संथाली भिथि मं झूमत जंगल

गोपालनगर के एक ठन नानकन संथाल घर के माटी के भिथि मं एक जंगल जामत हवय. छानी ले उपर निकरे रुख बगल मं लगे लीम के घेर मं समा जाथे. जेकर रद्दा मं एक ठन एंर्रा हिरन अपन बछरू संग किंजरत हवय, वो ह छोटे छोटे फूल अऊ भारी तितली ले भरे पड़े हवय. बुलबुल, बैबलर, बारबेट अऊ सुवा बड़े रूप धरे पांख ह चटक रंग ले भरे हवंय. लकठा के इल्लमबाजार जंगल के ये चिरई, भिथि के उधडे उज्जर रंग मं फड़फड़ावत हवंय.

75 बछर के चुरकी टुडू ला भिथि मं बने ये जीव मन के हलचल धन ओकर होय ला लेके कोनो भरम नइ ये, फेर न मई के ये मंझनिया ओकर टीना वाले छानी मं बेबखत बरसा के आवाज ले वोला कोनो दिक्कत हवय. फेर घर के बहिर के भिथि मं बने ये पेंटिंग के संग-संग चलत हमर पांव के आवाज ह, माटी मं कांथा जइसने बगरे हवय.

इलमबाजार ब्लॉक के ये गाँव ले होवत एक ठन पक्का रोड के दूनों डहर अऊ अइसनेच कतको संथाल माटी के घर बने हवंय. जब हमन उहाँ ले गुजरथन, घर के बहिर के भिथि मन मं बने रिंगी-चिंगी चित्र हमर धियान अपन कोती खिंच लेथें.

“आज के नवा पीढ़ी के लइका मं फोन अऊ अख़बार ले नवा-नवा डिज़ाइन बनाथें. हमर जमाना मं अतक रंग-रंग के कहां रहिस? हमन त बस खेत ले थोकन माटी लावन अऊ भिथि मं रंग लगा देवन,” चुरुकी टुडू अपन खोली ले निकरके घर के मुहटा तीर आवत कहिथे. जेन हिसाब ले बिन झिझके वो ह बोले सुरु करथे, ओकर ले पता चलथे के वोला गाँव मं अक्सर बहिर के पहुना मन ले, जेन मन ओकर घर के सजे भिथि के फोटू खींचे ला आथें, बढ़िया ढंग ले जान-पहिचान गे हें .

वो ह हमर पूछे ला बिन अगोरे, सीधा वो बात ला कहे लाग जाथे जेन मं वोला लागथे के हमर मन हवय. सफ़ेद माटी, लाल माटी (गेरू), करिया माटी [रंग] जेन ह हांड़िर तेल [रांधे बखत जरे तेल] ले बनाय जावत रहिस – ये रंग रहिस. एक छिन रुक के वो ह बतावत जाथे: “सबले पहिली भिथि ले माटी के जुन्ना परत ला हेरे जाथे. ओकर बाद माटी लिपे जाथे अऊ ओकर बाद एक पईंत अऊ लिपत रहेन. आखिर मं, हमन धारी ला खारीमाटी [चूना धन छूही] ले लिपत रहेन.”

चुरकी ला पूर्व बर्धमान के अकुलिया गाँव मं अपन जनम के जगा मं बिताय बचपना के दिन सुरता आथे. फेर वो ह संथाल समाज मं तेजी ले बदलत तौर-तरीका अऊ नवा पीढ़ी के संग तालमेल करे के तरीका ला जानत हवय. वो ह ये बखत वो अपन बेटी के संग गोपालनगर मं रहत हवय. ओकर घर ये गाँव के 304 घर मन ले एक ठन आय, जेन ह श्रीनिकेतन रोड के डेरी डहर, बोलपुर ले इलमबाजार जंगल जवेइय्या रद्दा मं बने हवय.

बीरभूम के कुल आबादी के करीबन सात फीसदी आदिवासी आंय. संताल (जेन मन ला संथाल घलो कहे जाथे) सबले जियादा हवंय – 80 फीसदी ले जियादा (जनगणना 2011).

“गाँव के अधिकतर परिवार करा दू ठन घर हवय – एक ठन माटी के अऊ एक ठन सीमेंट के. माटी के घर के भिथि मं चित्र बनाय जाथे,” चुरकी के 40 बछर के बेटी सुमी कहिथे. जब हमन ला ये चलन अऊ परंपरा ला लेके बताथे, त अचानक ले हमर नजर परथे के इहाँ हरेक कोनो अपन पारंपरिक घर के ठीक बगल मं ईंटा अऊ सीमेंट के पक्का घर बनाय हवय. सिरतोन, जइसने जुन्ना, पुस्तेनी घर ला नवा ढंग ला ले बनाय गे होय. ओकर मन बर नवा मं रहे ले जुन्ना के मान कम नइ होय जाय.

