‘ମୁଁ (ଆଉ) କେବେ ଅହମୀୟାରେ ଗାଇବି ନାହିଁ’

ଅଗଷ୍ଟ ୨୦୨୩ରେ ଆଫିୟା ଖାତୁନଙ୍କ ଗୀତ ଗାଇବା ଭାଇରାଲ୍‌ ହୋଇଯାଇଥିଲା।

ସଂଯୋଗବଶତଃ ଏପରି ଘଟିଥିଲା: ଏକ୍ସ (ପୂର୍ବତନ ଟ୍ୱିଟ୍ଟର)ର ଜଣେ ୟୁଜର୍‌ ତାଙ୍କର ଗୋଟିଏ ଭିଡିଓକୁ ଶେୟାର କରି ଦେଇଥିଲେ। ଏଥିରେ ଆସାମର ବଙ୍ଗଳା ଭାଷୀ ମୁସଲିମଙ୍କ କଥିତ ଭାଷାରେ ଖାତୁନ ଗୀତ ଗାଉଥିବା ଦେଖାଯାଇଥିଲା। ତାଙ୍କ ସହିତ ତାଙ୍କର ଦୁଇ ପୁଅ ଦତୋରା (ବଙ୍ଗଳା ଲୋକ ଗୀତରେ ବ୍ୟବହାର କରାଯାଉଥିବା ତାର ଲାଗିଥିବା ବାଦ୍ୟ ଯନ୍ତ୍ର) ଏବଂ ଢୋଲ ବଜାଉଥିଲେ।

ତାଙ୍କ ଗୀତ ପଦଗୁଡ଼ିକ ଥିଲା:

ଜୋନୋତାରେ ଇଶୋବାଇ ମିଲେ ଥାନା’ ଏଥାନା’ ଈଜାରଦିଲେ, ହିମନ୍ତୋସୋରକାର ବୁଲେ ଦୋଇୟୋଷୀ ରେହ।
ଜୋନୋତାରେଜଲାହିୟା, ହିମନ୍ତୋରେଜୋନତ୍ରୋନା, ଜୋନୋତା ଈଶୋଇତିଏର ପାରେ ନା।
ଆର୍‌ କୋତୋ ଜଲାଇବେ ବୋଲୋ ନା,
ଆର୍‌ କୋତୋ ଜଲାଇବେ ବୋଲୋ ନା

(ଲୋକମାନେ ମିଳିତ ଭାବେ ଗୋଟିଏ ପରେ ଗୋଟିଏ ଥାନାରେ ପୁଲିସରେ ଅଭିଯୋଗ କରୁଛନ୍ତି; ସେମାନେ କହୁଛନ୍ତି ହେମନ୍ତ ସରକାର ଦୋଷୀ।
ଲୋକମାନଙ୍କୁ ନିର୍ଯାତନା ଦିଆଯାଉଛି, ହିମନ୍ତଙ୍କ ଅତ୍ୟାଚାରକୁ ଦେଖ। ଲୋକମାନେ ଆଉ ସହ୍ୟ କରିପାରୁନାହାନ୍ତି।
ଆଉ କେତେ ଦିନ ଆମକୁ ଏମିତି ନିର୍ଯାତନା ଦେବ ମୋତେ କୁହ?
ଆଉ କେତେ ଦିନ ଆମକୁ ଏମିତି ନିର୍ଯାତନା ଦେବ ମୋତେ କୁହ?)

ବାଲ୍ୟବିବାହ ରୋକିବା ଲାଗି ରାଜ୍ୟ ବ୍ୟାପି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ଅଧୀନରେ ମୁସଲିମ ସମ୍ପ୍ରଦାୟର ଲୋକମାନଙ୍କର ଗଣଗିରଫଦାରୀ ପ୍ରତିବାଦରେ ଗାଇଥିବା ଏହି ଗୀତ ବିଷୟରେ ସେ ଆମକୁ କହିଛନ୍ତି।

