’اب میں آسامی میں کبھی نہیں گاؤں گی‘

اگست ۲۰۲۳ میں عافیہ خاتون اپنی گلوکاری کے سبب وائرل ہو گئی تھیں۔

ایسا اتفاقاً ہو گیا: ایکس (جسے پہلے ٹوئٹر کے نام سے جانا جاتا تھا) کے ایک یوزر نے ان کا ویڈیو شیئر کر دیا۔ اس ویڈیو میں عافیہ آسام کے بنگالی مسلمانوں کے ذریعہ بولی جانے والی ایک مقامی زبان میں گا رہی تھیں۔ ان کے ساتھ ان کے دو بیٹے بھی تھے، جو دوتارہ (بنگالی فوک میوزک میں بجایا جانے والا دو تاروں کا ایک ساز) اورڈھول بجا رہے تھے۔

گانے کے الفاظ کچھ اس طرح تھے:

جونوتارے ای شوبائی ملے تھانائے تھانائے ایجار دلے، ہیمنتو سرکار بُلے دوئیوشی رے۔

جونوتارے زالاہیا، ہیمنتو ایئی جونترنا، جونوتائی شوئیتے آر پارے نا۔

آر کوتو جلائی بے بولو نا،

آر کوتو جلائی بے بولو نا

[لوگوں نے ایک کے بعد دوسرے تھانے میں مجموعی شکایت درج کی ہے؛ ان کا کہنا ہے کہ ہیمنت کی سرکار اس کے لیے قصوروار ہے۔

لوگوں کو پریشان کیا جا رہا ہے، ہیمنت کا ظلم و جبر دیکھئے۔ عوام اب اسے برداشت کرنے کی حالت میں نہیں ہیں۔

مہربانی کر کے ہمیں بتا دو، تم کب تک ہم پر یہ ظلم ڈھاتے رہوگے؟

مہربانی کر کے ہمیں بتا دو، تم کب تک ہم پر یہ ظلم ڈھاتے رہوگے؟]

وہ بتاتی ہیں کہ یہ گیت انہوں نے آسام کے وزیر اعلیٰ ہیمنت بسوا شرما کے ذریعہ کم عمری کی شادی کو کنٹرول کرنے کے لیے چلائی گئی ریاست گیر مہم کے نام پر ان کی مسلم برادری کے لوگوں کی اجتماعی گرفتاری کی مخالفت کرنے کے مقصد سے گایا تھا۔

’’اس گیت کی تخلیق میری برادری کے مشترکہ درد اور ان کے زبردست غم و غصہ کے نتیجہ میں ہوئی تھی،‘‘ عافیہ کہتی ہیں۔ ’’کسی نہ کسی کو تو آواز اٹھانی ہی تھی۔‘‘ فروری ۲۰۲۳ میں کم عمری کی شادی کے خلاف چلائی گئی مہم میں آسام میں ۳۹۰۰ سے بھی زیادہ لوگوں کو گرفتار کیا گیا۔ اس کے بعد بھی سینکڑوں دوسرے لوگوں کی گرفتاریاں ہوئیں، اور اس میں بنگالی مسلمانوں کی حیرت انگیز تعداد ہے۔

دیکھتے دیکھتے اس گیت اور ’آسامی ماں‘ کے طور پر پیش کرتے ایک ایکس پوسٹ نے ان کو سوشل میڈیا پر سیاسی تنازع کے مرکز میں لا کھڑا کیا۔ لوگوں نے ایک آسامی عورت کے طور پر ان کی پہچان اور اس کے جواز کو چیلنج کرتے ہوئے ان کے خلاف ہتک آمیز اور سخت ٹوئیٹ کیے۔

بہرحال، اپنے ویڈیو کے خلاف اس تنازع – جسے زیادہ تر لوگ بیرونی ہاتھ سے متاثر مانتے ہیں – سے عافیہ بے خبر ہی رہیں۔ ڈیرا پتھار نمبر ۴ این سی گاؤں کی ۳۶ سالہ عافیہ گزشتہ دو برسوں سے سوشل میڈیا کنٹینٹ کرئیٹر کے طور پر سرگرم ہیں۔ بنگالی مسلم ماں باپ – جو اپنی مذہبی قدروں کی بنسبت موسیقی سے ہمیشہ دور رہے – کے گھر پرورش پانے والیں عافیہ ایک استثنیٰ تھیں۔ گانے اور گیتوں کو موسیقی میں ڈھالنے میں ان کی دلچسپی بچپن سے ہی تھی۔

