دعا کے ساتھ ساتھ دوا بھی ہے ضروری

یہ اسٹوری پارتھ ایم این کی اُس سیریز کا حصہ ہے جسے پُلٹزر سنٹر کا تعاون حاصل ہے۔

تقریباً ۷۵ سال کی اسماء خان اپنی بیٹی کے علاج کی تلاش میں ۱۰۰ کلومیٹر سے زیادہ کا سفر کر کے یہاں آئی تھیں۔ ان کی بیٹی شدید ذہنی مسائل سے دوچار ہے۔ اب ۱۲ سال کا عرصہ گزر چکا ہے، لیکن ماں بیٹی دونوں اب بھی اپنے گھر واپس نہیں لوٹی ہیں۔

مہاراشٹر کے مراٹھواڑہ خطہ کے سمبھاجی نگر (جو پہلے اورنگ آباد تھا) ضلع کے ایک مزدور خاندان میں پیدا ہوئیں فاطمہ کا بچپن کافی مشکلوں بھرا رہا۔ انہیں اکثر چکّر آنے اور بیہوش ہونے کی شکایت رہتی تھی، جو وقت کے ساتھ بڑھتی چلی گئی اور بعد میں انہیں پر تشدد دورے بھی پڑنے لگے۔

’’ہم سالوں تک اسے لے کر ایک ڈاکٹر سے دوسرے ڈاکٹر تک چکّر لگاتے رہے،‘‘ اسماء بتاتی ہیں۔ ’’علاج کے لیے ہم نے اپنے مویشی بھی فروخت کر دیے، لیکن کوئی فائدہ نہیں ہوا۔ اس کی حالت لگاتار بگڑتی گئی اور ہم دیکھ رہے تھے کہ دنوں دن وہ حقیقت سے دور ہوتی جا رہی تھی۔‘‘

ایک دن فاطمہ نے سب کو پہچاننا بند کر دیا اور گہرے ڈپریشن میں چلی گئی۔ تب وہ ۳۰ سال کی عمر پار کر چکی تھیں، اور ماں باپ کے پاس اب کوئی چارہ نہیں بچا تھا۔ روزی روٹی کی جدوجہد کے درمیان ان کی ذہنی حالت نے انہیں پوری طرح الجھا دیا تھا۔

’’وہ اپنے کپڑے پھاڑ دیتی تھی اور ہمیں سمجھ میں نہیں آتا تھا کہ اسے کیسے قابو میں رکھیں،‘‘ اسماء یاد کرتی ہیں۔ تبھی ایک پڑوسی نے انہیں ایک الگ قسم کی صلاح دی۔

ان کے گاؤں سے تقریباً ۱۰۰ کلومیٹر دور ایک اور گاؤں ہے، جہاں تقریباً ۱۱۷ سال پرانی ایک درگاہ ہے۔ کہا جاتا ہے کہ ۱۹ویں صدی کے آخر میں حضرت حاجی عبدالرحمٰن شاہ عرف سیلانی شاہ بابا یہاں پمپل گاؤں سرئی میں آئے تھے۔ ودربھ علاقہ میں بلڈھانہ شہر سے یہ گاؤں تقریباً ۲۰ کلومیٹر دور ہے۔ سیلانی بابا کی شہرت ’’بد روحوں سے آزادی‘‘ دلانے والے فقیر کے طور پر تھی۔ ان کے انتقال کے بعد ۱۹۰۸ میں ان کی یاد میں یہ درگاہ بنائی گئی۔

تب سے ہر سال مارچ میں یہاں عرس ہوتا ہے، جس میں لاکھوں عقیدت مند شامل ہوتے ہیں۔

اس گاؤں میں سیلانی بابا کی یاد میں بنی اس درگاہ پر برسوں سے مہاراشٹر کے مختلف حصوں سے ہر مذہب کے لوگ آتے رہے ہیں، کیوں کہ ایسا مانا جاتا ہے کہ یہاں ’’کرشمائی علاج‘‘ ہوتا ہے۔ اس درگاہ کا انتظام و انصرام کرنے والا ٹرسٹ صرف چندہ پر چلتا ہے۔ لیکن اس کے آس پاس کئی جھولا چھاپ بابا سرگرم ہیں، جو غریب لوگوں کی لاچاری اور حالات کا فائدہ اٹھاتے ہیں۔