‘‘ମୋ ସମାଜର ଲୋକଙ୍କ ମଧ୍ୟରେ ରହିଥିବା ଗଭୀର ଅସନ୍ତୋଷ ଏବଂ ସାମୂହିକ ସଂଘର୍ଷରୁ ଏହି ଗୀତ ଜନ୍ମ ନେଇଛି,’’ ଖାତୁନ କୁହନ୍ତି। ‘‘କାହାକୁ ନିଜର ସ୍ୱର ଉତ୍ତୋଳନ କରିବାର ଥିଲା।’’ ଫେବୃଆରୀ ୨୦୨୩ରେ ବାଲ୍ୟ ବିବାହ ବିରୋଧରେ ପ୍ରଥମ କାର୍ଯ୍ୟାନୁଷ୍ଠାନରେ ଆସାମରେ ୩,୯୦୦ ଲୋକଙ୍କୁ ଗିରଫ କରାଯାଇଥିଲା। ସେବେଠାରୁ ଆହୁରି ଶତାଧିକ ଲୋକଙ୍କୁ ଗିରଫ କରାଯାଇଛି ଏବଂ ଏମାନଙ୍କ ମଧ୍ୟରେ ବହୁସଂଖ୍ୟାରେ ବଙ୍ଗାଳୀ ମୁସଲମାନ ରହିଛନ୍ତି ।

ଖୁବ୍‌ କମ୍‌ ସମୟ ମଧ୍ୟରେ, ଏକ୍ସ ପୋଷ୍ଟରେ ତାଙ୍କର ଗୀତ ଏବଂ ‘ଅହମୀୟା ମା’ ଭାବେ ତାଙ୍କର ଚିତ୍ରଣ ଖାତୁନଙ୍କୁ ସାମାଜିକ ଗଣମାଧ୍ୟମରେ ବର୍ଦ୍ଧିତ ରାଜନୈତିକ ବିତର୍କର କେନ୍ଦ୍ରକୁ ନେଇ ଆସିଥିଲା। ଜଣେ ଅହମୀୟା ମହିଳା ଭାବେ ତାଙ୍କର ପରିଚୟର ବୈଧତାକୁ ନେଇ ଲୋକମାନେ ଅନଲାଇନରେ ଅତ୍ୟନ୍ତ କଠୋର ଏବଂ ଅପମାନଜନକ ଟ୍ୱିଟ୍‌ କରିଥିଲେ।

ତେବେ ଖାତୁନଙ୍କ ଭିଡ଼ିଓକୁ କିଭଳି ଭାବେ ବଦନାମ କରାଯାଉଛି ଏବଂ ଏହାକୁ ଅନେକ ଲୋକ କେମିତି ଏକ ସୁଚିନ୍ତିତ ଘୃଣା ଭାବେ ଦର୍ଶାଇଛନ୍ତି ତାହା ସେ ଜାଣିନଥିଲେ । ଡେରା ପଠାର ସଂଖ୍ୟା ୪ ଏନସି ଗ୍ରାମର ୩୬ ବର୍ଷ ବୟସ୍କା ଖାତୁନ ବିଗତ ଦୁଇ ବର୍ଷ ହେବ ସୋସିଆଲ ମିଡିଆରେ ଜଣେ କଣ୍ଟେଣ୍ଟ କ୍ରିଏଟର ଭାବେ କାମ କରି ଆସୁଛନ୍ତି। ସେ ବଙ୍ଗଳା ମୁସଲିମ ବାପାମା’ଙ୍କ ସନ୍ତାନ ଭାବେ ବଢ଼ିଥିବାରୁ ଧାର୍ମିକ ସିଦ୍ଧାନ୍ତ ଅନୁଯାୟୀ ତାଙ୍କୁ ସଂଗୀତଠାରୁ ଦୂରେଇ ରଖାଯାଇଥିଲା। ତେବେ ପ୍ରତିଭାଶାଳୀ ଖାତୁନ ଜଣେ ବ୍ୟତିକ୍ରମ ଥିଲେ ଏବଂ ଗୀତ ଗାଇବା ଓ ଲେଖିବା ପାଇଁ ତାଙ୍କର ବିଶେଷ ଆଗ୍ରହ ରହିଥିଲା।

