பிகாரில் தம் கதைகள் சொல்லும் மரணமுற்ற பழங்குடிகள்

“இவரை பாருங்கள்! இறந்து போயும் நடந்து கொண்டிருக்கிறார்.”

அமித் மராண்டியை சமீபமாக பலர் கேலி பேசுகிறார்கள். இன்றும் பேசுகிறார்கள். அவரை பார்த்து சிரித்து கொண்டிருக்கும் ஆறு சக கிராமவாசிகள் அமர்ந்திருக்கும் மச்சான் (மூங்கில் பெஞ்ச் போன்ற அமைப்பு) நோக்கி அவர் செல்கிறார்.

சிரிப்பில் இணையும் 32 வயது சந்தால் பழங்குடியின் உணர்வு மாறுகிறது. முகத்தில் கோஅம் பூண்டு, “என்னை பாருங்கள், உயிருடன் இருக்கிறான். ஆனால் இறந்துவிட்டதாக அறிவித்திருக்கிறார்கள்,” என்கிறார்.

பிகாரின் லோசிங்க்னா கிராமத்தை சேர்ந்த தினக்கூலியான அவர், இறந்து போன வாக்காளர்கள் பட்டியலில் தன் பெயர் இடம்பெற்றிருப்பது குறித்து சொல்கிறார். வாக்காளர் பட்டியல் சிறப்பு தீவிர திருத்த நடவடிக்கையில் இப்பட்டியல் தயார் செய்யப்பட்டது. வாக்காளர் பட்டியலில் தகுதியற்ற வாக்காளர்களை நீக்கவென மாநில தேர்தல் ஆணையத்தால் இந்த செயல்பாடு முன்னெடுக்கப்பட்டது. ஆனால் இங்கு, பல தகுதி பெற்ற பழங்குடி வாக்காளர்களின் பெயர்கள் ‘இறந்தவர்கள்’ பட்டியலில் இடம்பெற்றிருக்கின்றன. செல்பேசியில், உள்ளூர் நிருபர்களிடம், அமித் பெயர் பட்டியலில் இருக்கும் தகவலை நான் கூறினேன்.

இறந்தவர்கள் பட்டியலில் தன் பெயர் இடம்பெற்றிருப்பது குறித்து அவருக்கு கவலை இருக்கிறது: “நிச்சயமாக கவலை இருக்கிறது.”

நண்பகல் 12 மணி. பழங்குடி குக்கிராமமான லோவாவில், வாக்குச்சாவடி எண் 223ல் நீக்கப்பட்ட வாக்காளர்கள் பட்டியலுடன் நின்று கொண்டிருந்தேன். நீக்கப்பட்ட வாக்காளர்கள் குறித்த பட்டியல்கள் பற்றி தேர்தல் ஆணையத்தை ஆய்வு செய்து கொண்டிருந்தபோது இந்த குக்கிராமத்தை கண்டறிந்தேன். பல பழங்குடி மக்களின் பெயர்கள் நீக்கப்பட்டிருக்கும் லொகிசிங்கா கிராமத்தின் 223ம் வாக்குச்சாவடியை இப்படித்தான் கண்டறிந்தேன்.

சந்தால் பழங்குடி குக்கிராமமான இதன் பெயர், மரத்தின் பெயரில் இருந்து பெற்ற பெயர். துமார் அல்லது குலார் (கொத்து அத்தி) மரத்தை சந்தாலி மொழியில் ‘லொவா’ எனக் குறிப்பிடுவார்கள். ஆஸ்த்ரோஆசிய மொழியான இதை, இந்தியாவில் 74 லட்சம் பேர் பேசுகிறார்கள்.

ஊருக்குள் ஒரு காலத்தில் பெரிய அத்தி மரம் இருந்ததால், மண் குடிசைகள் அதிகம் இருக்கும் சந்தாலிகளின் இந்த ஊர் அப்பெயர் பெற்றதாக உள்ளூர்வாசிகள் சொல்கின்றனர். சந்தாலி மக்களின் சராசரி மாத வருமானம் 6000-க்கும் குறைவாக இருப்பதாக 2022-2023 ஆண்டு பிகார் சாதிய கணக்கெடுப்பு தெரிவிக்கிறது. ஐந்து சந்தால் பழங்குடிகளில் ஒருவர் சிறு விவசாயியாகவோ குத்தகை விவசாயியாகவோ இருக்கின்றனர். மீதமுள்ளவர்கள் அமித்தை போல தினக்கூலியாக இருக்கின்றனர். பாட்னாவில் ஓட்டுநராக இருக்கிறார் அவர்.