کئی کنبے اپنا گھر اور کھیتی باڑی چھوڑ کر یہیں سکونت اختیار کر لیتے ہیں اور خود کو درگاہ کے حوالے کر دیتے ہیں۔ تقریباً ۵۰۰۰ کی آبادی والے پمپل گاؤں سرئی میں اب مقامی لوگوں سے زیادہ مہاجرین رہائش پذیر ہیں۔ ان مہاجر خاندانوں میں عام طور پر کوئی نہ کوئی آدمی شدید ذہنی امراض میں مبتلا ہے۔

اسماء اور ان کے شوہر حسین ۱۲ سال پہلے یہاں پہنچے تھے۔ انہیں امید تھی کہ یہاں فاطمہ کو علاج مل جائے گا۔ انہوں نے ایک کھیت کے پاس ٹن کی چھت والی ایک جھونپڑی کرایے پر لی۔ حسین پھر کبھی اپنے اورنگ آباد والے گھر نہیں لوٹ پائے۔

فاطمہ جب پہلی بار پمپل گاؤں سرئی آئیں، تو انہیں سیلانی بابا کی سبز رنگ کی درگاہ کے ٹھیک سامنے ایک درخت سے زنجیر سے باندھ دیا گیا تھا۔ ’’وہ وہیں حوائج ضروریہ سے فارغ ہوتی تھی جہاں بندھی ہوتی تھی،‘‘ اسماء بتاتی ہیں۔ ’’میں نے اپنی زندگی کا زیادہ تر حصہ اس کا پیشاب پاخانہ صاف کرتے ہوئے گزارا ہے۔‘‘

لیکن ۱۰ سال اسی طرح گزارنے کے بعد ۲۰۲۲ میں حالات تھوڑے بہتر ہونے لگے۔

ڈاکٹر گرگی سپکال (۲۸) آبائی طور پر بُلڈھانہ کی رہنے والی ہیں۔ انہوں نے اس علاقہ میں کئی ہیلتھ کیمپ لگائے، جن میں سے ایک پمپل گاؤں سرئی میں بھی لگایا گیا۔ ’’اُس کیمپ کے دوران مجھے احساس ہوا کہ یہاں ذہنی صحت کی حالت بہت سنگین ہے،‘‘ انہوں نے بتایا۔

سپکال کے ادارہ ’ماتر بھومی فاؤنڈیشن‘ نے پھر بدعقیدگی کے خلاف کام کرنے والی تنظیم ’اندھ شردّھا نرمولن سمیتی‘ (اے این آئی ایس) اور ’پریوَرتَن ٹرسٹ‘ کے ساتھ مل کر کام شروع کیا۔ تینوں نے مل کر گاؤں کے کلینک میں ذہنی صحت کے لیے کل وقتی او پی ڈی (آؤٹ پیشنٹ ڈپارٹمنٹ) شروع کیا۔

ذہنی امراض کے ماہر اور اے این آئی ایس کے رہنما حامد دابھولکر نے محسوس کیا کہ تبدیلی لانے کا یہی ایک راستہ ہے۔ اس متوازی دنیا میں، جہاں لوگ اپنی زندگی کے دسیوں سال اور اپنی محدود پونجی کو ایک ایسے ’’علاج‘‘ میں جھونک دیتے ہیں جو حقیقت میں ہے ہی نہیں۔ پمپل گاؤں سرئی، جسے اب ’’ذہنی مریضوں کا گاؤں‘‘ کہا جاتا ہے، کو متواتر علاج اور دوا کی ضرورت ہے۔

’’ہمارے معاشرہ میں اب بھی ذہنی صحت کے بارے میں بہت لاعلمی ہے،‘‘ دابھولکر کہتے ہیں۔ ’’لوگ اب بھی مانتے ہیں کہ ذہنی امراض کسی غیبی طاقت کے سبب ہوتے ہیں۔ یہ بیداری کی کمی، سماجی بدگمانی، اور ماہرین کی قلت – ان تینوں کے ملے جلے اسباب سے ایسا ہے۔‘‘

پمپل گاؤں سرئی میں ساتھ آئی ان تینوں تنظیموں نے اپنی مہم کا نام رکھا ’دوا-دعا پروجیکٹ‘۔ انہوں نے اس بات کا خاص خیال رکھا کہ کسی بھی مرحلہ میں ایسا نہ محسوس ہو کہ وہ سیلانی بابا کی ’کرشمائی طاقت‘ پر سوالیہ نشان لگا رہے ہیں۔

