ਜਦੋਂ ਕੇਰਲ ਦੀ ਕਲਾਸ ਨੌਵੀਂ ਦੇ ਵਿਦਿਆਰਥੀਆਂ ਨੇ ਮਲਿਆਲਮ ਭਾਸ਼ਾ ਦਾ ਪ੍ਰਸ਼ਨ-ਪੱਤਰ ਖੋਲ੍ਹਿਆ ਤਾਂ ਉਸ ਵਿੱਚ 'ਤਨਿੱਚਿਰਿਕਕੁੰਬੋਲ' (ਵ੍ਹੈਨ ਆਈ ਐਮ ਅਲੋਨ) ਨਾਮ ਦੀ ਇੱਕ ਕਵਿਤਾ ਛਪੀ ਸੀ। ਉਨ੍ਹਾਂ ਲਾਈਨਾਂ ਵਿੱਚ ਖਾਮੋਸ਼ੀ, ਇਕੱਲਾਪਨ ਅਤੇ ਕਿਸੇ ਦੇ ਇਕਲਾਪੇ ਵਿੱਚੋਂ ਮਿਲ਼ਣ ਵਾਲ਼ੀ ਗਹਿਰਾਈ ਦਾ ਜ਼ਿਕਰ ਸੀ। ਰਾਜ ਭਰ ਵਿੱਚ ਇਮਤਿਹਾਨ ਦੇ ਰਹੇ ਲੱਖਾਂ ਨੌਜਵਾਨ ਇਹ ਨਹੀਂ ਜਾਣਦੇ ਸਨ ਕਿ ਉਹ ਇਕ ਯੁਵਾ ਕਵਿਤ੍ਰੀ ਪੀ. ਏ. ਸੇਬਾ ਦੀ ਰਚਨਾ ਪੜ੍ਹ ਰਹੇ ਹਨ।
ਇਸੇ ਸਾਲ 2023 ਵਿੱਚ ਸੇਬਾ ਨੇ ਵਿਰਲ ਪਲੁਥਿਲੇ ਆਕਾਸਾਂਗਲ ਨਾਂ ਦੀ ਪੁਸਤਕ ਪ੍ਰਕਾਸ਼ਿਤ ਕੀਤੀ, ਜਿਸ ਵਿੱਚ ਵਿਚਾਰ, ਕਵਿਤਾਵਾਂ ਅਤੇ ਦ੍ਰਿਸ਼ ਪ੍ਰਗਟਾਵੇ ਸ਼ਾਮਲ ਹਨ। ਇੱਥੇ ਵੀ ਉਨ੍ਹਾਂ ਦੀਆਂ ਸਤਰਾਂ ਉਨ੍ਹਾਂ ਦੇ ਸਪਾਇਨਲ ਮਸਕੁਲਰ ਐਟ੍ਰੋਫੀ (ਐੱਸਐੱਮਏ) ਨਾਲ਼ ਜੀਵਨ ਤਜ਼ਰਬਿਆਂ ਤੋਂ ਉਭਰੀਆਂ ਸਨ। ਇਹ ਇੱਕ ਦੁਰਲਭ ਜੈਨੇਟਿਕ ਬਿਮਾਰੀ ਹੈ ਜੋ ਮਾਸਪੇਸ਼ੀਆਂ ਨੂੰ ਕਮਜ਼ੋਰ ਕਰਦੀ ਹੈ। ਇਸ ਦਾ ਕੋਈ ਇਲਾਜ ਨਹੀਂ ਹੈ। ਐੱਸਐੱਮਏ ਦੇ ਮਰੀਜ਼ ਹੌਲ਼ੀ-ਹੌਲ਼ੀ ਆਪਣੇ ਸਰੀਰ 'ਤੇ ਕਾਬੂ ਗੁਆ ਲੈਂਦੇ ਹਨ ਅਤੇ ਅੰਤ ਵਿੱਚ ਸਾਹ ਲੈਣ ਲਈ ਵੀ ਉਨ੍ਹਾਂ ਨੂੰ ਇੱਕ ਟਿਊਬ ਦੀ ਲੋੜ ਪੈਂਦੀ ਹੈ।