செப்டம்பர் மாத வெயில் நாள் ஒன்றில், பழுப்பு மழைமேகங்கள் வானில் மிதந்து கொண்டிருந்தன. லொவா குக்கிராமம் ஆளரவமற்று இருந்தது. 19-லிருந்து 50 வயது வரை இருந்த சிலர் ஒரு பெஞ்சில் அமர்ந்து பேசிக் கொண்டிருந்தது மட்டும்தான் அங்கிருந்த ஒரே சத்தம். அவர்களில் சிலர் தங்களின் செல்பேசிகளில் வேடிக்கையான ரீல்களை பார்த்துக் கொண்டிருந்தனர்.

பட்டியலை கொண்டு சென்றிருந்த நான், என்னை அறிமுகப்படுத்திக் கொண்டு, கையிலிருந்த பட்டியலை அவர்களிடம் காட்டினேன். இந்த பெயர்கள் யாவும் ‘இறந்து விட்டதாக’ குறிப்பிட்டு தேர்தல் ஆணையத்தால் வாக்காளர் பட்டியலிலிருந்து நீக்கப்பட்டிருப்பதாக கூறினேன்.

உடனே அவர்கள் என்னை கவனிக்கத் தொடங்கினர். தங்களின் பெயர்கள் பட்டியலில் இருக்கிறதா என தெரிந்து கொள்ள வாக்காளர் அட்டைகளை கொண்டு வர விரைந்தனர். இறந்தவர்கள் பட்டியலில் பெயர் இல்லை என தெரிந்து பலர் நிம்மதி பெருமூச்சு விட்டனர்.

ஆனால் ‘உயிரோடிருக்கும்’ அதிர்ஷ்டத்தை அனைவரும் இங்கு பெற்றிருக்கவில்லை.

நவம்பர் 2025-ல் பிகாரில் தேர்தல் நடக்கவிருக்கிறது. 243 சட்டசபை தொகுதிகளில் 7.89 கோடி வாக்காளர்கள் வாக்களிக்கவிருக்கின்றனர். ஒன்றியத்தில் ஆளும் பாஜக, பிகாரில் தடம் பதிக்க ஆர்வத்துடன் இருக்கிறது. SIR நடவடிக்கையை, வாக்காளர் பட்டியல்கள் சரிபடுத்தப்பட தேர்தல் ஆணையம் செய்கிறது. ஆனால் பாஜகவுக்காக இந்த முன்னெடுப்பு செய்யப்படுவதாக எதிர்க்கட்சிகள் சொல்கின்றன.

ஆகஸ்ட் 1, 2025 அன்று, வரைவு வாக்காளர் பட்டியல் வெளியிடப்பட்டது. உச்சநீதிமன்றம் தலையிட்டதால்தான் அதுவும் நடந்தது. சிறப்பு தீவிர திருத்தத்தில், பிகாரை சேர்ந்த 65 லட்சம் வாக்காளர்களின் பெயர்கள் நீக்கப்பட்டன. அவற்றில் 36 லட்சம் பெயர்கள், கண்டறியப்பட முடியாமலும் நிரந்தமாக புலம்பெயர்ந்ததாலும் நீக்கப்பட்டது. 22 லட்சம் பேர் இறந்துவிட்டதாக கண்டறியப்பட்டது. மிச்ச ஏழு லட்சம் பெயர்கள் பலமுறை பதிவு செய்யப்பட்டிருக்கிறது.

சகாய் சட்டசபை தொகுதிக்குள் வரும் லொசிங்னா கிராமமும் பாதிக்கப்பட்டிருக்கிறது. 169 பெயர்கள் நீக்கப்பட்டிருக்கிறது. கிட்டத்தட்ட அங்கு வசிக்கும் பழங்குடிகளில் 50 சதவிகிதம் பேர். இங்குள்ளவர்கள், பட்டியலில் இடம்பெற்றுள்ளவர்களில் பாதி பேரின் பெயர்கள், இறந்துவிட்டதாக தவறாக குறிப்பிடப்பட்டு நீக்கப்பட்டிருப்பதாக கூறுகிறார்கள்.