ତାଙ୍କ ଘର ଆସାମର ହୋଜଇ ଜିଲ୍ଲାର ସମୃଦ୍ଧ ଆଖୁ ଚାଷ ଅଞ୍ଚଳରେ। ତାଙ୍କର ଷ୍ଟୁଡିଓ କହିଲେ ବାଉଁଶ କାନ୍ଥ ଘେରା ଗୋଟିଏ ବଖରା; ବାଦ୍ୟଯନ୍ତ୍ର, ଇଲେକ୍ଟ୍ରୋନିକ୍ସ ସାମଗ୍ରୀ ଥିବା ଗୋଟିଏ ଡେସ୍କ, ଗୋଟିଏ ଷ୍ଟାଣ୍ଡିଂ ମାଇକ୍‌ ଏବଂ ତାଙ୍କର ସୋସିଆଲ ମିଡିଆ ହ୍ୟାଣ୍ଡେଲର ବିବରଣୀ ରହିଥିବା ପୋଷ୍ଟର ଚାରିଆଡ଼େ ଘେରି ରହିଥିବା ସ୍ଥାନକୁ ବୁଝାଏ। ତାଙ୍କର ଦିନ ଏକ ନିୟମିତ ଧାରାରେ ଆଗକୁ ବଢ଼ିଥାଏ। ସକାଳେ ସେ ଘର କାମ ସାରନ୍ତି, ତା’ପରେ ସେ ଭଲ ଶାଢ଼ି ଖଣ୍ଡେ ପିନ୍ଧନ୍ତି, ସେ ତାଙ୍କର ଛୋଟ ପିଲାମାନଙ୍କୁ ଭଲ ପୋଷାକ ପିନ୍ଧାଇ ଦିଅନ୍ତି ଏବଂ ବଙ୍ଗଳା ଲୋକ ଗୀତ ଗାଇବା ଆରମ୍ଭ କରି ଦିଅନ୍ତି। ‘‘ଦୁନିଆକୁ ଦେଖାଇବା ଲାଗି କିଛି ଗାଇବା ଓ ନାଚିବାକୁ ମୁଁ ପସନ୍ଦ କରିଥାଏ,’’ ସେ ପରୀକୁ କୁହନ୍ତି।

ଖାତୁନଙ୍କ ସବୁଠୁ ବଡ଼ ପୁଅ ଅତିକୁର୍‌ ରେହମାନ ନିକଟରେ କିଣିଥିବା ଗୋଟିଏ ଆଇଫୋନ୍‌ରେ ଗୀତ ସୁଟିଂ କରିଥା’ନ୍ତି। ପରେ ସେ ନିଜ ବନ୍ଧୁମାନଙ୍କ ସହିତ ସେକେଣ୍ଡ ହ୍ୟାଣ୍ଡ ଲାପଟପରେ ଭିଡିଓକୁ ଏଡିଟ୍‌ କରନ୍ତି ଏବଂ ତା’ପରେ ଖାତୁନଙ୍କ ସୋସିଆଲ ମିଡିଆ ଆକାଉଣ୍ଟରେ ଅପଲୋଡ କରନ୍ତି। ତାଙ୍କର ଦୁଇ ସାନପୁଅ - ୧୨ ବର୍ଷ ବୟସ୍କ ମୋଞ୍ଜରୁଲ୍‌ ହକ୍‌ ଏବଂ ୮ ବର୍ଷ ବୟସ୍କ ଜାହାଙ୍ଗୀର ଆଲମ୍‌ ପ୍ରାୟତଃ ନିଜ ମା’ଙ୍କ ସହିତ ଗୀତ ଗାଇବାରେ ସାମିଲ ହୁଅନ୍ତି । ଖାତୁନ ଖୁସିର ସହ କୁହନ୍ତି, ‘‘ଏବେ ଏହା ଆମ ଦୁନିଆ।’’ ସୋସିଆଲ ମିଡିଆ କଣ୍ଟେଣ୍ଟ କ୍ରିଏଟର ରୂପରେ ତାଙ୍କର ଅବତାର ତାଙ୍କ ପିଲାମାନଙ୍କୁ ଚକିତ କରିନଥାଏ।

