मुसीबत के बाढ़ में डूबल अमृतसर

मच्छीवाला गांव के लोग ए पत्रकार के एक कप चाय दिहलें. चाय आपदा के समय बंटल आपातकालीन राहत सामग्री सब में से लेके बनावल रहे. रावी में बाढ़ आवे के वजह से ओ लोगन के घर बरबाद हो गईल, उनकी खेतन में कीचड़ आ पानी भर गईल. आजकल उ लोग अलग-थलग हो के अस्थायी तम्बू में रहे के मजबूर बा.

अगस्त में आइल बाढ़ में ओ लोगन के मोटा-मोटी सब कुछ बरबाद हो गईल.

सरबजीत कौर रामदास ब्लाक के मच्छीवाला गांव के बाहर एगो झुग्गी (अस्थायी घर) में बईठल बाड़ी, ई उ जगह हवे जहां कब्बो उनकर घर रहे. रावी नदी एकरा बहा ले गईल. कौर अपनी जिनगी के भयानक मोड़ के बारे में बता रहल बाड़ी. उनकरी चेहरा पर अजीब हंसी तैरता.

“हमनी के पूरा रात बंध (मानव निर्मित तटबंध) मजबूत करे के कोशिश करत रहनी जा,” 18 बरिस के कौर पारी के बतावेली. “गुरद्वारे में 27 अगस्त के सबेरे 6 बजे लाउडस्पीकर से बतावल गईल कि धुस्सी (माटी से बनल तटबंध) टूट गईल बा. ई सूचना आसपास के गांवन ले पहुंचावल गईल. हमनी के ऊंच जगह पर आसरा लेवे खातिर भगनी जा.”

मच्छीवाला अमृतसर के एगो छोट गांव हवे जेकर जनसंख्या लगभग 1,186 (जनगणना 2011) बा जेमे ज्यादातर जाट सिख आ राय सिख समुदाय के लोग बा, राय सिख समुदाय के पंजाब में अनुसूचित जाति के दर्जा मिलल बा. दलित परिवार खास करके छोट जमीन पर खेती करेला आ दूसरा लोगन के खेतन में कृषि के काम कर के आपन आजीविका चलावेला.

सरबजीत के परिवार भूमिहीन राय सिख हवे आ जीवन यापन खातिर खेतिहर मजदूरी करेला. उनकर माई खेतिहर मजदूर रहस जिनकर छव महीना पहिले देहांत हो गईल; पिता मिर्गी के रोगी हवें आ काम ना कर पावेलन. दू भाइयन आ एक बहिन के ए परिवार में आपन घर चलावे खातिर सब केहू मजदूरी करेला.

बाढ़ में गांव तीन से चार दिन डूबल रहल जेसे जलस्तर आठ फीट ले पहुंच गईल. एसे खेतिहर मजदूरन के घर बर्बाद हो गईल, खरीफ धान के कटे लायक खड़ा फसल पूरी तरह से बरबाद हो गईल आ खेतन में कीचड़ भर गईल. बड़का-बड़का यूकिलिप्टस के पेड़ उखड़ गईलें सन.

रंजीत सागर डैम से जब अचानक पानी रावी नदी में छोड़ल गईल, त अमृतसर आ गुरदासपुर जिलन में चारों ओर जमीन पानी में डूब गइल. थेइन बांध के नाम से भी जानल जाए वाला ई बांध राज्य के उत्तरी किनारा पर स्थित बा जवन सरबजीत के गांव से 100 किलोमीटर से अधिक दूर बा. हिमाचल आ जम्मू-कश्मीर के जलग्रहण क्षेत्रन से निरंतर पानी के प्रवाह के कारण ई 26 अगस्त ले अधिकतम अनुमति प्राप्त स्तर 528 मीटर ले पहुंच चुकल रहे. इहां देरी से आवे वाला मानसून में असामान्य रूप से भारी बरखा भईल रहे.

स्थानीय समाचार में आइल रिपोर्ट सब के कहनाम बा कि एकरी बाद 26 अगस्त 2025 के उधमपुर में 629 मिलीमीटर बरखा भईल. डाउनस्ट्रीम में स्थित ई बांध 528.008 मीटर ले भरल रहे जवन लगभग एकर अधिकतम सीमा हवे. बरखा के पानी जब जलाशय में भरे लागल त गेट के पूरा खोले के अलावा कवनो विकल्प ना रहे. एह से ताकि जेतना पानी आईल बा लगभग ओतने छोड़ दिहल जाओ; 2.15 लाख क्यूबिक प्रति सेकेण्ड (क्यूसेक) के आउटफ्लो आ 2.25 लाख क्यूसेक के इनफ्लो.