அந்த பெயர்களில் அமித் மராண்டியின் பெயரும் அடக்கம். அவரின் வாக்காளர் அடையாள அட்டை எண், நீக்கப்பட்ட வாக்காளர்கள் பட்டியலில் இடம்பெற்றது. சந்தால் பழங்குடியான அமித், ட்ரக் ஓட்டுநராக இருக்கிறார். ஐந்தாம் வகுப்போடு படிப்பை நிறுத்தியவர். நான்கில் ஒரு சந்தால் பழங்குடி ஆரம்பப் பள்ளியை முடிக்கிறார். ஒரு சதவிகிதத்துக்கும் குறைவான சந்தாலிகள் பல்கலைக்கழகம் வரை செல்கின்றனர்.

தவறாக அவரது பெயர் சேர்க்கப்பட்டது எப்படி எனக் கேட்டதற்கு, கணக்கெடுப்பு படிவத்தை கொடுக்காமல் இருந்ததால் இருக்கலாம் என பதிலளிக்கிறார். எல்லா தடவையும் வாக்களித்ததாக அமித் குறிப்பிடுகிறார்: “ஒவ்வொரு முறையும் நான் வாக்களித்திருக்கிறேன். பஞ்சாயத்து தேர்தல்களில் தவற விட்டாலும், மக்களவை மற்றும் சட்டசபை தேர்தல்களில் தவறாமல் வாக்களித்திருக்கிறேன்.”

2024ம் ஆண்டு மக்களவை தேர்தலில் வாக்களிக்க இரு நாட்களுக்கான வருமானத்தை இழந்ததாக அவர் நினைவுகூருகிறார். “பாடனாவிலிருந்து நான் ரயிலில் வந்து, பின் பேருந்து பிடித்து கிராமத்தை அடைந்தேன். வாக்களிக்க இரண்டு நாட்கள் தங்கி இருந்தேன். 1,000 ரூபாய் வருமானத்தை இழக்க வேண்டி இருந்தது,” என்கிறார் அவர்.

வாக்காளர் பட்டியலிலிருந்து அவரது பெயர் நீக்கப்பட்டிருக்கும் தகவல் அவரை பதற்றத்துக்குள்ளாக்கியது. “இதனால் நான் பல சிரமங்களை எதிர்கொள்வேன். அரசு திட்டங்களின் பலன் எனக்கு கிடைக்காதல்லவா?” என கவலையுடன் கேட்கிறார்.

பிகாரில் 21.99 லட்சம் பழங்குடிகள் இருப்பதாக 2022-2023ல் நடத்தப்பட்ட மாநில அரசின் சாதிய கணக்கெடுப்பு தெரிவிக்கிறது. ஒரு காலத்தில் இன்னும் அதிகமாக அம்மாநிலத்தில் பழங்குடி மக்கள் இருந்த நிலையில், பெரும்பாலானோர் புதிதாக 2000மாம் ஆண்டில் உருவாக்கப்பட்ட ஜார்க்கண்ட் மாநிலத்துக்கு புலம்பெயர்ந்து சென்றுவிட்டனர். ஜார்க்கண்டில் 26 சதவிகிதமாக இருக்கும் பழங்குடியினர் தேர்தலில் செல்வாக்கு செலுத்தும் அளவுக்கு வலிமை கொண்டிருக்கின்றனர்.

ஆனால் பிகாரிலோ மொத்த மக்கள்தொகையில் அவர்கள் இரண்டு சதவிகிதம் மட்டும்தான் இருக்கின்றனர். பெரும்பாலும் ஊடகங்களாலும் மாநில அரசியலாலும் புறக்கணிக்கப்படுகிறார்கள். பல தொகுதிகளில் சிதறிக் கிடக்கும் அவர்களின் தாக்கம், தேர்தலில் பெரிதாக இருப்பதில்லை. எனவே அவர்களது நீக்கம் என்பது, அரசியல் கட்சிகளுக்கோ ஊடகங்களுக்கோ பெரிய விஷயமாக இருக்கவில்லை.

கட்டுரையாளர் சந்தித்த பழங்குடி வாக்காளர்களில் பலருக்கு SIR பற்றி ஏதும் தெரியவில்லை. ஏன் அது நடத்தப்பட்டது என்றோ ஏன் அவர்களின் பெயர்கள் நீக்கப்பட்டது என்றோ அவர்களுக்கு தெரியவில்லை.

