سیلاب کے قہر کا سامنا کرتا پنجاب

ماچھی وال گاؤں کے لوگوں نے اس رپورٹر کو چائے پلائی، جس کا سامان انہیں قدرتی آفت کے دوران تقسیم کی گئی راحت اشیاء سے ملا تھا۔ راوی ندی کا بند ٹوٹنے سے آئے زبردست سیلاب نے ان کے گھر تباہ کر دیے، ان کے کھیت گاد اور سیلاب کے پانی سے بھر گئے۔ سیلاب نے انہیں ایسا بے سہارا کر دیا کہ وہ اب عارضی خیموں میں رہنے کو مجبور ہیں۔

اگست میں آئے سیلاب میں وہ اپنا تقریباً سب کچھ کھو چکے ہیں۔

سربجیت کور، رمداس بلاک کے ماچھی وال گاؤں کے باہر ایک جھونپڑی میں بیٹھی ہیں۔ یہیں پاس میں ان کا گھر تھا جسے راوی ندی اپنے ساتھ بہا کر لے گئی۔ اپنی زندگی کے مشکل حالات کے بارے میں بات کرتے ہوئے بھی وہ اپنے چہرے پر مسکراہٹ بنائے ہوئی تھیں۔

سربجیت (۱۸) نے پاری کو بتایا، ’’ہم پوری رات بند کو مضبوط بنائے رکھنے کی کوشش کرتے رہے۔ گزشتہ ۲۷ اگست کو صبح ۶ بجے گرودوارہ میں لاؤڈ اسپیکر سے اعلان ہوا کہ دُھسّی [مٹی سے بنا بند] ٹوٹ گیا ہے، جسے پورے گاؤں نے سنا۔ ہم سب کسی اونچی جگہ پناہ لینے کے لیے بھاگے۔‘‘

ماچھی وال، امرتسر ضلع کا ایک چھوٹا سا گاؤں ہے، جس کی آبادی تقریباً ۱۱۸۶ ہے (مردم شماری، ۲۰۱۱)۔ یہاں زیادہ تر جاٹ سکھ اور رائے سکھ برادری کے لوگ رہتے ہیں، جن میں سے رائے سکھ، پنجاب میں درج فہرست ذات کے طور پر درج ہیں۔ دلت خاندان کسی طرح اپنی چھوٹی چھوٹی زمینوں پر کھیتی کر کے اور دوسرے کے کھیتوں میں بطور زرعی مزدور کام کر کے گزارہ کرتے ہیں۔

سربجیت کی فیملی بے زمین رائے سکھ ہے، اور دوسرے کے کھیتوں میں مزدوری کر کے اپنا پیٹ پالتی ہے۔ سربجیت کی ماں بھی زرعی مزدور تھیں، جن کی ۶ مہینے قبل موت ہو گئی؛ ان کے والد مرگی میں مبتلا ہیں اور کام کرنے سے قاصر ہیں۔ دو بھائی اور ایک بہن والا یہ خاندان اپنا گھر چلانے کے لیے مزدوری کرتا ہے۔

سیلاب کی وجہ سے گاؤں تین چار دن تک پانی میں ڈوبا رہا، جہاں پانی کی سطح ۸ فٹ تک پہنچ گئی تھی۔ اس میں مزدوروں کے گھر تباہ ہو گئے۔ کھیتوں میں خریف کے سیزن کی دھان کی فصل لگی تھی، جو تقریباً تیار ہو گئی تھی۔ لیکن فصل برباد ہو گئی اور کھیت گاد سے بھر گئے۔ یہاں تک کہ بڑے بڑے یوکولپٹس کے درخت بھی جڑ سے اکھڑ گئے۔

امرتسر اور گرداس پور ضلعوں کے بڑے حصے سیلاب میں ڈوب گئے جب رنجیت ساگر بند سے اچانک راوی ندی میں پانی چھوڑا گیا۔ رنجیت ساگر بند، جسے تھین باندھ بھی کہتے ہیں، ریاست کے شمالی سرے پر واقع ہے اور سربجیت کے گاؤں سے تقریباً ۱۰۰ کلومیٹر دور ہے۔ مانسون کے آخری مہینوں میں ہماچل اور جموں و کشمیر میں ہو رہی لگاتار تیز بارش کے سبب بند کی آبی سطح مسلسل بڑھتی رہی، جو ۲۶ اگست تک اپنی زیادہ سے زیادہ استطاعت (۵۲۸ میٹر) تک پہنچ چکی تھی۔

