یمنا میں اترنے والے انسان

نگم بودھ کا مصروف گھاٹ تضادات سے بھرا ہوا ہے۔ یمنا ندی میں اترنے والی اس کی سیڑھیوں پر لوگ مذہبی رسومات ادا کرتے ہیں، پجاری منتر پڑھتے ہیں، اور مرد مقدس ڈبکی کے لیے سرمئی پانی کو ہاتھوں سے ہٹاتے ہوئے آگے بڑھتے ہیں۔ سیاح کشتیوں میں سوار ہو کر موسم سرما کے پرندوں کی، ان کی ہجرت سے پہلے، تصویریں اتارتے ہوئے گزرتے ہیں۔ دور سے یہ منظر پر سکون نظر آتا ہے۔

اس کے بعد ندی کی سڑاندھ ناکوں سے ٹکراتی ہے۔

’’یہ پانی بہت گندا ہے۔ اس قدر گندا ہے کہ اگر کوئی شخص اس میں کوئی مچھلی چھوڑ بھی دے، تو وہ تیرتی ہوئی مر جائے گی،‘‘ دارالحکومت کے اس اہم گھاٹ کے ایک کشتی بان ابھینندن یادو کہتے ہیں۔

سال کے آٹھ مہینوں (مارچ سے اکتوبر) تک، ابھینندن کامن ویلتھ گیمز کمپلیکس میں سوئمنگ کوچ کے طور پر کام کرتے ہیں۔ جب سردیوں میں دہلی کے پول بند ہو جاتے ہیں، تو وہ کام کے لیے ندی کا رخ کرتے ہیں، اور لوگوں اور سامان کو یمنا پار کرواتے ہیں۔ دونوں ملازمتوں سے انہیں اوسطاً ۲۱ ہزار روپے ماہانہ کی کمائی ہو جاتی ہے۔

وہ اپنے کوچنگ کے کام کو ترجیح دیتے ہیں۔ ’’سوئمنگ کوچ کے کام میں عزت زیادہ ہے؛ بوٹ مین (کشتی بان) کا کوئی بھویشیہ (مستقبل) نہیں ہے،‘‘ سال ۲۰۲۴ میں پوسٹ گریجویٹ کورس مکمل کرنے والے ۲۷ سالہ ابھینندن کہتے ہیں۔

ابھینندن کی طرح دہلی میں یمنا پر کشتی بانوں کو ندی کی آلودگی میں اضافہ کی وجہ سے سخت نقصان پہنچا ہے۔ یہ ندی ۱۳۷۶ کلومیٹر کے اپنے سفر میں صرف ۲۲ کلومیٹر کا فاصلہ دہلی میں طے کرتی ہے، جو اس کی کل لمبائی کا محض ۶ء۱ فیصد ہے، مگر اس کی کل آلودگی کا تقریباً ۸۰ فیصد حصہ یہیں ڈالا جاتا ہے۔

چونکہ دارالحکومت میں بہت سے لوگوں کے پاس سیوریج کنکشن نہیں ہیں، اس لیے سیپٹک ٹینکوں اور دیگر ذرائع سے بغیر صاف کیا ہوا ٹنوں فضلہ اس ندی میں بہہ جاتا ہے جو کبھی زندگی سے لبریز ہوا کرتی تھی۔ پڑھیں: بڑا شہر، چھوٹے کسان، اور ایک مرتی ہوئی ندی

مرکزی آلودگی کنٹرول بورڈ (سی پی سی بی) کے مطابق، یہاں پر فیکل بیکٹیریا کی سطح محفوظ حد سے سو گنا سے بھی زیادہ ہے، جس نے دہلی میں زندگی کی علامت سمجھی جانے والی اس ندی کو پانی کے غیر محفوظ ذخیرہ میں تبدیل کر دیا ہے۔

لیکن یہ ندی اب بھی ایک بڑی کشش کی حیثیت رکھتی ہے اور روزانہ ہزاروں عقیدت مند یہاں پوجا کرنے آتے ہیں۔ ابھینندن کہتے ہیں، ’’لوگ یہاں پوجا کرنے آتے ہیں اور اپنے پیچھے بہت سا کچرا ندی کے کنارے چھوڑ جاتے ہیں۔‘‘ عقیدت مند گھریلو فضلہ، کپڑے، اور دیوتاؤں کے کپڑے براہ راست اسی پانی میں پھینک دیتے ہیں۔