“நீங்கள் இப்போது சொன்ன பிறகுதான் எனக்கு தெரியும்,” என்கிறார் சம்பா மராண்டி. 35 வயது பழங்குடியான அவர், தன்னுடைய பெயர் நீக்கப்பட்ட விஷயமே தெரியாது என்கிறார். 223ம் வாக்குச்சாவடிக்கான பக்கத்தை எடுத்து, அவருக்குக் காட்டினேன். அவருடைய வாக்காளர் அடையாள அட்டை எண்ணை கொண்டு, அவரின் பெயர் நீக்கப்பட்டதை அவரிடம் உறுதி செய்தேன்.

சுவாரஸ்யம் என்னவெனில் அவரது கணவரான சஞ்சய் முர்முவின் பெயர் வரைவு பட்டியலில் இருக்கிறது. அவரருகே நிற்கும் 40 வயது கணவர், புன்னகைத்து, “இது எப்படி நடந்தது? இவள் இன்னும் உயிருடன்தான் இருக்கிறாள்,” என்கிறார்.

திருத்தத்துக்கு பொறுப்பாக இருப்பவர்கள் வாக்குச்சாவடி அலுவலர்கள் (BLO). கணக்கெடுப்பு படிவங்களை விநியோகித்து, தேவையான அடையாள சான்றாவணங்களுடன் திரும்பப் பெற்று, தரவுகளின் அடிப்படையில் வரைவு பட்டியலை தயார் செய்வதுதான் 78,000 அலுவலர்களின் வேலை. இலக்கை முடிக்க அவர்களுக்கு ஒரு மாதம்தான் இருந்தது. நாளொன்றுக்கு 40 வாக்காளர்களை பரிசீலிக்க வேண்டும். பெரும் வேலையான அது அவர்களுக்கு சிரமத்தை கொடுக்கும். பிறருக்கு வாக்காளர் பட்டியலில் இடம்பெறாமல் போகும் சாத்தியமும் ஏற்படும்.

வாக்குச்சாவடி அலுவலரை தவறவிட்டுவிட்டால், நீங்கள் ‘இல்லாமல்’ போவீர்கள். உண்மையாக.

“பழங்குடி வாக்காளர்களின் பெயர்கள் நீக்கப்பட்ட பல வாக்குச்சாவடிகள் சகையில் இருக்கிறது,” என்கிறார் பழங்குடி சங்கத்தின் மாவட்ட ஒருங்கிணைப்பாளரான பசுதேவ் ஹன்ஸ்தா.

ஊடகங்களில் பேசியதற்காக பல வாக்குச்சாவடி அலுவலர்கள் கண்டிக்கப்பட்டனர். எனவே பெயர் வெளியிட விரும்பாத, ஜமுய் பகுதியை சேர்ந்த பழங்குடி வாக்குச்சாவடி அலுவலர் ஒருவர், காடுகளில் வசிக்கும் பழங்குடிகளை சந்திக்க, குறைந்தபட்சம் 10 கிலோமீட்டர் தூரம் பயணிக்க வேண்டியிருப்பதாக சொல்கிறார். “தினசரி 20-25 வீடுகளுக்கு செல்வேன். வீடுகள் அருகே இருந்தால், 50 வீடுகள் வரை செல்ல முடியும்,” என்கிறார் அவர்.

அது மட்டுமல்ல. களத்தில் 12 மணி நேரங்கள் இருந்த பிறகு, “படிவங்களையும் அடையாள ஆவணங்களையும் தேர்தல் ஆணைய இணையதளத்தில் பதிவேற்ற வேண்டும். பகலில் இணைய இணைப்பு மோசமாக இருக்கும். எனவே இரவில் பதிவேற்ற வேண்டும். நள்ளிரவு 12 அல்லது 1 மணி ஆகிவிடும்,” என்கிறார்.

வீட்டில் ஆளில்லை என்றாலும் மீண்டும் அதே வீடுகளுக்கே பலமுறை செல்ல நேர்ந்தாலும் அவர்களின் நேரம்தான் விரயமாகிறது. “இலக்கை எட்டவில்லை எனில் நடவடிக்கை எடுக்கப்படும் என (மூத்த அதிகாரிகள்) மிரட்டுகின்றனர். பல வாக்காளர்களை பள்ளிக்கு வந்து படிவத்தை நிரப்பும்படி சொல்வோம்,” என்கிறார் அவர். குறைந்தபட்சம் இரண்டு மாத காலமும் தெளிவான விதிமுறைகளும் சரியாக செயல்பட உதவியிருக்கும் என்கின்றனர்.

