علی راج پور میں پانی کے لیے جدوجہد

وِندھیہ پہاڑیوں کے پیچھے سورج غروب ہو چکا ہے اور پرندے جنگل کی طرف لوٹ چکے ہیں۔ یہی وہ وقت ہے جب داما سَستیہ اپنا سفر شروع کرتے ہیں۔ وہ ایک کسان ہیں اور سُگت گاؤں میں اپنے گھر سے ایک کلومیٹر پتھریلے راستے پر نیچے اتر کر پانی کے ایک ذخیرہ تک جاتے ہیں۔ وہ اپنے گھڑے بھرتے ہوئے پوری رات وہیں گزاریں گے اور صبح واپس لوٹیں گے۔ تقریباً ۵۰ سال کے داما بتاتے ہیں، ’’رات میں آبشار (جھرنے) سے زیادہ پانی نکلتا ہے۔‘‘

ایک یا دو آبشار ۵۳۴ لوگوں کی آبادی (بحوالہ مردم شماری ۲۰۱۱) والے پورے گاؤں کی پانی کی ضرورت کو پورا نہیں کر سکتے۔ صبح سویرے سُگت کے رہائشی اپنے پانی کے ڈبوں اور گدھوں کے ساتھ غسل کرنے اور پانی بھرنے کے لیے پہاڑی سے نیچے نرمدا تک اترتے ہیں۔ یہی عمل شام کو بھی دہرایا جاتا ہے اور غسل کرنے، برتن دھونے اور پانی لانے جیسے کاموں میں گاؤں کے لیے روزانہ اوسطاً تین گھنٹے لگا دیتے ہیں۔ ہندوستانی آئین نے پانی کے حق کو زندگی کے حق کا حصہ مانا ہے۔ ایسے میں، یہ انسانی حقوق کی شدید خلاف ورزی ہے۔

ندی سے سب سے دور گھر تقریباً ڈیڑھ کلومیٹر دور ہے۔ پانی لانے میں، اوپر نیچے جانے میں ایک گھنٹہ سے کچھ زیادہ وقت لگ جاتا ہے۔ ایک ہفتہ میں یہ تقریباً ۱۵ گھنٹے کی پیدل دوری بنتا ہے، کیوں کہ بھرے گھڑوں کے ساتھ چڑھائی میں اُترائی کے مقابلے دوگنا وقت لگتا ہے۔

صبح سویرے کی ذمہ داری داما کے بیٹے سنبھال لیتے ہیں۔ وہ آٹھ رکنی فیملی کے لیے دو گدھوں پر پانی کے قیمتی ڈبے لاد کر لاتے ہیں۔ گدھوں کو اب اس کی مشق ہو چکی ہے، اور اب وہ اپنے آپ ہی گھر چل پڑتے ہیں۔

پندرہ سال قبل، سُگت اور پڑوسی جھنڈانہ کے بھیلالہ آدیواسیوں کے لیے پانی کوئی مسئلہ نہیں تھا۔ وہ نرمدا اور اس کی معاون ندی ہتھنی کے کنارے رہتے تھے۔ پانی وافر مقدار میں اور آسانی سے دستیاب تھا۔

لیکن نرمدا پر بنے سردار سرووَر باندھ کی وجہ سے جب یہ گاؤں ڈوب گئے، تو سب کچھ بدل گیا۔ تقریباً ۲۰۱۴ کے آس پاس باندھ کے پھاٹک بند ہوئے اور مدھیہ پردیش کے تقریباً ۲۰۰ گاؤوں، جن میں سُگت اور جھنڈانہ بھی شامل ہیں، غرقاب ہو گئے۔ ندی نے وہاں کے لوگوں کی قابل کاشت زمینیں چھین لیں۔ داما اور ان کی فیملی جیسے لوگ، جو مہاجرت یا نقل مکانی نہیں کر سکے، انہیں وندھیہ پہاڑیوں کی جانب اوپر جانا پڑا، جہاں نہ پانی ہے، نہ بجلی، اور نہ ہی پکّی سڑک۔

