بہار: ایل پی جی بحران کے سبب گھر لوٹتے مہاجر مزدور

بالو مانجھی اور تعمیراتی مقامات پر کام کرنے والے نو دیگر مزدور تقریباً دو ہفتوں سے ایک الگ کام میں مصروف تھے: پاس کے جنگل سے ایندھن کی لکڑی اکٹھا کرنا۔

’’ہر تیسرے یا چوتھے دن، ہم صبح پانچ بجے نکل پڑتے تھے، اور دوپہر تک ہر آدمی ۱۰-۱۲ کلو لکڑی لے کر لوٹتا تھا،‘‘ بہار کے نالندہ ضلع کی ارپا پنچایت میں اپنے گھر کے پاس چارپائی پر بیٹھے ۵۵ سالہ بالو کہتے ہیں۔

’’ہم جو لکڑی لاتے تھے، اس سے ۱۰ لوگوں کے لیے تین سے چار دن تک کھانا بنا لیتے تھے،‘‘ بالو کہتے ہیں، ’’لیکن ہم صرف چاول اور دال یا سبزی ہی بناتے تھے، کیوں کہ تین چیزیں بنانے کا مطلب زیادہ لکڑی جلانا پڑتا۔‘‘

وہ تمل ناڈو کے چنئی میں واقع ایک مشہور مضافاتی علاقہ تامبرم میں تعمیراتی مقام پر کام کے دوران گزرے اپنے دنوں کی بات کر رہے ہیں۔

ایل پی جی بحران کے سبب بالو اور ان کے ساتھی مہاجر مزدوروں کے ذریعہ اپنایا گیا یہ عارضی طریقہ دو ہفتوں تک ہی چلا۔ ’’ہر وقت لکڑی ملنا ممکن نہیں ہوتا،‘‘ وہ کہتے ہیں۔

گزشتہ یکم اپریل کو وہ ٹرین سے اپنے گاؤں لوٹ آئے۔ یہ ایک بیحد مشکل سفر تھا۔

جنرل ڈبے مسافروں سے پوری طرح بھرے ہوئے تھے اور ۲۴ گھنٹے تک انہیں بیٹھنے کے لیے ایک بھی سیٹ نہیں ملی۔ موسہر برادری سے تعلق رکھنے والے دلت بالو کہتے ہیں، ’’۲۴ گھنٹے تک ہم نے کچھ نہیں کھایا۔ کھڑے کھڑے کیسے کھاتے؟‘‘

ایران پر امریکہ و اسرائیل کے حملے سے پیدا ہوئے ایندھن کے بحران نے کام کی تلاش میں مہاجرت کرنے والے غیر منظم مزدوروں، خاص طور پر روز کمانے کھانے والے مزدوروں کو بری طرح متاثر کیا ہے، جو شہروں میں پرائیویٹ سپلائروں سے مہنگی ایل پی جی گیس خریدنے پر منحصر رہتے ہیں۔

ایل پی جی کی کمی نے تمام مزدوروں کو گاؤں لوٹنے کے لیے مجبور کر دیا ہے، جہاں روزگار کی وہی غیر یقینی صورتحال ان کا انتظار کر رہی ہے، جس کی وجہ سے انہوں نے کام کی تلاش میں مہاجرت کی تھی۔

تمل ناڈو چھوڑنے سے پہلے بالو اور ان کے ساتھیوں نے کئی متبادل آزمائے، لیکن کوئی بھی کارگر ثابت نہیں ہوا۔ ایک ہفتہ تک انہوں نے ۳۰۰ روپے فی کلو کے حساب سے ایل پی جی خریدی۔ یہ رقم واجب قیمت سے تین گنا زیادہ تھی۔ ’’لیکن بعد میں قیمت پر بھی گیس ملنا بند ہو گیا،‘‘ وہ بتاتے ہیں۔

اس کے بعد وہ ایک مقامی ڈھابہ پر کھانے لگے، لیکن وہاں بھی قیمتیں بڑھا دی گئیں۔

تعمیراتی مقامات پر کام کرنے والے ارپا کے ہی ایک اور مزدور، مُنّا پاسوان (۳۶)، جو بالو کے ساتھ کام کرتے تھے، کہتے ہیں، ’’جو مرغ چاول ۹۰ روپے میں ملتا تھا، اچانک ۱۶۰ روپے کا ہو گیا۔ اس لیے ہم نے وہاں کھانا بند کر دیا۔‘‘