ஹன்ஸ்தா ஒப்புக் கொள்கிறார்: “பழங்குடி வாக்குச்சாவடி அலுவலர்களுக்கு குறைவான நேரம் கொடுக்கப்பட்டதாகதான் நான் நினைக்கிறேன். அவர்கள் பல பழங்குடி குடும்பங்களை சென்றடையாததால், ‘இறந்துவிட்டார்கள்’ என குறிப்பிட்டிருக்கலாம்,” என்கிறார் அவர். தேர்தல் ஆணைய விதிமுறைகளின்படி, ஒரு வாக்குச்சாவடி அலுவலர் வாக்காளரின் வீட்டுக்கு மூன்று முறையேனும் செல்ல வேண்டும். ஆனால் நான் பேசிய பழங்குடியினர், வாக்குச்சாவடி அலுவலர் எவரும் வரவில்லை என்றனர்.

2005ம் ஆண்டிலிருந்து பாஜக மற்றும் ஐக்கிய ஜனதா தளம் ஆகிய கட்சிகளின் கூட்டணி மாநிலத்தின் ஆட்சியில் இருந்தன. கடந்த 20 வருடங்களில் ஐக்கிய ஜனதா தளம், இரண்டு முறை தேசிய ஜனநாயக கூட்டணியில் இருந்து வெளியேறி, குறுகிய காலத்துக்கு பிகாரின் மாநில கட்சியான ராஷ்ட்ரிய ஜனதா தளத்துடன் கூட்டணி வைத்தது.

ஒன்றியத்தில் ஆட்சியில் இருக்கும் பாஜகவுக்கு, பிகாரில் தனியாக ஆட்சியமைப்பது மிகவும் முக்கியம். இதுவரை கூட்டணியில் மட்டுமே இடம்பெற்ற அக்கட்சி, தற்போதும் ஐக்கிய ஜனதா தள கூட்டணியில் இருக்கிறது. ஆனால் ஆட்சியில் அமர விரும்புகிறது. தற்போது ஆட்சியில் இருக்கும் ஐக்கிய ஜனதாதளம், அதன் தலைவரும் முதலமைச்சருமான நிதிஷ் குமாரின் ஆரோக்கியம் நலிவடைந்திருப்பதை அடுத்து, பலவீனமாகி இருக்கிறது.

சட்டசபை தேர்தல் நெருங்கும் நிலையில், தேர்தல் ஆணையம், வாக்காளர் பட்டியல் சிறப்பு தீவிர திருத்த நடவடிக்கையை (SIR) தொடங்கியது. “SIR-ன் நோக்கம், இந்தியாவில் தகுதி பெற்ற அனைவரும் வாக்காளர் பட்டியலில் இடம்பெறச் செய்வதும் தகுதியற்ற வாக்காளர்களை நீக்குவதும்தான்,” என தேர்தல் ஆணைய செய்தியறிக்கை தெரிவிக்கிறது. வேகமாக நடக்கும் நகரமயமாக்கல், மரணங்கள் பதிவு செய்யப்படாதது, தொடர் புலப்பெயர்வு ஆகியவற்றை, பட்டியல் திருத்தத்துக்கான காரணங்களாக தேர்தல் ஆணைய இணையதளம் தெரிவிக்கிறது.

கணக்கெடுப்பு படிவங்கள் வாக்காளர்களுக்கு விநியோகிக்கப்பட்டு, நிரப்பப்பட்ட படிவங்கள் சேகரிக்கப்பட்டு தேர்தல் ஆணைய தளத்தில் பதிவேற்றப்பட்டன. இந்த செயல்பாடு ஜூன் 15ம் தேதி தொடங்கி, ஒரு மாதம் வரை நடந்தது. வரைவு வாக்காளர் பட்டியல், ஆகஸ்ட் 1, 2025 அன்று வெளியிடப்பட்டது.

