کھڑیا بولنے والی ایک آخری ماں

اے بیرا بیٹی ایئم تیں مارچی باری تے، بیرا بیٹی ایئم تیں
دھائیں سے ددا جو ڈینام رے، بیہا گوٹے نی
من مجور ڈینا لا رے، بیہا گوٹے نی
مارچی باری تے، بیرا بیٹی ایئم تائیں
دائیں سے ددا جو ڈینام رے، بیہا گوٹے نی

[مرچ کے کھیت میں بیٹی رو ر ہی ہے
بابا جاؤ نہ، رشتہ کرا دو
من ملا ہمارا، پسند آ جائے تو میری شادی کرا دو
مرچ کے کھیت میں بیٹی رو رہی ہے
بابا جاؤ نہ، جلدی بات بڑھا دو]

لکھیشوری بائی، کھڑیا گاتے وقت ایک الگ دنیا میں پہنچ جاتی ہیں۔ آنکھیں جھکائے، وہ اپنے ہاتھ میں پکڑے مائیکرو فون کو دیکھ رہی ہیں۔ یہ ان کے لیے ایک غیر معمولی لمحہ ہے۔ لکھیشوری کے ارد گرد بہت کم لوگ انہیں گاتے ہوئے یا اس زبان میں بولتے ہوئے سننے میں دلچسپی رکھتے ہیں، جسے ہم ریکارڈ کر رہے ہیں۔ لیکن ہر لفظ کے ساتھ، ان کا من پل بھر میں ۱۶۰ کلومیٹر دور رائے گڑھ پہنچ جاتا ہے، جہاں انہی آوازوں نے ان کے بچپن کے دنوں کو بھر دیا تھا۔

’’اب میں کس سے بات کروں؟ ساس سسر تو اس دنیا سے کوچ کر گئے۔ میں بچوں سے کہتی ہوں، ’اپنی مادری زبان میں مجھ سے بات کرو اور مجھ سے سیکھو۔‘ لیکن یہ بچے کہاں سنتے ہیں؟ پوتے پوتی کی تو بات ہی چھوڑیے، میں ہی اس پورے گاؤں میں اکیلی بچی ہوں جو کھڑیا بولتی ہے۔‘‘

مہاسمند ضلع کے اس گاؤں میں ’جونا‘ کے نام سے جانی پہچانی جانے والی لکھیشوری بائی، بڈھوا کھڑیا سے شادی کے بعد یہیں آباد ہو گئیں، جو اب ۶۰ سال کے ہو چکے ہیں۔ ریاستی حکومت سے ملی دو ایکڑ زمین سے گھر کا خرچ نہیں چل پاتا، اس لیے میاں بیوی دونوں زرعی مزدوری کرتے ہیں۔ لکھیشوری کہتی ہیں، ’’جب میں رائے گڑھ سے یہاں آئی، تو اپنے ساس سسر سے کھڑیا میں بات کرتی تھی۔ اب وہ گزر چکے ہیں اور میرے پاس کوئی نہیں ہے جس سے میں یہ زبان بول سکوں۔‘‘ ان کے شوہر بڈھوا بتاتے ہیں، ’’میں الفاظ کی صحیح ادائیگی نہیں کر پاتا، اس لیے میں اس کا استعمال نہیں کرتا۔ یہاں تو چھتیس گڑھی کا راج ہے۔ اس زبان کو کون سمجھے گا؟‘‘

نو دہائی سے بھی زیادہ عرصے قبل کھڑیا قبیلہ کے کچھ خاندان معاش کی تلاش میں رائے گڑھ سے پاٹن دادر چلے آئے تھے۔ گاؤں میں آج بھی اس قبیلہ کے چار پانچ خاندان ہیں، لیکن وہ سبھی چھتیس گڑھی بولتے ہیں۔ لکھیشوری اس گاؤں میں کھڑیا بولنے والی واحد ماں ہیں۔

کھڑیا آسٹرو ایشیائی لسانی گروہ سے تعلق رکھتی ہے، جو بنیادی طور پر اوڈیشہ، جھارکھنڈ اور مغربی بنگال میں پھیلے کھڑیا قبیلہ کے لوگوں کے ذریعہ بولی جاتی ہے۔ چھتیس گڑھ میں ان کی آبادی تقریباً ۴۹ ہزار ہے، جو رائے گڑھ اور جشپور ضلعوں کے آس پاس آباد ہیں۔ ان کی زبان کا اپنا کوئی رسم الخط نہیں ہے (یہ اکثر لکھنے کے لیے دیوناگری، بنگالی یا اڑیہ رسم الخط کا استعمال کرتی ہے)، جسے یونیسکو کے ذریعہ امکانی طور پر کمزور زبان کی فہرست میں شامل کیا گیا ہے۔