भिथि बर माटी बरसात बखत आय नवा गाद ले लाय जाथे. सुमी कहिथे, “हमन हम भाद्र अऊ आश्विन [बीच अगस्त ले बीच अक्टूबर] के महीना मं खेत मन ले गाद संकेलथन.” घर के पोताई बर सलाना संथाल नेग बर, पारंपरिक रूप ले लकठा मं मिलत कतको किसिम के माटी ले पोते जाथे.

सुमी के सहेली अऊ परोसिन, 40 बछर के गगनी मंडी कहिथे, “आदिवासी मन के चार ठन माई रंग होथें.” वो ह वोला एक के बीएड एक बतावत कहिथे: “उज्जर/सफेद रंग बर खारीमाटी [चाक/छूई]बउरे जाथे: इलमबाजार के जंगल ले लाय लालमाटी ला पानी मं फिलोय जाथे. अक्सर, हमन येकर ले धारी/किनारी बनाथन. कभू कभू चुंवा खनत/ कोड़त हमन ला पिलीमाटी मिल जाथे. ये हमन ला जियादा नइ मिलय. ते पायके, जब घलो हमन ला थोर बहुत मिल जाथे, हमन वोला बोरी मं भरके राख लेथन जेकर ले बाद मं लिपे बउरे सकन. ओकर बाद करिया रंग घलो होथे. हमन पैरा जराथन अऊ ओकर करिया राख ला पानी मं घोल के वो रंग बनाथन.”

“कभू-कभू हमन बजार मं मिलेइय्या नीला रंग मं खारीमाटी मिलाके चित्र बनाय बर नव रंग बनाथन. हमन शिम [स्नो पीज] के पाना ले हरियर रंग निकारथन,” गगनी कहिथे. ये [प्राकृतिक] रंग अक्सर बखत के संग फीका परके उड़ जाथे, ते पायके हमन येला [हरेक बछर] दुबारा लगाय ला परथे.”

अऊ वो घर के भिथि मं चिरई-चिरगुन, फूल अऊ जानवर वाले चित्र मं बउरे गेय बाकि रंग के कइसने करथो? गगनी कहिथे, “बाकि जम्मो रंग बजार ले बिसोय गे हवय.”

तितली के डिज़ाइन वाले वो दूनों घर ला देखत हव? सब्बो पूर्णिमा ह बनाय हवय. हमन त सिरिफ ओकर मदद करे हवन,” सुमी के बेटी रेखा मुर्मू कहिथे. 16 बछर के रेखा हमन ला गरब ले गाँव मं थोकन दूरिहा भिथि मं काम करत वो कलाकार ले मिलवाथे. वो अऊ ओकर 15 बछर के सहेली चित्रकार पूर्णिमा मुर्मू, दूनों, एक झिन रायपुर सीतीकांठा एम. हाई स्कूल मं अऊ एक झिन दारंदा चंडीमाता विद्यालय मं 11 वीं क्लास मं पढ़थें, रेखा, जेन ह मूल रूप ले संथाली भाखा कहिथे, गोपालनगर के लोगन मन के जइसने बिन अटके बंगला घलो कहिथे.

रेखा के घर के भिथि मं बने ये सब्बो चिरई-चिरगुन, तितली अऊ मइनखे के चित्र ओकर मन के पारंपरिक चित्र नो हे, न ओकर तरीका ओकर जइसने हवंय जेन ह ओकर दीदा (डोकरी दाई) धन दाई सुमी ह सीखे हवंय. रेखा कहिथे, “हमन ये सब्बो एक झिन दीदी (अपन ले बड़े बहिनी धन सीखेइय्या ला कहे जाथे) ले सीखे हवं जेन ह हमन ला चित्रकारी सिखाय बर आथें.“ फोरके बतावत रेखा कहिथे के वो दीदी ह संथाल समाज ले नइ ये, रेखा कहिथे. पूर्णिमा जेन रंग, ब्रश अऊ पैलेट काम मं लावत हवय, वो ह बोलपुर के बजार ले बिसोके लाय गे हवय.

“पहिली हमन अपन घर के जम्मो भिथि मं चित्र नइ बनावत रहेन. घास फूस के छानी के ठीक तरी माटी के भिथि मं लाल माटी के धारी /बॉर्डर बनाय जावत रहिस. ओकर खाल्हे मं फूल अऊ नार बनाय जावत रहिस. ये ह जियादा आसान (कलात्मक शैली के बनिस्बत) रहिस,” रेखा चित्रकला के शैली मं पीढ़ी दर पीढ़ी आये बदलाव ला बतावत कहिथे. अपन डोकरी दाई चुरकी जइसने, वो घलो समझथे के पहिली के बखत मं आकार अऊ डिज़ाइन जिनगी जिए के तरीका के हिस्सा रहिस, जेन हा अब पहिली जइसने नइ रहिगे.

