बकरी आ आस पे टिकल हुस्न-आरा के दुनिया

हुस्न-आरा के खुशी के ठेकाना नइखे. उनकर तीनो बकरी तीन-तीन गो बच्चा देले बाड़ी सन. एमे से छव गो के जनम त एही साल 30 अक्टूबर के भईल ह आ बाकी के तीन के ओसे एक दिन पहिले. बच्चा अभी एतना छोट बाड़ें सन कि उन्हनी के ठीक से दूध पिए ना आवेला. एसे हुस्न-आरा अपनी हाथ से उन्हनी के मदद करेली कि उ कुल पर्याप्त दूध पी सकें सन. उ जानत बाड़ी कि जब ई बड़ हो जईहें सन त उनकी आमदनी के एगो रास्ता बनिहें सन.

हुस्न-आरा बिहार के सीतामढ़ी जिला के बाजपट्टी प्रखंड के बर्री-फुलवरिया गांव में रहेली. एह पंचायत के आबादी मोटा-मोटी 5,700 बा. एमे बहुते लोग गरीब बा, केहू वंचित किसान बा, त केहू बिना जमीन के मजूर. हुस्न-आरा भी ओही लोगन में से एक हई.

उनकर बियाह बहुत कमे उमिर में उनकरी चचेरा भाई मोहम्मद शब्बीर से हो गईल रहे. उ पांच साल पहिले हैदराबाद चल गईलें जहां उ चमड़ा के बैग बनावे वाला एगो कारखाना में काम करेलें, ओकरी पहिले उ खेतिहर मजदूर रहलें. हुस्न-आरा उनका बारे में बतइली, “उ हर महिना 5,000 रुपिया कमालें जेमे से कबो-कबो उ 2,000 रुपिया घरे भेज देलें. ओही पईसा में उनके आपन खर्चा भी चलावे के रहेला एसे उ हर महीना ना भेज पावेलें.”

गांव के ज्यादातर आदमी लोग अहमदाबाद, दिल्ली, जयपुर, कोलकाता आ मुंबई जईसन शहरन में काम करेला. उ लोग कपड़ा आ बैग बनावे वाला कारखाना में सिलाई-कढ़ाई के काम करेला, चाहे सड़क किनारे ढाबा में खाना पकावे आ हाथ बंटावे के. उ लोग जवन पईसा अपनी घरे भेजेला ओसे गांव में कुछ बदलाव जरूर आईल बा. कुछ दशक पहिले जहां गांव में खाली 3-4 गो हैण्ड पम्प रहत रहे, अब लगभग हर घर में हैंडपम्प बा. ज्यादातर माटी आ बांस से बनल पुरान मकान के जगह पर ईंटा आ सीमेंट के घर बन गईल बा. हालांकि हुस्न-आरा के घर निहर कई घरन में शौचालय अब्बो नईखे जबकि प्रधानमंत्री योजना के अंतर्गत 2022 ले पूरा देश के ‘खुले में शौच से मुक्त’ बनावे के रहे. इहां के गांवन में बिजली 2008 में पहुंचल जबकि पक्का सड़क के निर्माण 2016 में भईल.

फुलवरिया गांव के दोसर मुस्लिम महिला लोग निहर, 56 बरिस के हुस्न-आरा भी बचपन से खेतन पर मजदूरी करत अइली. उनकर माई, समेल 9 बरिस पहिले मर गयीली. उहो इहे काम करें. घर के माली हालत एतना पतला रहे कि हुस्न-आरा के पांचो बच्चन के स्कूल या मदरसा जाए के मौका ना मिलल. बर्री-फुलवरिया में साक्षरता दर खाली 38.81% बा (जनगणना 2011) आ महिला लोगन में त अउरी कम, खाली 35.09% बा.

हुस्न-आरा के पिता मोहम्मद जहूर रोज के आमदनी खातिर अब्बो दिहाड़ी करे के कोशिश करेलन. उनके उमिर 100 बरिस बा, उ बतावेली. बुढ़ापा के वजह से उ दिन भर खेत में कुदारी या हल ना चला पावेलन बाकिर खेत में बीज आ खाद अब्बो डालेलें आ फसल तैयार भईला के बाद ओके कटबो करेलन. “हम बटाई पर खेती करेनी,” उ बतावेलन. अब खेती के कवनो भरोसा नईखे रहि गईल आ ना एमे कवनो फायदा रहि गईल बा. धान या गेंहू के फसल कबो होला कबो ना होला, उ आगे बतावेलन. “खेती के पारम्परिक तरीका अब ख़तम हो रहल बा. लोग ट्रेक्टर के उपयोग करे लागल बा जेसे दिहाड़ी मजदूरन के काम एकदम घट गईल बा. जेके काम मिलियो जाला, उ कबो एक दिन में 300-350 रुपिया से अधिका ना कमा सकेला.”