ان کا گھر آسام کے ہوجائی ضلع میں ہے۔ یہ علاقہ گنّے کی بہترین پیداوار کے لیے مشہور ہے۔ بانس کی دیواروں سے بنا ایک کمرہ ان کا اسٹوڈیو ہے۔ اس کمرہ میں ان کے گانے بجانے کے ساز رکھے ہوئے ہیں۔ ایک میز پر بے ترتیبی سے رکھے الیکٹرانک سامان ہیں اور ایک کونے میں مائک اسٹینڈ رکھا ہے۔ دیوار پر ایک پوسٹر لگا ہے جس پر ان کے سوشل میڈیا ہینڈلز کے بارے میں معلومات فراہم کی گئی ہیں۔ عافیہ کا روزمرہ کا معمول کم و بیش ایک جیسا ہے۔ صبح میں وہ اپنے گھر کا کام کاج نمٹاتی ہیں۔ اس کے بعد اپنے پسند کی ساڑی پہن کر اپنے تینوں بچوں کو تیار کرتی ہیں اور بنگالی لوک گیت گاتی ہیں۔ ’’دنیا میرے ناچنے گانے کو دیکھے اور اس کی تعریف کرے، یہ بات مجھے اچھی لگتی ہے،‘‘ وہ پاری سے کہتی ہیں۔

عافیہ کے سب سے بڑے بیٹے عتیق الرحمن ان گیتوں کو فیملی کے ذریعہ حال ہی میں خریدے گئے آئی فون سے شوٹ کرتے ہیں۔ پھر اُن گیتوں کو عافیہ کے سوشل میڈیا اکاؤنٹس پر اپ لوڈ کرنے سے پہلے وہ اپنے ایک دوست کی مدد سے ویڈیو کو ایڈٹ کرتے ہیں۔ ان کے دونوں چھوٹے بیٹے – منظرالحق اور جہانگیر عالم گانے میں اپنی ماں کا ساتھ دیتے ہیں۔

’’آپ امی کو صرف ایک لفظ دے دیجئے، وہ اس سے پورا ایک گیت بنا دیں گی،‘‘ ان کے بڑے بیٹے عتیق الرحمن فخر سے بتاتے ہیں۔ ’’وہ اتنی کمال کی ہیں۔‘‘

اپنی ماں کو سوشل میڈیا سے متعارف کرانے کا خیال تقریباً ۲۱ سال کے عتیق الرحمن کو تب آیا تھا، جب پورا ملک ۲۰۲۱ میں کووڈ وبائی مرض کی دوسری لہر کے دوران لاک ڈاؤن سے گزر رہا تھا۔ تب وہ کیرالہ میں ایک راج مستری کے طور پر کام کر رہے تھے۔ ’’لاک ڈاؤن کی وجہ سے ہمارا کام بند ہو گیا تھا اور میں اپنا وقت سوشل میڈیا پر ویڈیو اور ریل دیکھتے ہوئے گزارتا تھا، جن میں مرد اور عورتیں گیت گاتے ہوئے نظر آتی تھیں،‘‘ وہ کہتے ہیں۔ ’’اسی وقت میں نے سوچا کہ کیوں نہ میں اپنی امی کو بھی سوشل میڈیا پر لے کر آؤں؟‘‘

ایک سال کے بعد عتیق الرحمن اپنے گاؤں لوٹ گئے اور ۲۶ اکتوبر، ۲۰۲۲ کو عافیہ کے نام سے ایک یوٹیوب چینل بنایا۔ دوسرے ہی دن عافیہ نے اپنا پہلا بنگالی لوک گیت ’امار دنیار ایتم کرور بڑا مائی کمون روئیلو‘ (جن ماں باپ کے بچے مر جاتے ہیں وہ اس دنیا میں کیسے جیتے ہیں؟) کے ٹائٹل کے ساتھ اپ لوڈ کیا۔ ان کے چھوٹے بیٹوں، ان کے شوہر عبدالشہید اور کچھ پڑوسیوں نے کورس میں ان کا ساتھ دیا۔ ’’اُس ویڈیو کو کچھ دنوں کے اندر ہی ۵۰۰۰ ویوز مل گئے،‘‘ عتیق بتاتے ہیں۔ ’’ہم نے لوگوں کو چینل سبسکرائب کرتے ہوئے دیکھا۔‘‘

عافیہ سوشل میڈیا پر سنگنگ سنسیشن (ابھرتی گلوکارہ) بن گئیں!