’’آپ اس عقیدہ کو چیلنج نہیں کر سکتے اور لوگوں کو الگ تھلگ نہیں کر سکتے،‘‘ دابھولکر کہتے ہیں۔ ’’ہمارا طریقہ یہ ہے کہ ہم ان سے اپنا عقیدہ برقرار رکھنے کے لیے کہتے ہیں، لیکن یہ بھی کہتے ہیں کہ ضرورت پڑنے پر ساتھ ساتھ طبی علاج بھی کراتے رہیں۔‘‘

جب سپکال نے پہلی بار گاؤں کے لوگوں سے رابطہ کیا، تو وہ انہیں اپنی پرانی میڈیکل فائلیں دکھاتے تھے، جس میں سالوں سے چلے آ رہے علاجوں کا بیورہ ہوتا تھا۔ ’’معلومات کی کمی یا وقت پر جانچ نہ ہونے کے سبب اُن کا علاج کارگر نہیں رہا،‘‘ وہ بتاتی ہیں۔ ’’اس سے ان کا طبی علاج سے بھروسہ پوری طرح اٹھ گیا تھا۔ شروعاتی کچھ مہینوں تک ہم بس وہاں جاتے اور انہیں سنتے رہے، تاکہ آہستہ آہستہ ان کا اعتماد حاصل کر سکیں۔‘‘

اسماء اُن شروعاتی لوگوں میں سے تھیں جنہوں نے یہ جوکھم اٹھایا۔ ان کے شوہر حسین کو کچھ سال پہلے لقوہ کا دورہ پڑا تھا اور ان کی موت ہو گئی تھی۔ ان کی عمر ۷۰ سال سے زیادہ تھی۔ اب اسماء اکیلی رہ گئی تھیں اور فاطمہ کی دیکھ بھال کی ذمہ داری بھی انھیں کی تھی۔

’’میرے پاس اب کھانے کو کچھ نہیں تھا،‘‘ وہ کہتی ہیں۔ ’’میری بیٹی کی حالت اس سے زیادہ بگڑ نہیں سکتی تھی۔ اس لیے میں نے دواؤں پر آنکھ موند کر بھروسہ کر لیا۔‘‘

جو لوگ دوا کا سہارا لے رہے ہیں، وہ ایسا لاچاری میں کر رہے ہیں۔ لیکن انہیں اس سے فائدہ بھی ہوا ہے، حالانکہ اب بھی بہت سے لوگ علاج سے انکار کرتے ہیں۔ اس سے سماجی کارکنوں کا کام مشکل ہو جاتا ہے۔

تقریباً ۶۰ کے آس پاس کی اوما بائی گزشتہ چھ برسوں سے پمپل گاؤں سرئی میں رہ رہی ہیں۔ وہ شروع میں اپنی بار بار ہونے والی جسمانی تکلیفوں کی وجہ سے یہاں آئی تھیں۔ ان کی جھونپڑی اسماء کی جھونپڑی کے بالکل سامنے ہے۔ دونوں اپنے کپڑے کھلے آسمان کے نیچے دونوں گھروں کے درمیان بندھی ایک ہی رسی پر سُکھاتی ہیں۔ ’’میرا گاؤں جلگاؤں میں ہے، جو ۶۰-۷۰ کلومیٹر دور ہے،‘‘ اوما بائی کہتی ہیں۔ ’’کبھی کبھی میں اپنی فیملی سے ملنے وہاں جاتی ہوں۔‘‘

لیکن اوما بائی کہتی ہیں کہ جب وہ اپنے گھر واپس جاتی ہیں تو ان کے بدن میں درد اور سر میں چکّر آنا شروع ہو جاتا ہے۔ ’’یہاں لوٹنے کے بعد ہی مجھے آرام ملتا ہے،‘‘ وہ کہتی ہیں۔ ’’بابا نہیں چاہتے کہ میں یہاں سے جاؤں۔‘‘

سونالی کردَل نے انہیں دوا پر لانے کی بہت کوشش کی، لیکن اوما بائی کو لگتا ہے کہ وہ اپنے گاؤں تبھی لوٹ پائیں گی، جب سیلانی بابا خود انہیں ’’رہا‘‘ کریں گے۔ ’’یہاں کئی مریضوں کا ماننا ہے کہ بابا انہیں خواب میں بتاتے ہیں کہ کیا کرنا ہے،‘‘ سونالی بتاتی ہیں۔ ’’ہم ان کے عقیدہ کا احترام کرتے ہوئے بھی جب سمجھانے کی کوشش کرتے ہیں، تو بہت سے لوگ نہیں مانتے۔‘‘

