चिंचपुर ढगे: नदी सब बहा ले गईल

“रात में बरखा एतना तेज बरसुवे कि सब कुछ बहि गईल...अपने देख लिहीं. सब कुछ बहि गईल बा. हमनी के घर आ चार गो मवेशी चलि गईल. कुल चलि गईल...” श्रीकवल भारत मोरे आपन टीन वाला घर घुमा-घुमा के देखावत कहेली. “पानी हमनी के कमर ले रहुवे. बेटा फोन कईलस आ हमनी के जगा दिहलस, एसे हमनी के बच गईल बानी जा. बाकिर का खतरनाक पानी रहुवे,” उ आगे कहेली.

मोरे मौसी जवन कुछ बचा सकत रहली ओके उ घर में टीन के अलमारी पर सइहार देली. घर के माटी के फर्श बह गइल. अब बस बालू-माटी आ उबड़-खाबड़ जमीन बचल बा.

धाराशिव (पहले ओस्मानाबाद) के भूम ब्लाक के चिंचपुर ढगे में 21 सितम्बर 2025 के तूफानी बारिश भईल. ई गांव गोदावरी के सहायक नदी बाणगंगा के किनारे बा. अगिला दिन, 22 सितम्बर के भी रात भर जबरदस्त पानी बरसल. गांव डूब गईल. लोग ए प्रलय के वर्णन करत के कहता, “पूरा जीवन में अइसन चीज कब्बो ना देखनी.”

सूर्यकांत मोरे एगो नदी देखा रहल बाड़ें. उहंवा किनारे के खेत कुल बह गईल बा. एह में उनकर दू एकड़ के अंगूर के बगईचा भी रहे. “हमनी के आपन जानवरन के समय रहते बचा लिहनी जा. उ पानी में गर्दन ले डूबल रहलें सन. हम उन्हनी के छोड़ दिहनी आ उ बच गईलें सन,” मोरे कहेलन. “बाकिर टीन के झोपड़ी में जवन कुछ भी रखल रहे उ भीज गईल. ज्वार, मूंग, उड़िद आ मूंगफली, सब कुछ. कुल कड़बा, मक्का या ज्वार के रूप में कुल चारा बह गईल.”

मोरे डेढ़ एकड़ में पियाज बोवले रहलें. अब खेत में खाली पत्थर आ चट्टान बचल बा. पियाज के कुल पौधा आ उपजाऊ माटी के ऊपरी हिस्सा तेज बहाव वाला पानी में बहि गईल.

मेन रोड के बायां ओर के खेत बुजुर्ग सिद्धेश्वर भगवान ढगे के हवे जे उमिर के साठवां फेंटा में बाड़ें. उ खेत पर रहल करें. “पानी के बहाव एतना जोर रहे कि उ हमरी अंगूर के बगईचा में लागल पेड़ उखाड़ दिहलस. पूरा ढांचा टूट गईल बा,” उ कहेलन. अंगूर के ई बगईचा 1995 में लगावल गईल रहे. “हमनी के उड़िद के फसल कटले रहनी. उहो बहि गईल.”

इलाका में 21 आ 22 सितम्बर के लगातार दू रात भारी बरखा भइल. “21 सितम्बर के रात आठ बजे से बरखा चालू भईल आ सबेरे 10 बजे ले बरसत रहल,” गणेश मोरे कहलें. “राती के डेढ़ बजे हमनी के गांव से केहू फोन करुवे एसे हमनी के जाग गईनी जा. सवाल ई रहे कि अपनी बच्चन के बचावल जाए कि पालतू जानवरन के. बाढ़ में चार गो जानवरन, दू गो भैंस आ दू गो जरसी गाय जियान हो गइल. चारों दूध देवे वाला मवेशी रहलें सन.”