’’دیو دیوالی کے موقع پر لاکھوں دیے (چراغ) روشن کیے جاتے ہیں۔ یہ منظر بہت خوبصورت ہوتا ہے،‘‘ ابھینندن کہتے ہیں۔ ’’لیکن جب دیوں کی لو بجھ جاتی ہیں، تو استعمال شدہ دیے ہر جگہ بکھرے پڑے ہوتے ہیں،‘‘ وہ مزید کہتے ہیں۔

پڑوسی ریاست اتر پردیش سے تعلق رکھنے والے ۴۶ سالہ غوطہ خور بنارسی گزشتہ ۳۵ سال سے روزانہ پانی میں تیرتے ہیں۔ وہ یوپی کے ضلع بلیا سے تعلق رکھنے والے ایک غوطہ خور ہیں، جو آخری رسومات کی ادائیگی کے دوران ندی میں پھینکے گئے سکے، دھات کے ٹکڑے اور نذرانے اکٹھا کرتے ہیں۔ ’’ماں یمنا جو کچھ بھی دیتی ہے… دس روپے، پچاس روپے… اسی پر ہمارا گزارہ ہو جاتا ہے،‘‘ وہ کہتے ہیں۔

بنارسی جب پانی میں غوطہ لگاتے ہیں تو ان کی آنکھوں میں چبھن ہوتی ہے اور ان کی جلد پر خارش ہو جاتی ہے۔ نیشنل گرین ٹریبونل نے ۲۰۱۸ میں ندی کے اس حصہ کو ’’سیور لائن‘‘ قرار دیا تھا۔

بنارسی کا کام اکثر بچاؤ کے عمل میں تبدیل ہو جاتا ہے۔ ’’اگر کوئی ڈوب رہا ہوتا ہے تو ہم اسے بچاتے ہیں۔ کچھ لوگ یہاں خودکشی کرنے آتے ہیں، ہم انہیں بھی بچاتے ہیں۔ ہم یہ خدمت مفت فراہم کرتے ہیں،‘‘ وہ کہتے ہیں۔

کالندی کنج گھاٹ کی طرف مزید جنوب میں ندی چوڑی ہوتی جاتی ہے اور ہوا کیمیائی بو سے بھر جاتی ہے۔ پانی کی سطح پر گاڑھا سفید جھاگ تیر رہا ہوتا ہے اور ہوا حلق کو جلا دیتی ہے۔

یہاں ۴۱ سالہ فیروز ملک ایک الگ طرح کی خدمت انجام دیتے ہیں۔ وہ یمنا میں راکھ کو بہاتے ہیں (جو ہندوؤں کے عقیدہ کے مطابق ادا کی جانے والی ایک رسم ہے)۔ وہ یہ کام اس وقت بھی کرتے ہیں جب پانی فضلہ سے بھرا ہوتا ہے۔ ’’اس میں سانس لینا مشکل ہے، اگر کوئی [زیادہ دیر تک سطح کے نیچے] پھنس جائے تو وہ زندہ نہیں رہ پائے گا،‘‘ وہ کہتے ہیں۔ اس کے باوجود فیروز کے لیے اس پانی میں مکمل طور پر غوطہ لگانا روز کا معمول ہے۔

دہلی میں یمنا محض ٹکڑوں میں زندہ ہے، گھٹن کی حالت میں۔ بالکل ویسے ہی جیسے اس پر انحصار کرنے والوں کے کم ہوتے روزگار، جیسے بنارسی اور فیروز جیسے غوطہ خور جو اس خطرناک کام سے ملنے والی روزانہ کی اجرت پر گزارہ کرتے ہیں۔

ندی خاموشی سے تکلیف اٹھا رہی ہے۔ اسی طرح اس پر انحصار کرنے والے لوگ بھی اذیت برداشت کر رہے ہیں۔ ڈوبتے ہوئے اجنبیوں کو بچانے اور مردہ لاشوں کو نکالنے کے لیےغوطہ خوروں کو کیمیکل سے لدے زہریلے پانی میں اترنا پڑتا ہے۔ ابھینندن جیسے کشتی بان روزانہ تضادات کا مشاہدہ کرتے ہیں: وہ عقیدت مند جو ندی کی پوجا کرتے ہیں مگر اسے آلودہ چھوڑ جاتے ہیں۔ یہ یمنا میں اترنے والے انسان ہیں، جو ندی کے کنارے تباہی، صبر اور استقامت دونوں کے گواہ ہیں، ایک ایسی ندی کے محافظ ہیں جس کے ساتھ طویل عرصہ سے زیادتی کی جاتی رہی ہے۔

ترجمہ نگار: شفیق عالم