ان کے پاس آخری متبادل لکڑی پر کھانا پکانے کا بچا تھا؛ لیکن جس آٹھ ضرب آٹھ فٹ کے کمرہ میں بالو اور منا تین دیگر مزدوروں کے ساتھ رہتے تھے، وہاں یہ سخت منع تھا۔

اس لیے وہ تعمیراتی مقام پر چلے گئے، جہاں انہوں نے دو ہفتے تک رہ کر لکڑی کے چولہے پر کھانا بنایا۔ مُنّا پاسوان یاد کرتے ہیں، ’’ہمیں زیادہ تر کانٹے دار ٹہنیاں ہی ملتی تھیں۔ اس لیے کھانا بناتے وقت اکثر لکڑی کے ٹکڑے میرے ہاتھوں میں چبھ جاتے تھے اور جلتی لکڑی کا دھواں آنکھوں میں جلن پیدا کرتا تھا۔‘‘

اب پاسوان گیس کی سپلائی پھر سے شروع ہونے کا انتظار کر رہے ہیں، تاکہ دوبارہ مہاجرت کر سکیں۔

وہ کہتے ہیں، ’’میں تامبرم میں راج مستری کا کام کرتا ہوں اور ۱۱۰۰ روپے روزانہ کماتا ہوں، لیکن یہاں گاؤں کے کھیتوں میں مزدوری کے صرف ۲۰۰-۲۵۰ روپے ملتے ہیں۔ اور پھچلے ایک ہفتہ سے تو یہ کام بھی نہیں مل رہا ہے۔‘‘ پاسوان ایک دلت ہیں جن کے پاس اپنی کوئی زمین نہیں ہے۔

’’پوری فیملی [بیوی اور چار بچے] صرف میری کمائی پر چلتی ہے۔ آگے کیسے سنبھالوں گا، مجھے سمجھ نہیں آ رہا،‘‘ یہ کہتے ہوئے پاسوان کے چہرے پر فکرمندی کی لکیریں صاف دکھائی دیتی ہیں۔

بالو مانجھی کے لیے، پچھلے سال ان کے ۳۰ سالہ اکلوتے بیٹے کارو مانجھی کی موت کے بعد مہاجرت کرنا مجبوری بن گیا تھا۔ کارو کے پانچ بچوں اور اس کی بیوی کی ذمہ داری اب ان کے کندھوں پر آ گئی۔

حکومت نے ابھی تک کارو کی ڈوب کر ہوئی ناگہانی موت کے لیے ملنے والا ۴ لاکھ روپے کا معاوضہ اور آخری رسومات کے ۲۰ ہزار روپے نہیں دیے ہیں۔ لیکن ڈسٹرکٹ سرکل آفیسرز کی ہڑتال – جیسا کہ انہیں ہر بار بتایا جاتا ہے – تقریباً ایک سال سے اس معاملہ کو روک کر رکھے ہوئے ہے۔

انہوں نے کارو کی آخری رسومات اور دیگر رسومات کے خرچ کے لیے ایک مہاجن سے ایک لاکھ روپے کا قرض لیا تھا، جس پر وہ ہر مہینے ۸۰۰۰ روپے کا سود دیتے ہیں۔ چنئی میں تعمیراتی مقامات پر معاون کے طور پر وہ روزانہ ۹۰۰ روپے کماتے تھے۔

’’ان دنوں میں سود کی رقم ادا کر پا رہا تھا۔ اب تو سود کی رقم بھی میرے سر پر بڑھتی جا رہی ہے۔ پورے گھر کی ذمہ داری میرے اوپر ہے۔ جب بھی میں ان سب کے بارے میں سوچتا ہوں تو میرا سر چکرانے لگتا ہے،‘‘ مانجھی کہتے ہیں۔

وہ اپنی فیملی کی کفالت کے بارے میں فکرمند ہیں۔ ’’مجھے کام پر لوٹنا ہی پڑے گا، کوئی اور متبادل نہیں ہے،‘‘ وہ کہتے ہیں۔

حالانکہ، فی الحال ان مزدوروں کا مستقبل خود مزدور نہیں، بلکہ ایل پی جی طے کرے گا۔‘‘

ترجمہ نگار: قمر صدیقی