بیر بھوم: سنتالی دیواروں پر اُگا جنگل

گوپال نگر کے ایک چھوٹے سے سنتالی گھر کی مٹی کی دیواروں پر جنگل اگ رہا ہے۔ چھت کی طرف اٹھنے والی درخت کی شاخیں بغل میں اگنے والے نیم کے درخت کی چھتری سے مل جاتی ہیں۔ وہ راستہ جس پر ایک نر چیتل (ہرن) اپنے بچوں کے ساتھ گزر رہا ہے، اسے چھوٹے چھوٹے پھولوں اور دیو ہیکل تتلیوں سے سجایا گیا ہے۔ بلبل، ببلر، باربیٹ اور طوطے کے پروں کو شوخ رنگوں سے رنگا گیا ہے۔ قریب میں واقع اِیلم بازار جنگل میں بسیرا کرنے والے یہ پرندے، دیوار کی مدھم سفیدی کے اوپر اپنے پر تول رہے ہیں۔

دیوار پر ان مخلوقات کی نقل و حرکت یا اس کا واہمہ ۷۵ سالہ چُرکی تُوڈو کا دھیان اپنی طرف نہیں کھینچتی۔ اور نہ ہی مئی کی اس دوپہر میں ان کی ٹن کی چھت پر ٹپکنے والی غیرموسمی بارش کی بوندوں سے پیدا ہونے والی موسیقی ہی ان کی توجہ اپنی جانب مبذول کراتی ہے۔ بلکہ جب ہم گھر کی بیرونی دیوار پر مٹی کی کانتھا کی طرح بنی اس پینٹنگ کے پاس سے گزرتے ہیں تو ہمارے قدموں کی چاپ انہیں متوجہ کر لیتی ہے۔

اِیلم بازار بلاک میں واقع اس گاؤں سے گزرتی ہوئی پکی سڑک کے دونوں طرف ایک دوسرے سے متصل مٹی کی متعدد سنتال جھونپڑیاں بنی ہوئی ہیں۔ جب ہم وہاں سے گزرتے ہیں تو گھروں کی بیرونی دیواروں پر بنی رنگ برنگی تصویریں ہماری توجہ کا مرکز بن جاتی ہیں۔

’’ان دنوں بچے فون اور اخبارات کی مدد سے نت نئے ڈیزائن بناتے ہیں۔ ہمارے زمانے میں ایسی سہولت کہاں تھی؟ ہم صرف کھیت سے مٹی حاصل کرتے اور دیواروں پر رنگ چھڑکتے تھے،‘‘ چُرکی تُوڈو اپنے کمرے سے باہر نکل کر دروازے تک پہنچتے ہوئے کہتی ہیں۔ وہ جس آسانی کے ساتھ ہم سے بات کرتی ہیں، اس سے معلوم ہوتا ہے کہ انہیں ہم جیسے متجسس مہمانوں کی عادت ہے، جو ان کے گھر کی سجی ہوئی دیواروں کی تصویریں اتارنے گاؤں آتے رہتے ہیں۔

وہ ہمارے پوچھنے کا انتظار کیے بغیر براہ راست اس موضوع پر آ جاتی ہیں جس سے متعلق ان کا خیال ہے کہ ہم دلچسپی رکھتے ہیں۔ ’’سفید مٹی، سرخ مٹی، سیاہ مٹی کے رنگ جو ہانڈیر تیل [کھانے پکانے کے برتن سے جلے ہوئے تیل کی باقیات] سے بنتے تھے، یہی رنگ ہوتے تھے۔‘‘ ایک لمحہ کے توقف کے بعد وہ اپنی باتوں کا سلسلہ جاری رکھتی ہیں، ’’پہلے مٹی کی پرانی تہہ کو دیوار سے کھرچ دیا جاتا تھا۔ اس کے بعد مٹی کی ایک تازہ تہہ اس پر چڑھائی جاتی تھی اور پھر ہم ایک اور تہہ لگا تے تھے۔ آخر میں، کناروں (بارڈر) کو کھڑی ماٹی [چونا پتھر یا چاک] سے رنگتے تھے۔‘‘