‘‘ଆପଣ ମୋ ଆମ୍ମା (ମା’)କୁ ଗୋଟିଏ ଶବ୍ଦ ଦିଅନ୍ତୁ ଏବଂ ସେ ଏହାକୁ ନେଇ ଗୋଟିଏ ଗୀତ ଗାଇଦେବେ,’’ ତାଙ୍କର ବଡ଼ ପୁଅ ରେହମାନ ଗର୍ବର ସହିତ କୁହନ୍ତି। ‘‘ସେଥିରେ ସେ ଅତି ଭଲ।’’

୨୦୨୧ରେ କୋଭିଡ-୧୯ ମହାମାରୀର ଦ୍ୱିତୀୟ ଲହର ସମୟରେ ଦେଶବ୍ୟାପୀ ଲକଡାଉନ ଲାଗୁ ହୋଇଥିବା ବେଳେ ୨୧ ବର୍ଷୀୟ ରେହମାନଙ୍କ ମନରେ ନିଜ ମା’କୁ ସୋସିଆଲ ମିଡିଆ ସହ ପରିଚିତ କରାଇବାର ଉପାୟ ଆସିଥିଲା। ସେତେବେଳେ ସେ କେରଳରେ ରାଜମିସ୍ତ୍ରୀ କାମ କରୁଥିଲେ। ‘‘ଲକଡାଉନ କାରଣରୁ ଆମ କାମ ବନ୍ଦ ହୋଇଗଲା ଏବଂ ମୁଁ ସୋସିଆଲ ମିଡିଆରେ ପୁରୁଷ ଓ ମହିଳାଙ୍କ ଗୀତ ଗାଉଥିବା ରିଲ୍‌ ଏବଂ ଭିଡ଼ିଓ ଦେଖିବାରେ ସମୟ ବିତାଉଥିଲି,’’ ସେ କୁହନ୍ତି । ‘‘ଏହି ସମୟରେ ମୁଁ ଭାବିଲି, ‘କାହିଁକି ମୋ ମା’ଙ୍କୁ ମଧ୍ୟ ସୋସିଆଲ ମିଡିଆକୁ ଆଣିବି ନାହିଁ?’’

ଗୋଟିଏ ବର୍ଷ ପରେ ରେହମାନ ଗାଁକୁ ଚାଲି ଆସିଲେ ଏବଂ ୨୬ ଅକ୍ଟୋବର ୨୦୨୨ରେ ସେ ଖାତୁନଙ୍କ ନାମରେ ଗୋଟିଏ ୟୁଟ୍ୟୁବ୍‌ ଚାନେଲ ଖୋଲିଲେ। ଏହାର ଗୋଟିଏ ଦିନ ପରେ ଖାତୁନ ନିଜର ପ୍ରଥମ ଭିଡିଓ ଅପଲୋଡ୍‌ କରିଥିଲେ, ଯାହାର ଶୀର୍ଷକ ଥିଲା, ‘ଆମରାର ଦୁନିୟାରେ ତିମକରୁର ବାବା-ମାଏକ ମୁନରୋଇଲୋ ’(ସେହି ଅନାଥଙ୍କ ବାପାମା’ ଆମ ଦୁନିଆରେ କେମିତି ରୁହନ୍ତି?)? ତାଙ୍କର ସାନ ପୁଅମାନେ, ତାଙ୍କ ସ୍ୱାମୀ ଅବଦୁଲ ଶୋହିଦ ଏବଂ କିଛି ପଡ଼ୋଶୀ ତାଙ୍କ ସହ ସାମିଲ ହୋଇ ଗୀତ ଗାଇଥିଲେ। ‘‘ଅଳ୍ପ କିଛି ଦିନ ମଧ୍ୟରେ ସେହି ଭିଡିଓକୁ ୫,୦୦୦ ଲୋକ ଦେଖିଥିଲେ,’’ ରେହମାନ କୁହନ୍ତି। ‘‘ଲୋକମାନେ ଚାନେଲକୁ ସବସ୍କ୍ରାଇବ କରୁଥିବା ଆମେ ଦେଖିଲୁ।’’

ଖାତୁନ ସୋସିଆଲ ମିଡିଆରେ ଜଣେ ଲୋକପ୍ରିୟ ଗାୟିକା ପାଲଟିଗଲେ!