आउटफ्लो से 1959 में बनल माधोपुर बैराज यूनिट के दो गो गेट टूट गईल. तेजी से बहे वाली उझ नदी (एगो सहायक नदी) बढ़ल रावी में मिल गईल जेसे अमृतसर, गुरदासपुर आ अंतर्राष्ट्रीय सीमा पार के क्षेत्रन में बाढ़ आ गईल. सरबजीत के गांव पाकिस्तान सीमा से खाली पांच किलोमीटर दूर बा. अइसन बाढ़ रावी में पिछला बेर 1988 में देखल गईल रहे.

सरबजीत ओ डर याद करेली जवन उनकी आ बाकी लोगन के करेजा दहला देले. उ लोग अइसन कुछु कब्बो ना देखले रहे. जईसे जईसे पानी बढ़े लागल, गांव वालन के बहुत कुछ बचावे के मौका ना मिलल आ आखिर ओ लोगन के ऊंच जगह पर स्थित जमींदार के घर में शरण लेवे के पड़ल. जाट सिख लोगन के ज्यादातर घर कुछ नुकसान के साथ अब्बो बचल बा.

एइजा से गांव के लोग देखल कि कईसे ओ लोगन के खेतन में पानी भर रहल बा, ओ लोगन के सामान पानी में तैरता आ उनकर घर बरबाद हो रहल बा. कम से कम तीन दिन ले ग्रामीण लोग ओइजे फंसल रहे. कुछ लोगन के लगे अपनी मवेशियन के खियावे खातिर कुछु ना रहे. राष्ट्रीय आपदा मोचन बल (एनडीआरएफ) के पहुंचे में समय लागल तबले स्थानीय लोग एक दूसरा के मदद कईलें. अमृतसर जिला में करीब 1.3 लाख लोग एसे प्रभावित भईलें आ ‘भारी मात्रा में मवेशियन के नुकसान’ के आंकड़ा आवल अभी बाकी बा (बाढ़ बुलेटिन, दिनांक 18 सितम्बर, 2025).

कुछ मवेशियन के मालिक खेतिहर मजदूर 62 बरिस के जसपाल सिंह कहेलन, “दू दिन ले हमनी के लगे कवनो नाव, कवनो सहायता ना पहुंचल. हमनी पानी में भुखाईल आ डेराईल बईठल रहनी जा.” उ अपनी कुछ मवेशियन आ सामान के बचावे में सफल भईलें.

अधिकारिक सरकारी आंकड़न के अनुसार 2,490 गांव बाढ़ से प्रभावित बा आ 57 लोग के मृत्यु हो चुकल बा. करीब दू लाख हेक्टेयर कृषि क्षेत्र प्रभावित भईल बा जेमे सबसे अधिका अमृतसर में अकेले 27,154 हेक्टेयर बा. “भूमि मालिक लोगन के सब कुछ बर्बाद हो गईल बा आ हमनियो के भी,” बलदेव सिंह पारी से कहेलन.

उमिर के सत्तरवां फेंटा में पहुंचल बलदेव सिंह खाली आपन मवेशी बचा पवलें. “जब पानी तेजी से आईल त हमनी के जानवरन के खाना खियावत रहनी जा. ओतना समय में कुछु बचावे के मौका ना मिलल. हमनी के खाली आपन मवेशी बचा पवनी जा,” अपनी झुग्गी के बाहर बईठल उ कहेलन.

वयोवृद्ध खेतिहर मजदूर बलदेव पारी के बतावेलन, “ए बेरी ई 1988 से भी बदतर बा.” उ कहेलन, “सारी ज़िन्दगी एत्थे ही लंघ गयी, कित्थे जावांगे असीं (हमनी के आपन पूरा जिनगी एइजे बिता दिहनी जा, अब कहां जाईब जा)?”

बलदेव के परिवार के छवो सदस्य खेतिहर मजदूर हवे आ हर केहू बोवाई के मौसम में 8,000 रुपिया महीना कमायेला. “भूखे मरण वाली गल्ल आ (हमनी के भूख से मर सकेनी जा),” उ राहत संगठनन से मिले वाला सहायता के बारे में कहेलन. उ चारों ओर जमा बाढ़ के पानी से फईले वाला बेमारियन के ले के भी चिंता कर रहल बाड़ें.

जब सितम्बर के पहिला हफ्ता में पानी के कम हो गईल रहे तब्बो कई गो मानव निर्मित बंध (धुस्सी) टूटल रहे. स्थानीय लोग गैर-लाभकारी संगठनन के मदद से ओके फिर से मजबूत करे के कोशिश कर रहल बा. राहत संगठन, स्थानीय गैर-सरकारी संगठन, शिरोमणि गुरुद्वारा परबंधक समिति, पंजाब के बाहर के नागरिक लोग (हरियाणा, राजस्थान, उत्तराखंड, उत्तर प्रदेश) बाढ़ प्रभावित क्षेत्रन के लोगन खातिर राशन, राहत सामग्री, पशु चारा, स्वच्छता सामग्री आ दवाई पहुंचा रहल बाड़ें.