பொதுவெளிக்கு பட்டியல்கள் வந்ததும், வாக்காளர்கள் இறந்து விட்டதாக தவறாக பட்டியல்கள் தெரிவிப்பதாக பிகாரின் பல பகுதிகளில் இருக்கும் புகார்கள் எழுந்தன. வீடுகளில் இருக்கும் பலர், அங்கு வசிக்கவில்லை என்றும் முன்னோர்களின் வீடுகளில் வசிப்பவர்கள் ‘நிரந்தரமாக புலம்பெயர்ந்து விட்டதாகவும்’ குறிப்பிடப்பட்டு, அவர்களின் பெயர்கள் நீக்கப்பட்டிருந்தன. வாக்காளர் பட்டியல்களில் பெயர்களை சேர்க்க வேண்டுமென 36.475 பெரெ தேர்தல் ஆணையத்துக்கு கோரிக்கைகள் அனுப்பினர். கட்சிகள் 25 கோரிக்கைகளை அனுப்பின.

“உயிருடன் இருப்பவர்கள் இறந்துவிட்டதாக குறிப்பிடப்பட்டிருக்கிறது. இறந்து போனவர்கள் உயிருடன் இருப்பதாக குறிப்பிடப்பட்டிருக்கிறது,” என கோபத்துடன் சொல்கிறார் சங்கிதா சோரன்.

லொவா குக்கிராமத்திலிருந்து இரண்டு கிலோமீட்டர் தொலைவில்தான் அவர் வசிக்கிறார். சமீபத்தில்தான் அவரது வீடு கட்டப்பட்டது. செங்கல்கள், களிமண்ணால் பூசப்பட்டிருக்கிறது. மழை பெய்தால் களிமண்ணை அடித்து சென்றுவிடும் அபாயம் இருக்கிறது. ஆனால் மண்ணையும் சிமெண்ட்டையும் பயன்படுத்தும் வசதி சங்கிதாவுக்கு இல்லை. “25,000 ரூபாயை மண்ணுக்கும் சிமெண்டுக்கும் வைத்திருந்தேன். ஆனால் ஒரு திருடன் திருடி சென்றுவிட்டான்.” எனவே மண்ணை கொண்டு செங்கற்களை பூசுவது தவிர வேறு வழி அவருக்கு இருக்கவில்லை.

இரண்டு கட்டா நிலம் (ஏக்கரின் பத்து பங்குகளில் ஒரு பங்கு) கொண்டிருக்கும் குடும்பத்தில், கணவரான மனோஜ் முர்மு வேலைக்காக புலம்பெயரும் நிலை இருக்கிறது. கேரளாவில் உள்ள ஓர் ஆலையில் கான்க்ரீட் தளங்களை உருவாக்கி, நாளொன்றுக்கு 500 ரூபாய் வருமானம் ஈட்டுகிறார் அவர்.

லொவாவில் 30லிருந்து 35 பழங்குடி குடும்பங்களின் ஆண் உறுப்பினர்கள் பெங்களூரு, கேரளா, சென்னை தொடங்கி ஜம்மு காஷ்மீர் வரை தினக்கூலி வேலை பார்க்க புலம்பெயருகின்றனர். நாட்டின் ஏழ்மையான மாநிலங்களில் ஒன்றாக இருக்கும் பிகாரில், புலப்பெயர்வு விகிதம் தேசிய சராசரியை விட அதிகம்.

24 வயது சங்கிதா மற்றும் அவரது கணவர் 28 வயது மனோஜ் ஆகியோருக்கு ஆறு வயது மகளும் நான்கு வயது மகனும் இருக்கின்றனர்.

அதிகாரப்பூர்வமான தரவுகளிலோ, அந்த குடும்பமே இல்லை.

சமீபத்திய வாக்காளர் பட்டியல் தீவிர திருத்தம் குறித்தும் அதில் அவர் பெயரும் அவரது கணவர் பெயரும் நீக்கப்பட்டது குறித்தும் நான் கூறினேன். அவர்களின் வாக்காளர் அடையாள அட்டைகளை அவர் கொண்டு வந்தார். இரு அட்டைகளின் எண்களும், நீக்கப்பட்டவர்களின் பட்டியலுடன் பொருந்திப் போனது. அவர்களின் பெயர்கள் நீக்கப்பட்ட காரணமாக ‘மரணம்’ என தேர்தல் ஆணையம் குறிப்பிட்டிருந்தது.