ଏବେ ଦୁଇ ବର୍ଷ ପରେ (ଫେବୃଆରୀ ୨୦୨୫) ୟୁଟ୍ୟୁବରେ ଖାତୁନଙ୍କର ୪୬୮,୦୦୦ ସବସ୍କ୍ରାଇବର ଏବଂ ଫେସବୁକରେ ପ୍ରାୟ ୫,୭୮,୦୦୦ ଫଲୋଅର୍‌ ଅଛନ୍ତି।

ପରୀ ଯେତେବେଳେ ଜୁଲାଇ ୨୦୨୪ରେ ତାଙ୍କ ଘରକୁ ଯାଇଥିଲା ଖାତୁନ ପ୍ରଥମେ କିଛି କହିବାକୁ କୁଣ୍ଠାବୋଧ କରିଥିଲେ। ‘‘ଅଭିଯୋଗ ଏବଂ ସେ ସାମ୍ନା କରିଥିବା ଅପମାନ ତାଙ୍କ ମନୋବଳ ଭାଙ୍ଗି ଦେଇଥିଲା,’’ ତାଙ୍କ ସ୍ୱାମୀ ଆଖୁ ଚାଷୀ ଶୋହିଦ୍‌ ଆମକୁ କହିଥିଲେ। ‘‘(ପୂର୍ବରୁ) ସେ ସବୁବେଳେ ଅତିଥିମାନଙ୍କୁ ଆମନ୍ତ୍ରଣ କରୁଥିଲେ ଏବଂ ସେମାନଙ୍କ ପାଇଁ ଗୀତ ଗାଉଥିଲେ,’’ ସେ କୁହନ୍ତି।

ଆସାମର ନାଗାଓଁ ଜିଲ୍ଲାର ଏକ କଳାକାର ସଂଗଠନ ସୋନାଇ ପୋଡ଼ିଆ ଶିଳ୍ପୀ ମଞ୍ଚ ଦ୍ୱାରା ୯ ମଇ, ୨୦୨୪ରେ ତାଙ୍କ ବିରୋଧରେ ଥାନାରେ ଅଭିଯୋଗ ହେବା ପରେ ଏହା ବଦଳି ଯାଇଛି ।

ଦିବଙ୍ଗତ ଅହମୀୟା କଳାକାର ବିଷ୍ଣୁ ପ୍ରସାଦ ରାଭାଙ୍କ ଗୀତ ‘ବିଲୋତେ ହାଲିସେ’ ଗାଉଥିବାର ଏକ ଭିଡିଓ ଖାତୁନ ଅପଲୋଡ୍‌ କରିବାର କିଛି ଦିନ ପରେ ତାଙ୍କ ବିରୋଧରେ ଏହି ଅଭିଯୋଗ କରାଯାଇଥିଲା।

‘‘ଏହି ଗୀତ ମୁଁ ପିଲାଦିନରୁ ଶୁଣିଛି ଏବଂ ଗାଇ ଆସିଛି,’’ ସେ କୁହନ୍ତି । ‘‘ତେଣୁ ତାଙ୍କ ସମ୍ମାନରେ ଏହି ଗୀତ ଗାଇବାକୁ ମୁଁ ଭାବିଲି।’’

କିନ୍ତୁ ସୋନାଇ ପୋଡ଼ିଆ ଶିଳ୍ପୀ ମଞ୍ଚର ସଭାପତି ଜିତୁ ସ୍ରୱାନ ଦାବି କରନ୍ତି ଯେ, ତାଙ୍କ ଗୀତର ସ୍ୱର ଠିକ୍‌ ନଥିଲା ଏବଂ ଏହା ଅହମୀୟା ଲୋକଙ୍କ ଭାବନାକୁ ‘ଆଘାତ’ ପହଞ୍ଚାଇଛି । ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସେ ପୁଲିସକୁ କହିଛନ୍ତି ‘‘ଯାହାଫଳରେ ଭବିଷ୍ୟତରେ କେହି ଏପରି ‘ଲଜ୍ଜିତ’ କଲା ଭଳି କାର୍ଯ୍ୟ କରିବେ ନାହିଁ।’’

ସ୍ଥାନୀୟ ଅଧିକାରୀମାନେ ତୁରନ୍ତ ଖାତୁନଙ୍କ ଘରେ ପହଞ୍ଚିଥିଲେ। ସେ କୁହନ୍ତି, ଆମେ ସେମାନଙ୍କୁ ଦେଖିବା ପରେ ପାଦ ତଳୁ ମାଟି ଧସିଯିବା ଭଳି ଲାଗିଥିଲା। ଆମ ଦ୍ୱାରକୁ ପୂର୍ବରୁ କେବେ ପୁଲିସ ଆସିନଥିଲା।’’ ଖାତୁନ ଓ ତାଙ୍କର ପିଲାମାନେ କ୍ଷମା ମାଗିବା ଏବଂ ନିଜର ସୋସିଆଲ ମିଡିଆରୁ ଭିଡିଓ ଡିଲିଟ କରିବା ପରେ ମଧ୍ୟ ସାମୂହିକ ଭାୋବ ଅଭିଯୋଗ ଫେରାଇ ନେବା ପାଇଁ ଅନେକ ଥର ପୁଲିସ ଷ୍ଟେସନକୁ ଦୌଡ଼ିବା ପାଇଁ ପଡ଼ିଥିଲା।

ଖାତୁନ କୁହନ୍ତି ଯେ, ଅନେକ ଅହମୀୟା ଲୋକମାନେ ହିନ୍ଦୀର ଗାଉଥିଲେ ମଧ୍ୟ ସେମାନଙ୍କ ବିରୋଧରେ କେହି ଅଭିଯୋଗ କରନ୍ତି ନାହିଁ । ‘‘ଆମେ ମିୟାଁ ହୋଇଥିବାରୁ, ଆମକୁ ଅହମୀୟା ଗୀତ ଗାଇବା କାରଣରୁ ଆଇନଗତ ନିର୍ଯାତନାର ଶିକାର ହେବାକୁ ପଡ଼ୁଛି।’’ ଆସାମରେ ବଙ୍ଗଳା ଭାଷୀ ମୁସଲମାନଙ୍କୁ ପ୍ରାୟତଃ ଅପମାନଜନକ ରୂପରେ ‘ମିୟାଁ’ କହି ସମ୍ବୋଧିତ କରାଯାଇଥାଏ। ‘‘ଆମେ ଅହମୀୟାରେ (ଆଉ) କେବେ ଗାଇବୁ ନାହିଁ,’ ସେ କୁହନ୍ତି । ‘‘କେବେ ନୁହେଁ।’’

ତେବେ ଖାତୁନଙ୍କ ପିଲାମାନେ ମାଇକ ଧରି ନେଇଛନ୍ତି: ‘‘ଆମି ଆସାମୀ ସିଙ୍ଗର୍‌ ବୋନମୁ ଏକ ଦିନ (ମୁଁ ଦିନେ ଅହମୀୟା ଗାୟକ ହେବି’’, ସବା ସାନ ପୁଅ ଜାହାଙ୍ଗିର ଆଲମ କହିଥାଏ, ସେ ପ୍ରାୟତଃ ସବୁ ଭିଡିଓରେ ଥାଏ। ସେ ନିଜ ମା’ ପାଇଁ ସମ୍ମାନ ପାଇବା ଲାଗି ପୂର୍ବାପେକ୍ଷା ଅଧିକ ଦୃଢ଼ ହୋଇଯାଇଛନ୍ତି ଏବଂ କୁହନ୍ତି, ‘‘ମୁଁ ମୋ ମା’ଙ୍କ ପକ୍ଷରୁ ଅହମୀୟା ଗୀତ ଗାଇବି।’’