’’ہم نے دیکھا کہ پاس کے گاؤوں میں لوگ تعمیراتی کام کے دوران اینٹ اور ریت ڈھونے کے لیے گدھوں کا استعمال کرتے ہیں،‘‘ داما بتاتے ہیں۔ ’’یہیں سے ہمیں پانی ڈھونے کے لیے گدھے پالنے کا خیال آیا۔‘‘ اب سُگت کے ہر گھر میں پانی لانے کے لیے تربیت یافتہ گدھا مل جاتا ہے۔ سُگت کے رہائشی راجو سولنکی بتاتے ہیں کہ جیسے ہی مالک خالی گھڑے ٹانگ دیتا ہے، گدھا اپنے آپ ندی کنارے کی طرف چل پڑتا ہے۔

جب وہ پانی کے پاس رہتے تھے، تب داما اور ان کی فیملی کے پاس پانچ ایکڑ زمین تھی۔ اب چار بھائیوں کے ساتھ مشترکہ طور پر دو تین ایکڑ زمین سے ہی گزارہ کرنا پڑتا ہے۔ داما کہتے ہیں، ’’ہم باجرا، جوار، مکئی، مونگ پھلی، اُڑد، بھادی [ساواں]، تور دال اُگاتے تھے۔‘‘

وہ آج بھی وہی فصلیں اُگاتے ہیں اور سویابین اور مونگ پھلی بیچ کر تقریباً ۲۰ ہزار روپے کما لیتے ہیں۔ کٹائی کے موسم میں داما کے بیٹے نانیا اور اس کی بیوی زرعی مزدوری کے لیے گجرات جاتے ہیں، جس سے دو مہینے کی مزدوری میں تقریباً ۳۰ ہزار روپے مزید مل جاتے ہیں۔

’’ہم نے اپنی زمینوں کو اپنی آنکھوں کے سامنے ڈوبتے دیکھا ہے۔ یہ بہت دردناک منظر تھا،‘‘ سُگت کے ۵۹ سالہ رہائشی گوبا سستیہ کہتے ہیں۔ شام کا وقت ہے اور پانی بھر کر لانے کا کام نمٹا کر گوبا گاؤں کے کچھ دوسرے لوگوں کے ساتھ پہاڑی کی چوٹی پر اکٹھا ہوئے ہیں۔ یہاں سے وہ ندی کو دیکھ سکتے ہیں۔

علی راج پور ضلع کے نیم پت جھڑ جنگلوں میں آباد سُگت گاؤں تک پہنچنے کا سب سے آسان راستہ ہتھنی ندی (نرمدا کی ایک معاون ندی) کو نرمدا کے سنگم تک کشتی سے پار کرنا ہوتا ہے۔ اس کے بعد وہاں کے رہائشی نرمدا کے ساتھ ساتھ چلتے ہیں۔

حکومت ہند نے ۱۹۶۹ میں نرمدا آبی تنازع ٹربیونل (این ڈبلیو ڈی ٹی) قائم کی تھی۔ دس سال بعد اس نے باز آبادکاری اور نقل مکانی پیکج کی سفارش کی، جس میں کہا گیا تھا کہ ہر بے گھر ہوئے شخص اور اس کے بالغ بیٹوں کو اپنی آبائی ریاست یا گجرات میں دو ہیکٹیئر آبپاشی والی زمین دی جائے گی، ساتھ ہی باز آبادکاری کے مقام پر مکان اور دیگر سہولیات بھی مہیا کرائی جائیں گی۔

’’ایسا لگا گویا ہمارے سر پر پہاڑ آ گرا ہو،‘‘ نرمدا پر بڑے باندھ بننے کی مخالفت میں چل رہے آندولن کے صف اوّل کے لیڈر اور بس آپریٹر رہ چکے پارس مل جی کرناوَت کہتے ہیں۔ ’’۱۹۷۸ میں (این ڈبلیو ڈی ٹی) کی آخری رپورٹ میں کہا گیا تھا کہ ۴۵۵ فٹ اونچا باندھ بنے گا اور مدھیہ پردیش کے ۱۹۳ گاؤں ڈوبیں گے،‘‘ وہ یاد کرتے ہیں۔ سال ۱۹۷۹ میں آخری فیصلہ کے بعد انہوں نے مدھیہ پردیش کے نیماڑ خطہ میں نیماڑ بچاؤ تحریک شروع کی۔