”அவர்கள் என்ன வேலை பார்க்கிறார்கள் என புரியவில்லை,” என்கிறார் சங்கிதா கோபத்துடன். மணமகளாக 2017ம் ஆண்டில் குக்கிராமத்துக்கு வந்த அவரின் பெயர், 2020ம் ஆண்டில் வாக்காளர் பட்டியலில் சேர்க்கப்பட்டது. 2024ம் ஆண்டு தேர்தலில் அவர் வாக்களித்தார். “ஒரு கிலோமீட்டர் நடந்து சென்று, இரண்டு மணி நேரங்கள் வரிசையில் காத்திருந்து நான் வாக்களித்தேன்.”

நீக்கப்பட்ட பட்டியலிலிருந்து தங்களின் பெயர்களை நீக்கி, வாக்காளர் பட்டியலில் இடம்பெற வைக்க வேண்டிய சிரமத்தால் மட்டும் சங்கிதா கவலை கொள்ளவில்லை. ஏழைகளுக்கான அரசு திட்டங்களின் பயனை அவர்கள் பெற முடியாது என்கிற அச்சமும் கூடுதலாக இருக்கிறது. “ஆவணத்தில் எங்களை அவர்கள் கொன்று விட்டனர். இனி அரசாங்கத்திடமிருந்து எந்த நலனும் எங்களுக்குக் கிடைக்காது.”

அவரை போலவே ‘இறந்தவர்கள்’ பட்டியலில் இடம்பெற்றிருக்கும்ப் பக்கத்து வீட்டுக்காரரான சம்பா மராண்டி, தன் அச்சத்தை பகிர்ந்து கொள்கிறார்: “அரசு திட்டங்களுக்கு நாங்கள் விண்ணப்பிக்கும்போது, இறந்துவிட்டதாக அறிவிக்கப்பட்டிருக்கும் நாங்கள் புறக்கணிக்கப்படுவோம்.” மானியவிலையிலான உணவுப்பொருட்களும் பிரதமர் விவசாயத் திட்டத்தின் கீழ் வரும் ரூ.6000 ரொக்கமும் வரும் நாட்களில் கிடைக்காமல் போகும்.

“பிழைப்புக்காக நாங்கள் நிலங்களிலும் கட்டுமான தளங்களிலும் தினக்கூலி தொழிலாளர்களாக பணிபுரிகிறோம். மானிய விலை உணவுப் பொருட்களும் விவசாயி உதவித் தொகையும் எங்களுக்கு பெரும் உதவியாக இருக்கின்றன,” என்கிறார் சம்பா.

அவரின் கணவரான சஞ்சய் கேரளாவில் வேலை பார்க்கிறார். ஜூலை மாதத்திலிருந்து வீட்டில் இருக்கிறார். அவரின் பெயர் வாக்காளர் பட்டியலில் இடம்பெற்றிருக்கிறது. ஆனால் பொது விநியோகத் திட்ட பட்டியலிலிருந்து (மகனின் பெயருடன்) நீக்கப்பட்டிருக்கிறது. “தற்போது எனக்கு மட்டும்தான் ரேஷன் பொருட்கள் கிடைக்கின்றன. ஏன் என் கணவர் மற்றும் மகனின் பெயர்கள் நீக்கப்பட்டன என தெரியவில்லை. அது குறித்து விசாரித்தபோது, மீண்டும் விண்ணப்பிக்க வேண்டுமென சொன்னார்கள்,” என்கிறார் அவர்.

வாக்குச்சாவடி அலுவலர் சம்பா மராண்டியை சந்தித்தபோது, “உங்களின் பெயர் இடம்பெற்றிருக்கிறது. நீங்கள் எதுவும் செய்ய வேண்டியதில்லை. பட்டியலில் இடம்பெறாத பெயர்கள்தான் சேர்க்கப்பட்டு வருகின்றன,” என தவறாக கூறியிருக்கிறார்கள்.

ஆனால் அவரின் பெயர் தற்போது பட்டியலில் இல்லை.

பெயர் நீக்கப்பட்டிருக்கும் அமித் மராண்டி சொல்கையில், “SIR செயல்பாட்டுக்காக எவரும் கணக்கெடுப்பு படிவத்துடன் வரவில்லை,” என்கிறார். பாட்னாவில் பணிபுரியும் அவர், அரை நாள் பயணித்து வீடு வர வேண்டும். ஆனால் கடந்த மூன்று மாதங்களாக அவர் லொவாவில்தான் இருக்கிறார்.