ਪ੍ਰੀਖਿਆ ਦੇ ਰਹੇ ਵਿਦਿਆਰਥੀਆਂ ਅਤੇ ਦੂਰ-ਦੁਰਾਡੇ ਦੇ ਪਾਠਕਾਂ ਵਿੱਚੋਂ ਕੋਈ ਵੀ ਇਹ ਨਹੀਂ ਜਾਣਦਾ ਕਿ ਲੇਖਿਕਾ ਕਈ ਸਾਲਾਂ ਤੋਂ ਆਪਣੇ ਕਮਰੇ ਤੋਂ ਬਾਹਰ ਨਹੀਂ ਨਿਕਲ਼ੀ। ਉਨ੍ਹਾਂ ਨੇ ਇਹ ਸਤਰਾਂ ਉਸ ਵੇਲ਼ੇ ਲਿਖੀਆਂ ਜਦੋਂ ਉਹ ਗਲ਼ੇ ਵਿੱਚ ਟਿਊਬ ਲਗਾਈ ਬਿਸਤਰੇ 'ਤੇ ਸਿੱਧੀ ਲੇਟੀ ਰਹਿੰਦੀ ਸੀ। ਪਿਛਲੇ ਛੇ ਸਾਲਾਂ ਤੋਂ ਵੱਧ ਸਮੇਂ ਤੋਂ ਸੇਬਾ ਟ੍ਰੇਕੀਓਸਟੋਮੀ ਟਿਊਬ ਰਾਹੀਂ ਸਾਹ ਲੈ ਰਹੀ ਹੈ। ਉਹ ਨਾ ਤੁਰ ਸਕਦੀ ਹੈ, ਨਾ ਠੀਕ ਤਰ੍ਹਾਂ ਬੈਠ ਸਕਦੀ ਹੈ ਅਤੇ ਨਾ ਹੀ ਸੌਖਿਆਂ ਕੁਝ ਨਿਗਲ਼ ਹੀ ਸਕਦੀ ਹੈ।
27 ਸਾਲਾ ਸੇਬਾ ਨੇ ਆਪਣੇ ਮੋਬਾਈਲ ਫ਼ੋਨ ਰਾਹੀਂ ਰਚਨਾਤਮਕ ਦੁਨੀਆ ਨੂੰ ਸ਼ਬਦ ਦਿੱਤੇ ਹਨ। ਸਾਲ 2018 ਵਿੱਚ ਉਨ੍ਹਾਂ ਨੇ ਆਪਣਾ ਕੰਮ ਆਨਲਾਈਨ ਸ਼ੇਅਰ ਕਰਨਾ ਸ਼ੁਰੂ ਕੀਤਾ। ਪੰਜ ਇੰਚ ਦੀ ਮੋਬਾਈਲ ਸਕ੍ਰੀਨ 'ਤੇ ਉਹ ਬਹੁਤ ਮਿਹਨਤ ਨਾਲ਼ ਆਪਣੀਆਂ ਰਚਨਾਵਾਂ ਤਿਆਰ ਕਰਦੀ ਸੀ।
ਪੀ. ਵੇਣੁਗੋਪਾਲ ਨੇ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਦਾ ਕੰਮ ਦੇਖਿਆ। ਤਿਰੁਵਨੰਤਪੁਰਮ ਦੇ ਇਸ ਪੱਤਰਕਾਰ ਦਾ ਕਹਿਣਾ ਹੈ, “ਉਨ੍ਹਾਂ ਦੇ ਸ਼ਬਦ ਲੋਹੇ ਦੀ ਧਾਰ ਜਿੰਨੇ ਤਿੱਖੇ ਹਨ। ਉਹ ਇਸ ਤਰ੍ਹਾਂ ਲਿਖਦੀ ਹੈ ਜਿਵੇਂ ਕਿਸੇ ਨੇ ਸੌ ਸਾਲ ਜੀਵਨ ਜੀ ਲਿਆ ਹੋਵੇ ਅਤੇ ਫਿਰ ਵੀ ਨਰਮ ਬਣਿਆ ਰਿਹਾ ਹੋਵੇ।” ਅੱਜ ਵੀ ਜਦੋਂ ਸੇਬਾ ਬਹੁਤ ਥੱਕ ਜਾਂਦੀ ਹੈ ਤਾਂ ਉਨ੍ਹਾਂ ਨੂੰ ਟਾਇਪ ਕਰਨ ਅਤੇ ਸੋਧ ਕਰਨ ਵਿੱਚ ਉਹ ਮਦਦ ਕਰਦੇ ਹਨ। ਉਹ ਕਹਿੰਦੇ ਹਨ, “ਉਹ ਮਲਿਆਲਮ ਅਤੇ ਅੰਗ੍ਰੇਜ਼ੀ ਦੋਵੇਂ ਵਿੱਚ ਇੱਕੋ-ਜਿੰਨੀ ਸੁੰਦਰਤਾ ਨਾਲ਼ ਲਿਖਦੀ ਹੈ। ਜਦੋਂ ਉਨ੍ਹਾਂ ਦੀਆਂ ਉਂਗਲੀਆਂ ਥੱਕ ਜਾਂਦੀਆਂ ਹਨ ਤਾਂ ਮੈਂ ਆਪਣੀਆਂ ਉਂਗਲੀਆਂ ਉਧਾਰ ਦੇ ਦਿੰਦਾ ਹਾਂ।”
ਉਮੀਦ 'ਤੇ ਲਿਖਿਆ ਉਸ ਦਾ ਲੇਖ “ਟ੍ਰੈਪਡ ਇਨ ਏ ਕੇਜ ਬਟ ਵਰਡਸ ਬ੍ਰੇਕ ਫ੍ਰੀ” 1 ਜਨਵਰੀ 2023 ਨੂੰ ਦਿ ਟੈਲੀਗ੍ਰਾਫ ਦੇ ਪਹਿਲੇ ਪੰਨੇ 'ਤੇ ਪ੍ਰਕਾਸ਼ਿਤ ਹੋਇਆ। ਸੰਪਾਦਕ ਆਰ. ਰਾਜਗੋਪਾਲ ਨੇ ਫੇਸਬੁੱਕ 'ਤੇ ਉਨ੍ਹਾਂ ਦੀਆਂ ਰਚਨਾਵਾਂ ਦੇਖੀਆਂ ਅਤੇ ਉਨ੍ਹਾਂ ਨੂੰ ਪ੍ਰਕਾਸ਼ਿਤ ਕਰਨਾ ਚਾਹਿਆ। ਇਸ ਤੋਂ ਬਾਅਦ ਉਨ੍ਹਾਂ ਦੀਆਂ ਮਲਿਆਲਮ ਰਚਨਾਵਾਂ ਨੂੰ ਵਿਰਲ ਪਲੁਥਿਲੇ ਆਕਾਸੰਗਲ (ਸਕਾਈਜ਼ ਸੀਨ ਥਰੂ ਦਿ ਸਪੇਸੇਜ ਬਿਟਵੀਨ ਫਿੰਗਰਸ) ਨਾਮਕ ਕਿਤਾਬ ਵਿੱਚ ਸੰਕਲਿਤ ਕੀਤਾ ਗਿਆ। ਕੇਰਲ ਦੇ ਉਦਯੋਗ ਮੰਤਰੀ ਪੀ. ਰਾਜੀਵ ਨੇ ਜਨਵਰੀ 2023 ਵਿੱਚ ਏਰਨਾਕੁਲਮ ਪ੍ਰੈੱਸ ਕਲੱਬ ਵਿੱਚ ਇਸ ਨੂੰ ਲਾਂਚ ਕੀਤਾ। ਸੇਬਾ ਨੇ ਇਹ ਪ੍ਰੋਗਰਾਮ ਆਪਣੇ ਕਮਰੇ ਤੋਂ ਆਪਣੀ ਮਾਂ ਦੇ ਫ਼ੋਨ 'ਤੇ ਦੇਖਿਆ।
ਉਨ੍ਹਾਂ ਦੀ ਮਾਂ, ਸਾਬਿਰਾ ਨੇ ਪਾਰੀ ਨੂੰ ਕਿਹਾ,''ਉਹ ਬਾਰ-ਬਾਰ ਕਹਿ ਰਹੀ ਸੀ, 'ਦੇਖ ਅੰਮਾ, ਮੇਰੇ ਹਿੱਸੇ ਦਾ ਅਸਮਾਨ ਹੋਰਨਾਂ ਤਾਈਂ ਪਹੁੰਚ ਰਿਹਾ ਏ'।''