بھیلالہ آدیواسی گوبا سستیہ کا خاندان ندی کے کنارے آباد اپنے گھر سے بے گھر ہو گیا۔ نرمدا کنٹرول اتھارٹی کی ۲۰۲۰-۲۱ کی رپورٹ کے مطابق، مدھیہ پردیش میں سردار سرووَر پروجیکٹ سے ۲۳ ہزار سے زیادہ خاندان متاثر ہوئے ہیں۔ ایک گاؤں تو پوری طرح متاثر ہوا ہے اور ۱۷۷ گاؤوں جزوی طور پر متاثر ہوئے ہیں۔

تقریباً ۲۰-۲۵ سال پہلے میں نرمدا بچاؤ آندولن کے ساتھیوں کے ساتھ دہلی گیا تھا۔ وہاں اور بھی بہت سارے لوگ تھے۔ ہم اپنی اُس زمین کا مطالبہ کرنے گئے تھے، جو باندھ کے پانی میں ڈوب گئی تھی،‘‘ گوبا کہتے ہیں۔

گوبا بتاتے ہیں کہ ان کی فیملی، جس میں پانچ بچے ہیں، کو معاوضہ اور باز آبادکاری کے طور پر گجرات میں صرف پانچ ایکڑ زمین ملی۔ ’’ہمیں کوئی پیسہ نہیں ملا،‘‘ اپنی ٹھڈی کے نیچے لاٹھی ٹکاتے ہوئے وہ کہتے ہیں۔ اس لیے گوبا نے وہاں نہ جانے کا فیصلہ کیا۔ ’’اگر ہم کسی اور جگہ رہنے چلے جائیں گے تو اپنی برادری کھو دیں گے اور معاش کے لیے پوری طرح مزدوری پر منحصر ہو جائیں گے۔ ہمیں زمینداروں کے کھیتوں میں کام کرنا پسند نہیں،‘‘ گوبا کہتے ہیں، جو اب بھی سُگت میں رہتے ہیں۔

اپنے مویشیوں کو ندی کے کنارے لے جاتے وقت وہ یہ بات پاری سے کہتے ہیں۔ سر پر اپریل کی تیز دھوپ پڑ رہی ہے اور گوبا اَنجن کے درخت (ہارڈ وِکیا بیناٹا) کے سایہ میں آرام کرنے بیٹھ جاتے ہیں۔

گجرات میں ملی زمین کے بارے میں گوبا کہتے ہیں، ’’وہاں کوئی اور کھیتی کرتا ہے اور بدلے میں ہمیں سالانہ تقریباً ۲۰-۲۵ ہزار روپے دے دیتا ہے۔ ہم گجرات اس لیے نہیں گئے، کیوں کہ ہمارے قریبی رشتہ داروں کی باز آبادکاری کسی دوسرے گاؤں میں ہوئی، جو یہاں سے تقریباً ۲۰ کلومیٹر دور ہے۔ ہم نے حکام سے مطالبہ کیا تھا کہ ہمیں اسی گاؤں میں کھیتی کی زمین اور گھر کا پلاٹ دیا جائے۔‘‘

گاؤں میں جب شادی یا کوئی اور پروگرام ہوتا ہے، تو برادری صرف جشن کے لیے ہی نہیں، بلکہ پانی کی اضافی ضرورت پوری کرنے کے لیے بھی ایک ساتھ جمع ہوتی ہے۔ گوبا بتاتے ہیں، ’’پورا گاؤں اپنے گدھوں کے ساتھ پہاڑی سے نیچے نرمدا ندی تک پانی لے جاتا ہے۔ تقریب سے ایک ہفتہ پہلے ہی پانی اکٹھا کرنا شروع کر دیتے ہیں۔ اگر تقریب کے دن پانی ختم ہو جائے تو مزید پانی لانے کے لیے گدھوں کو تیار رکھتے ہیں۔‘‘

ندی آج بھی پانی کا بنیادی ذریعہ ہے۔ لیکن وہاں تک پہنچنے کے لیے لمبی اور خطرناک چڑھائی چڑھنی پڑتی ہے – خاص کر حاملہ عورتوں کے لیے۔ ایسا سُگت میں ہی رہنے والی گِلا سولنکی محسوس کرتی ہیں۔ ’’میں سات مہینے کی حاملہ تھی، تب ندی سے پانی لانے گئی تھی۔ پہاڑی چڑھتے وقت میرا پیر پھسل گیا۔ خوش قسمتی سے مجھے چوٹ نہیں لگی،‘‘ وہ بتاتی ہیں۔

