अगस्त 2023 मं आफिया खातून अपन गाये सेती वायरल होगे रहिस.
ये ह संजोग के बात रहिस: एक्स (जेन ला पहिली ट्विटर के नांव ले जाने जावत रहिस) के एक झिन यूजर ह ओकर वीडियो ला सेयर कर दीस. ये वीडियो मं खातून असम के बांग्लाभासी मुसलमान मन के बोलेइय्या इहाँ के एक ठन भाखा मं गावत रहिस. ओकर संग ओकर दूनों बेटा घलो रहिन, जऊन मन दोतारा(बंगाली लोकसंगीत मं बजाय के दू तार वाला बाजा) अऊ ढोल बजावत रहिन.
गाना के बोल कुछु अइसने रहिस:
जोनोतारे’ई शोबाई मिले थाना’ए थाना’ए एजार दिले, हिमंतो सरकार बुले दोइयोशी रे.
जोनोतारे ज़ालाहिया, हिमंतोर एई जोंत्रना, जोनोता’ई शोइते आर पारे ना.
आर कोतो जलाई’बे बोलो ना,
आर कोतो जलाई’बे बोलो ना
[लोगन मन एक एक करके थाना मन मं मिलके सिकायत दर्ज कराय हवंय; वो मन के कहना आय के हिमंता सरकार येकर बर दोसी आय.
लोगन मन ला हलाकान करे जावत हे, हिमंता के अतियाचार ला देखव. जनता अब येला झेले के हालत मं नइ ये.
बिनती हवय के हमन ला बतावव तुमन कब तक ले हमर उपर जुलुम ढावत रइहू?
किरिपा करो के हमन ला बतावव तुमन कब तक ले हमर उपर जुलुम ढावत रइहू?]
वो ह बताथे के ये गीत वो ह असम के मुख्यमंत्री हिमंता बिस्वा शर्मा डहर ले लइका बिहाव ला काबू करे सेती राज भर मं चलाय गे अभियान के नांव मं ओकर मुसलमान समाज के लोगन मन के सामूहिक गिरफ्तारी के विरोध करे के मंसूबा ले गाये रहिस.
“ये गीत मोर समाज के सबके पीरा अऊ भारी रीस ले जन्मे रहिस,” खातून कहिथे. “कोनो ला कोनो ला तो अवाज उठायेच ला रहिस.” फरवरी 2023 मं लइका बिहाव के खिलाफ चलाय गे पहिली अभियान मं असम मं 3, 900 ले जियादा लोगन मन ला गिरफ्तार करे गीस. ओकर बाद घलो सैकड़ों लोगन मन ला गिरफ्तार करे गीस, अऊ ये मं बंगाली मुसलमान मन के आंकड़ा अचमित करेइय्या आय.