ବଙ୍ଗାଳୀ ମୁସଲମାନମାନେ ବାରମ୍ବାର ଅହମୀୟା ଜାତିଗତ-ରାଷ୍ଟ୍ରୀୟତାବାଦୀ ଗୋଷ୍ଠୀମାନଙ୍କଠାରୁ ପ୍ରତିରୋଧର ସମ୍ମୁଖୀନ ହୋଇଛନ୍ତି, ବିଶେଷକରି ଯେତେବେଳେ ସେମାନେ କଥିତ ଭାବରେ ସରକାରୀ-ନେତୃତ୍ୱାଧୀନ ଅତ୍ୟାଚାରର ସାମ୍ନା କରି ନିଜର ସାଂସ୍କୃତିକ ପରିଚୟ ଜାହିର କରିବାକୁ ଚେଷ୍ଟା କରିଛନ୍ତି।

୧୦ ଜୁଲାଇ ୨୦୧୯ରେ, ନିଜର ମୂଳ ମିୟାଁ ଭାଷାରେ କବିତା ଲେଖିବା କାରଣରୁ ବଙ୍ଗାଳୀ ମୁସଲମାନ ସମ୍ପ୍ରଦାୟର କେତେଜଣ କବିଙ୍କ ବିରୋଧରେ ଗୌହାଟୀର ଜଣେ ସାମ୍ବାଦିକଙ୍କ ଅଭିଯୋଗ କ୍ରମେ ଏକ ଏଫଆଇଆର (ପ୍ରାଥମିକ ତଦନ୍ତ ରିପୋର୍ଟ) ଦାୟର କରାଯାଇଥିଲା। କବିତାରେ ରାଷ୍ଟ୍ରୀୟ ନାଗରିକ ରେଜିଷ୍ଟ୍ରାରର ଚୂଡ଼ାନ୍ତ ଚିଠାକୁ ସମାଲୋଚନା କରାଯାଇଥିଲା, ଯାହାକୁ ସେହି ବର୍ଷ ଅଗଷ୍ଟ ୩୧ ତାରିଖରେ ପ୍ରକାଶ କରାଯିବାର ଥିଲା।

ଅକ୍ଟୋବର ୨୦୨୨ରେ ଆଉ ଏକ ଘଟଣାକ୍ରମରେ, ଆସାମ ସରକାର ବଙ୍ଗାଳୀ ମୁସଲମାନମାନଙ୍କର ସାଂସ୍କୃତିକ ଇତିହାସକୁ ସ୍ମରଣ କରୁଥିବା ଗୋଟିଏ ସଂଗ୍ରହାଳୟକୁ ବନ୍ଦ କରି ଦେଇଥିଲେ। ଏଥିରେ ପ୍ରଦର୍ଶିତ କେତେକ ବସ୍ତୁ ସେମାନଙ୍କର ସଂସ୍କୃତି ପାଇଁ ଅଭିନବ ନୁହେଁ ବୋଲି ସରକାର ବନ୍ଦ କରିବାର କାରଣ ରୂପେ ଦର୍ଶାଇଥିଲେ। ସଂଗ୍ରହାଳୟ ସହ ଜଡ଼ିତ ତିନି ଜଣ ମୁସଲିମ ଲୋକଙ୍କୁ ଆତଙ୍କବାଦୀ ସଂଗଠନ ସହ ସମ୍ପର୍କ ରଖିବା ଅଭିଯୋଗରେ ଆସାମ ପୁଲିସ ଗିରଫ କରିଥିଲା ଏବଂ ସେମାନଙ୍କ ବିରୋଧରେ ‘ବେଆଇନ ଗତିବିଧି (ନିବାରଣ) ଆଇନ ୧୯୬୭ ଅନୁଯାୟୀ ମାମଲା ରୁଜୁ କରାଯାଇଥିଲା।