لکھیشوری کہتی ہیں، ’’میں اپنے دونوں بیٹوں اور بیٹی سے کھڑیا میں بات کرتی رہی۔ لیکن انہوں نے کبھی جواب نہیں دیا۔ پوتے پوتی اسے تھوڑا بہت سمجھتے ہیں، لیکن انہیں بولنا پسند نہیں ہے۔ وہ سبھی چھتیس گڑھی ہی بولتے ہیں۔‘‘

چھتیس گڑھ کے رائے پور میں واقع پنڈت روی شنکر شکلا یونیورسٹی میں علم الانسان کے پروفیسر اشوک پردھان کئی آدیواسی گروہوں کے ساتھ کام کر رہے ہیں۔ اس زبان کے زوال کے بارے میں وہ بتاتے ہیں، ’’جیسے جیسے جنگلات کی کٹائی بڑھتی گئی، جنگل میں رہنے والے اس آدیواسی قبیلہ کے ارکان معاش کی تلاش میں میدانی علاقوں میں آباد ہونے لگے۔ نوجوان نسل چھتیس گڑھی یا سمبل پوری جیسی مقامی بولیوں کو اپنا رہی ہے۔ اور جیسے جیسے خاندان اپنی مادری زبان بولنا بند کرتے ہیں، برادری کے بزرگوں کے ساتھ یہ زبان بھی ختم ہوتی جا رہی ہے۔‘‘

لکھیشوری اور بڈھوا کے دونوں بیٹے – بھاگیرتھی اور دشرتھی – چالیس سال سے زیادہ عمر کے ہیں اور اتر پردیش کے اینٹ بھٹوں میں کام کرنے کے لیے مہاجرت کر گئے ہیں۔ ان کی بیٹی بھگوتی (۴۳) شادی شدہ ہیں اور پڑوس کے گاؤں میں رہتی ہیں۔ ان کا ۱۹ سالہ پوتا مترام تمل ناڈو میں ایک کارخانہ میں کام کرتا ہے۔ وہ کہتا ہے، ’’مجھے کھڑیا بولنا پسند نہیں ہے۔ میں تھوڑا بہت سمجھ لیتا ہوں۔ لیکن اب میں تمل سیکھنا اور سمجھنا شروع کر رہا ہوں۔ کام کے لائق بول بھی لیتا ہوں،‘‘ وہ ہمیں چھتیس گڑھی میں بتاتا ہے۔

دادی کے ساتھ رہنے والا بڑا پوتا کلپرام کہتا ہے، ’’مجھے چھتیس گڑھی میں بات کرنے کی عادت ہے۔ یہاں ہر کوئی یہی زبان بولتا ہے۔ اس لیے میرے منہ سے بھی یہی نکلتا ہے۔ میں کھڑیا نہیں جانتا۔‘‘

لکھیشوری کو اپنی زبان میں بات کرنے کا موقع صرف تبھی ملتا ہے، جب وہ اپنے میکے جاتی ہیں۔ ’’سال دو سال میں جب میکے جا پاتی ہوں، تو وہاں دل کھول کر باتیں کرنے سے دل خوش ہو جاتا ہے، مگر یہ بھی دو چار دن ہی چلتا ہے۔‘‘

’’اپن بولی ہردے لے نکلرتھے، اوکر بات کوچھو اؤ ہے [اپنی بولی دل سے نکلتی ہے، اس کی بات ہی کچھ اور ہے]۔‘‘

عظیم پریم جی یونیورسٹی کی مدد سے پاری نے ’معدومیت کی شکار زبانوں کا پروجیکٹ‘ شروع کیا ہے۔ اس پروجیکٹ کا مقصد ہندوستان کی معدوم ہوتی زبانوں کا، انہیں بولنے والے عام عوام اور ان کی زندگی کے تجربات کے ذریعہ دستاویز بندی کرنا ہے۔

یہ اسٹوری بنیادی طور پر ہندی میں لکھی گئی ہے۔

ترجمہ نگار: محمد قمر تبریز