गैस संकट के मारल, गांव लउटत बिहारी मजूर

बालो मांझी आ नौ गो आउर ईंट-गारा मजूर लोग, दू हफ्ता ले आपन असली काम छोड़ के, लगे के जंगल से जलाए खातिर लकड़ी लावे में लागल रहल.

खटिया पर बइठल पचपन बरिस के बालो मांझी कहे लगलन, “हर तेसरा-चउथा रोज हमनी पांचे बजे भोरहीं निकल जाईं. आ दिन चढ़त-चढ़त सभे कोई कंधा पर 10-12 किलो लकड़ी उठइले लउटे.” बालो बिहार के नालंदा जिला के अरपा पंचायत में आपन मकान लगे बइठल बाड़न.

बालो बतावत बाड़न, “जंगल से बीन-बटोर के लावल लकड़ी से हमनी दस लोग के तीन-चार दिन के खाना बन जात रहे. बाकिर, खाली भाते-दाल, चाहे भाते-तरकारी बने. तीन चीज बनावे में लकड़ी जादे खरचा हो जाइत, एही से.”

तमिलनाडु के चेन्नई शहर लगे के एगो बड़ इलाका, तांबरम में ऊ बिल्डिंग बनावे के काम करत रहस.

गैस (एलपीजी) के नयका संकट में बालो आ संगे के मजूर लोग जवन जुगाड़ कइलक, बस दुइए हफ्ता टिक पाइल. ऊ कहले, “जलावे खातिर लकड़ी जुटावल हरमेसा आसान ना रहत रहे.”

एक अप्रिल के दिन ऊ लोग ट्रेन से आपन-आपन गांव लउट गइल. रस्ता में बहुत दिक्कत भइल.

जनरल बोगी में लोग ठूंस-ठूंस के भरल रहे, एतना कि गोड़ो धरे के जगह ना रहे. 24 घंटा बाद बइठे खातिर एगो जगह मिलल. मुसहर समुदाय से आवे वाला दलित, बालो के कहनाम बा, “चौबीस घंटा ले पेट में अन्न के एगो दाना ना गइल. ठाड़-ठाड़ हमनी कइसे खइतीं?”

अमरीका-इजराइल के ईरान पर युद्ध चलते गैस के भारी किल्लत हो गइल बा. एही से बाहर काम करे वाला मजूर लोग के बहुत मुस्किल में बा. खासकरके दिहाड़ी मजूर, जे शहर में गैस कीनके खाना पकावेला.

एलपीजी संकट चलते बहुते मजूर आपन गांव लउटे के मजबूर हो गइल. ऊ लोग फेरु से रोजी-रोटी के संकट झेलता. एहि चलते ऊ लोग पहिलहूं पलायन करे के मजबूर भइल रहे.

तमिलनाडु छोड़े से पहिले बालो आ उनकर साथी मजूर लोग हर तरह के जुगाड़ लगावे के कोसिस कइलक, बाकिर कवनो फायदा ना भइल. एक हफ्ता ले 300 रुपइया किलो के हिसाब से गैस कीने पड़ल, तीन गुना महंगा. ऊ कहत बाड़न, “बाद में ओतनो दाम पर मिलल बंद हो गइल.”

गैस मिलल बंद भइला के बाद ऊ लोग लगे के ढाबा में जाके खाए के सुरु कइलक. बाकिर जल्दिए उहंवो खाना महंगा हो गइल.

अरपा से आवे वाला एगो आउर ईंट-गारा मजूर मुन्ना पासवान, जे बालो संगे काम करेलन, बतावत बाड़न, “पहिले जवन मुरगा-भात 90 रुपइए प्लेट मिलत रहे, अचानक 160 रुपइया गइल. हमनी उहंवा खाएल बंद कर देनी.”

हार के ऊ लोग लकड़ी पर खाना बनावे लागल. बाकिर आठ बाई आठ के छोट खोली में, जहंवा बालो, मुन्ना आ तीन आउर मजूर लोग रहत रहे, लकड़ी जरावे के सख्त मनाही रहे.

मजबूरी में ऊ लोग, जहंवा बिल्डिंग बनत रहे, उहंवा जाके रहे लागल. दू हफ्ता ले लकड़ी के चूल्हा पर खाना बनत रहल. मुन्ना पासवान कहत बाड़न, “जादेतर लकड़ी कांटा वाला रहत रहे. खाना बनावे घरिया हाथ में एने-ओने घोपा जाए. लकड़ी के धुंआ से आंख जरे लागे.”

पासवान गैस संकट दूर होखे के इंतजारी ताकत बाड़न, जेसे काम खातिर फेरु बाहर निकल सकस.

उनकर कहनाम बा, “तांबरम में हम राजमिस्त्री के काम करत रहीं आउर एक दिन के 1100 रुपइया कमात रहीं. इहंवा गांव में त खेत में दिन भर खटलो पर 200-250 रुपइया मिलेला. बाकिर पछिला हफ्ता त उहो काम ना भेंटाइल.” पासवान भूमिहीन दलित मजूर बाड़न.

“आपन परिवार (घरवाला आ चार ठो लरिकन) चलावे वाला हम अकेला बानी. आगे का होई कुछ बुझात नइखे,” पासवान बेचैन होके कहलन.

पछिला बरिस बालो मांझी के 30 बरिस के एकलौता लइका, कारो मांझी के मरला के बाद ऊ परदेस जाके मजूरी करे के मजबूर हो गइलन. अब त कारो के पांच ठो बच्चा आ घरवाली के जिम्मेवारी उनके कान्हा पर बा.

कारो के डूब के मर जाए के बाद मिले वाला 4 लाख के मुआवजा आ अंतिम संस्कार खातिर 20 हजार रुपइया उनका सरकार से अबले नइखे मिलल. ऊ बतावत बाड़न कि जबो ऊ जिला दफ्तर के अधिकारी लोग से मिले जालन, उनका इहे बतावल जाला कि बाबू लोग हड़ताल पर बा. एहि चलते ई काम एक साल से अटकल बा.

कारो के अंतिम संस्कार खातिर ऊ महाजन से एक लाख रुपइया करजा उठइले रहस. एकरा खातिर उनका हर महीना 8 हजार के सूद देवे पड़ेला. चेन्नई में मजूरी करत बेरा हेल्पर के काम से उनका रोज के 900 के कमाई हो जात रहे.

“पहिले हम समय पर ब्याज चुका देत रहीं. अब त ब्याजो जमा भइल जा रहल बा. सगरे घर के जिम्मेदारी हमरे पर बा. ई सब सोच-सोच के दिमाग घूमे लागता,” मांझी कहत बाड़न.

परिवार के पेट कइसे भरी, एकर उनका बहुते चिंता बा. ऊ कहत बाड़न, “हमरा फेरु कमाए खातिर बाहर जाए पड़ी. आउर कवनो रस्ता नइखे.”

फिलहाल त एह मजूर लोग के भविष्य मजूरी ना, गैसे तय कर रहल बा.