बिहार: रसोई गैस के मार, घर लहूटत मजूर

दू हफ्ता तक ले बालो मांझी अऊ दीगर नौ झिन सड़क इमारत के काम करेइय्या एक ठन अलग बूता मं लग गीन: तीर-तखार के जंगल ले जलावन लकरी संकेले मं.

“हर तीसर धन चौथा दिन, हमन झुलझुलहा निकर जावत रहेन. अऊ मंझनिया, हरेक झिन करा 10-12 किलो जलावर लकरी धरके आवत रहिस,” बिहार जे नालंदा जिला के अरपा पंचायत मं अपन घर के तीर एक ठन खटिया मं बइठे 55 बछर के बालो कहिथे.

“हमन जेन लकरी संकेल के लावत रहेन, ओकर ले हमर 10 झिन बर तीन-चार दिन रांधे के काम आ जावत रहिस,” बालो कहिथे, “फेर हमन सिरिफ दार-भात धन साग बनावत रहेन. काबर के तीन ठन जिनिस बनाय के मतलब रहिस जियादा लकरी बारे.”

वो ह तमिलनाडु के चेन्नई के एक ठन बड़े उपनगर, तांबरम मं एक ठन काम वाले जगा (कंस्ट्रक्शन साइट) मं बूता करे के अपन बखत ला बतावत हवय.

रसोई गैस (लिक्विफाइड पेट्रोलियम गैस)संकट के ये कामचलाऊ तोड़, जेन ला बालो अऊ ओकर संगी प्रवासी मजूर मन निकारे रहिन, सिरिफ पाख भर तक ले चलिस. वो ह कहिथे, “बारे बर हमेसा लकरी मिले नइ सकय.”

1 अप्रैल के दिन, वो ह ट्रेन मं बइठ के अपन गाँव जाय बर निकरे रहिस. ये जवई भारी तकलीफ वाले रहिस.

जनरल डब्बा ठसाठस भरे रहिस, वो मन ला 24 घंटा तक ले एको घलो सीट नइ मिलिस. मुसहर समाज के ये दलित बालो कहिथे: “हमन 24 घंटा तक ले कुछु नइ खायेन. ठाढ़े-ठाढ़े हमन कइसने खा सकत रहेन?”

ईरान उपर अमेरिका-इज़राइल के लड़ई सेती जन्मे ईंधन संकट ह प्रवासी मजूर मन ला बरबाद कर दे हवय- खास करके वो भारी कारखाना वाले शहरी इलाका मं रहेइय्या रोजी मजूर मन ला, जेन मं निजी गैस बेचेइय्या मन ले रसोई गैस बिसोय बर अपन कम आमदनी के भरोसे रहिथें.

रसोई गैस के कमी सेती कतको मजूर मन ला अपन गाँव कोती लहूटे ला परत हवय – अऊ वो मन के जीविका के कोनो ठिकाना नइ रहिगे हवय जेकर कारन वो मन कमाय खाय ला आय रहिन.

तमिलनाडु छोड़े के पहिली बालो अऊ दीगर लोगन मन येकर उपाय करके निदान करिन. फेर कोनो घलो काम नइ आइस. हफ्ता भर तक वो मन 300 रूपिया किलो के हिसाब ले गैस बिसोइन- जेन ह येकर मूल दाम ले तीन गुना जियादा रहिस. “फेर बाद मं ये ह ये दाम मं घलो मिलत नइ रहिस,” वो ह कहिथे.

ते पायके वो मन एक ठन लोकल होटल (भोजनालय) मं चले गीन, फेर वो जगा घलो जल्दीच अपन दाम बढ़ा दीस.

अरपा के एक झिन अऊ कंस्ट्रक्शन मजूर, 36 बछर के मुन्ना पासवान, जेन ह बालो के संग बूता करत रहिस, कहिथे: “कुकरी साग अऊ भात, जेकर दाम पहिली 90 रूपिया रहिस, अचानक बढ़के 160 रूपिया हो गीस. ते पायके हमन उहाँ खाय जाय छोड़

वो मन करा आखिरी रद्दा लकरी बार के रांधे रहिस; फेर आठ-बाइ-आठ फीट के वो खोली मं –जेन मं बालो अऊ मुन्ना तीन झिन आने मजूर मन के संग रहत रहिन, लकरी बार के रांधे के सख्त मनाही रहिस.

येकरे सेती वो मन कंस्ट्रक्शन साइट मं चले गीन, जिहां वो मन दू हफ्ता तक रहिन अऊ लकरी बार के रांधत रहिन. मुन्ना पासवान सुरता करथे, “हमन ला अधिकतर काँटा वाले झिटकाच मिलय. ते पाय के रांधे बखत अक्सर हाथ मं चुभ जावय, बरत लकरी के धुंवा आंखी मं लगय.”

अब पासवान गैस फिर ले मिले ला अगोरत हवय जेकर ले वो ह फिर ले लहूट के जाय सकय.

वो ह कहिथे: “तांबरम मं, मंय राजमिस्त्री के काम करथों अऊ रोजी मं 1,100 रूपिया कमाथें, फेर गाँव मं, खेत मं भारी मिहनत करे के बाद घलो सिरिफ 200-250 रूपियाच मिलथे. फेर बीते हफ्ता भर ले, मोला ये बूता घलो मिलत नइ ये.” पासवान भूमिहीन दलित आय.

“घर (सुवारी अऊ चार लइका] के जम्मो खरचा मोर कमई के भरोसे चलथे. मोला पता नइ घर कइसने चलही,” पासवान के चेहरा मं चिंता साफ झलक परथे.

बालो मांझी बर, बीते बछर अपन 30 बछर के इकलौता बेटा, कारो मांझी के गुजर जाय के बाद, पलायन करे मजबूरी हो गे. कारो के पाँच लइका अऊ ओकर सुवारी के भार ओकर खांध मं आ परिस.

सरकार ह अब तक ले बालो ला, कारो के बूड़े ले होय अकस्मात मऊत सेती मिलेइय्या 4 लाख रूपिया के मुआवज़ा अऊ ओकर किया करम बर 20,000 रूपिया देय नइ ये. फेर जिला सर्कल अफसर मन के हड़ताल सेती – धन कम-से-कम हरेक पईंत जब घलो वो ह जाथे – वोला इहीच बताय जाथे – ये पइसा करीबन बछर भर ले अटके हवय.

वो ह कारो के क्रिया-करम अऊ रीति-रिवाज के खरचा बर एक झिन महाजन ले 1 लाख रूपिया उधार लेय रहिस. जेकर वो ह महिना मं 8,000 रूपिया बियाज देथे. चेन्नई मं एक ठन काम वाले जगा मं हेल्परी के वोला रोजी मं 900 रूपिया मिलत रहिस.

“वो बखत, मंय बियाज ला बखत मं चुकता करदेवत रहेंय. अब त बियाज के रकम घलो मोर मुड़ उपर बढ़त जावत हवय, घर-गृहस्थी के जम्मो भार मोरेच उपर हवय. जब घलो मंय ये सब्बो बात ला बिचारे लागथों त मोर मुड़ी चकराय लागथे,” मांझी कहिथे.

वो अपन परिवार के खाय के चिंता करत हवय. “मोला पलायन करेच ला परही, मोर करा कोनो दीगर उपाय नइ ये,” वो ह कहिथे.

फेर ये बखत बर, वो खुद नइ, गैसेच ह ओकर मन के अगम ला तय करही.

अनुवाद: निर्मल कुमार साहू