे वडगाँव, साबलेवाड़ी अऊ बुरुदवाड़ी मं तीनों बांध फूट गे अऊ सब्बो पानी नदिया मं बोहागे. येकरे संगे संग झड़ी धरे रहिस.” वो ह आगू बतावत जाथे, “21 तारीख के बिहनिया पानी चढ़े सुरु होइस अऊ 23 सितंबर के बिहनियच उतरिस.” चिंचपुर रोड के उत्ती मं एक ठन केटी (कोल्हापुर टाइप) वीयर (कम ऊंच के बांध) हवय. “घाम मं गेट खोले नइ गे रहिस. पुर के पानी अपन संग रुख-रई, डारा-पाना अऊ दीगर कचरा बोआके ले आइस. ते पायके ओकर निकरे के रद्दा ह बंद होगे.” नदिया ह अपन नवा रद्दा बना लिस अऊ खेत अऊ गाँव मं खुसरगे. ओकर बोहाय के जगा ह गाँव ले करीबन 500 मीटर दूरिहा हवय.

लोगन मन हुसियार हवंय अऊ अइसने तबाही के कारन ला पता लगा लेथें.

सूर्यकांत मोरे के भाई हमन ला बतातें, “गर तुमन मोला पूछहू, त 1980 के दसक तक नदिया के पर के सब्बो जमीन बंजर रहिस. येला चरी चरागान बर रखे गे रहिस. अब इहाँ खेती होवत हवय. नदिया के कछार मं बेजा कब्जा होवत हवय.”

ये पुर ला लेके माइलोगन मन के काय कहना आय?

वो मन हमन ला बताइन, “ताई, हमर गाँव ह गोशा ला मानथे.”

गोशा एक ठन अइसने प्रथा आय, जेन मं ‘ऊंच’ जात के हिंदू घर के माईलोगन मन बहिर के लोगन मन, खासकरके मरद लोगन मन ले मेलजोल नइ राखंय. मराठवाड़ा के कतको गाँव मन मं आज घलो येला माने जाथे. माइलोगन मन ला अपन लुगरा ले मुड़ ढंके ला परथे, अऊ कोनो घलो ओकर चेहरा देखे नइ सकय.

“हमन सब्बो एकेच परिवार के आन. जब मरद लोगन मन गोठियावत होथें, त हमर घर के माईलोगन मन घर ले बहिर नइ निकरेंय,” दू झिन मनखे गरब ले हँसी-ठिठोली करथें.

नदिया ह सब्बो कुछु बोहा लेगे. फेर काय सिरतोन अइसने होइस? सदियों जुन्ना लगे रोक अब ले घलो जस के तस हवंय.

एक पईंत अऊ:

जिला कलेक्टर दफ्तर ह 3 अक्टूबर, 2025 के बताइस के धाराशिव जिला के सब्बो 42 सर्किल मं भारी बरसा होय हवय अऊ करीबन 4,49,689 हेक्टेयर खेती ला नुकसान पहुँचे हवय, जेन मं 8,000 हेक्टेयर पूरा बोहागे. करीबन 221 ठन रोड, 146 बांध अऊ 19 ठन आने तरिया घलो फूटे हवंय: बरसा अऊ पुर मं 70-80 फीसदी सरकारी स्कूल ला नुकसान पहुंचे हवय.

अनुवाद: निर्मल कुमार साहू