यमुना के आसरित बासिंदा

भीड़-भड़क्का वाले निगमबोध घाट के स्थिति एके बखत मं अलग-अलग बात ला उजागर करत हवय. यमुना नदी कोती जवेइय्या येकर पचरी मं, परिवार मन पूजा-पाठ करथें, पुजेरी मंत्र पढ़थे, अऊ लोगन मन असनान करे बर करिया पानी मं उतरथें. सैलानी मन डोंगा मं बइठ के जावत, जाय के पहिली जड़कल्ला के चिरई-चिरगुन मन के फोटो खिंचथें. दूरिहा ले ये जगा ह शांत लागथे.

फिर नदिया बस्साय लागथे.

रजधानी के ये माई घाट मं एक झिन डोंगावाले अभिनंदन यादव कहिथे, “ये पानी भारी गंदा हवय. गर कोनो ये मं मछरी छोड़ही, त वो ह मरके उफले लागही.”

साल के आठ महीना (मार्च ले अक्टूबर) अभिनंदन कॉमनवेल्थ गेम्स कॉम्प्लेक्स मं स्विमिंग कोच (तैराकी सीखाय) के काम करथे. जब जड़कल्ला मं दिल्ली के पूल बंद हो जाथे, त वो ह काम करे बर नदी कोती आ जाथे, डोंगा मं यमुना पार कराय अऊ लोगन मन के जिनिस-पतर ला दोहारथे. ये दूनों काम ले ओकर महिना मं करीबन 21,000 रूपिया बन जाथे.

वो ह अपन कोचिंग के काम ला जियादा पसंद करथे. “स्विमिंग कोच के काम में इज़्ज़त ज़्यादा है, बोटमैन का कोई भविष्य नहीं है,” 27 बछर के ये सियान कहिथे, जेन ह साल 2024 मं एमए करे हवय.

दिल्ली मं यमुना नदी के भरोसे यादव जइसने लोगन मन के डोंगा ले होवेइय्या कमई उपर घलो असर परे हवय. ये नदी 1,376 किमी बोहाथे जेन मं 7 कोस ले जियादा (22 किमी) दिल्ली ले होके बोहाथे – जेन ह येकर इहाँ बोहाय के सिरिफ 1.6 फीसदी आय – ओकर बाद घलो येकर करीबन 80 फीसदी गंदगी इहींचे डारे जाथे.

रजधानी मं बनेच अकन लोगन मन करा सीवर कनेक्शन नइ होय सेती, सेप्टिक टैंक अऊ दीगर तरीका ले बिन साफ करे कचरा वो नदी मं बोहाथे जेन ह कभू साफ नदी रहिस. पढ़व: बड़े शहर, छोटे किसान अऊ मरत नदी

सेंट्रल पॉल्यूशन कंट्रोल बोर्ड (सीपीसीबी) के मुताबिक, इहाँ फेकल बैक्टीरिया के लेवल, सेफ लिमिट ले सौ गुना जियादा हवय, जेकर ले दिल्ली के जीवनरेखा (यमुना नदी) ला अइसने बदल दे हवय के वो ह बउरे लइक नइ रहिगे हवय.

फेर ये नदिया अभू घलो लोगन मन ला अपन डहर खिंच लेथे अऊ हरेक दिन हजारों भगत धन तिरिथ करेइय्या मन इहाँ पूजा-पाठ करे आथें. यादव कहिथे, लोगन मन इहाँ पूजा-पाठ करे आथें अऊ नदी के घाट मं बनेच अकन कचरा छोड़ जाथें.” वो मन घर के कचरा, कपड़ा अऊ देवी-देवता के कपड़ा सीधा पानी मं फेंक देथें.

अभिनंदन कहिथे, ”देव दिवाली (देवारी) बखत लाखों दीया जराय जाथे. ये ह भारी सुग्घर लागथे.” वो ह आगू कहिथे, “फेर जब वो ह बूथा जाथे त जरे दीया हर जगा बगरे परे रहिथे.”

परोस के उत्तर प्रदेश के रहेइय्या 46 बछर के बनारसी गोताखोर आय, जेन ह बीते 35 बछर ले रोज पानी मं उतरथे. यूपी के बलिया जिला के मूल बासिंदा ये गोताखोर, अस्थि विसर्जन बखत फेंके गे सिक्का, धातु के टुकड़ा अऊ दीगर जिनिस खोज निकारत रहिथे.

वो ह कहिथे, “ माँ जमुना जेन घला कुछु देथे ... दस रूपिया, पचास रूपिया... हमन उहिच ले गुजारा करथन.”

जब बनारसी पानी मं डुबकी लगाथे त ओकर आंखी मं जलन होथे अऊ ओकर चमड़ी मं चकता पर जाथे. नेशनल ग्रीन ट्रिब्यूनल ह साल 2018 मं नदिया के ये हिस्सा ला “सीवर लाइन” घोसित करे रहिस.

अक्सर बनारसी के काम लोगन मन ला बचाय आय. “गर कोनो बूड़त रहिथे, त हमन वोला बचाथन. कुछेक मन मरे बर आथें, हमन वो मन ला बचाथन. हमन ये सब्बो काम फोकट मं करथन,” वो ह कहिथे.

अऊ दक्खिन मं कालिंदी कुंज घाट मं, नदिया चाकर हो जाथे अऊ हवा केमिकल वाले बास ले बस्सावत रहिथे. येकर पानी उपर गाढ़ा सफेद झाग उफलत रहिथे अऊ येकर हवा ले गला मं जलन होथे.

इहां, 41 बछर के फिरोज मलिक एक अलग किसम के सेवा करथे. ये यमुना नदी मं अस्थि विसर्जन करथें [ हिंदू मन के दाह संस्कार के बाद के रित-रिवाज), भलेच पानी कचरा ले भरे होय, “ मंय येकर भीतरी साँस लगे नइ सकंव, गर कोनो [पानी भीतरी जियादा बखत तक] फंस जाही, त वो ह जिंदा नइ रइही,” वो ह कहिथे. ओकर बाद घलो, फिरोज बर वो पानी मं बूड़े रोज के बूता आय.

दिल्ली मं यमुना मूल रूप मं नइ सिरिफ टुकड़ा-टुकड़ा मं बांचे हवय, गंदा अऊ संकेल्ला होगे हवय, ठीक वइसनेच, जेन मन के रोजी-रोटी येकर भरोसे हवंय, जइसने बनारसी अऊ फिरोज जइसने गोताखोर जेन मन करे ये खतरा भरे काम छोड़ कोनो रद्दा नइ ये.

नदी कलेचुप अपन दुख झेलत हवय. अऊ वो लोगन मन घला जेन मन येकर भरोसे हवंय. गोताखोर मन ला बूड़त अनजान लोगन मन ला बचाय अऊ लाश निकारे बर केमिकल वाले पानी मं बूड़े ला परथे. अभिनंदन जइसने डोंगावाले रोज के ये हालत ला देखथें: भगत मन धन तिरिथ करेइय्या जेन मन नदी के पूजा करथें, वोला अऊ घलो गंदा कर देथें. वो मन यमुना के वो बासिंदा आंय, जउन मन नदिया के होवत बिनास अऊ ओकर झेले के ताकत, दूनों के गवाह आंय, वो मन वो अइसने नदिया के रखवार आंय जेन ह लंबा बखत ले गंदगी के मार झेलत हवय.

अनुवाद: निर्मल कुमार साहू