फुलवरिया गांव के आसपास के खेत उपजाऊ त बा, बाकिर पानी के समस्या बा. गांव से लगभग एक किलोमीटर दूर पश्चिम में अधवारा नदी बहतिया बाकिर एमे खाली बरसाते में पानी मिलेला. साल के बाकी दिनन में एमे एतना पानी ना रहेला कि एसे खेत पटावल जा सके. पिछला तीन साल से एह इलाका में ढंग से बरखा नइखे भइल, एही से सूखा जइसन स्थिति बन गइल बा.

हुस्न-आरा के पांच गो बच्चा बाड़ें सन. सबसे बड़ बेटा मोहम्मद अली (32) अपनी माई के ही घर में अपनी मेहरारू शाहिदा खातून आ दू गो बच्चा संघे एगो अलग कमरा में रहेला. उ परिवार चलावे में माई के कवनो सहायता ना करेला. दूसरको बेटा कवनो काम ना करे. बड़की बेटी के बियाह हुस्न-आरा कुछ बरिस पहिले, बर्री-फुलवरिया से करीब 40 किलोमीटर दूर, नेपाल के शम्सी गांव में कर दिहले रहली. तिसरका बेटा आ 18 बरिस के एगो बेटी के बियाह बाकी बा. उहो लोग कबो-कबो बोआई आ कटाई के सीजन में दिहाड़ी पर खेतन में काम करेला.

हुस्न-आरा खातिर आपन परिवार चलावल मुश्किल बा आ घर खातिर राशन पानी जुटावे में उनके बहुत मेहनत करे के पड़ेला. परिवार के राशन कार्ड पर उ हर महीना 2 रुपिया प्रति किलो के हिसाब से 14 किलो चावल आ 3 रुपिया प्रति किलो के हिसाब 21 किलो गेहूं आ बाकी सामान ले आवेली. “आजकल खेती के काम ढेर नईखे मिलत,” उ कहेली. “हमार तबियत भी अब ठीक ना रहेला. परिवार बढ़ गईल बा बाकिर आमदनी नईखे बढ़ल. हमके अपनी पोता-पोतियन के भी खियावे के पड़ता. पता ना कब ले हम ई कुल कर पाईब.”

अपनी कम आमदनी के बढ़ावे खातिर हुस्न-आरा मुर्गी आ बकरी पाले लगली-जवन उनकी गांव के कई परिवारन के आमदनी के रास्ता हवे. अंडा से उ कुछ सौ रुपिया हर महीना कमा लेवेली या त अंडा परिवार के लोगन के भोजन में जाला. बकरी कुल हर दू-तीन साल में बच्चा देली सन. बच्चन के उ खिया-पिया के बड़ करेली फिर कवनो पशुअन के व्यापारी के बेच देली. बाकिर दूसरी लोगन के बकरियन के जवन दाम मिलेला उ उनके ना मिलेला. “जेकरी लगे पईसा बा उ अपनी बकरियन के बढ़िया चारा खियावेला. हम गरीब बानी त हम अपनी बकरियन एक खाली घास या पतई खिया पावेनी, एही से इ कमजोर बाड़ी सन...” उ कहेली.

बढ़िया चारा खईला प ई बच्चा चार महीना बाद 8-10 किलो के हो जालें सन. एके व्यापारियन के 4,000 रुपिया में बेचल जा सकेला. बाकिर हुस्न-आरा के बकरा कुल बड़ भईला के बादो 5 किलो से ढेर वजन के ना हो पावेलें सन. एसे उन्हनी के दाम चार महिना बाद खाली 2000 रुपिया ही मिल पावेला. अगर ए बकरन के उ अपनी लगे साल भर राखें, त आसपास के गांवन के पईसा वाला मुसलमानन से प्रति बकरा 10,000 रुपिया कमा सकेली. एकरा ईद-उल-अजहा या बकरईद में क़ुरबानी खातिर ओके कीनेला लोग.

हुस्न-आरा अपनी पांच गो बच्चन से उम्मीद लगा रखले रहली कि जब उ बड़ होइहें सन त परिवार के आमदनी में हाथ बंटइहें सन आ जीवन में खुशहाली आई. उ बड़ो हो गईल बाड़ें सन आ ओमे से ज्यादातर के आपनो बाल बच्चा हो गईल बा बाकिर हुस्न-आरा के जिनगी से खुसी अभी कोसों दूर बा.

अनुवाद: विमल चन्द्र पाण्डेय