مقامی خبروں کے مطابق، ۲۶ اگست ۲۰۲۵ کو اودھم پور میں ۶۲۹ ملی میٹر بارش ہوئی۔ بند، جو ندی کے بہاؤ کی سمت میں واقع ہے، میں پانی پہلے ہی ۰۰۸ء۵۲۸ کی زیادہ سے زیادہ حد تک پہنچ چکا تھا۔ لیکن جب بارش کا پانی وہاں بھرنے لگا، تب بند کے دروازے کو کھولنے کے سوا دوسرا کوئی متبادل نہیں تھا۔ یعنی ۲۵ء۲ لاکھ کیوسک پانی کے بہاؤ کی جگہ ۱۵ء۲ لاکھ کیوسک پانی چھوڑا گیا۔

پانی کے تیز بہاؤ کے سبب، مادھو پور بند کے دو دروازے ٹوٹ گئے، جسے ۱۹۵۹ میں بنایا گیا تھا۔ اُجھ ندی (معاون ندی) کی تیز موج راوی میں مل گئی اور امرتسر، گُرداس پور کے ساتھ ساتھ بین الاقوامی سرحد سے ملحق علاقے بھی غرقاب ہو گئے۔ سربجیت کا گاؤں پاکستان کی سرحد سے صرف پانچ کلومیٹر دور ہے۔ راوی ندی میں اتنا زبردست سیلاب پچھلی بار ۱۹۸۸ میں دیکھا گیا تھا۔

سربجیت یاد کرتی ہیں کہ کیسے اُس وقت انہیں اور باقی لوگوں کو بھیانک ڈر نے گھیر لیا تھا، جسے وہ الفاظ میں بیان نہیں کر سکتیں۔ انہوں نے پہلے کبھی ایسا کچھ نہیں دیکھا تھا۔ پانی کی سطح بہت تیزی سے بڑھنے لگی، جس سے گاؤں والے زیادہ کچھ بچا نہیں پائے۔ آخرکار وہ زمیندار کے گھر میں پناہ لینے پہنچے، جن کا گھر اونچائی پر تھا۔ جاٹ سکھوں کے زیادہ تر گھر ابھی بھی سلامت ہیں، لیکن ان میں سے کچھ ٹوٹ پھوٹ گئے ہیں۔

یہاں سے گاؤں والے دیکھ سکتے تھے کہ ان کے کھیت پانی میں ڈوب رہے ہیں، ان کے سامان تیر رہے ہیں اور ان کے گھر تباہ ہو گئے ہیں۔ کم از کم تین دن تک گاؤں والے پھنسے رہے۔ کچھ کے پاس خود کے کھانے یا اپنے مویشیوں کو کھلانے کے لیے کچھ نہیں تھا۔ نیشنل ڈیزاسٹر رسپانس فورس (این ڈی آر ایف) کو پہنچنے میں وقت لگا، اس لیے مقامی لوگ ایک دوسرے کی مدد کرتے رہے۔ سیلاب سے امرتسر ضلع میں ۳ء۱ لاکھ سے زیادہ لوگ متاثر ہوئے، اور ’مویشیوں کے نقصان‘ کا اندازہ لگایا جانا ابھی باقی ہے (فلڈ بلیٹن، ۱۸ ستمبر ۲۰۲۵)۔

جسپال سنگھ (۶۲) کہتے ہیں، ’’کم از کم دو دنوں تک ہم تک کوئی کشتی یا مدد نہیں پہنچی۔ ہم ڈر اور بھوک سے پریشان، پانی کے درمیان پھنسے رہے۔‘‘ جسپال سنگھ ایک زرعی مزدور ہیں، جن کے پاس کچھ مویشی بھی ہیں۔ وہ سیلاب سے اپنا کچھ سامان اور مویشی بچانے میں کامیاب رہے۔

