जमुना माई के असल सपूत

दिन भर चहल-पहल से भरल निगमबोध घाट अपना में बहुते उलट-फेर समवले बा. जमुना नदी में उतरे वाला सीढ़ी पर कहूं कवनो परिवार पूजा करता, कहूं पंडित मंत्र पढ़ता, त हूं कवनो आदमी एतना गंदा पानी में पवितर स्नान खातिर उतरता. नाव पर सैलानी लोग जाड़ा में प्रवास करे वाला चिरई सब के फोटो निकालता. दूर से देखीं, त इहंवा एगो ठहराव नजर आई.

आउर उहे घरिया नदी बास मारे लागी.

“पानी बहुते गंदा बा. एकरा में मछरी छोर देवल जाव, त ऊ मर जाई, आ ऊपर तइरे लागी,” अभिनंदन यादव कहलन. ऊ देस के राजधानी दिल्ली के एह प्रसिद्ध घाट पर खेवइया (नाव खेवे वाला) बाड़न.

साल में आठ महीना (मार्च से अक्टूबर) अभिनंदन कॉमनवेल्थ गेम्स कॉम्पलेक्स में तैराकी सिखावेलन. जाड़ा में जब दिल्ली के पुल बंद हो जाला, त ऊ जमुना नदी के सहारे लोग आ सामान के नाव से पार करावेलन. दुनो काम से उनका महीना के कोई 21,000 रुपइया के कमाई हो जाला.

बाकिर उनका आपन कोचिंग के काम जादे नीमन लागेला. “स्वीमिंग कोच के काम में आदर जादे बा, बोटमैन के कवनो भविष्य नइखे,” सन् 2024 में आपन पोस्ट ग्रेजुएशन पूरा करे वाला सत्ताइस बरिस के ई गोताखोर कहेलन.

जमुना नदी में नाव चलाके रोजी-रोटी कमाए वाला यादव जइसन लोग के अब मुस्किल में बा. काहेकि नदी बहुते गंदा भइल जा रहल बा. कुल 1,376 किमी लमहर नदी के 22 किमी हिस्सा दिल्ली से होके जाला. माने एकर कुल लंबाई के त मात्र 1.6 फीसदी बा बाकिर ई अपना में गिरावल जाए वाला गंदगी के 80 फीसदी हिस्सा झेलेला.

देस के राजधानी में अइसन ढेर घर बा जहंवा नाली-सीवर नइखे पहुंचल. कबो जियत नदी जमुना में ओह लोग के सेप्टिक टंकी के गंदा आउर दोसर मैला, बिना छनइले गिर रहल बा. पढ़ीं: बड़का सहर के छोट खेतिहर आ एगो मुअत नदी

केंद्रीय प्रदूषण नियंत्रण बोर्ड (सीपीसीबी) के हिसाब से जमुना के गंदा पानी में पैदा भइल बैक्टीरिया सुरक्षित सीमा से सौ गुना से भी जादे बा. अब त दिल्ली के जीवनरेखा कहलावे वाला नदी पिए लायक नइखे रह गइल.

बाकिर अबो लोग दूर दूर से इहंवा आवेला, हजारन भक्त लोग आके पूजा-पाठ करेला. यादव के कहनाम बा, “लोग इहंवा पूजा के फूल-फल आ चढ़ावे के सामान घाटे पर कचरा जइसन छोड़ के चल जाला.” भक्त लोग घर के बेकार सामान, कपड़ा आ भगवान के पहिरावल वस्त्र, सब इहे पानी में डाल देवेला.

अभिनंदन कहलन, “देव दीवाली पर इहंवा लाखन दिया सब जगमगाएला. देखे में परम आनंद त आई. बाकिर बाती बुझते दिया सब चारो ओरी छितराएल पड़ल रहेला.”

पड़ोस के उत्तर-प्रदेस से आइल 46 बरिस के बनारसी, गोताखोर बाड़न. ऊ पछिला 35 बरिस से नदी में गोता लगावत आवत ताड़न. यूपी के बलिया जिला के रहे वाला एह गोताखोर के पानी में भीतरी दाह-संस्कार घरिया पानी में चढ़ावल सिक्का, लोहा के टुकड़ा आ दोसर चढ़ावा सब मिलेला. ऊ कहेलन, “देवी मइया जमुना जवन दे देवेली, दस, पचास रुपइया... ओही से गुजारा चल जाला.”

जमुना के गंदा पानी में गोता लगावे चलते बनारसी के आंख जरेला, देह पर फोड़ा-फुंसी निकल आवेला. सन् 2018 में नेशनल ग्रीन ट्रिब्यूनल जमुना के एह हिस्सा के ‘सीवर लाइन’ घोषित कइले रहे.

गोताखोर बनारसी अक्सरहा आपन काम छोड़ के लोग के जान बचावे में लगे के पड़ेला. ऊ बतइलन, “केहू डूबता, त हमनी ओकरा बचाइला. केहू इहंवा आपन जान देवे आवेला, त हमनी ओकरो बचाइला. ई सब काम खातिर हमनी कवनो पइसा ना लीहीं.”

दक्खिन में कालिंदी कुंज घाट पर नदी चउड़ा हो जाला, हवा में दवाई के गंध आवे लागेला. नदी ऊपर मोट मोट उज्जर फेन तैरेला आ सांस लेवे में गला जरे लागेला.

इहंवा 41 बरिस के फिरोज मलिक एगो दोसर तरह के सेवा कर रहल बाड़न. ऊ पहिलहीं से भयानक रूप से गंदा भइल जमुना में राख बहा रहल बाड़न (हिंदू धरम के रीत के हिसाब से). ऊ कहेलन, “भीतरी दम घुटे लागेला. केहू फंसल (पानी के नीचे जादे देर ले रह गइल), त बची ना.” एतना सब के बादो फिरोज इहे पानी में रोज-रोज उतरेलन. ई उनकर रोज के काम बा.

जमुना नदी घुट रहल बाड़ी, अब बस एकर कुछे हिस्सा बचल बा. नदी पर निर्भर लोग के रोजी-रोटी खतम हो रहल बा. रोज कमाए खातिर अइसन खतरा वाला काम बनारसी आ फिरोज जइसन गोताखोर लोग करेला. ओह लोग के जिनगी भी मझधार में फंसल बा.

नदी आ एकरा आसरे रहे वाला लोग, दुनो चुपचाप सब दुख सहत बा. गोताखोर लोग डूबत अनजान लोग के बचावे आ मरल देह निकाले खातिर जहरीला रसायन वाला पानी में गोता लगावल मजबूर बा. अभिनंदन जइसन खेवइया लोग रोज एक-दोसरा से विपरीत चीज देखेला. एक ओरी त लोग भक्ति भाव से जमुना के पूजेला आउर उहे लोग नदी के गंदा छोड़ के चल जाला. गोताखोर लोग जमुना के असल सपूत बा, तबाही आ धीरज के गवाह, लमहर समय से जूझ रहल नदी के रखवाला.

अनुवाद: स्वर्ण कांता