पहिला दिन भारी बरखा के बाद सतीश ताम्बे अपनी पिता के फोन करे के कोशिश करत रहलें. “हम कई दिन से उनका से बात करे के कोशिश कर रहल बानी,” उ हमनी के 23 सितम्बर के गांव में दौरा करत समय बतवलें. “अब हमके पता लागल ह कि मोबाइल नेटवर्क टावर बंद हो गईल रहे आ केहू से संपर्क ना कईल जा सकल.” गांव के मुख्य सड़क से जोड़े वाली सड़क के कुछ हिस्सा ध्वस्त हो गईल रहे आ एक दिन ले कवनो वाहन बाहर ना आ पवलस. दू दिन ले बिजली भी ना रहल,” चिंचपुर ढगे गांव के ताम्बे बतवलें.

चिंचपुर ढगे-वालवड़ सड़क एकमात्र सड़क हवे जवन पड़ोसी गांवन बेलगांव, पिम्पलगांव, कारंडी, भोगलगांव, वालवड़, सुम्बली, साड़े सांगवी आ गणेगांव के जोड़ेला. चिंचपुर ढगे के सरपंच विशाल सरजेराव ढगे के अनुसार, “दू दिन के बरखा के बाद साड़े सांगवी पानी में डूब गइल, केहू ओइजा पहुंच ना सकल. लगभग 200-250 परिवारन के दोसर गांवन से संपर्क टूट गईल.” लोगन के एगो समूह टूटल पुल पर नदी के ए तरफ खड़ा लोगन से बतियावत देखल जा सकेला.

महारेन पोर्टल देखा रहल बा कि ए साल 1 जून से 30 सितम्बर 2025 ले मराठवाड़ा में सामान्य यानि 679.5 मिलीमीटर के तुलना में 949.3 मिलीमीटर बरखा भईल. कई तहसीलन में बरखा मई के महीना में शुरू भईल रहे जेसे बोआई में देरी भईल काहें कि खेतन में पानी लाग गईल रहे. धाराशिव जिला में ए अवधि में 603 मिलीमीटर बरखा होला. बाकिर ए साल ई औसत बरखा से 161.5 प्रतिशत अधिका 974.7 मिलीमीटर दर्ज कईल गईल. सबसे अधिक बरखा सितम्बर में दर्ज कईल गईल.

चिंचपुर ढगे वाला भूम ब्लाक में सितम्बर में रिकॉर्डतोड़ बरखा भईल. इहां हर साल औसतन 190.9 मिलीमीटर बरखा होला. 2024 में 161.9 मिलीमीटर रहे आ ए साल, इहां 514.4 मिलीमीटर बरखा रिकॉर्ड कईल गईल बा. ई सितम्बर महीना के औसत से 320.8 प्रतिशत अधिका बा.

“मंदिराच्या शिखरला पानी लागला होता (पानी मंदिर के शिखर ले पहुंच गईल रहे),” ढगे कहेलन. बरगद के पेड़ के नीचे मारुती मंदिर के सामने कुछ लोग इकठ्ठा हो गईलें. “दू दिन ले पानी हे ऊंचाई ले बहत रहे,” उ बतावेलन आ मंदिर के दीवार आ पश्चिम में स्थित आईसीडीएस केंद्र के दीवार पर पानी के निशान देखावेलन जवन लगभग 11-12 फीट उंच बा. केंद्र बंद रहे एसे हमनी के अंदर के नुकसान ना देख पवनी जा. बाकिर बाद में (30 सितम्बर के) आईसीडीएस के कर्मचारी जीविता पाटिल हमनी के फोन पर बतवली कि आंगनवाड़ी में मौजूद कुल सामान आ रिकॉर्ड बहि गईल बा. “रिकॉर्ड रखे खातिर एकहू रजिस्टर तक नईखे बाचल. टिफिन बॉक्स, प्लेट आ कटोरा...सब कुछ चल गईल,” जीविता ताई कहेली.