سرکاری اعداد و شمار کے مطابق، سیلاب سے ۲۴۹۰ گاؤں متاثر ہوئے ہیں اور ۵۷ لوگوں کی موت ہوئی ہے۔ تقریباً دو لاکھ ہیکٹیئر رقبہ کی فصلیں تباہ ہوئی ہیں، جس میں سب سے زیادہ نقصان اکیلے امرتسر (۲۷۱۵۴ ہیکٹیئر) میں ہوا ہے۔ بلدیو سنگھ نے پاری کو بتایا، ’’زمیندار نے اپنا سب کچھ کھو دیا۔ اور ہمارے پاس بھی کچھ بچا نہیں ہے۔‘‘

عمر کی ساتویں دہائی میں پہنچ چکے بلدیو سنگھ صرف اپنے مویشی ہی بچا پائے۔ اپنی جھونپڑی کے باہر بیٹھے ہوئے وہ بتاتے ہیں، ’’ہم اپنے جانوروں کو چارہ دے رہے تھے کہ تبھی پانی اچانک گھُس آیا۔ ہم وقت رہتے کچھ بھی بچا نہیں سکے۔ ہم صرف اپنے جانوروں کو ہی بچا پائے۔‘‘

اس بزرگ زرعی مزدور نے پاری کو بتایا، ’’اس بار ۱۹۸۸ سے بھی بری حالت تھی۔ ساری زندگی ایتھے ہی لانگھ گئی، کیتھے جاوانگے اسی [ہماری پوری زندگی یہیں کٹ گئی، اب کہاں جائیں گے]؟‘‘

بلدیو سنگھ کی فیملی کے تمام رکن کھیتوں میں مزدوری کرتے ہیں، اور بوائی کے موسم میں ہر مہینہ تقریباً ۸ ہزار روپے کما لیتے ہیں۔ وہ کہتے ہیں، ’’بھُکھّے مرن والی گل آ۔‘‘ یعنی کہ اگر راحت تنظیموں کی مدد نہیں ملتی تو وہ بھوکے مر جاتے۔ انہیں سیلاب کی وجہ سے بیماریاں پھیلنے کی بھی فکر ہے۔

حالانکہ، ستمبر کے پہلے ہفتہ میں پانی کی سطح گھٹ گئی تھی، لیکن کئی بند (دُھسّیاں) ابھی ٹوٹے ہوئے تھے۔ مقامی لوگ غیر سرکاری تنظیموں کی مدد سے انہیں دوبارہ بنانے کی کوشش کر رہے ہیں۔ راحت تنظیموں، مقامی غیر سرکاری تنظیموں، شرومنی گرودوارہ پربندھک کمیٹی، اور پنجاب کے باہر سے شہری (ہریانہ، راجستھان، اتراکھنڈ، اتر پردیش) سیلاب متاثرہ علاقوں میں لوگوں تک راشن، راحت اشیاء، مویشیوں کا چارہ، صفائی سے متعلق سامان اور دوائیں پہنچا رہے ہیں۔

ماحولیاتی تبدیلی کی وجہ سے علاقہ میں بے ترتیب بارش اور موسم کی شدت بار بار دیکھنے کو مل رہی ہے۔ لدھیانہ کے ایک ماحولیاتی کارکن جسکیرت سنگھ کہتے ہیں، ’’رنجیت ساگر جیسے بڑے ہائڈرو الیکٹرک بند موسمیاتی پیشن گوئیوں پر توجہ نہیں دیتے۔ اگست کے وسط میں یہ بند اپنی استعداد کے مطابق بھر جاتے ہیں۔ جب مانسون آتا ہے، تو اسے سنبھالنے کی صلاحیت ان کے پاس نہیں ہوتی۔‘‘

سربجیت ایک ایکڑ رقبہ میں دھان بونے پر ۴۰۰۰ روپے کماتی ہیں۔ اس موسمی کمائی کے علاوہ وہ کھیتوں سے گھاس پھوس صاف کرنے کے لیے فی گھنٹہ ۴۰ روپے مزدوری لیتی ہیں۔ لیکن فی الحال یہ سارے کام ان کے ہاتھ سے نکل گئے ہیں۔ اب وہ کسی طرح اپنی زندگی کو پھر سے سنبھالنے کی کوشش کر رہی ہیں۔