बेढ़ंग बरखा आ जलवायु परिवर्तन के वजह से अतिव्यापी मौसम अब एकदम कड़वा सच्चाई बन के सामने आ गईल बा. लुधियाना के जलवायु कार्यकर्ता जसकीरत सिंह कहेलन, “रंजीत सागर बांध जईसन बड़ हाइड्रोइलेक्ट्रिक बांध मौसम के भविष्यवाणी के ध्यान में ना राखेला.” उ बतावेलन, “बीच अगस्त ले बांध अपनी पूरा जलाशय के स्तर ले भर गईल रहे. मानसून के आगमन पर उनकी लगे तनिको (अतिरिक्त) क्षमता ना बाचल रहे.”

सरबजीत एक एकड़ में धान बोवला पर 4,000 रुपिया कमायेली. ए मौसमी कमाई के अलावा, उ खेतन से खरपतवार निकाल के भी 40 रुपिया प्रति घंटा कमायेली. बाकिर अब कुल काम खतम बा आ उ आपन जिनगी फिर से चलावे खातिर कवनो मदद के इंतजार में बाड़ी.

मात्र 18 बरिस के ई लईकी अपनी भविष्य के ले के चिंता में बा. “हम गांव के स्कूल में कक्षा 8 ले पढ़ाई कईले बानी. आपन स्कूलिंग हम ओपन स्कूलिंग (ऑनलाइन) से पूरा कईनी. अब हम खेतिहर मजदूर बानी,” खटिया पर बईठल उ कहेली. सरबजीत आगे पढ़ल चाहत रहली बाकिर घर के हाथ बंटावे खातिर उनके पढ़ाई छोड़े के पड़ल. बाढ़ से भईल तबाही के बाद उ सोच रहल बाड़ी कि उनकी दिहाड़ी के का होई.

उनकर भाई, 15 बरिस के रंजीत सिंह ए पत्रकार के देखा रहल बाड़ें कि ए साल अगस्त ले ई उनकर घर रहे. घर के अगिला हिस्सा पूरी तरह से बहि गईल बा. दू गो कमरा के ढांचा आ बीच में खड़ा एगो आलमारी साफ़ लउकता. चारों ओर पानी आ कीचड़ बा, त ओइजा ले पहुंचल ना जा सकेला. “एइजा 7-8 फीट ले पानी रहे. हमनी के 2-3 दिन ले जमींदार के घर में रहे के पड़ल,” उ बतावेलन. रंजीत कक्षा 9 के बाद स्कूल छोड़ दिहलें आ अब मेकैनिक के प्रशिक्षण लेतारें ताकि अपनी कमाई से परिवार के मदद कर सकें.

जवना खेत में ऊ काम करत रहलें उ बाढ़ के पानी से पूरा डूब गईल जेसे खरीफ के फसल बरबाद हो गईल. अब ई कई फीट ले कीचड़ से ढकल बा जेके हटावल एगो और बड़ चुनौती बा. पंजाब सरकार किसानन के कीचड़ हटावे आ बिना परमिट के 31 दिसम्बर ले एके बेचे के अनुमति दे दिहले बा बाकिर ई सम्भावना अब कम बुझाता कि किसान लोग अगला रबी के फसल बो पइहें.

जसपाल सिंह झुग्गी में अपनी परिवार संघे धुस्सी पर बईठल बाड़ें; उनकर घर बहि गईल बा. उ बतावेलन कि ओ लोगन के कपड़ा के बहुत जरूरत बा. “हमके ई कपड़ा घोनिवाला गांव से मांगे के पड़ल,” आपन पहिनल कपड़ा देखावत के उ कहेलन. उनके चारों ओर अस्थायी कपड़ा के रसरी बनावल गईल बा जहां उ कपड़ा आ बिस्तर लागल बा जेके उ लोग पानी कम भईला पर ले लिहल.

कुछ दिन के गरम धूप से कपड़ा के सूखे में मदद मिली. ओइजे सुखावे खातिर रखल गेहूं फूल गइल बा आ सड़ रहल बा. ई कई महीना के भोजन के नुकसान बा.

जेतना लोगन से पारी के बात भईल, उ सब फिर से आपन जीवन शुरू करे खातिर उत्सुक बा. बाकिर उ लोग अपनी दिहाड़ी के ले के चिंता में बा काहें कि खेती पर बहुत असर पड़ल बा. अब उ लोग पूरी तरह से राहत संगठनन से मिले वाला मदद पर निर्भर बा.

अनुवाद: विमल चन्द्र पाण्डेय