बरगद के पेड़ के पास एगो बेंच पर कस्तूराबाई चव्हाण सुस्तात के बईठल रहली. “मीठ मिराचिचा डब्बा सुद्धा गेला वाहून. नदी कुल ले के चल गईल... नमक मसाला के डिब्बा तक,” उ कहेली. टिन के झोपड़ी जेमे उ आ उनकर आदमी रहेला, पूरी तरह से बहि गईल बा. पेशे से लोहार ई वृद्ध दंपत्ति आपन कुल औजारन से हाथ धो चुकल बा. “हमनी के कुल कपड़ा, बरतन आ कढ़ाही सब चल गइल. हमरी लगे तीन ग्राम सोना आ चांदी चार गो के बिछिया रहे. बस इहे हमार कुल संपत्ति रहे.” पिछला दू दिन से कस्तूराबाई आ उनकर आदमी एकनाथ चव्हाण (75) लोगन के कृपा पर निर्भर बाड़ें. पड़ोसी उनके बारी-बारी से खाना दे रहल बाड़ें सन. उनकर बेटी आ ओकर आदमी अहिल्यानगर (पहले अहमदनगर) से उनकर साथ देवे आईल बाड़ें.

एगो छोट टिन के शेड जेकर दरवाजा टूटल आ आधा खुलल रहे, उ शाहजी बापू सांगले (75) के हेयर कटिंग सैलून रहे. ई पूरा माटी से भर गईल रहे. एगो टूटल लकड़ी के कुर्सी के अलावा एइजा कुछु नईखे बाचल. “हम ए काम से आपन जीवन चलावत रहीं,” सांगले कहेलन. उ बतावेलन कि अपनी दूनो बेटन के दू एकड़ खेत दे दिहला के बाद इहे सैलून उनकी आमदनी के एकमात्र जरिया बाचल रहल ह.

जईसहीं नदी के पानी गांव में घुसल आ छोट-छोट गलियन में फईले लागल, कई गो संकट खड़ा हो गईल. एगो मेहरारू के जचगी के दर्द उठ गईल. उनका लेके परिवार के लोग जब सरकारी प्राथमिक स्वास्थ्य उपकेंद्र पहुंचल त देखलस कि गेट के लगहिं एगो बड़ गढ़हा बा. स्वास्थ्य केंद्र के एएनएम श्रीमती ए. बी. थिटे महिला के सबसे नजदीक के प्राथमिक स्वास्थ्य केंद्र में ले जा के जचगी करावे के पड़ल. “बरखा लगातार होत रहे. एही बीच में, ओ महिला के हमनी उहंवा से हटावे के रहे जवन आज भोर में बच्चा के जनम दिहलस.” उ भूम में अपनी सीनियरन के कॉल कईली आ आगे के निर्देश के इंतजार करत रहली. क्लीनिक ले पहुंचे के कवनो रास्ता ना रहे. सामने के सड़क भी केतना जगह से बहि गईल बा.

भूम मुख्य रूप से अपना दूध आ डेयरी उत्पादन, खासतौर पर खावा (खोया) खातिर जानल जाला. चिंचपुर आ आसपास के कई ग्रामीण लोग मवेसी पालेला आ दूध भूम के संग्रह केन्द्रन पर भेजेला. “पिछला दू दिन से हमनी के दूध नईखी जा भेज पावत,” गांव के एगो सम्मानित नाम बाबासाहेब कातुरे कहेलन. “चिंचपुर में हमनी के लगे छव गो डेयरी बा आ एइजा लगभग 5,000 से 6,000 लीटर दूध एकट्ठा होला, जवन भूम भेजल जाला. बाढ़ में मेन रोड बह गईल बा. वाहन दू दिन से गांव नईखे पहुंच पावत,” उ बतावेलन. कई किसान पशुपालन करेलें आ दूध आ डेयरी उत्पादन से आपन आमदनी बढ़ावेलें.

“ए बाढ़ में हमनी के लगभग 200 से 250 मवेशी खतम हो गईल,” कातुरे हमनी के बतावेलन. “बाकिर सबसे ज्यादा नुकसान पिम्पलगांव के एगो किसान के पहुंचल बा.” उ विश्वनाथ दातखिले के बात कर रहल बाड़ें. नदी आपन रास्ता बदल दिहलस आ बाढ़ के पानी उनकरी मवेशीखाना के पूरा डुबा दिहलस. ओह में 27 गाय या बछड़ा खम्बा से सुरक्षित रूप से बन्हाईल रहलें सन. “दुःख एतने पर खतम ना भईल. अगिला दिन मरल मवेशी सब बाढ़ में बह गईलें सन,” उ बतावेलन.