ଅହମୀୟା ଜାତିର ଲୋକମାନେ ଯେଉଁମାନଙ୍କୁ ମୂଳନିବାସୀ ବୋଲି ବିବେଚନା କରନ୍ତି କେବଳ ସେହିମାନେ ହିଁ ଅହମୀୟା ଗୀତ ଗାଇପାରିବେ ବୋଲି ଅହମୀୟା ସମାଜବିଜ୍ଞାନୀ ସୁରଜ ଗୋଗୋଇ କୁହନ୍ତି । କୋଝିକୋଡ଼ ସ୍ଥିତ ଭାରତୀୟ ପ୍ରବନ୍ଧନ ପ୍ରତିଷ୍ଠାନରେ ପଢ଼ାଉଥିବା ଗୋଗୋଇ କୁହନ୍ତି, ‘‘ଖାତୁନ ଏବଂ ତାଙ୍କ ସମ୍ପ୍ରଦାୟର ଅନ୍ୟ ଲୋକମାନଙ୍କୁ ଗରିବ ‘ବେଆଇନ ପ୍ରବାସୀ’ ବୋଲି ଆଖ୍ୟା ଦିଆଯାଇଥାଏ, ଯଦି ସେମାନେ ବହୁସଂଖ୍ୟକଙ୍କ ଅତ୍ୟାଚାର ବିରୋଧରେ ପ୍ରତିବାଦ ସ୍ୱରୂପ ନିଜ କଳା ମାଧ୍ୟମରେ ନିଜର ସାଂସ୍କୃତିକ ପରିଚୟକୁ ପ୍ରତିଷ୍ଠା କରିବାକୁ ଚେଷ୍ଟା କରନ୍ତି, ତା’ହେଲେ ସେମାନଙ୍କୁ ଏଭଳି ଅପରାଧିକ ମାମଲାର ଶିକାର ହେବାକୁ ପଡ଼ିଥାଏ।’’

ବାରମ୍ବାର ପକ୍ଷପାତ ଏବଂ ନିର୍ଯାତନାର ଶିକାର ହେବା ସତ୍ତ୍ୱେ ଖାତୁନ ଅନେକ ଲୋକଙ୍କ ପାଇଁ ଆଦର୍ଶ ପାଲଟିଛନ୍ତି। ତେବେ ସେ ନିଜ ସମ୍ପ୍ରଦାୟ ସହ ଜଡ଼ିତ ସାମାଜିକ ପ୍ରସଙ୍ଗରେ ଗାଇବା ବନ୍ଦ କରି ଦେଇଛନ୍ତି, କିନ୍ତୁ ସ୍ଥାନୀୟ ଲୋକଙ୍କ ସହିତ ଅନ୍ୟ ଗାଁର ଲୋକମାନେ ମଧ୍ୟ ତାଙ୍କ ଚାନେଲ ଜରିଆରେ ଚିକିତ୍ସା ଓ ଶିକ୍ଷାଗତ ସହାୟତା ପାଇଁ ଅର୍ଥ ସଂଗ୍ରହ କରିବା ଲାଗି ତାଙ୍କ ସହ ଯୋଗାଯୋଗ କରିଥା’ନ୍ତି।

‘‘ମୁଁ ସେମାନଙ୍କ ପାଇଁ ଗାଇବି ଯେଉଁମାନେ ମୋତେ ଦରକାର କରନ୍ତି,’’ ସେ କୁହନ୍ତି। ‘‘ଅତିକମ୍‌ରେ ଯେଉଁମାନଙ୍କୁ ମୁଁ ସାହାଯ୍ୟ କରିଥାଏ ସେମାନେ ମୋ ପରିଚୟକୁ ନେଇ ବିରୋଧରେ ଅଭିଯୋଗ କରିବେ ନାହିଁ।’’

ଅନୁବାଦ: ଓଡ଼ିଶାଲାଇଭ୍‍