سونالی اور ان کی ٹیم کو کئی بار گاؤں کے لوگوں کی مخالفت کا سامنا کرنا پڑا ہے۔ انہیں یہاں تک کہا گیا کہ وہ مریضوں کی ذہنی حالت کو مزید بگاڑ رہی ہیں۔ ’’ہم صرف مسلسل کوشش کرتے رہ سکتے ہیں،‘‘ وہ کہتی ہیں۔ ’’ہم مخالفت کی امید کے ساتھ ہی چلتے ہیں۔‘‘

اب تک انہوں نے گاؤں میں ۶۰۰ سے زیادہ مریضوں کا علاج کیا ہے، جن میں سے کئی پوری طرح ٹھیک ہو کر اپنے گھر لوٹ چکے ہیں۔ باقی مریض علاج جاری رکھے ہوئے ہیں اور سونالی کی مسلسل جانچ سے فائدہ اٹھا رہے ہیں۔

انہی میں سے ایک ۱۸ سالہ آشیش بھی ہے۔ سونالی جب اس کے گھر، جو بھوسے کی چھت والا ایک اندھیرا سا جھونپڑا ہے، میں جاتی ہیں تو وہ پیٹھ پھیر کر بیٹھا رہتا ہے۔ اس کی ماں سویتا (۴۵) اس کا ہاتھ پکڑے ہوئے ہم سے بات کرتی ہیں۔

آشیش بنیادی طور پر اکولہ ضلع کے ایک گاؤں کا رہنے والا ہے، جو پمپل گاؤں سرئی سے تقریباً چار گھنٹے کی دوری پر ہے۔ وہ ایک ذہین طالب علم تھا۔ باقی لڑکوں کی طرح اسے سیلفی لینا اور دھوپ کا چشمہ پہننا پسند تھا۔ لیکن چار سال پہلے اس کے ساتھ ریگنگ کا ایک ایسا واقعہ ہوا جس نے اس کی زندگی بدل دی۔

’’کچھ لڑکے اسے ستایا کرتے تھے،‘‘ سویتا بتاتی ہیں۔ ’’ایک شام انہوں نے اسے زمین پر گرا دیا اور اس کے اوپر بیٹھ گئے۔ وہ سانس نہیں لے پا رہا تھا اور اس کے ہاتھ پاؤں دب گئے تھے۔‘‘ گھبرا کر وہ رہا ہونے کی کوشش کرنے لگا اور منہ کے سامنے نظر آ رہے ایک بچہ کے ہاتھ کو دانت سے کاٹ کھایا۔ ’’دانت کاٹ کر اس نے خود کو کسی طرح چھڑایا۔‘‘

اگلے دن، جس لڑکے کو اس نے دانت کاٹا تھا اُس کے والد اسکول آ پہنچے۔ انہوں نے آشیش کو دھمکی دی اور سویتا سے بدتمیزی کی۔ اس واقعہ کے بعد آشیش گہرے صدمہ میں چلا گیا۔

’’اس واقعہ کے بعد سے اس کی آواز چلی گئی،‘‘ سویتا بتاتی ہیں۔ ’’اس نے بولنا بند کر دیا۔‘‘

جب اکولہ کے ذہنی امراض کے ماہرین سے کوئی فائدہ نہیں ہوا، تو سویتا اور ان کی بڑی بیٹی نکیتا (۲۲)، آشیش کو لے کر سیلانی بابا کی درگاہ پہنچیں اور اسی گاؤں میں سکونت اختیار کر لی۔

سویتا کو حکومت سے ۱۵۰۰ روپے کی بیوہ پنشن ملتی ہے، جس کا ایک تہائی حصہ جھونپڑی کے کرایے میں چلا جاتا ہے۔ باقی روز تینوں وقت کے کھانے کے لیے وہ گاؤں میں مہاجر خاندانوں کو تقسیم کیے جانے والے این جی او کے راشن پر منحصر ہیں۔