ढेरे जवना किसान लोग डेयरी व्यवसाय में आपन किस्मत अजमावत रहल बा. अइसने एगो किसान, अमोल ढगे के बाढ़ में छव गो गाय, एगो भैंस आ एगो बछड़ा के नुकसान हो गईल. “खाली जानवरन के नुकसान नईखे, हमार 2000 कड़बा (चारा) के गांठ, 45,000 रुपिया के कड़बा कुट्टी (चारा काटे के मशीन) आ दूध निकाले के मशीन सब चल गईल.” नुकसान लाखों के भईल. ओइजा एकट्ठा भईल कई गो किसान लोग हमनी के बतावल कि कईसे उ लोग अपनी मवेशियन से हाथ धो बईठलें. केहू के चार त केहू के दू गो जानवर बाढ़ के पानी में बह गईल.

भेड़ आ बकरी भी डूब आ बह गईली सन. भैरवनाथ शिंदे बतावेलन का भईल. “हम मेहरारू संघे अपनी खेत पर गईनी आ देखनी कि सब कुछ बह गईल बा. शेड बह गईल रहे आ बकरियन के कवनो नामोनिशान ना रहे. कुछ दूर छत के टीन सब लउकत रहे,” शिंदे कहेलन. “हमनी के नदी से कवनो समस्या ना भईल. बाकिर ए साल, ‘खोरितला तल’ टूट गईल जेकरा से बाढ़ आ गईल. तेज़ बहत पानी रास्ता में आवे वाला कुल चीज के बहा दिहलस.” उ ऊपर के दिशा में बनल एगो छोट सिंचाई वाला तालाब के ओर इशारा कर रहल बाड़ें जवन लगभग 10 साल पहिले बनल रहे.

बहुत से किसान लोग मेहनत कर के पईसा बचवलस ताकि उ लोग बागबानी में किस्मत आजमा सकें. अंगूर के बगईचा, अनार आ बढ़िया अमरुद के बगईचा से अच्छा पैसा बनावल गईल. नुकसान बहुत बड़ बा. श्रीराम ढगे के लगे 15 एकड़ के अंगूर के बगईचा रहे. “ई पूरी तरह से बह गईल बा. धातु के बनल ढांचा सीमेंट के नींव संघे उखड़ गईल रहे,” ढगे कहेलन.

सुहास गणेश ढगे आ उनकर छोट भाई केशव एही तरह के खेती में लागल रहे लोग. उनकरी पिता के मृत्यु के बाद सुहास ही खेतन के देखभाल करत रहलें. “उनकर एगो पूरा अमरुद के बगईचा बह गईल. ओमे लगभग 1000 पेड़ रहे जेमे अगिला हफ्ता बाजार में भेजे खातिर फल तैयार रहे. अब उ कुल बाढ़ के भेंट चढ़ गईल,” ई बतावल लोगन खातिर कष्टदायक रहे.

एकरी संघे ही सुहास के दू एकड़ के सोयाबीन के फसल आ अनार के पेड़न के छोट बगईचा भी बर्बाद हो गईल. बाढ़ में उनकर छोट ट्रैक्टर आ पॉवर ट्रांसफार्मर भी बह गईल.

हमनी से सुहास से मुलाकात ना हो पावल. काहें? काहें कि ई नयका पीढ़ी के लईका सोलापुर के एगो अस्पताल में जिनगी के लड़ाई लड़ रहल बा. “तीन हफ्ता पहिले ओके सांप काट दिहलस. स्थानीय क्लिनिक कुछ काम ना आईल त ओके ओइजा भर्ती कईल गईल. उ पांच बेर डायलिसिस से गुजर चुकल बा,” कातुरे कहेलन. “हमनी के अभी ले ओके बाढ़ के बारे में कुछ नईखी जा बतवले.” केशव के खाली चेहरा अ भींजल आंख से ए झटका आ आघात साफ जाहिर रहे.