تقریباً دو سال بعد (فروری ۲۰۲۵ میں) یوٹیوب پر عافیہ کے ۴ لاکھ ۶۸ ہزار سے بھی زیادہ سبسکرائبر ہیں، اور فیس بک پر ان کے ۵ لاکھ ۷۸ ہزار فالوور ہیں۔

جب پاری نے جولائی ۲۰۲۴ میں ان کے گھر کا دورہ کیا، تو شروع میں تو عافیہ بات کرنے سے کترائیں۔ ’’ان کو جن تنقیدوں اور سماجی چنوتیوں کا سامنا کرنا پڑا، اس سے ان کی خود اعتمادی کو ٹھیس لگی تھی،‘‘ ان کے شوہر عبدالشہید نے ہمیں بتایا۔ وہ گنے کی کھیتی کرتے ہیں۔ ’’پہلے وہ ہمیشہ مہمانوں کا استقبال کرتی تھیں، اور ان کی درخواست پر گیت بھی گاتی تھیں،‘‘ وہ بتاتے ہیں۔

لیکن ۹ مئی، ۲۰۲۴ کو ان کے خلاف پولیس میں شکایت درج کیے جانے کے بعد ان کا نظریہ بدل گیا۔ یہ شکایت آسام کے ناگاؤں ضلع میں فنکاروں کی ایک تنظیم ’سونائی پوریا شلپی منچ‘ کے ذریعہ کی گئی تھی۔

یہ شکایت اس کے کچھ دن بعد ہی درج کی گئی، جب عافیہ نے اپنے ساتھ اپنے دو بچوں کا ایک ویڈیو اپ لوڈ کیا تھا، جس میں آسام کے آرٹسٹ بشنو پرساد رابھا کا گیت ’بیلوتے ہلیسے‘ گاتے ہوئے دکھایا گیا تھا۔

’’میں اس گیت کو سن کر اور گا کر بڑی ہوئی ہوں،‘‘ وہ کہتی ہیں۔ ’’اس لیے میں نے سوچا تھا کہ مجھے ان کے اعزاز میں یہ گیت گانا چاہیے۔‘‘

لیکن سونئی پوریا شلپی منچ کے صدر جیتو شروَن کا یہ ماننا ہے کہ عافیہ کے ذریعہ گایا گیا گیت موسیقی کے نقطہ نظر سے بے سُرا ہے اور آسامی لوگوں کے جذبات کو ٹھیس پہنچاتا ہے۔ شروَن نے یہ بھی کہا کہ انہوں نے ہی پولیس سے عافیہ کے خلاف کارروائی کرنے کے لیے کہا، ’’تاکہ آسامی زبان کی بے حرمتی کرنے والا واقعہ مستقبل میں پھر کبھی نہیں دہرایا جائے۔‘‘

مقامی اہلکار جلد ہی عافیہ کے دروازے پر پہنچ گئے۔ ’’انہیں دیکھ کر لگا کہ ہمارے پیروں کے نیچے کی زمین کھسک گئی ہو،‘‘ وہ کہتی ہیں۔ ’’ہمارے گھر پر آج تک پولیس نہیں آئی تھی۔‘‘ حالانکہ، مذکورہ تنظیم نے عافیہ اور ان کے بچوں کے ذریعہ معافی مانگنے اور سوشل میڈیا سے اس ویڈیو کو ڈیلیٹ کر دینے کے بعد اپنی شکایت واپس لے لی، لیکن اس سے پہلے انہیں پولیس چوکی کے کئی چکر کاٹنے پڑے۔

عافیہ بتاتی ہیں کہ بہت سے آسامی لوگ ہندی گیت گاتے ہیں، لیکن ان کے خلاف کوئی شکایت درج نہیں ہوتی ہے۔ ’’چونکہ ہم لوگ میاں ہیں، تو ہمیں قانون کے نام پر پریشان کیا جاتا ہے۔‘‘ ’میاں‘ لفظ عام طور پر آسام میں بنگالی مسلمانوں کو بے عزت کرنے کے مقصد سے بولا جاتا ہے۔ ’’ہم اب کبھی آسامی میں نہیں گائیں گے۔‘‘

