छेरी अऊ आस के रस्सी ले बंधाय हुस्न-आरा के नानकन दुनिया

हुस्न-आरा भारी उछाह मं हवय के ओकर तीन छेरी मन ले हरेक ह तीन तीन पिला जन्माय हवंय – छै के जनम त इहीच बछर 30 अक्टूबर के होय रहिस, फेर बाकि तीन ओकर मन ले एक दिन पहिलीच जन्मे रहिन. छेरी के पिला मन ला ये बखत पीये ला घलो नइ आवय हुस्न-आरा अपन हाथ मं धरथे जेकर ले वो मन, जी भरके दूध पी सकंय. वो ह ये जानते के ये मं जब बाढ़हीं,त ओकर आमदनी के जरिया बनहीं.

हुस्न-आरा बिहार के सीतामढ़ी जिला के बाजपट्टी प्रखंड के बर्री-फुलवरिया गाँव मं रहिथे. करीबन 5,700 आबादी वाले ये पंचायत मं बनेच अकन लोगन मन गरीब, भूमिहीन बनिहार आंय. हुस्न-आरा घला वो मन ले एक आय.

ओकर बिहाव दाई-ददा मन बनेच कम उमर मं चचेरा भाई, मोहम्मद शब्बीर ले कर दे रहिन. वो ह पांच बछर पहिली हैदराबाद चले गीस जिहां वो ह चमड़ा के बैग बनाय के कारखाना मं बूता करथे; ओकर पहिली वो ह बनिहारी करत रहिस. “ वो हर महिना 5,000 रूपिया कमावत हवय, अतक पइसा ले कभू-कभार 2,000 रूपिया घर भेज देथे. काबर के इहीच पइसा मं वोला अपन खरचा घलो चलाय ला परथे, ते पायके हर महिना घर भेजे नइ सकय,” हुस्न-आरा बताथे.

गाँव के बनेच अकन मरद लोगन मन अहमदाबाद, दिल्ली, जयपुर, कोलकाता अऊ मुंबई जइसने शहर मं काम करथें. वो मन अधिकतर कपड़ा अऊ बैग बनेइय्या कारखाना मन मं सिलाई- कढ़ाई के काम करथें, धन रोड तीर के छोटे छोटे होटल मं रांधे अऊ बरतन मांजे, अऊ कतको किसिम के बूता करथें. वो मन अपन घर मं जेन पइसा भेजथें, ओकर ले गाँव मं कुछु बदलाव जरूर आय हवय. कुछेक दसक पहिली गाँव मं जिहां 3-4 बोरिंग रहिस, अब करीबन हर घर मं बोरिंग हवय. अइसनेच, माटी अऊ बांस ले बने जुन्ना घर, अब ईंटा अऊ सीमेंट के बन गे हवय. वइसे, हुस्न-आरा के घर जइसने, कतको घर मं अभू घला ‘पखाना’ नइ ये , फेर प्रधानमंत्री योजना के तहत साल 2022 तक पूरा देस ला “खुल्ला मं शौच ले मुक्त’ बनाना हे. इहाँ के गाँव मन मं बिजली साल 2008 मं आइस फेर पक्का सड़क 2016 मं बनिस.

फुलवरिया गाँव के कतको दीगर मुस्लिम माईलोगन मन के जइसनेच, 56 बछर के हुस्न-आरा घला बचपन लेच बनिहारी करथे. ओकर दाई, समेल, जेन ह 9 बछर पहिली गुजर गीस उहू घला जींयत तक ले बनिहारी करत रहिस. ग़रीबी सेती हुस्न-आरा धन ओकर पांचों लइका स्कूल धन मदरसा जाय नइ सकिन. बर्री-फुलवरिया मं साक्षरता दर सिरिफ 38.81फीसदी हवय (जनगणना 2011), माईलोगन मन न ये ह सिरिफ 35.09 फीसदी हवय.

हुस्न-आरा के ददा, मोहम्मद ज़हूर, अभू घला रोजी मजूरी करथें – ओकर उमर 100 बछर हवय, वो ह बताथे. डोकरा सियान होय सेती वो ह दिन भर कुदारी धन नांगर धरे नइ सकय, फेर खेत मं बीजा अऊ खातू छिंचे के बूता करथे अऊ फसल पाके के बाद लुवई के काम घला करथे. “मंय अधिया मं खेती करथों,” वो ह बताथे. अब खेती के कोनो भरोसा नइ ये, धान धन गहूँ कभू होथे कभू नइ होवय, वो ह बतावत जाथे. “ खेती के पारंपरिक तरीका अब नंदागे. लोगन मन ट्रेक्टर ले काम करे लगे हवंय, बनिहार कम लगत हवय. जेन मन ला काम-बूता मिल जाथे, वो ह दिन भर मं 300 -350 रूपिया ले जियादा नइ कमाय सकय.”