’’ہمارا کھیت اب ویران پڑا ہے،‘‘ نکیتا کہتی ہیں۔ ’’پاپا کا انتقال بہت پہلے ہو گیا تھا، اور رشتہ دار ہماری زیادہ مدد نہیں کرتے۔‘‘

نکیتا کو کالج چھوڑنا پڑا، تاکہ وہ آشیش کی دیکھ بھال کرنے میں ماں کی مدد کر سکیں۔ ’’وہ اب بھی اس صدمہ سے باہر نہیں نکل پایا ہے،‘‘ سونالی بتاتی ہیں۔ ’’علاج لگاتار جاری رکھنا ضروری ہے۔‘‘

لیکن آشیش کو جب دوائیں دی جاتی ہیں، تو وہ انہیں پھینک دیتا ہے۔ وہ زیادہ بولتا نہیں، بس اشاروں سے اور چھو کر اپنی بات بتاتا ہے۔ ماں اور بہن خاموشی سے اس کی دوائیں کھانے پینے میں ملانے کی کوشش کرتی ہیں۔ یہ ان کی روزانہ کی جدوجہد بن چکی ہے۔

خوش قسمتی سے، اسماء کے لیے حالات بہتر ہوئے ہیں۔ ان کی بیٹی فاطمہ نے دوائیں لینے سے انکار نہیں کیا۔ تقریباً تین سال کے مسلسل علاج کے بعد اب انہیں درگاہ کے سامنے درخت سے زنجیر میں نہیں باندھا جاتا۔ ان کو پڑنے والے پر تشدد دورے اب ماضی کی بات ہیں۔ وہ خود اپنی صفائی کرتی ہیں، اور اسماء کے ساتھ باورچی خانہ میں بھی ہاتھ بٹاتی ہیں۔

’’اب تو وہ دواؤں کی دکان سے اپنی دوائیں خود ہی خرید لاتی ہے،‘‘ اسماء فخر سے کہتی ہیں۔

بیٹی میں آئی تبدیلیوں نے اسماء کو دوا-دعا پروجیکٹ کا معاون بنا دیا ہے۔ وہ اکثر دیگر خاندانوں کو بھی ذہنی مرض کے علاج کے لیے راضی کرنے میں سونالی کی مدد کرتی ہیں۔ ’’مسئلہ یہ ہے کہ ہم اُس بات کو قبول نہیں کرتے جسے ہم جانتے نہیں،‘‘ اسماء کہتی ہیں۔ ’’اگر کوئی ہم سے زیادہ جانتا ہے، تو ہمیں اس کی بات سننی چاہیے۔ میری بیٹی نے ۱۰ سال درگاہ کے سامنے زنجیروں میں گزارے، مگر وہ تبھی ٹھیک ہوئی جب اسے صحیح علاج ملا۔‘‘

فاطمہ کی صحت یابی نے اسماء کے اندر اورنگ آباد میں واقع اپنے گھر لوٹنے کی خواہش پھر سے جگا دی ہے۔ ان کے دو بیٹے کبھی کبھی ملنے آتے ہیں، لیکن اب وہ چاہتی ہیں کہ اپنی زندگی کے بچے ہوئے سال اُسی گھر میں گزاریں جہاں انہوں نے زندگی گزاری ہے۔ ’’میں زیادہ دنوں تک زندہ نہیں رہوں گی،‘‘ وہ کہتی ہیں۔ ’’میں اپنے گھر میں مرنا پسند کروں گی۔‘‘

لیکن فاطمہ ہی اب انہیں روک رہی ہے۔ اسماء کو ڈر ہے کہ اگر وہ واپس چلی گئیں، تو علاج کا سلسلہ ٹوٹ جائے گا اور اس کی بیماری لوٹ آئے گی۔ وہ یہ جوکھم نہیں اٹھا سکتیں۔ سینکڑوں کلومیٹر دور رہنے سے اس کی جانچ پڑتال میں پریشانی آئے گی۔ ’’میں نے اپنی پوری زندگی اپنی بیٹی کی دیکھ بھال کرنے میں لگا دی،‘‘ اسماء کہتی ہیں۔ ’’میں چاہتی ہوں کہ وہ پوری طرح ٹھیک ہو جائے۔‘‘

(اس اسٹوری میں شامل لوگوں کے نام ان کی شناخت کو پوشیدہ رکھنے کے لیے تبدیل کر دیے گئے ہیں۔)

ترجمہ نگار: قمر صدیقی