حالانکہ، اب عافیہ کے بچوں نے کمان سنبھال لی ہے: ’’آمی اشامی سنگر بونمو ایک دن [ایک دن میں آسامی گلوکار بن کر رہوں گا]،‘‘ ان کے سب سے چھوٹے بیٹے جہانگیر عالم کہتے ہیں، جو ان کے زیادہ تر ویڈیو میں نظر بھی آتے ہیں۔ وہ اپنی بات پر اٹل بھی دکھائی دیتے ہیں، ’’میں اپنی ماں کی طرف سے آسامی گانے گاؤں گا۔‘‘

بنگالی مسلمانوں کو بار بار آسام کے مذہبی و علاقائی گروہوں کے ذریعہ مخالفت کا سامنا کرنا پڑا ہے۔ یہ مخالفت تب مزید شدت اختیار کر لیتی ہے جب وہ اقتدار کی قیادت میں دبائے جانے کے ردعمل میں اپنی ثقافتی شناخت کو تلاش کرنے کی کوشش کرتے ہیں۔

۱۰ جولائی، ۲۰۱۹ کو بنگالی مسلم برادری کے کئی شاعروں کو گوہاٹی کے ایک صحافی کے ذریعہ ایف آئی آر دائر کرنے کے بعد گرفتار کر لیا گیا۔ ان پر اپنی مقامی میاں زبان میں شعر کہنے کا الزام لگایا گیا تھا۔ ان کی شاعری نے این آر سی (نیشنل رجسٹر آف سٹیزنس) کے فائنل مسودہ کی تنقید کی تھی، جسے اسی سال ۳۱ اگست کو شائع کیا جانا تھا۔

ایک دوسرے واقعہ میں اکتوبر ۲۰۲۲ میں آسام کی حکومت نے بنگالی مسلمانوں کی ثقافتی تاریخ کی جھلک دکھانے والے ایک میوزیم کو یہ کہتے ہوئے بند کر دیا کہ جن چیزوں کی میوزیم میں نمائش کی جا رہی ہے وہ ان کی ثقافت کے لیے انوکھی نہیں ہیں۔ آسام پولیس نے میوزیم سے وابستہ تین مسلمانوں کو دہشت گرد تنظیموں سے ساز باز کرنے کے الزام میں گرفتار کرتے ہوئے غیر قانونی سرگرمیوں کی روک تھام کا قانون، ۱۹۶۷ کے تحت جیل بھیج دیا تھا۔

آسام کے ماہر سماجیات سورج گوگوئی کہتے ہیں کہ عموماً آسامی نژاد لوگوں سے ہی آسامی گیت گائے جانے کی توقع کی جاتی ہے۔ ’’عافیہ جیسے لوگ اور ان کی برادری، جنہیں غریب ’غیر قانونی مہاجر‘ تصور کیا جاتا ہے، کو اپنی ثقافتی شناخت قائم کرنے کی کوشش کرنے کی حالت میں مجرمانہ مقدموں کا سامنا کرنا پڑتا ہے، کیوں کہ ان کے آرٹ کو اکثریتی طبقہ کے ظلم و استحصال کی مخالفت مانا جاتا ہے،‘‘ گوگوئی بتاتے ہیں، جو فی الحال انڈین انسٹی ٹیوٹ آف مینجمنٹ، کوژی کوڈ میں پڑھاتے ہیں۔

اس معاندانہ رویہ، متعصب برتاؤ اور درکنار کیے جانے کے باوجود عافیہ بہت سے لوگوں کے لیے رول ماڈل ہیں۔ انہوں نے اپنی برادری سے متعلق سماجی مسائل پر گانا چھوڑ دیا ہے، لیکن مقامی لوگوں کے ساتھ ساتھ دوسرے گاؤوں کے لوگ ان سے رابطہ کرتے ہیں اور ان کے چینل کے توسط سے طبی اور تعلیمی مقاصد کے تحت مالی مدد مانگتے ہیں۔

’’میں ان سب کے لیے گاؤں گی، جنہیں میری ضرورت ہوگی،‘‘ وہ کہتی ہیں۔ ’’کم از کم جن کی میں مدد کروں گی وہ لوگ تو میری پہچان کی وجہ سے میرے خلاف شکایت درج نہیں کریں گے۔‘‘

ترجمہ نگار: قمر صدیقی