ਰੁਬੇਲ ਸ਼ੇਖ ਤੇ ਅਨਿਲ ਖਾਨ ਡਰਾਈਵਿੰਗ ਕਰ ਰਹੇ ਹਨ... ਪਰ ਜ਼ਮੀਨ ਦੇ ਨੇੜੇ ਕਿਤੇ ਵੀ ਨਹੀਂ। ਉਹ ਜ਼ਮੀਨ ਨਾਲ਼ੋਂ 80 ਡਿਗਰੀ ਲੰਬਕਾਰ ਕੋਣ ਦੀ ਢਾਲ਼ਵੀ ਰੇਲਿੰਗ ‘ਤੇ 20 ਫੁੱਟ ਦੀ ਉਚਾਈ 'ਤੇ ਗੱਡੀ ਭਜਾ ਰਹੇ ਹਨ। ਅਗਰਤਲਾ ਦੇ ਇਸ ਮੇਲ਼ੇ ਦਾ ਹਜ਼ੂਮ ਉਨ੍ਹਾਂ ਨੂੰ ਦੇਖ ਕੇ ਜੋਸ਼ ਨਾਲ਼ ਚੀਕਦਾ ਹੈ। ਰੁਬੇਲ ਤੇ ਅਨਿਲ ਕਾਰ ਦੀ ਖਿੜਕੀਆਂ ਵਿੱਚੋਂ ਦੀ ਬਾਹਰ ਆ ਕੇ ਹੱਥ ਹਿਲਾਉਂਦੇ ਹਨ।
ਉਹ ਮੌਤ-ਕਾ-ਕੂਆਂ ਵਿੱਚ ਪੇਸ਼ਕਾਰੀ ਕਰ ਰਹੇ ਹਨ। ਇਸ ਸਟੇਜ ਦੀਆਂ ਢਾਲ਼ਵੀਆਂ ਲੰਬਕਾਰੀ ਕੰਧਾਂ ਹਨ ਜਿੱਥੇ ਉਹ ਕਦੇ ਕਾਰ ਤੇ ਕਦੇ ਮੋਟਰਸਾਈਕਲ ਨਾਲ਼ ਕਲਾਬਾਜ਼ੀਆਂ ਕਰਦੇ ਦੇਖੇ ਜਾ ਸਕਦੇ ਹਨ।
ਉਹ ਇਸ ਖ਼ੂਹ ਵਿੱਚ ਘੰਟਿਆਂ ਤੱਕ ਗੱਡੀ ਚਲਾਉਂਦੇ ਹੋਏ 10-10 ਮਿੰਟ ਦਾ ਸ਼ੋਅ ਦਿਖਾ ਰਹੇ ਹਨ। ਮੇਲੇ ਦੀ ਇਸ ਸਟੇਜ ਦਾ ਖ਼ੂਹਨੁਮਾ ਢਾਂਚਾ ਬਣਾਉਣ ਵਿੱਚ ਕਈ-ਕਈ ਦਿਨ ਲੱਗ ਜਾਂਦੇ ਹਨ। ਇਹ ਖ਼ੂਹ ਲੱਕੜ ਦੇ ਤਖ਼ਤਿਆਂ ਨੂੰ ਇਕੱਠੇ ਰੱਖ ਕੇ ਬਣਾਇਆ ਗਿਆ ਹੈ। ਜ਼ਿਆਦਾਤਰ ਡਰਾਈਵਰ ਖ਼ੂਹ ਦੀ ਉਸਾਰੀ ਦੌਰਾਨ ਖ਼ੁਦ ਵੀ ਸ਼ਾਮਲ ਰਹਿੰਦੇ ਹਨ ਕਿਉਂਕਿ ਇਹਦੀ ਸਾਰੀ ਤਕਨੀਕ ਅਤੇ ਉਸਾਰੀ ਹੀ ਉਨ੍ਹਾਂ ਦੀਆਂ ਦਲੇਰ ਕਲਾਬਾਜ਼ੀਆਂ ਤੇ ਸੁਰੱਖਿਆ ਦੀ ਕੁੰਜੀ ਹੈ.
ਮੌਤ-ਕਾ-ਕੂਆਂ ਨਾਮ ਤੋਂ ਹੀ ਖੇਡ ਬਾਰੇ ਪਤਾ ਚੱਲ ਜਾਂਦਾ ਹੈ। ਇਹ ਮੇਲਾ ਅਕਤੂਬਰ ਦੇ ਮਹੀਨੇ ਦੁਰਗਾ ਪੂਜਾ ਦੇ ਨੇੜੇ-ਤੇੜੇ ਤ੍ਰਿਪੁਰਾ ਦੇ ਅਗਰਤਲਾ ਵਿੱਚ ਆਯੋਜਿਤ ਕੀਤਾ ਜਾਂਦਾ ਹੈ। ਵੱਖ-ਵੱਖ ਕਿਸਮਾਂ ਦੇ ਝੂਲੇ ਜਿਵੇਂ ਕਿ ਫੇਰ੍ਹੀ ਵੀਲ੍ਹ, ਮੈਰੀ-ਗੋ-ਰਾਊਂਡ, ਖਿਡੌਣਾ ਰੇਲਾਂ ਵੱਡੇ ਆਕਰਸ਼ਣ ਦਾ ਕਾਰਨ ਬਣਦੇ ਹਨ।