चुरकी टुडू ला सुरता नइ ये के आखिरी पईंत वो ह कब कोनो लइका ला तीर-धनुष बनावत देखे रहिस. वो ह कहिथे के आजकल के लोगन मन अइसने जिनिस नइ बनायेंव; खेदा (सिकार) उपर घलो अब रोक लगे हवय. बछर भर मं एक बेर बंदना परब (बीरभूम के संथाल समाज मं जनवरी के पहिली हफ्ता मं मनाय जवेइय्या तिहार) के दिन घलो वो मन जेन करथें, वो असल सिकार ले जियादा नेग भर के आय. ये ह एक ठन चिन्हारी आय जेन ह किसानी के पहिली वो मन के सिकारी होय के चिन्हारी आय. बीरभूम के जंगल के इलाका घलो तेजी ले कम होवत जावत हे.

“गोपालनगर के अधिकतर संथाल परिवार दीगर मन के खेत ला अधिया मं कमेइय्या आंय. हमन बरसा मं धान अऊ जाड़ मं आलू कमाथन अऊ बछर भर के गुजारा बर इहीच फसल के भरोसे रहिथन,” घर के पक्का हिस्सा मं बगरे आलू ले भरे भूंइय्या मं बइठे गगनी कहिथे. फसल के बंटवारा खेत मालिक अऊ अधिया लेवेइय्या मं येकर आधार ले तय होथे के बीजा अऊ खातू मं सबले जियादा खरचा कोन करे हवय. गिनती के परिवार तीर अपन खुद के खेत हवय. वो ह घलो जियादा ले जियादा एक धन दू बीघा ( इहाँ एक बीघा 0.33 एकड़ होथे). धान के छोड़ वो मन आलू, सरसों, तिल, भाटा अऊ पताल घलो कमाथें.

पशुपालन, चाय-नास्ता के दुकान अऊ बैटरी वाले ई-रिक्शा समाज के उपराहा कमई के साधन आय. फेर इहाँ के जिनगी अब ले घलो फसल के भरोसे हवय. सुमी कहिथे, “हमन अक्सर [बंदना] तिहर के पहिली अघरान [बीच नवंबर ने बीच दिसंबर] के महीना मं अपन भिथि ला लिपथन.” हरेक बछर भिथि मं नवा माटी चढ़ाथन अऊ लिपे पोते के काम खासकरके घर के माईलोगन मनेच करथें.

फेर जब तिहार के बखत नइ ये त घर ला काबर सजाथो?

रेखा कहिथे के येला परिवार मं बर-बिहाव बखत घलो सजाय जाथे. अऊ पूर्णिमा के घर मं घलो जल्दी एक ठन बिहाव होवेइय्या हे, ते पायके घर के माइलोगन मन भिथि ला सजावत हवंय. इहाँ के कलाकार मन फर्नीचर ला येती-वोती कर देय हवंय. रघुनाथ मुर्मू ( नामी संताली विद्वान, नाटककार अऊ ओल चिकी लिपि बनेइय्या). डॉ. बी. आर. आंबेडकर अऊ रवींद्रनाथ ठाकुर के चित्र भिथि ले हटाके एक ठन पलंग मं रखाय हवय. रेखा कहिथे के इहाँ रखाय तीनों चित्र समाज के बपोती आंय अऊ समाज के तिहार अऊ कोनो कार्यक्रम बखत राखे बर येला मांगे जाथे.

ये वो चित्र अऊ रंग आय जेन ह गोपालनगर गाँव के संथाल समाज ला कतको पीढ़ी ले एक दूसर ला बांध के राखे हवय. ठऊका वइसनेच जइसने वो खास किसम के गोदना माइलोगन मन – गगनी, सुमी अऊ रेखा के सहेली बृष्टि- अपन छाती के उपर बनवाथें. रेखा उछाह ले कहिथे, “भारी दरद होथे. ते पायके मंय येला अपन छाती मं नइ गुदवांय. फेर देखव, मंय येला अपन बाँहा मं गुदवाय हवं.” रेखा अपन बांहा ला आगू करत उछाह ले कहिथे, जेन मं फूल वाले डिज़ाइन के गोदना हवंय, ठऊका वइसनेच जइसने ओकर दाई के छाती मं हवय. ये गोदना सुमी ले लेके रेखा तक बखत अऊ परंपरा के एक ठन संस्कार मं बदल जाथे.

“हम सब्बो ला पांच –छै बछरके उमर मं ये गोदना गुदवाय ला परथे. बिहार ले लोगन मन इहाँ गोदना गुदवाय आथें. गर बड़े होय मं हमन ला गुदवाय ला परे, त ये ह दुख के बात आय. दाई-डोकरी दाई मन हमन ला ये गोदना देय हवंय. येकर रंग बखत के संग फीका पर जाथे,” सुमी मुचमुचावत कहिथे.

उहाँ संकलाय नोनी मन – पूर्णिमा, रेखा अऊ बृष्टि - के चेहरा मं एक ठन मुस्कान बगर जाथे. वो मुस्कान जेन ह फीका नइ परय, फेर ये बरसा मं भींगे मंझनिया मं भिथि मं लगे रंग जइसने चमकत हवय.

ये कहिनी मूल रूप मं बांग्ला भाखा मं लिखे गे रहिस.

अनुवाद: निर्मल कुमार साहू