அமித், தந்தையின்றி தாயால் வளர்க்கப்பட்டவர். மூன்று சகோதரர்களில் இளையவரான அவர், ட்ரக்கை ஓட்டி, நாளொன்றுக்கு ரூ.500 வருமானம் ஈட்டுகிறார். 29 வயது மனைவி சுனிதா ஹெம்ப்ரம் மற்றும் இரண்டிலிருந்து ஏழு வயது வரை இருக்கும் நான்கு குழந்தைகள் ஆகியோருடன் பாட்னாவில் வாடகை அறையில் அவர் வசிக்கிறார்.

“சொந்தமாக ஆறு கட்டா நிலம் (கிட்டத்தட்ட 0.083 ஏக்கர்) இருப்பதால் அடிக்கடி நான் ஊருக்கு வருகிறேன். அந்த நிலத்தில் நான் விவசாயம் பார்க்கிறேன். என் தாய், முன்னி ஹெம்ப்ராம் ஊரில் வாழ்கிறார்,” என்கிறார் அமித்.

மனோஜ் முர்மு ஒரு மாதம் ஊரில் இருந்தும் எந்த வாக்குச்சாவடி அலுவலரும் அவரை பார்க்கவில்லை. அவரின் மனைவியான சங்கிதா சொல்கையில், விறகு எடுக்க தான் வெளியே சென்றலும், கணவர் எப்போதும் வீட்டில் இருந்ததாக சொல்கிறார். “கடந்த ஒன்றரை மாதங்களில், வாக்காளர் பட்டியல் திருத்தம் குறீத்து எவரும் எங்களிடம் வந்து தெரிவிக்கவில்லை,” என்கிறார் அவர் உறுதியாக.

ஆனாலும் அவருக்கு ஒரு கேள்வி இருக்கிறது: “நாங்கள் வாக்களித்தோம். அதற்கு அர்த்தம் நாங்கள் அரசின் மக்கள்! பின் ஏன் என் பெயர் நீக்கப்பட்டது?”

வாக்காளர் பட்டியலில் தன் பெயர் நீக்கப்பட்டது தெரியாமல், மனோஜ் ஆகஸ்ட் மாத இறுதியில் கேரளாவுக்கு சென்றுவிட்டார். “நான்கு நாட்களுக்கு முன்பு அவரை தொடர்பு கொண்டு, இந்த தகவலை சொன்னேன். திருத்தம் செய்வதற்கு திரும்ப வர முடியாது என்றார்,” என்கிறார் அவர். பெயர் சேர்க்கப்பட அவர்கள் விரும்பினாலும், எப்படி செய்வதென அவர்களுக்கு தெரியவில்லை.

”சார், நீங்கள் பெயரை சேர்த்து விடுங்கள்,” என கட்டுரையாளரை அவர் வேண்டுகிறார்.

பின்குறிப்பு: இறுதி வாக்காளர் பட்டியலை செப்டம்பர் 30, 2025 அன்று தேர்தல் ஆணையம் பிரசுரித்தது. புதிய வாக்காளர் பட்டியலில் 7.42 கோடி வாக்காளர்கள் இடம்பெற்றிருக்கின்றனர். 7.89 கோடி வாக்காளர்களை கொண்டிருந்த முந்தைய பட்டியலிலிருந்து 47 லட்சம் பேர் நீக்கப்பட்டிருக்கின்றனர். சிறப்பு தீவிர திருத்தத்தில், 68.66 லட்சம் பேர் நீக்கப்பட்டு, 21.53 தகுதியான வாக்காளர்கள் சேர்க்கப்பட்டிருப்பதாக தேர்தல் ஆணையம் தெரிவித்திருக்கிறது.

இறுதி வாக்காளர் பட்டியல் வெளியாகி ஒரு நாள் கழித்து, அக்டோபர் 1, 2025 அன்று, இக்கட்டுரையில் இடம்பெற்றிருக்கும் நான்கு பழங்குடியினரின் வாக்காளர் அடையாள அட்டைகளின் எண்களை கொண்டு கட்டுரையாளர் ஆய்வு செய்ததில், நான்கு பெயர்களும் நீக்கப்பட்டிருந்தது கண்டறியப்பட்டது. பிகார் சட்டசபை தேர்தலில் அவர்களால் வாக்களிக்க முடியாது

இக்கட்டுரை தஷிலா-பாரி சீனியர் மானியப்பணி 2025 கீழ் பிரசுரிக்கப்பட்டது

தமிழில்: ராஜசங்கீதன்