वइसे फुलवरिया गाँव के तीर-तखार के खेती वाले सब्बो जमीन धनहा हवंय. समस्या सिरिफ पानी के कमी आय. गाँव ले कुछु फर्लांग (करीबन एक किलोमीटर) दूरिहा बूड़ति मं अधवारा नदी हवय, जेन ह सिरिफ बरसात के सीजन मं बोहाथे, बाकि बखत अतक पानी नइ रहय के ओकर ले पानी पलोय जा सकय. बीते तीन बछर ले ये इलाका मं पानी नइ गिरे सेती, इहाँ के किसान मन ला दुकाल परे जइसने हालत ले जूझे ला परत हवय.

हुस्न-आरा के पांच झिन लइका हवंय. सबले बड़े बेटा 32 बछर के मोहम्मद अली, अपन घरवाली शाहिदा खातून अऊ दू लइका के संग घर के एक ठन अलग खोली मं रहिथे. वो ह घर चलाय मं अपन दाई के कोनो मदद नइ करय. दूसर बेटा घलो कोनो काम बूता नइ करय. हुस्न-आरा ह बड़े बेटी के बिहाव कुछेक बछर पहिली, बर्री-फुलवरिया ले करीबन 13 कोस (40 किमी) दूरिहा, नेपाल के शम्सी गाँव मं कर दीस. तीसर बेटा अऊ 18 बछर के एक झिन बेटी के बिहाव करे बांचे हवय. वो मन कभू-कभू बुवई अऊ लुवई के सीजन मं बनिहारी करथें.

हुस्न-आरा बर अपन घर चलाय मुस्किल हे अऊ घर के रासन-पानी के जुगाड़ करे बर भारी मिहनत करे ला परथे. घर के राशन कार्ड ले वो ह हर महिना 2 रूपिया किलो के हिसाब ले 14 किलो चऊर, अऊ 3 रूपिया किलो के हिसाब ले 21 किलो गहूँ, अऊ आन समान ले आथे. “ ये बखत खेती के बनेच जियादा काम बूता नइ मिलय,” वो ह कहिथे. “मोर देह घला अब बने नइ रहय. हमर घर मं लोगन मन बढ़े त हवंय फेर आमदनी बढ़े नइ ये. मोला अपन पोता-पोती मन ला घलो पोसे ला परत हवय. मंय नइ जानंव के ये सब मोला कतक बखत तक ले करे ला परही.”

अपन मामूली आमदनी मं इजाफा सेती हुस्न-आरा कुकरी अऊ छेरी पाले लगिस – जेन ह ओकर गाँव के कतको घर के आमदनी के एक ठन जरिया आय. अंडा बेचके वो ह महिना मं कुछेक सौ रूपिया कमा लेथे धन ये अंडा घर के खाय के काम आथे. छेरी मन हर दू तीन बछर मं जनथें. पिला मन ला खवा-पिया के बड़े करथे अऊ कोनो मवेसी कारोबारी ला बेंच देथे. फेर, ये छेरी मन ले वोला वो दाम नइ मिलय जेन ह दीगर मन ला मिलथे. “ जऊन मन पइसा वाले आंय, वो मन अपन मवेसी मन ला बढ़िया चारा खवाथें. मंय गरीब अवं, ते पायके अपन छेरी मन ला सिरिफ कांदी धन पाना खवाय सकथों, येकरे सेती ये मन कमजोर हवंय...” वो ह कहिथे.

बढ़िया चारा खाके ये छेरी पिला मन चार महिना मं 8-10 किलो के हो जाथें, जेन ला बेपारी मन ला 4,000 रूपिया मं बेचे जा सकथे. फेर, हुस्न-आरा के बोकरा मन बड़े होय ला घलो 5 किलो ले जियादा वजन के नइ होय सकंय, येकरे सेती दाम चार महिना बाद मं वोला सिरिफ 2,000 रूपिया मिल पाथे. गर वो ह ये बोकरा मन ला बछर भर पोसही, त तीर-तखार के पोठ मुसलमान मन ले एक ठन बोकरा ले 10, 000 रूपिया कमा सकथे, जेन मन ईदुल-अज़हा धन बकरीद मं क़ुर्बानी बर वोला बिसोथें.

हुस्न-आरा ला अपन लइका मन ले आस रहिस- के जब वो मन बड़े होहीं, त घर के आमदनी मं हाथ बंटाहीं अऊ आगू के जिनगी ह बढ़िया गुजरही. वो मन न सिरिफ बड़े हो चुके हवंय, फेर वो मन के अधिकतर के बाल-बच्चा घलो हवंय. येकर बाद घलो, हुस्न-आरा के जिनगी ले खुसी कोसों दूरिहा हवय.

अनुवाद: निर्मल कुमार साहू