تمام دیگر مسائل بھی ہیں۔ باندھ کی وجہ سے جنگلات کی کٹائی ہونے سے رساؤ کے ذریعہ ملنے والا پانی کم ہو گیا ہے، اس لیے گرمیوں میں جھرنے دھیرے دھیرے سوکھ جاتے ہیں۔ ماحولیاتی تبدیلی میں کمی اور حیاتیاتی نظام کی بحالی کے ماہر، ڈاکٹر راہل بنرجی کے مطابق، ایسا محکمہ جنگلات کے ذریعہ حد سے زیادہ کٹائی کی وجہ سے ہوا ہے۔ وہ یہ بھی کہتے ہیں، ’’ماحولیاتی تبدیلی کے سبب کم وقت میں بہت تیز بارش کے واقعات میں اضافہ ہوا ہے اس سے مٹی کا کٹاؤ اور سطحی بہاؤ بڑھتا ہے، جس سے زیر زمین پانی کا بھرنا اور بھی کم ہو جاتا ہے۔‘‘ (ان کا ایک انٹرویو یہاں دیکھیں۔)

نائکا برادری (ریاست میں دیگر پس ماندہ طبقہ کے طور پر درج) کی ۲۰ سالہ گِلا کہتی ہیں، ’’نومبر سے جون میں مانسون آنے تک ہمیں پانی کا بڑا مسئلہ رہتا ہے۔‘‘

پانی لانے میں مرد حضرات بھی مدد کرتے ہیں۔ لیکن ’’جب مزدوری کے لیے باہر جاتے ہیں، تو عورتوں کے پاس بیمار ہونے پر بھی پانی لانے کے علاوہ کوئی متبادل نہیں ہوتا،‘‘ گِلا کی ساس رائتی سولنکی کہتی ہیں۔ پھر وہ ہنستے ہوئے مزید کہتی ہیں، ’’ہم نے گرنے پر جلدی اٹھ جانا سیکھ لیا ہے۔‘‘

سُگت کے رہائشی کٹیا اور سَنی سستیہ سال میں دو مہینے گجرات جا کر کھیتوں میں کام کرتے ہیں۔ اس سے انہیں ۳۰ ہزار روپے ملتے ہیں۔ کٹیا بتاتے ہیں کہ سال کے بقیہ دنوں وہ گاؤں میں ہی رہتے ہیں۔ سَنی پہاڑی پر رات کا کھانا الیکٹرک ٹارچ کی روشنی میں پکاتی ہیں۔ یہاں روشنی کا واحد ذریعہ یہی ہے۔ فیملی کے پاس ایک چھوٹا سا سولر پینل ہے، جس سے ایک بلب جلتا ہے اور موبائل فون چارج کیے جاتے ہیں، لیکن یہ پینل اکثر خراب ہو جاتا ہے۔

پانی لانے میں مدد کے لیے کٹیا اور سَنی نے چار گدھے رکھے ہیں۔ ان کے تین بچے ندی کے اُس پار ککرانہ میں واقع آدیواسی طلبا کے رہائشی اسکول میں پڑھتے ہیں، جس کا نام رانی کاجل جیون شالہ ہے۔ چھٹیوں میں گھر آنے پر وہ بھی پانی بھرنے میں مدد کرتے ہیں۔ باندھ بننے کے دوران گاؤں ڈوب جانے کی وجہ سے بھیلالہ برادری سے متعلق اس فیملی کو گجرات میں پانچ ایکڑ زمین ملی۔ یہ زمین تین بھائیوں میں بانٹنی پڑی اور کٹیا نے وہاں نہ جانے کا فیصلہ کیا۔

گوبا بے گھر کیے گئے آدیواسیوں کے جذبات کو مختصراً بتاتے ہوئے کہتے ہیں، ’’ہمارے پاس پانی، بجلی اور سڑکیں نہیں ہیں۔ پھر بھی ہم اپنے گاؤں میں رہنا پسند کرتے ہیں، کیوں کہ یہاں ہماری زمین اور ہماری برادری ہے۔‘‘

ترجمہ نگار: قمر صدیقی