چُرکی کو مشرقی بردھمان کے اکولیا گاؤں میں اپنے پشتینی مکان میں گزارے ہوئے بچپن کے دن یاد ہیں۔ لیکن وہ سنتال برادری کے تیزی سے بدلتے ہوئے طور طریقوں اور نئی نسل کے ذریعہ ان تبدیلیوں کو اپنائے جانے کی حقیقت سے بھی واقف ہیں۔ وہ فی الحال گوپال نگر میں اپنی بیٹی کے ساتھ مقیم ہیں۔ ان کا گھر اس گاؤں کے ۳۰۴ گھروں میں سے ایک ہے، جو بولپور سے ایلم بازار جنگل کو جانے والی شری نکیتن روڈ کے بائیں جانب واقع ہے۔

بیر بھوم کی کل آبادی کا تقریباً سات فیصد حصہ آدیواسی ہیں، جن میں سنتال (جنہیں سنتھال بھی کہا جاتا ہے) اکثریت میں ہیں (۲۰۱۱ کی مردم شماری کے مطابق ۸۰ فیصد سے زیادہ)۔

چرکی کی۴۰ سالہ بیٹی، سومی کہتی ہیں، ’’گاؤں میں زیادہ تر کنبوں کے دو مکان ہیں – ایک مٹی کا اور ایک سیمنٹ کا۔ مٹی کے مکان پر جداری تصویریں بنائی جاتی ہیں۔‘‘ جب وہ اس حقیقت اور روایت کی وضاحت کر رہی تھیں، تو ہم نے اچانک دیکھا کہ یہاں ہر ایک نے اپنے روایتی مکانات سے متصل اینٹوں اور سیمنٹ کا ایک پکا مکان بھی بنوا رکھا ہے۔ پرانے آبائی مکان میں جدید توسیع کی طرح۔ ان کے لیے نئی چیزیں پرانی چیزوں کی قیمت پر نہیں آئی ہیں۔

دیواروں کے لیے مٹی مانسون کے دوران زمین پر جمع ہونے والی تازہ تہہ دار گاد (کیچڑ) سے حاصل کی جاتی ہے۔ سومی کہتی ہیں،’’ہم بھادوں اور اشون (وسط اگست سے وسط اکتوبر تک) کے مہینوں میں کھیتوں سے یہ گاد جمع کرتے ہیں۔ گھروں کی رنگائی کی سالانہ سنتالی رسم کے لیے، رنگ روایتی طور پر گرد و نواح میں دستیاب مختلف اقسام کی مٹی سے حاصل کیے جاتے تھے۔

سومی کی دوست اور پڑوسن، ۴۰ سالہ گَگنی مَنڈی کہتی ہیں، ’’آدیواسیوں کے چار بنیادی رنگ ہوتے ہیں۔ وہ ان کی فہرست بتاتی ہیں: ’’کھڑی ماٹی [چاک] سفید رنگ کے لیے استعمال ہوتی ہے؛ لال ماٹی [سرخ مٹی] کو ایلم بازار کے جنگل سے لاکر پانی میں بھگویا جاتا ہے، عام طور پر ہم اس سے کناروں کو سجاتے ہیں، بعض اوقات ہمیں بورویل کرتے وقت زرد مٹی مل جاتی ہے۔ چونکہ زرد مٹی بہت زیادہ نہیں ملتی، اس لیے جب بھی ملتی ہے، ہم اسے احتیاط سے بوریوں میں رکھ کر محفوظ کر لیتے ہیں، بعد میں رنگائی کے لیے استعمال کرتے ہیں۔ ہم گھاس پھوس جلا کر راکھ کو پانی میں ملا کر سرمئی رنگ حاصل کرتے ہیں۔‘‘

’’ہم بعض اوقات بازار میں آسانی سے دستیاب نیلے رنگ میں کھڑی ماٹی ملا کر رنگائی کے لیے نئے رنگ بناتے ہیں۔ ہم سیم کے پتوں سے بھی سبز رنگ حاصل کرتے ہیں،‘‘ گگنی کہتی ہیں۔ ’’یہ [قدرتی] رنگ اکثر وقت کے ساتھ مدھم پڑتے پڑتے غائب ہو جاتے ہیں اس لیے ہمیں انہیں [ہر سال] دوبارہ رنگنا پڑتا ہے۔‘‘

اور اُس گھر کی دیوار پر پرندوں، پھولوں اور جانوروں کو دکھانے والی جداری مصوری میں استعمال ہونے والے باقی تمام رنگوں کا کیا؟ گگنی کہتی ہیں، ’’باقی سارے رنگ بازار سے خریدے جاتے ہیں۔‘‘