खेतन आ खड़ा फसल के नुकसान के संघे 100 से अधिक सौर पम्प आ ओकर पैनल भी बह गईल. पानी बचावे वाला ड्रिप आ स्प्रिंकलर सेट नदी बहा ले गईल. आ कुल कुआं अब बाढ़ के संघे आईल माटी आ झाड़ियन से भर गईल बा.

बाकिर खाली बरखा से एतना नुकसान ना हो सके.

बाणगंगा नदी के ऊपर की ओर तीन गो छोट सिंचाई टैंक बा. “वारे वड़गांव, साबलेवाड़ी आ बुरुड़वाड़ी में तीनों टैंक टूट गईल आ पूरा पानी नदी में बह गईल. एकरी संघे लगातार बरखा भी होत रहे,” सूरज ढगे बतावेलन. “पानी 21 सितम्बर के सबेरे बढ़े चालू भईल आ फिर सीधे 23 सितम्बर के सुबह में घटे चालू भईल.” चिंचपुर रोड के पूरब में एगो केटी (कोल्हापुर टाइप) वीयर बा. “गर्मी में गेट ना खोलल गईल रहे. बाढ़ के पानी अपनी संघे पेड़, झाड़ी आ बहुत कचरा ले के आईल जेकरी वजह से पानी के निकासी रुक गईल.” नदी आपन नया रास्ता खोज लिहलस आ खेतन आ गांव में घुस गईल. प्राकृतिक रास्ता मुख्य गांव से लगभग 500 मीटर दूर बा.

लोग बुद्धिमान बाड़ें आ अइसन विनाश के कारण पता लगावे में सक्षम बाड़ें.

“अगर हमसे पुछब त हम इहे कहब 1980 के दशक ले नदी के किनारे के कुल जमीन बंजर रहे. एके चराई खातिर छोड़ल गईल रहे. अब ए जमीनन के खेती में ले लिहल गईल बा,” सूर्यकान्त मोरे के भाई हमनी के समझावेलें. “ई नदी के मैदानन पर अतिक्रमण हवे.”

मेहरारू लोगन के ए बाढ़ के बारे में का कहनाम बा?

“ताई, हमनी के गांव गोशा के पालन करेला,” उ लोग हमनी के बतावेलें.

गोशा अइसन प्रणाली होला जेमे ‘उंच’ जात के हिन्दू परिवार के मेहरारू लोग बाहरी लोगन, खासकर आदमी लोगन के संघे बातचीत ना करेला. ई प्रणाली अब्बो मराठवाडा के कई गो गांवन में मानल जाला. मेहरारू लोगन के आपन कपार साड़ी से तोपे पड़ेला. केहू ओ लोगन के मुंह ना देख सकेला.

“हमनी के कुल जाना एक ही खानदान के हईं जा. आदमी लोग बतियावेला त मेहरारू घर से बाहर ना आवेली सन,” दू गो आदमी गर्व से कहेला.

बाढ़ में कुल चीज बहि गईल बा. सांचो? पुरान नियम-कायदा आ भेदभाव त ओइसहीं चल रहल बा.

जिला कलेक्ट्रेट 3 अक्टूबर 2025 के सूचित कईलन कि धाराशिव जिला के कुल 42 सर्कल में जरूरत से जादे बरखा भईल बा. एह में लगभग 4,49,689 हेक्टेयर कृषि भूमि के नुकसान पहुंचल जेमे से 8,000 हेक्टेयर पूरी तरह से बह गईल. लगभग 221 गो सड़क, 146 गो रिसाव टैंक आ 19 गो अन्य जल भण्डारण टैंक टूट गईल; 70-80 प्रतिशत सरकारी स्कूलन के बारिश आ बाढ़ से नुकसान पहुंचल बा.

अनुवाद: विमल चन्द्र पाण्डेय