سربجیت اپنے مستقبل کے بارے میں فکرمند ہیں۔ وہ چارپائی پر بیٹھی ہوئی کہتی ہیں، ’’میں نے گاؤں کے اسکول میں آٹھویں تک پڑھائی کی اور پھر اس کے بعد کی پڑھائی اوپن اسکولنگ [آن لائن] کے ذریعہ کی۔ اب میں کھیتوں میں مزدوری کرتی ہوں۔‘‘ سربجیت آگے پڑھنا چاہتی تھیں، لیکن گھر میں مدد کے لیے انہیں پڑھائی چھوڑنی پڑی۔ سیلاب کی وجہ سے ہوئی تباہی نے انہیں یہ سوچنے پر مجبور کر دیا ہے کہ وہ آگے کیا کام کریں گی، کیسے گھر چلائیں گی۔

سربجیت کے چھوٹے بھائی رنجیت سنگھ کی عمر صرف ۱۵ سال ہے۔ وہ اس رپورٹر کو اُس جگہ لے کر گیا، جہاں ان کا گھر ہوا کرتا تھا۔ گھر کے سامنے کا حصہ پوری طرح بہہ گیا ہے۔ اب بھی اس کھنڈر میں دو کمرے اور ایک الماری نظر آتی ہے۔ ارد گرد جمے پانی اور گاد کی وجہ سے وہاں تک پہنچنا ممکن نہیں تھا۔ اس نے بتایا، ’’پانی ۷-۸ فٹ اونچا تھا۔ دو تین دن ہمیں زمیندار کے گھر پر رہنا پڑا۔‘‘ رنجیت نے ۹ویں جماعت کے بعد پڑھائی چھوڑ دی ہے اور اب بطور میکینک ٹریننگ حاصل کر رہا ہے، تاکہ وہ گھر کے خرچ میں ہاتھ بٹا سکے۔

جس کھیت پر وہ کام کرتے تھے، وہ سیلاب کے پانی میں ڈوب گیا، جس سے خریف کی فصلیں پوری طرح تباہ ہو گئیں۔ اب کھیت میں کئی فٹ اونچی گاد کی پرت جمع ہو گئی ہے، جسے ہٹانا ایک بڑا چیلنج ہوگا۔ حالانکہ، پنجاب حکومت نے کسانوں کو راحت دیتے ہوئے انہیں ۳۱ دسمبر تک کا وقت دیا ہے، جس کے دوران وہ سرکار کی اجازت حاصل کیے بغیر اپنی زمین صاف کر کے گاد بیچ سکتے ہیں۔ لیکن ایسا لگتا نہیں ہے کہ کسان آگے ربیع کی فصل بو پائیں گے۔

جسپال سنگھ دُھسّی پر ایک جھونپڑی میں اپنی فیملی کے ساتھ بیٹھے ہیں۔ ان کا گھر سیلاب میں بہہ گیا ہے۔ انہوں نے بتایا کہ انہیں کپڑوں کی سخت ضرورت ہے۔ وہ اپنے کپڑوں کی طرف اشارہ کرتے ہوئے کہتے ہیں، ’’مجھے یہ کپڑے گھونے واہلا گاؤں سے مانگنے پڑے۔‘‘ ان کے چاروں طرف کپڑے لٹکانے والی رسیاں بندھی ہوئی ہیں، جن پر وہ کپڑے اور بستر پھیلائے گئے ہیں جنہیں سیلاب کا پانی کم ہونے پر کسی طرح اٹھا کر لا سکے۔

کچھ دنوں کی دھوپ سے یہ کپڑے تو سوکھ جائیں گے، لیکن جس گیہوں کو سُکھانے کے لیے انہوں نے باہر رکھا ہے، وہ پہلے ہی سڑنے لگے ہیں۔ اس کا مطلب ہے کہ کئی مہینوں کا اناج خراب ہو گیا ہے۔

جن لوگوں نے بھی پاری سے بات کی، وہ اپنی زندگی کو پھر سے سنبھالنے کی خاطر پرجوش تھے، لیکن انہیں یہ نہیں معلوم کہ کھیتی تباہ ہونے کے بعد اب انہیں کیسا کام ملے گا۔ اب وہ پوری طرح سے راحت تنظیموں کے ذریعہ دی جانے والی مدد پر منحصر ہیں۔

ترجمہ نگار: قمر صدیقی