سومی کی بیٹی ریکھا مرمو کہتی ہیں، ’’تتلی کے ڈیزائن والے ان دو گھروں کو دیکھیں؟ یہ سب پورنیما نے پینٹ کیا ہے۔ ہم صرف اس کی مدد کرتے ہیں۔‘‘ ریکھا (۱۶) گاؤں میں کچھ اور آگے دیوار پر کام میں مصروف فنکار کا فخریہ انداز میں تعارف کراتی ہیں۔ وہ اور ان کی نوعمر پینٹر دوست پورنیما مرمو (۱۵)، دونوں بالترتیب رائے پور شتی کنٹھ ایم ہائی اسکول اور دَرندا چنڈی ماتا ودیالیہ میں ۱۱ویں جماعت میں پڑھتی ہیں۔ مقامی سنتالی بولی بولنے والی ریکھا بھی گوپال نگر کے تمام لوگوں کی طرح روانی سے بنگلہ بولتی ہیں۔

ریکھا نے اپنے گھر کی دیواروں پر پرندوں، تتلیوں اور انسانی شکلوں کی جو تصویریں بنائی ہیں وہ ان کے روایتی فن کا خاصہ نہیں ہیں اور نہ ہی ان کا طریقہ کار ویسا ہے جیسا ان کی دیدا چُرکی یا ماں سومی کا ہے۔ ’’ہم نے یہ سب ایک دیدی [استانی] سے سیکھا ہے، جو ہمیں پینٹنگ سکھانے آتی ہیں،‘‘ یہ واضح کرتے ہوئے کہ استانی کا تعلق سنتال برادری سے نہیں ہے، ریکھا کہتی ہیں۔ پورنیما کے پینٹ، برش، اور پیلیٹ بولپور کے مقامی بازار سے خریدے جاتی ہیں۔

’’پہلے، ہم اپنے گھروں کی پوری دیوار پینٹ نہیں کرتے تھے۔ جہاں پھوس کی چھپر لٹکتی تھی اس کے نیچے کچی دیوار پر سرخ مٹی کی لکیر کھینچ دیتے تھے۔ اس کے نیچے پھولوں اور بیلوں کی تصویریں بنائی جاتی تھیں۔ یہ سادہ [فنکارانہ] کام تھا،‘‘ ایک نسل سے دوسری نسل میں پینٹنگ کے انداز میں آئی تبدیلیوں کی وضاحت کرتے ہوئے ریکھا کہتی ہیں۔ اپنی دادی چرکی کی طرح، ان کا بھی خیال ہے کہ پرانی پینٹنگز کی شکلیں اور ڈیزائن زندگی کے ایک وسیع تر حصہ کے ترجمان تھے جو اب پہلے جیسے نہیں ہیں۔

چرکی توڈو کو یاد نہیں ہے کہ آخری مرتبہ انہوں نے کسی بچے کو کمان اور تیر پینٹ کرتے ہوئے کب دیکھا تھا۔ وہ کہتی ہیں کہ آج کل لوگ ان چیزوں کو پینٹ نہیں کرتے۔ اب شکار پر پابندی ہے۔ سال میں ایک بار باندنا پرب [بیر بھوم میں جنوری کے پہلے ہفتہ میں منایا جانے والا سنتال برادری کا ایک تہوار] کے دن وہ جو کچھ کرتے ہیں وہ حقیقی شکار سے زیادہ ایک رسم ادائیگی ہے۔ یہ ایک ایسی علامت ہے جو کاشتکار ہونے سے پہلے شکاری کے طور پر سنتالوں کی حیثیت کا پتہ دیتی ہے۔ بیر بھوم کے جنگلات بھی تیزی سے کم ہو رہے ہیں۔

’’گوپال نگر میں زیادہ تر سنتال کنبے بٹائی دار کسان ہیں۔ ہم مانسون میں دھان اور سردیوں میں آلو اگاتے ہیں اور پورے سال اپنے کھانے کے لیے انہی فصلوں پر انحصار کرتے ہیں،‘‘ گگنی کہتی ہیں۔ وہ اپنے گھر کے پکے حصہ کے اندر فرش پر بیٹھی ہیں، جہاں کھیت سے حاصل شدہ آلو بکھرے پڑے ہیں۔ زمین مالک اور بٹائی دار کے درمیان فصل کی تقسیم کا فیصلہ اس بنیاد پر کیا جاتا ہے کہ بیج اور کھاد پر کس نے کتنا خرچ کیا ہے۔ صرف چند کنبوں کے پاس اپنی زمین ہے۔ وہ بھی زیادہ سے زیادہ ایک یا دو بیگھہ۔ (یہاں ایک بیگھہ ۳۳ء۰ ایکڑ کے برابر ہوتا ہے۔) وہ دھان کے علاوہ آلو، سرسوں، تل، بینگن اور ٹماٹر کی کاشت بھی کرتے ہیں۔

مویشی پالنا، چائے اور ناشتے کے اسٹال لگانا، اور بیٹری سے چلنے والے ای رکشہ چلانا برادری کے لیے کمائی کے اضافی ذرائع ہیں۔ لیکن یہاں زندگی اب بھی کھیتی سے حاصل فصلوں کے گرد گھومتی ہے۔ سومی کہتی ہیں، ’’ہم عموماً اپنی دیواروں کو اگہن [وسط نومبر سے وسط دسمبر] کے مہینہ میں [بندنا کے] تہواروں سے پہلے پینٹ کرتے ہیں۔ ہر سال دیواروں پر مٹی کی نئی تہہ چڑھانے اور اس کے رکھ رکھاؤ کی ذمہ داری عموماً سنتال خواتین پر ہوتی ہے۔

لیکن اب جب کہ تہوار کا وقت نہیں ہے تو گھروں کو کیوں سجایا جا رہا ہے؟

یہ کام خاندان میں شادیوں کے موقع پر بھی کیا جاتا ہے، ریکھا کہتی ہیں۔ پورنیما کے گھر میں جلد ہی ایک شادی متوقع ہے اور اسی لیے خاندان کی خواتین دیواروں کو سجا رہی ہیں۔ گھریلو فنکاروں نے فرنیچر کو ادھر ادھر منتقل کر دیا ہے۔ رگھوناتھ مرمو (مشہور سنتالی دانشور، ڈرامہ نگار اور اول چیکی رسم الخط کے تخلیق کار)، ڈاکٹر بی آر امبیڈکر اور رابندر ناتھ ٹیگور کے پورٹریٹ ایک بستر پر آرام کر رہے ہیں۔ ریکھا کہتی ہیں کہ یہاں رکھے گئے تینوں پورٹریٹ برادری کے اثاثے ہیں اور تہواروں اور تقریبات کے دوران برادری میں ان کی مانگ بڑھ جاتی ہے۔

یہ وہ تصویریں اور رنگ ہیں جو نسل در نسل گوپال نگر گاؤں کی سنتال برادری کو ایک ساتھ جوڑے رکھتے ہیں۔ بالکل اُن منفرد ٹیٹوز کے رنگوں کی طرح جنہیں خواتین – گگنی، سومی اور ریکھا کی سہیلی برِشٹی – اپنے سینہ کے اوپری حصہ پر بنواتی ہیں۔ اس سے بہت درد ہوتا ہے۔ اس لیے میں نے اسے سینہ پر نہیں بنوایا ہے۔ لیکن دیکھو، میں نے اسے اپنے ہاتھ پر بنوا لیا ہے،‘‘ ریکھا جوش و خروش سے کہتی ہیں، اور پھولوں کے نمونوں والے ٹیٹو سے مزین اپنا بازو پھیلا دیتی ہیں جس پر اسی طرح کا نمونہ بنا ہوا ہے جیسا ان کی ماں کے سینہ پر بنا ہے۔ سومی سے ریکھا تک آتے آتے یہ ٹیٹو وقت اور روایات کا حصہ بن جاتے ہیں۔

’’ہم سب کو یہ ٹیٹو ۵ یا ۶ سال کی عمر میں بنوانے ہوتے ہیں۔ اس کام کے لیے بہار سے لوگ یہاں آتے ہیں۔ بڑے ہونے پر ٹیٹو بنوانے میں بہت تکلیف ہوتی ہے۔ یہ ہماری نشانی ہے۔ ماں-دادی نے اسے ہم تک پہنچایا ہے۔ اس کا رنگ آہستہ آہستہ [وقت کے ساتھ] معدوم ہوتا جا رہا ہے،‘‘ سومی مسکراتے ہوئے کہتی ہیں۔

ایک مسکراہٹ جو وہاں موجود لڑکیوں – پورنیما، ریکھا اور برشٹی – کے چہروں پر پھیل جاتی ہے۔ ایسی مسکراہٹ جو معدوم نہیں ہوتی، بلکہ اس برسات کی دوپہر میں پینٹ شدہ دیواروں کے رنگوں کی طرح چمکتی ہے۔

یہ اسٹوری بنیادی طور پر بنگلہ میں لکھی گئی تھی۔

ترجمہ نگار: شفیق عالم